CUID I.

Reamhraiteach agus Ginearalta

1. —(1) Féadfar an tAcht Leasa Shóisialaigh, 1948 , a ghairm den Acht seo.

(2) Féadfar Achta na bPinsean Sean-Aoise, 1908 go 1948, a ghairm d'Achta na bPinsean Sean-Aoise, 1908 go 1938, agus de Chuid II den Acht seo le chéile.

(3) Féadfar na hAchta um Arachas Sláinte Náisiúnta, 1911 go 1948, a ghairm de na hAchta um Arachas Sláinte Náisiúnta, 1911 go 1947, agus de Chuid III den Acht seo le chéile.

(4) Féadfar na hAchta um Arachas Dífhostaíochta, 1920 go 1948, a ghairm de na hAchta um Arachas Dífhostaíochta, 1920 go 1946, agus de Chuid IV den Acht seo le chéile.

(5) Féadfar na hAchta um Chúnamh Dífhostaíochta, 1933 go 1948, a ghairm de na hAchta um Chúnamh Dífhostaíochta, 1933 go 1940, agus de Chuid V den Acht seo le chéile.

(6) Féadfar na h Achta um Pinsin do Bhaintreacha agus do Dhílleachtaithe, 1935 go 1948, a ghairm de na h Achta um Pinsin do Bhaintreacha agus do Dhílleachtaithe, 1935 go 1947, agus de Chuid VI den Acht seo le chéile.

2. —San Acht seo—

ciallaíonn an abairt “an tAire” an tAire Leasa Shóisialaigh;

ciallaíonn an abairt “Ordú 1947” an tOrdú um Scéimeanna Leasa Shóisialaigh (Forlíontais Airgid), 1947 (R. &O. R., Uimh. 76 de 1947), arna leasú leis an Ordú i dtaobh an Orduithe um Scéimeanna Leasa Shóisialaigh (Forlíontais airgid), 1947 (An Chéad Leasú), 1947 (R. &O. R., Uimh. 307 de 1947), agus leis an Ordú i dtaobh an Orduithe um Scéimeanna Leasa Shóisialaigh (Forlíontais Airgid), 1947 (An Dara Leasú), 1947 (R. & O. R., Uimh. 366 de 1947).

3. —(1) Déantar leis seo na hachtacháin a luaitear i gcolún (2) d'aon Chuid den Chéad Sceideal a ghabhas leis an Acht seo d'athghairm a mhéid a sonraítear i gcolún (3) den Chuid sin agus amhail ar na dátaí agus ó na dátaí faoi seach a sonraítear i gcolún (4) den Chuid sin.

(2) Cúlghairmtear leis seo na hOrduithe a luaitear i gcolún (2) den Dara Sceideal a ghabhas leis an Acht seo.

4. —Ní déanfar aon íocaíocht faoi aon fhoráil d'Ordú 1947 dá luaitear i gcolún (2) den Tríú Sceideal a ghabhas leis an Acht seo ag aon uimhir thagartha i leith aon tseachtaine nó lae is déanaí ná an tseachtain nó an lá (pé acu é) a sonraítear i gcolún (3) den Sceideal sin ag an uimhir thagartha sin.