Uimhir 5 de 1985

AN tACHT LEASA SHÓISIALAIGH, 1985

RIAR NA nALT

SCEIDEAL A

SCEIDEAL B

SCEIDEAL C

Uimhir 5 de 1985

AN tACHT LEASA SHÓISIALAIGH, 1985

[An tiontú oifigiúil]

ACHT DO LEASÚ AGUS DO LEATHNÚ NA nACHTANNA LEASA SHÓISIALAIGH, 1981 GO 1984. [28 Márta, 1985]

ACHTAÍTEAR AG AN OIREACHTAS MAR A LEANAS:

1. —San Acht seo—

ciallaíonn “Acht 1984” an tAcht Leasa Shóisialaigh, 1984 ;

ciallaíonn “an Príomh-Acht” an tAcht Leasa Shóisialaigh (Comhdhlúthú), 1981 .

2. —(1) Leasaítear leis seo an Príomh-Acht trí na Codanna atá leagtha amach i Sceideal A a ghabhann leis an Acht seo a chur in ionad Chodanna I go V den Dara Sceideal (a cuireadh isteach le hAcht 1984).

(2) Tiocfaidh an t-alt seo i ngníomh—

(a) a mhéid a bhaineann sé le sochar dífhostaíochta, an 4ú lá d'Iúil, 1985,

(b) a mhéid a bhaineann sé le sochar míchumais, le liúntas máithreachais, le sochar díobhála, le haisce mhíthreorach agus le pinsean míthreorach, an 8ú lá d'Iúil, 1985,

(c) a mhéid a bhaineann sé le sochar banchéile thréigthe, le pinsean easláine agus le pinsean scoir, an 11ú lá d'Iúil, 1985, agus

(d) a mhéid a bhaineann sé le sochar báis faoi alt 50, 51 nó 52 den Phríomh-Acht, le pinsean seanaoise (ranníocach), le pinsean baintrí (ranníocach) agus le liúntas dílleachta (ranníocach), an 12ú lá d'Iúil, 1985.

3. —(1) Leasaítear leis seo an Príomh-Acht trí na Codanna atá leagtha amach i Sceideal B a ghabhann leis an Acht seo a chur in ionad Chodanna I agus III den Cheathrú Sceideal (a cuireadh isteach le hAcht 1984).

(2) Tiocfaidh an t-alt seo i ngníomh—

(a) a mhéid a bhaineann sé le cúnamh dífhostaíochta, an 3ú lá d'Iúil, 1985,

(b) a mhéid a bhaineann sé le liúntas banchéile thréigthe, le liúntas banchéile príosúnaigh, le liúntas cúnaimh shóisialaigh agus le liúntas do bhean shingil, an 11ú lá d'Iúil, 1985,

(c) a mhéid a bhaineann sé le pinsean seanaoise, le pinsean dall, le pinsean baintrí (neamhranníocach) agus le pinsean dílleachta (neamhranníocach), an 12ú lá d'Iúil, 1985, agus

(d) a mhéid a bhaineann sé le liúntas leasa forlíontach, an 8ú lá d'Iúil, 1985.

4. —(1) Leasaítear leis seo alt 232B (a bhaineann le teideal chun forlíonadh ar ioncam teaghlaigh) den Phríomh-Acht (a cuireadh isteach le hAcht 1984) trí “£100” a chur in ionad “£95” gach áit a bhfuil sé agus trí “£18” a chur in ionad “£15”.

(2) Leasaítear leis seo alt 232C (a bhaineann leis an ráta seachtainiúil d'fhorlíonadh ar ioncam teaghlaigh) den Phríomh-Acht (a cuireadh isteach le hAcht 1984) trí “£2.50” a chur i bhfo-alt (2) (b) in ionad “£1.75”.

(3) Baineann an t-alt seo le haon éileamh ar fhorlíonadh ar ioncam teaghlaigh a gheofar an 11ú lá d'Iúil, 1985, nó dá éis.

5. —(1) Leasaítear leis seo alt 73 den Phríomh-Acht trí “£49” a chur in ionad “£43” (a cuireadh isteach le hAcht 1984).

(2) Beidh éifeacht ag an alt seo i ndáil le haon tréimhse bhearnaithe fostaíochta dar tosach an 1ú lá d'Aibreán, 1985 nó dá éis.

6. —(1) Leasaítear leis seo alt 10 (1) den Phríomh-Acht tríd an mír seo a leanas a chur in ionad mhír (c) (a cuireadh isteach leis an Acht Leasa Shóisialaigh, 1983 ):

“(c) I gcás ina raibh, i mbliain ranníoca áirithe, suim £13,800 de thuilleamh ináirithe ag ranníocóir fostaithe agus gur íocadh ranníocaí faoi mhír (b) i leith an tuillimh ináirithe sin, ní bheidh aon ranníoc eile den sórt sin iníoctha i leith aon tuillimh ináirithe de chuid an ranníocóra fhostaithe sin an bhliain ranníoca sin.”.

(2) Tiocfaidh an t-alt seo i ngníomh an 6ú lá d'Aibreán, 1985.

7. —(1) Leasaítear leis seo Cuid I den Chéad Sceideal a ghabhann leis an bPríomh-Acht tríd an mír seo a leanas a chur isteach i ndiaidh mhír 12:

“13. Fostaíocht mar chathaoirleach, leaschathaoirleach nó gnáthchomhalta den Chúirt Oibreachais arna bunú faoin Acht Caidrimh Thionscail, 1946 .”.

(2) Tiocfaidh an t-alt seo i ngníomh cibé lá a cheapfaidh an tAire le hordú.

8. —Leasaítear leis seo alt 7 (1) den Phríomh-Acht trí “12 agus 13 (arna chur isteach leis an Acht Leasa Shóisialaigh, 1985 )” a chur in ionad “agus 12” i mír (a).

9. —Leasaítear leis seo alt 38 (3) den Phríomh-Acht tríd an mír seo a leanas a chur isteach i ndiaidh mhír (f):

“(g) fostaíocht a shonraítear i mír 13 (a cuireadh isteach leis an Acht Leasa Shóisialaigh, 1985 ) de Chuid I den Chéad Sceideal.”.

10. —(1) Leasaítear leis seo Cuid II den Chéad Sceideal a ghabhann leis an bPríomh-Acht trí na míreanna seo a leanas a chur in ionad mhíreanna 8 agus 9:

“8. Fostaíocht, seachas fostaíocht sna Fórsaí Cosanta, mar liachleachtóir cláraithe nó lia-chleachtóir arna chlárú go sealadach.

9. Fostaíocht, seachas fostaíocht sna Fórsaí Cosanta, mar fhiaclóir cláraithe.”.

(2) Tiocfaidh an t-alt seo i ngníomh an 6ú lá d'Aibreán, 1985.

11. —Leasaítear leis seo alt 135 den Phríomh-Acht tríd an bhfo-alt seo a leanas a chur isteach i ndiaidh fho-alt (2):

“(2A) Chun críocha na Caibidle seo, maidir le haon tréimhse nach faide ná bliain—

(a) is tréimhse fostaíochta faoi scéim arna riaradh ag an Roinn Saothair agus dá ngairtear an Scéim Fostaíochta Sóisialta, nó

(b) is tréimhse glacadh páirte i scéim arna riaradh ag an Roinn Saothair agus dá ngairtear an Scéim Liúntas Fiontair, nó

(c) is tréimhse glacadh páirte i scéim arna riaradh ag an Roinn Saothair agus dá ngairtear an Scéim Sealaíochta, nó

(d) is tréimhse freastail ar chúrsa oiliúna arna chur ar fáil nó arna cheadú ag an gComhairle Oiliúna, nó

(e) is tréimhse fostaíochta faoi scéim arna riaradh ag an Roinn Saothair agus dá ngairtear Comhobair,

déanfar neamhaird uirthi nuair a bheifear, de bhun fho-alt (2) den alt seo, ag áireamh aon dá thréimhse leanúnacha dífhostaíochta nach bhfuil tréimhse is mó ná 20 seachtain eatarthu mar thréimhse leanúnach dífhostaíochta amháin.”.

12. —Maidir le duine a chiontófar i gcion dá bhforáiltear fíneáil in aon alt den Phríomh-Acht a shonraítear i gcolún (2) de Sceideal C a ghabhann leis an Acht seo—

(a) i gcas é a chiontú go hachomair, in ionad na fíneála dá bhforáiltear in aon alt den sórt sin agus a shonraítear i gcolún (3) den Sceideal sin, dlífear an fhíneáil a shonraítear i gcolún (4) den Sceideal sin ag an uimhir thagartha sin a chur air, nó

(b) i gcas é a chiontú ar díotáil, in ionad na fíneála dá bhforáiltear in aon alt den sórt sin agus a shonraítear i gcolún (5) den Sceideal sin, dlífear an fhíneáil a shonraítear i gcolún (6) den Sceideal sin ag an uimhir thagartha sin a chur air,

agus forléireofar aon alt den sórt sin agus beidh éifeacht leis dá réir.

13. —Leasaítear leis seo an Príomh-Acht tríd an alt seo a leanas a chur isteach i ndiaidh alt 143:

14. —Leasaítear leis seo alt 56 den Phríomh-Acht tríd an bhfo-alt seo a leanas a chur isteach i ndiaidh fho-alt (3):

“(3A) Ní bheidh feidhm ag forálacha fho-ailt (1), (2) agus (3) den alt seo maidir le cibé aicme nó aicmí d'oibrithe deonacha a bheidh forordaithe.”.

15. —(1) Féadfar an tAcht Leasa Shóisialaigh, 1985 , a ghairm den Acht seo.

(2) Féadfar na hAchtanna Leasa Shóisialaigh, 1981 go 1984, agus an tAcht seo a fhorléiriú le chéile mar aon ní amháin agus féadfar na hAchtanna Leasa Shóisialaigh, 1981 go 1985, a ghairm díobh le chéile.