CUID 5

Pionóis agus Forálacha Ilghnéitheacha

16 .— (1) Féadfaidh an tAire, trí fhógra i scríbhinn, a cheangal ar aon duine a bhfuil cúis aige nó aici chun a chreidiúint go bhfuil faisnéis nó doiciméid ag an duine sin atá ábhartha—

(a) maidir le forfheidhmiú Chuid 2 nó 3 den Acht seo, nó

(b) maidir leis an Stát do chomhlíonadh oibleagáide faoi Airteagal 7 nó 8 den Choinbhinsiún Cnuas-Mhuinisean nó Airteagal 7 nó 8 den Choinbhinsiún um Mianaigh Fhrithphearsanra a Chosc,

an fhaisnéis nó na doiciméid a sholáthar don Aire laistigh de cibé tréimhse a shonrófar san fhógra.

(2) (a) Déanfar fógra faoi fho-alt (1) a dhíriú chuig an duine lena mbaineann faoina ainm nó faoina hainm, agus féadfar é a sheirbheáil ar an duine nó a thabhairt dó nó di ar cheann amháin de na slite seo a leanas:

(i) trína sheachadadh ar an duine;

(ii) trína fhágáil ag an seoladh ag a bhfuil gnáthchónaí ar an duine nó, i gcás go mbeidh seoladh le haghaidh seirbheála tugtha, ag an seoladh sin; nó

(iii) trína chur leis an bpost i litir chláraithe réamhíoctha chuig an seoladh ag a bhfuil gnáthchónaí ar an duine nó, i gcás go mbeidh seoladh le haghaidh seirbheála tugtha, chuig an seoladh sin.

(b) Chun críocha an fho-ailt seo, measfar gnáthchónaí a bheith ar chuideachta de réir bhrí Achtanna na gCuideachtaí ag a hoifig chláraithe, agus measfar gnáthchónaí a bheith ar gach comhlacht corpraithe eile agus ar gach comhlacht neamhchorpraithe ag a phríomhoifig nó ag a áit ghnó.

(3) Aon duine—

(a) a mhainníonn déanamh de réir ceanglais faoi fho-alt (1), nó

(b) mar fhreagra ar an gceanglas sin, a sholáthraíonn go feasach nó go meargánta faisnéis nó doiciméid atá bréagach nó míthreorach i bponc ábhartha don Aire,

beidh sé nó sí ciontach i gcion agus dlífear—

(i) ar é nó í a chiontú go hachomair, fíneáil nach mó ná €5,000 nó príosúnacht ar feadh téarma nach faide ná 6 mhí, nó iad araon, a chur air nó uirthi, nó

(ii) ar é nó í a chiontú ar díotáil, fíneáil nach mó ná €50,000 nó príosúnacht ar feadh téarma nach faide ná 2 bhliain, nó iad araon, a chur air nó uirthi.

17 .— Aon duine atá ciontach i gcion faoi alt 6 nó 9 den Acht seo dlífear—

(a) ar é nó í a chiontú go hachomair, fíneáil nach mó €5,000 nó príosúnacht ar feadh téarma nach faide ná 12 mhí, nó iad araon, a chur air nó uirthi, nó

(b) ar é nó í a chiontú ar díotáil, fíneáil nach mó ná €1,000,000 nó príosúnacht ar feadh téarma nach faide ná 10 mbliana, nó iad araon, a chur air nó uirthi.

18 .— (1) I gcás go ndéanann comhlacht corpraithe cion faoin Acht seo agus go gcruthaítear go ndearnadh é le toiliú nó le cúlcheadú, nó gurbh inchurtha é i leith aon fhaillí ar thaobh, aon duine ba stiúrthóir, bainisteoir, rúnaí nó oifigeach eile den tsamhail sin de chuid an chomhlachta chorpraithe é nó í nuair a rinneadh an cion, nó duine a d’airbheartaigh a bheith ag gníomhú in aon cháil den sórt sin, beidh an duine sin, chomh maith leis an gcomhlacht corpraithe, ciontach i gcion agus dlífear imeachtaí a thionscnamh ina choinne nó ina coinne agus é nó í a phionósú amhail is dá mbeadh sé nó sí ciontach sa chion a rinne an comhlacht corpraithe.

(2) I gcás gurb iad comhaltaí comhlachta chorpraithe a bhainistíonn gnóthaí comhlachta chorpraithe, tá éifeacht le fo-alt (1) amhail is dá bhfolódh “stiúrthóir” comhalta den chomhlacht corpraithe.

19 .— (1) I gcás go gciontaítear duine i gcion faoi alt 6 nó 9, aon ní a úsáideadh chun an cion a dhéanamh, nó i dtaca leis an gcion a dhéanamh, forghéillfear don Stát é agus, más cnuasmhuinisean, buaimín pléascach nó mianach frithphearsanra an ní, déanfar é a sheachadadh ar Óglaigh na hÉireann lena scriosadh.

(2) I gcás go bhfuil cnuasmhuinisean, buaimín pléascach nó mianach frithphearsanra le seachadadh ar Óglaigh na hÉireann lena scriosadh faoi fho-alt (1), déanfaidh an chúirt, mura deimhin léi go bhfuil cúiseanna speisialta substaintiúla ann gan déanamh amhlaidh, a ordú don duine ciontaithe na costais agus na caiteachais a íoc, arna dtomhas ag an gcúirt, a thabhóidh Óglaigh na hÉireann i ndáil leis an scriosadh sin a shocrú.

(3) Maidir le hordú i leith costas agus caiteachas faoi fho-alt (2), is ordú é i dteannta aon fhíneála nó pionóis a d’fhéadfadh an chúirt a fhorchur faoi alt 17 agus ní ina hionad nó ina ionad.