CUID VI.

Ilghneitheach agus Ginearalta.

21. —D'fhonn airgead a chur ar fáil faoi chomhair muirear ginearálta a bheas ar an bPríomh-Chiste, aistreofar agus íocfar suim trí chéad míle punt as an Ród-Chiste isteach sa Stát-Chiste pé tráth nó trátha i rith na bliana airgeadais dar críoch an 31ú lá de Mhárta, 1952, agus i pé slí, a ordós an tAire Airgeadais.

22. —(1) San alt seo—

ciallaíonn an abairt “an príomh-alt” alt 22 den Acht Airgeadais, 1950 ( Uimh. 18 de 1950 );

ciallaíonn “an bhlianacht bhreise” an tsuim a muirearaítear ar an bPríomh-Chiste faoi fho-alt (4) den alt seo;

tá leis na habairtí “an tAire”, “an cuntas” agus “seirbhísí caipitiúla” na bríonna atá leo faoi seach sa phríomh-alt.

(2) Beidh éifeacht ag fo-alt (3) den phríomh-alt, maidir leis na naoi mbliana airgeadais fichead, d'éis a chéile, a thosós leis an mbliain airgeadais dar críoch an 31ú lá de Mhárta, 1952, ach “£427,482” a chur in ionad “£655,432”.

(3) Beidh éifeacht ag fo-alt (5) den phríomh-alt ach “£269,828” a chur in ionad “£423,979”.

(4) Déanfar suim £653,594 le haghaidh fuascailte iasacht, maraon le hús ar an gcéanna, i leith seirbhísí caipitiúla, a mhuirearú go bliantúil ar an bPríomh-Chiste nó a thoradh fáis sna tríocha bliain airgeadais, d'éis a chéile, a thosnós leis an mbliain airgeadais dar críoch an 31ú lá de Mhárta, 1952.

(5) Íocfar an bhlianacht bhreise isteach sa Chuntas i pé slí, agus pé trátha sa bhliain airgeadais iomchuí, a chinnfeas an tAire.

(6) Féadfar aon chuid den bhlianacht bhreise, nach mó ná £420,770 in aon bhliain airgeadais, d'úsáid chun an t-ús ar an bhfiach poiblí d'íoc.

(7) Úsáidfear iarmhéid na blianachta breise in aon tslí nó slite dá sonraítear i bhfo-alt (6) den phríomh-alt.

(8) Leasaítear leis seo fo-alt (4) den phríomh-alt trí “i pé slí, agus pé trátha sa bhliain airgeadais iomchuí, a chinnfeas an tAire” a chur in ionad “ina tráth-choda comhionanna leathbhliantúla”.

23. —(1) Déantar leis seo na hachtacháin a sonraítear sa Dara Sceideal a ghabhas leis an Acht seo d'athghairm a mhéid a sonraítear sa tríú colún den Sceideal sin.

(2) Ní bheidh éifeacht ag an alt seo ach i leith daoine a éagfas tar éis an 2ú lá de Bhealtaine, 1951.

24. —Cuirtear faoi chúram agus bainistí na gCoimisinéirí Ioncaim leis seo na cánacha agus na dleachta uile a forchuirtear leis an Acht seo.

25. —(1) Féadfar an tAcht Airgeadais, 1951 , a ghairm den Acht seo.

(2) Forléireofar Cuid I den Acht seo i dteannta na nAcht Cánach Ioncaim.

(3) Déanfar Cuid II den Acht seo, a mhéid a bhaineas sí le dleachta custam, d'fhorléiriú i dteannta na nAcht Custam agus, a mhéid a bhaineas sí le dleachta máil, forléireofar í i dteannta na Reacht a bhaineas le dleachta máil agus le bainistí na ndleacht sin.

(4) Forléireofar Cuid V den Acht seo i dteannta an Stamp Act, 1891, agus i dteannta na n-achtachán a leasaíos nó a leathnaíos an tAcht sin.

(5) Measfar Cuid I den Acht seo a theacht i bhfeidhm an 6ú lá d'Aibreán, 1951, agus beidh éifeacht aici amhail ar an lá sin agus uaidh sin amach.