An Chéad Lch. Lch. Roimhe Seo (Caibidil II Limistéir Chaomhantais Ailtireachta agus Limistéir Rialaithe Pleanála Speisialta) Ar Aghaidh (CUID VI An Bord Pleanála)

30 2000

An tAcht Um Pleanáil Agus Forbairt, 2000

CUID V

Soláthar Tithíochta

Léiriú.

93. —(1)  Sa Chuid seo—

ciallaíonn “riachtanais chóiríochta” méid na cóiríochta a theastóidh ó dhuine cáilithe, arna chinneadh de réir na rialachán a dhéanfaidh an tAire faoi alt 100(1)(a);

ciallaíonn “tithíocht incheannaithe” tithe nó talamh a chuirfear ar fáil, de réir alt 96(9)(10), do dhaoine cáilithe;

ciallaíonn “duine cáilithe”, faoi réir fho-alt (3) agus na rialachán, más ann, a dhéanfaidh an tAire faoi alt 100(1)(b), duine a bheidh i ngá cóiríochta agus nach mbeadh a ioncam nó a hioncam leordhóthanach faoi chomhair na n-íocaíochtaí ar mhorgáiste chun teach a cheannach d'fhonn freastal ar a riachtanais chóiríochta toisc gur mhó na híocaíochtaí arna ríomh thar tréimhse bliana ná 35 faoin gcéad d'ioncam bliantúil an duine sin tar éis cánach ioncaim agus árachais shóisialaigh pá-choibhneasa;

ciallaíonn “straitéis tithíochta” straitéis a áireofar i bplean forbartha de réir alt 94(1);

ciallaíonn “margadhluach”, i ndáil le teach, an praghas a gheofaí ar fheo simplí neamhualaithe an tí dá ndíolfaí ar an margadh oscailte é;

ciallaíonn “morgáiste” iasacht chun teach a cheannach a bheidh urraithe le morgáiste nach mó a méid ná 90 faoin gcéad de phraghas an tí.

(2)  Chun críocha na Coda seo, folaíonn riachtanais chóiríochta duine cháilithe riachtanais chóiríochta aon duine eile a mbeifí ag súil leis le réasún go mbeadh cónaí air nó uirthi leis an duine cáilithe.

(3)  Le linn dó cáilíocht duine a chinneadh chun críocha na Coda seo, cuirfidh an t-údarás pleanála na nithe seo a leanas san áireamh—

(a)  leath an ioncaim bhliantúil, tar éis cánach ioncaim agus árachais shóisialaigh pá-choibhneasa, atá ag aon duine eile a mbeifí ag súil leis le réasún go mbeadh cónaí air nó uirthi leis an duine cáilithe agus go ndéanfadh sé nó sí ranníoc i leith na n-íocaíochtaí morgáiste, agus

(b)  aon dálaí airgeadais eile de chuid an duine cháilithe agus de chuid aon duine eile a mbeifí ag súil leis le réasún go mbeadh cónaí air nó uirthi leis an duine cáilithe agus go ndéanfadh sé nó sí ranníoc i leith na n-íocaíochtaí morgáiste.

(4)  Chun amhras a sheachaint, dearbhaítear leis seo, i leith aon iarratais pleanála nó aon achomhairc, gur cúinse atá ábhartha maidir le pleanáil chuí agus forbairt inchothaithe an limistéir comhlíonadh na straitéise tithíochta agus aon chuspóra ghaolmhair.

Straitéisí tithíochta.

94. —(1) (a)  Cuirfidh gach údarás pleanála san áireamh, in aon phlean forbartha a dhéanfaidh sé de réir alt 12, straitéis chun a chinntiú go ndéanfar socrú le pleanáil chuí agus forbairt inchothaithe limistéar an phlean forbartha le haghaidh tithíochta do dhaonra láithreach agus todhchaí an limistéir sa mhodh a leagfar amach sa straitéis.

(b)  (i)  Faoi réir fhomhír (ii), áireofar, in aon phlean forbartha a dhéanfaidh údarás pleanála tar éis thosach feidhme an ailt seo, straitéis tithíochta i leith limistéar an phlean forbartha.

(ii)  Más rud é, roimh thosach feidhme an ailt seo go mbeidh fógra tugtha ag údarás pleanála faoi alt 21A(2) (a cuireadh isteach le hAcht 1976) d'Acht 1963 maidir le leasú beartaithe ar dhréachtphlean forbartha, féadfaidh sé dul ar aghaidh de réir alt 266 gan fomhír (i) a chomhlíonadh, ach i gcás ina ndéanfar plean forbartha amhlaidh, glacfaidh an t-údarás pleanála cibé bearta is gá chun a chinntiú go ndéanfar, a luaithe is féidir agus, in aon chás, laistigh de thréimhse 9 mí ó thosach feidhme an ailt seo, straitéis tithíochta a ullmhú i leith limistéar an phlean forbartha agus go dtionscnófar na nósanna imeachta faoi alt 13 chun an plean forbartha a athrú d'fhonn an straitéis a chur isteach sa phlean agus chun cibé athruithe eile a dhéanamh is gá ag éirí as cur isteach na straitéise sa phlean de bhun na Coda seo.

(c)  Glacfaidh údarás pleanála cibé bearta is gá chun a chinntiú go ndéanfar, a luaithe is féidir agus, in aon chás, laistigh de thréimhse 9 mí ó thosach feidhme an ailt seo, straitéis tithíochta a ullmhú i leith limistéar an phlean forbartha agus go dtionscnófar na nósanna imeachta faoi alt 13 chun an plean forbartha a athrú d'fhonn an straitéis a chur isteach sa phlean agus chun cibé athruithe eile a dhéanamh is gá ag éirí as cur isteach na straitéise sa phlean de bhun na Coda seo.

(d)  Bainfidh straitéis tithíochta le tréimhse an phlean forbartha nó, i gcás straitéise a ullmhófar faoi mhír (b)(ii) nó faoi mhír (c), leis an tréimhse a bheidh fágtha den phlean fhorbartha láithreach.

(e)  Féadfaidh 2 údarás pleanála nó níos mó nó, de bhun ordacháin ón Aire, déanfaidh siad, straitéis tithíochta faoin alt seo a ullmhú i gcomhpháirt i leith chomhlimistéar a bpleananna forbartha agus áireofar an chomhstraitéis sin in aon phlean forbartha a bhaineann leis an limistéar iomlán nó le haon chuid den limistéar atá clúdaithe leis an straitéis agus beidh feidhm ag forálacha na Coda seo dá réir sin.

(2)  Le linn dó straitéis tithíochta a ullmhú, beidh aird ag údarás pleanála ar an measúnacht nó ar na measúnachtaí tithíochta is déanaí a rinneadh faoi alt 9 d'Acht na dTithe, 1988, agus a bhaineann le limistéar an phlean forbartha.

(3)  Cuirfear na nithe seo a leanas san áireamh i straitéis tithíochta—

(a)  an gá atá le tithíocht lena mbaineann fo-alt (4)(a) faoi láthair, agus an gá is dócha a bheidh léi sa todhchaí,

(b)  an gá atá ann a chinntiú go mbeidh tithíocht ar fáil do dhaoine a bhfuil leibhéil éagsúla ioncaim acu,

(c)  an gá atá ann a chinntiú go ndéanfar meascán de chineálacha tithe agus de mhéideanna tithe a fhorbairt chun go mbeidh siad in oiriúint go réasúnach do riachtanais na n-earnálacha éagsúla líonta tí, de réir mar a chinnfidh an t-údarás pleanála, agus lena n-áirítear riachtanais speisialta daoine scothaosta agus daoine atá faoi mhíchumas, agus

(d)  an gá atá ann gníomhú i gcoinne leithlisiú míchuí i dtithíocht idir daoine ó chúlraí sóisialta éagsúla.

(4)  (a)  Áireofar meastachán i straitéis tithíochta—

(i)  ar an méid tithíochta do dhaoine dá dtagraítear in alt 9(2) d'Acht na dTithe, 1988, agus

(ii)  ar an méid tithíochta incheannaithe,

atá riachtanach i limistéar an phlean forbartha le linn thréimhse an phlean forbartha agus féadfar na riachtanais éagsúla le haghaidh limistéar éagsúil laistigh de limistéar an phlean forbartha a lua sa mheastachán.

(b)  Chun measúnacht faoi mhír (a)(ii) a dhéanamh, féadfaidh údarás pleanála daoine cáilithe a bhfuil teach ar úinéireacht acu nó a raibh teach ar úinéireacht acu roimhe sin a eisiamh.

(c)  Faoi réir mhír (d), forálfar i straitéis tithíochta go ndéanfar mar bheartas ginearálta céatadán sonraithe, nach mó ná 20 faoin gcéad, den talamh arna criosú le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, a chur in áirithe faoin gCuid seo chun tithíocht a sholáthar chun críocha fhomhír (i)fhomhír (ii) de mhír (a) nó chun críocha an dá fhomhír sin.

(d)  Ní oibreoidh mír (c) chun a chosc ar aon duine (lena n-áirítear údarás áitiúil) níos mó ná 20 faoin gcéad de thalamh arna criosú le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, a úsáid chun tithíocht lena mbaineann mír (a) a sholáthar.

(5)  (a)  Le linn dó meastachán a dhéanamh faoi fho-alt (4)(a)(ii), beidh aird ag an údarás pleanála ar na nithe seo a leanas:

(i)  an soláthar tithe, agus an t-éileamh ar thithe, i gcoitinne nó an soláthar tithe, agus an t-éileamh ar thithe, d'aicme nó d'aicmí áirithe, i limistéar iomlán an phlean forbartha nó i gcuid de;

(ii)  praghsanna tithe i gcoitinne, nó praghsanna tithe d'aicme nó d'aicmí áirithe, i limistéar iomlán an phlean forbartha nó i gcuid de;

(iii)  ioncam daoine i gcoitinne, nó ioncam aicme nó aicmí áirithe daoine, a mbeidh tithe ag teastáil uathu i limistéar an phlean forbartha;

(iv)  rátaí úis ar mhorgáistí chun teach a cheannach;

(v)  an ghaolmhaireacht idir praghas tithíochta faoi fhomhír (ii), ioncaim faoi fhomhír (iii) agus rátaí úis faoi fhomhír (iv) chun incheannaitheacht tithe i limistéar an phlean forbartha a shuíomh;

(vi)  cibé nithe eile is cuí leis an údarás pleanála nó a fhorordófar chun críocha an fho-ailt seo.

(b)  Ní dhéanfaidh rialacháin a dhéanfar chun críocha an fho-ailt seo difear d'aon straitéis tithíochta nó do chuspóirí aon phlean forbartha a dhéanfar sula dtiocfaidh na rialacháin sin i bhfeidhm.

Straitéisí tithíochta agus pleananna forbartha.

95. —(1)  (a)  In éineacht le straitéis tithíochta a áireamh ina phlean forbartha, cinnteoidh údarás pleanála go ndéanfar talamh leordhóthanach oiriúnach a chriosú le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, faoi chomhair cheanglais na straitéise tithíochta agus chun a chinntiú nach mbeidh ganntanas talún den sórt sin ann aon tráth le linn thréimhse an phlean forbartha.

(b)  Déanfaidh údarás pleanála cuspóirí a áireamh sa phlean forbartha d'fhonn a áirithiú go gcuirfear an straitéis tithíochta i ngníomh, go háirithe, aon ní de na nithe dá dtagraítear in alt 94(3), lena n-áirítear cuspóirí á cheangal go ndéanfar céatadán sonraithe de thalamh arna chriosú d'aon toisc le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, a chur ar fáil chun tithíocht dá dtagraítear in alt 94(4)(a) a sholáthar.

(c)  Féadfar cuspóirí sonracha amhail dá dtagraítear i mír (b) a chur in iúl i leith gach limistéir ar leith arna chriosú le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, agus, i gcás inar gá é de bharr imthosca áitiúla a bhaineann leis an méid tithíochta atá riachtanach, arna mheas sa straitéis tithíochta faoi alt 94(4)(a), féadfar cuspóirí sonracha éagsúla a chur in iúl i leith limistéar éagsúil, faoi réir an choinníll nach rachfar thar an gcéatadán sonraithe dá dtagraítear in alt 94(4)(c).

(d)  D'fhonn feidhmiú in éadan leithlisiú míchuí i dtithíocht idir daoine ó chúlraí sóisialta éagsúla, féadfaidh an t-údarás pleanála a chur in iúl, i leith aon limistéir áirithe dá dtagraítear i mír (c), nach bhfuil tithíocht dá dtagraítear in alt 94(4)(a) riachtanach i leith an limistéir sin, nó go bhféadfaidh go mbeidh, ina ionad sin, céatadán níos lú ná an céatadán a shonrófar sa straitéis tithíochta riachtanach.

(2)  Ní choiscfidh aon ní i bhfo-alt (1) aon talamh a fhorbairt go heisiach le haghaidh tithíochta dá dtagraítear in alt 94(a)(i)(ii).

(3)  (a)  Áireofar i dtuarascáil an bhainisteora faoi alt 15(2) athbhreithniú ar an dul chun cinn a rinneadh ó thaobh an straitéis tithíochta a chur i ngníomh agus, i gcás ina gcuirfear in iúl sa tuarascáil go mbeidh riachtanais tithíochta nua nó athbhreithnithe aitheanta, féadfaidh an bainisteoir a mholadh go ndéanfar an straitéis tithíochta a choigeartú agus an plean forbartha a athrú dá réir sin.

(b)  Déanfaidh bainisteoir údaráis pleanála, más dóigh leis nó léi go bhfuil athrú tagtha ar an margadh tithíochta, nó ar na rialacháin a rinne an tAire faoi alt 100, a dhéanann difear suntasach don straitéis tithíochta, tuarascáil a thabhairt ar an ábhar do chomhaltaí an údaráis agus, más dóigh leis nó léi gur gá é, féadfaidh an bainisteoir a mholadh go ndéanfar an straitéis tithíochta a choigeartú agus an plean forbartha a athrú dá réir sin.

Tithíocht shóisialta agus tithíocht incheannaithe a sholáthar.

96. —(1)  Faoi réir fho-alt (14) agus alt 97, i gcás ina gceanglófar le cuspóir de chuid plean forbartha go ndéanfar céatadán sonraithe d'aon talamh arna chriosú le haghaidh úsáide cónaithe, nó le haghaidh meascáin d'úsáidí cónaithe agus d'úsáidí eile, a chur ar fáil le haghaidh tithíochta dá dtagraítear in alt 94(4)(a), beidh feidhm ag forálacha an ailt seo maidir le hiarratas ar chead chun tithe a fhorbairt, nó i gcás ina mbaineann iarratas le meascán d'fhorbairtí, maidir leis an gcuid sin den iarratas a bhaineann le tithe a fhorbairt, i dteannta fhorálacha alt 34.

(2)  Féadfaidh údarás pleanála, nó féadfaidh an Bord ar achomharc, a cheangal, mar choinníoll le cead a dheonú, go ndéanfaidh an t-iarratasóir, nó aon duine eile ag a bhfuil leas sa talamh lena mbaineann an t-iarratas, comhaontú leis an údarás pleanála maidir le talamh lena mbaineann cuspóir sonrach de réir alt 95(1)(b) a fhorbairt le haghaidh tithíochta.

(3)  (a)  Féadfar a fhoráil i gcomhaontú faoin alt seo—

(i)  go ndéanfar úinéireacht na talún, a cheanglaítear leis an gcomhaontú a chur in áirithe chun tithíocht dá dtagraítear in alt 94(4)(a) a sholáthar, a aistriú chuig an údarás pleanála,

(ii)  in ionad an aistrithe talún dá dtagraítear i bhfomhír (i), go ndéanfar tithe de cibé líon agus de cibé tuairisc a shonrófar sa chomhaontú a thógáil agus iad a aistriú, ar iad a chríochnú, chuig an údarás pleanála nó chuig daoine a ainmneoidh an t-údarás de réir na Coda seo, ar phraghas a chinnfear ar bhonn na nithe seo a leanas—

(I)  costas láithreáin na dtithe arna ríomh amhail is dá mba ionann é agus costas na talún a aistreofar chuig an údarás faoi fhomhír (i), agus

(II)  na costais tógála agus na costais forbartha chomhghabhálacha ar a gcomhaontóidh an t-údarás agus an forbróir, lena n-áirítear brabús ar na costais,

(iii)  in ionad an aistrithe talún dá dtagraítear i bhfomhír (i), go ndéanfar cibé líon láithreán, a bheidh seirbhísithe go hiomlán nó go páirteach agus a shonrófar sa chomhaontú, a aistriú chuig an údarás pleanála, nó chuig daoine a ainmneoidh an t-údarás de réir na Coda seo, ar phraghas a chinnfear ar bhonn na nithe seo a leanas—

(I)  costas láithreáin na láithreán arna ríomh amhail is dá mba ionann é agus costas na talún a aistreofar chuig an údarás faoi fhomhír (i), agus

(II)  na costais forbartha chomhghabhálacha ar a gcomhaontóidh an t-údarás agus an forbróir, lena n-áirítear brabús ar na costais.

(b)  I gcás ina ndéanfar foráil i gcomhaontú maidir le haistriú talún, tithe nó láithreán de réir mhír (a), déanfar na tithe nó na láithreáin nó an talamh, cibé acu i gcuid amháin nó níos mó, a shainaithint sa chomhaontú.

(c)  A mhéid is eol dó é tráth an chomhaontaithe, cuirfidh an t-údarás pleanála in iúl don iarratasóir cad atá ar intinn aige i ndáil le tithíocht a sholáthar, lena n-áirítear tuairisc ar na tithe atá beartaithe, ar an talamh nó ar na láithreáin a bheidh le haistriú de réir mhír (a)(i)(iii).

(d)  Ní fhorléireofar aon ní san fho-alt seo mar ní lena gceanglófar ar an iarratasóir nó ar dhuine eile comhaontú a dhéanamh chun tithe nó láithreáin a aistriú de réir fhomhíreanna (ii)(iii) de mhír (a), in ionad talamh a aistriú de réir fhomhír (i) den mhír sin.

(e)  Chun críocha comhaontaithe faoi mhír (a), beidh aird ag an údarás pleanála ar na nithe seo a leanas—

(i)  pleanáil chuí agus forbairt inchothaithe an limistéir lena mbaineann an t-iarratas,

(ii)  an straitéis tithíochta agus cuspóirí sonracha an phlean forbartha a bhaineann le cur i ngníomh na straitéise,

(iii)  an gá atá ann comhtháthú foriomlán na forbartha lena mbaineann an t-iarratas a chinntiú, agus

(iv)  tuairimí an iarratasóra i ndáil le tionchar an chomhaontaithe ar an bhforbairt.

(f)  Ní bheidh feidhm ag treoirlínte Rialtais um sholáthar poiblí maidir le comhaontú a dhéanfar faoi mhír (a)(ii)(iii), ach amháin i gcás comhaontú atá faoi réir cheanglais Threoir Uimh. 93/37/CEE ón gComhairle(1) ar chomhordú nósanna imeachta i ndáil le dámhachtain Conarthaí Oibreacha Poiblí agus aon treorach lena leasaítear an treoir sin nó a chuirtear ina hionad.

(4)  Sonróidh iarratasóir ar chead, le linn dó nó di iarratas lena mbaineann an t-alt seo a dhéanamh, an modh ina mbeartódh sé nó sí coinníoll lena mbaineann fo-alt (2) a chomhlíonadh, dá gcuirfeadh an t-údarás pleanála coinníoll den sórt sin ag gabháil le haon chead a dheonófaí ar scór an iarratais sin, agus, i gcás ina ndeonóidh an t-údarás pleanála cead don iarratasóir faoi réir aon choinníll den sórt sin, beidh aird aige ar aon tograí a shonrófar amhlaidh.

(5)  I gcás díospóide i ndáil le haon ní is ábhar do chomhaontú faoin alt seo, seachas—

(a)  díospóid i ndáil le comhaontú faoi fho-alt (3)(a)(ii)(iii),

(b)  díospóid maidir le méid an chúitimh is iníoctha faoi fho-alt (6), nó

(c)  díospóid maidir leis an tsuim is iníoctha le húdarás pleanála faoi fho-alt (12),

féadfaidh an t-údarás pleanála nó aon pháirtí ionchasach eile sa chomhaontú an ní a tharchur chuig an mBord le breith a thabhairt air.

(6)  I gcás ina n-aistreofar úinéireacht talún chuig údarás pleanála de bhun fho-alt (3)(a)(i), déanfaidh an t-údarás pleanála, mar chúiteamh, suim a íoc le húinéir na talún ar suim í—

(a)  (i)  i gcás talún—

(I)  a cheannaigh an t-iarratasóir roimh 25 Lúnasa 1999, nó

(II)  a cheannaigh an t-iarratasóir de bhun comhaontaithe is infheidhmithe le dlí agus a rinneadh roimh an dáta sin nó i bhfeidhmiú rogha i scríbhinn chun an talamh a cheannach a deonaíodh nó a fuarthas roimh an dáta sin,

atá comhionann leis an bpraghas a íocadh ar an talamh, nó leis an bpraghas a comhaontaíodh a íoc ar an talamh de bhun an chomhaontaithe nó na rogha, mar aon le cibé suim i leith úis ar an gcéanna (lena n-áirítear, in imthosca ina bhfuil morgáiste ar an talamh, ús arna íoc i leith an mhorgáiste) a chinnfidh an t-eadránaí maoine,

(ii)  i gcás talún a bhfuair an t-iarratasóir úinéireacht air ar mhodh bronntanais nó oidhreachta a glacadh (de réir bhrí an Achta um Cháin Fháltas Caipitiúil, 1976) roimh 25 Lúnasa 1999, suim atá comhionann le margadhluach na talún ar an dáta luachála (de réir bhrí an Achta sin) arna mheas de réir alt 15 den Acht sin,

(iii)  i gcás talún—

(I)  a ceannaíodh roimh 25 Lúnasa 1999, nó

(II)  a ceannaíodh de bhun comhaontaithe is infheidhmithe le dlí chun an talamh a cheannach, ar comhaontú é a rinneadh roimh an dáta sin, nó i bhfeidhmiú rogha, i scríbhinn, chun an talamh a cheannach a deonaíodh nó a fuarthas roimh an dáta sin,

(i gcás gur morgáistí atá i seilbh na talún an t-iarratasóir ar chead) atá comhionann leis an bpraghas a íocadh ar an talamh, nó leis an bpraghas a comhaontaíodh a íoc ar an talamh de bhun an chomhaontaithe nó na rogha, mar aon le cibé suim i leith úis ar an gcéanna arna ríomh ón dáta sin (lena n-áirítear aon ús arna fhabhrú agus nár íocadh i leith an mhorgáiste) a chinnfidh an t-eadránaí maoine,

(b)  atá comhionann le luach na talún arna ríomh faoi threoir a úsáide láithrí ar dháta aistrithe úinéireacht na talún chuig an údarás pleanála lena mbaineann, ar an mbonn go mbeadh sé, ar an dáta sin, agus go leanfadh sé de bheith dá éis sin, neamhdhleathach aon fhorbairt a dhéanamh i ndáil leis an talamh sin seachas forbairt dhíolmhaithe,

cibé acu is mó.

(7)  (a)  Faoi réir mhír (b), aon eadránaí maoine a cheapfar faoi alt 2 den Acht um Luachanna Maoine (Eadránacha agus Achomhairc), 1960, déanfaidh sé nó sí (de réir an Acquisition of land (Assessment of Compensation) Act, 1919), cheal comhaontaithe, na nithe seo a leanas a shocrú i gcás inar cuí sin:

(i)  líon agus praghas na dtithe a bheidh le haistriú faoi fho-alt (3)(a)(ii);

(ii)  líon agus praghas na láithreán a bheidh le haistriú faoi fho-alt (3)(a)(iii);

(iii)  an cúiteamh is iníoctha faoi fho-alt (6) ag údarás pleanála le húinéir talún;

(iv)  an tsuim is iníoctha le húdarás pleanála faoi fho-alt (12); agus

(v)  an liúntas a bheidh le tabhairt faoi alt 99(3)(d)(i).

(b)  Chun críocha mhír (a), ní bheidh feidhm ag alt 2(2) den Acquisition of Land (Assessment of Compensation) Act, 1919, agus déanfar luach na talún a ríomh ar an toimhde go raibh sé, an tráth sin, agus go leanfadh sé de bheith, neamhdhleathach aon fhorbairt a dhéanamh i ndáil leis an talamh seachas forbairt dhíolmhaithe.

(c)  Beidh feidhm ag alt 187 maidir le cúiteamh is iníoctha faoi fho-alt (6).

(8)  I gcás ina mbeidh sé de choinníoll le deonú ceada go ndéanfar comhaontú de réir fho-alt (2) agus, mar gheall ar dhíospóid i leith aon ní a bhaineann le téarmaí comhaontaithe den sórt sin, nach ndéanfar an comhaontú roimh dheireadh 8 seachtain ó dháta deonaithe an cheada, féadfaidh an t-iarratasóir nó aon duine eile ag a bhfuil leas sa talamh lena mbaineann an t-iarratas—

(a)  aon díospóid lena mbaineann fo-alt (5) a tharchur chuig an mBord, nó

(b)  aon ní de na nithe seo a leanas a tharchur chuig an eadránaí maoine—

(i)  aon díospóid lena mbaineann fo-alt (3)(a)(ii)(iii),

(ii)  aon díospóid maidir le méid an chúitimh is iníoctha faoi fho-alt (6), nó

(iii)  aon díospóid maidir leis an tsuim is iníoctha le húdarás pleanála faoi fho-alt (12),

agus déanfaidh an Bord, nó an t-eadránaí maoine, de réir mar is cuí, breith a thabhairt ar an ní a luaithe is indéanta.

(9)  (a)  I gcás ina n-aistreofar úinéireacht talún nó úinéireacht láithreán chuig údarás pleanála de réir fho-alt (3)(a)(i)(iii), féadfaidh an t-údarás—

(i)  tithe a sholáthar ar an talamh nó ar na láithreáin, nó socrú a dhéanamh chun an céanna a sholáthar, do dhaoine dá dtagraítear in alt 94(4)(a),

(ii)  talamh nó láithreáin a chur ar fáil do na daoine sin le go ndéanfaidh siad tithe a fhorbairt lena n-áitiú acu féin, nó

(iii)  talamh nó láithreáin a chur ar fáil do chomhlacht arna cheadú chun críocha alt 6 d'Acht na dTithe (Forálacha Ilghnéitheacha), 1992, chun tithe a sholáthar ar an talamh do dhaoine dá dtagraítear in alt 94(4)(a).

(b)  Go dtí go soláthrófar tithe nó láithreáin de réir mhír (a)(i), nó go dtí go gcuirfear talamh nó láithreáin ar fáil de réir mhír (a)(ii)(iii), déanfaidh an t-údarás pleanála an talamh nó na láithreáin a chothabháil ar mhodh nach mbainfidh, agus nach dóigh go mbainfidh, go feadh méid ábhartha, de thaitneamhacht, de shainghné nó de dhreach talún nó tithe i gcomharsanacht na talún nó na láithreán.

(10)  (a)  I gcás ina n-aistreofar teach chuig údarás pleanála nó chuig a ainmnithigh faoi fho-alt (3)(a)(ii), úsáidfear é chun tithíocht a sholáthar do dhaoine lena mbaineann alt 94(4)(a).

(b)  Féadfaidh duine dá dtagraítear in alt 94(4)(a) nó comhlacht arna cheadú chun críocha alt 6 d'Acht na dTithe (Forálacha Ilghnéitheacha), 1992, chun tithíocht a sholáthar do dhaoine dá dtagraítear in alt 94(4)(a), a bheith ina ainmnitheach nó ina hainmnitheach de chuid údaráis pleanála.

(11)  D'ainneoin aon fhorála den achtachán seo nó d'aon achtachán eile, má thagann údarás pleanála chun bheith deimhin de nach bhfuil talamh, láithreán nó teach a aistríodh chuige faoi fho-alt (3) ag teastáil a thuilleadh chun na gcríoch a shonraítear i bhfo-alt (9)(10), féadfaidh sé an talamh, an láithreán nó an teach a úsáid chun críche eile atá bainteach lena fheidhmeanna nó é a dhíol ar an bpraghas is fearr is féidir a fháil le réasún agus, i gceachtar cás, déanfaidh sé méid atá comhionann le margadhluach na talún, an láithreáin nó an tí, nó fáltais an díola, de réir mar a bheidh, a íoc isteach sa chuntas ar leithligh dá dtagraítear i bhfo-alt (13).

(12)  (a)  I gcás ina measfaidh an t-údarás pleanála, nó ina measfaidh an Bord ar achomharc, mar gheall ar mhéid, ar chruth nó ar ghné eile an láithreáin, nach bhfuil comhaontú faoi fho-alt (3) praiticiúil, féadfaidh an t-údarás pleanála, nó féadfaidh an Bord ar achomharc, a cheangal, mar choinníoll le deonú ceada de réir alt 34, go n-íocfar leis an údarás pleanála méid ar comhluach le haistriú talún chuig an údarás faoi mhír (a) d'fho-alt (3).

(b)  Forálfar leis an gcoinníoll a shonraítear i mír (a) go gcomhaontófar an tsuim idir an t-údarás pleanála agus an duine dá ndeonófar an cead agus, cheal comhaontaithe, go socróidh an t-eadránaí maoine an tsuim de réir fho-alt (7).

(13)  Tabharfar cuntas in aon mhéid dá dtagraítear i bhfo-alt (11) agus in aon mhéid a íocfar le húdarás pleanála de réir fho-alt (12) i gcuntas ar leithligh, agus ní chuirfear chun feidhme é ach amháin mar chaipiteal le haghaidh a fheidhmeanna faoin gCuid seo nó ag údarás tithíochta le haghaidh a fheidhmeanna i ndáil le tithíocht a sholáthar faoi Achtanna na dTithe, 1966 go 1998.

(14)  Ní bheidh feidhm ag an alt seo maidir le hiarratais ar chead—

(a)  le haghaidh forbartha arb é atá inti soláthar tithe ag comhlacht atá arna cheadú chun críocha alt 6 d'Acht na dTithe (Forálacha Ilghnéitheacha), 1992, chun tithíocht a sholáthar do dhaoine dá dtagraítear in alt 9(2) d'Acht na dTithe, 1988, i gcás nach gcuirfear na tithe sin ar fáil ach amháin lena ligean.

(b)  chun foirgneamh atá ann cheana féin a athchóiriú nó chun foirgneamh a athfhoirgniú d'fhonn teaghais amháin nó níos mó a chruthú, ar choinníoll go gcoimeádfar 50 faoin gcéad nó níos mó den chreatlach sheachtrach atá ar an bhfoirgneamh cheana féin, nó

(c)  chun oibreacha a dhéanamh ar theach atá ann cheana féin.

(15)  Maidir le cead a deonaíodh faoi Chuid IV d'Acht 1963 nó faoi Chuid III den Acht seo de bhun iarratais arna dhéanamh tar éis 25 Lúnasa 1999 agus lena mbainfeadh an Chuid seo dá mbeadh an t-iarratas ar chead déanta tar éis straitéis tithíochta a áireamh sa phlean forbartha faoi alt 94(1), scoirfidh sé d'éifeacht a bheith leis an 31 Nollaig 2002, nó ag deireadh na tréimhse 2 bhliain ó dháta deonaithe an cheada, cibé acu is déanaí—

(a)  i gcás nach mbeidh an fhorbairt lena mbaineann an cead tosaithe faoin dáta sin nó faoi dheireadh na tréimhse sin, maidir leis an bhforbairt go léir, agus

(b)  i gcás go mbeidh an fhorbairt lena mbaineann an cead tosaithe faoin dáta sin nó faoi dheireadh na tréimhse sin, maidir le haon chuid den fhorbairt arb é atá inti foirgnimh nach mbeidh a mballaí seachtracha críochnaithe, ach sin gan dochar don oibleagáid atá ar an duine a dhéanfaidh an fhorbairt ceanglais eile an cheada a chomhlíonadh i ndáil leis an oiread sin den fhorbairt nach ndéanann an t-alt seo difear dó.

(16)  San alt seo, ciallaíonn “úinéir”—

(a)  duine, seachas morgáistí nach bhfuil i seilbh, atá de thuras na huaire i dteideal feo simplí na talún a dhiúscairt (cibé acu i seilbh nó i bhfrithdhílse), agus

(b)  duine a shealbhaíonn cíosanna nó brabúis na talún nó atá i dteideal an chéanna, faoi léas nó faoi chomhaontú ar faide ná 5 bliana an téarma de atá gan chaitheamh.

Forbairt nach mbeidh feidhm ag alt 96 maidir léi.

97. —(1)  San alt seo—

folaíonn “iarratasóir” duine a ndéanann duine iarratas ar dheimhniú thar a cheann nó thar a ceann;

ciallaíonn “an chúirt” seachas i bhfo-ailt (19) agus (21), an Chúirt Chuarda don chuaird ina bhfuil an fhorbairt go léir nó cuid di, lena mbaineann an t-iarratas faoi fho-alt (3).

(2)  Chun críocha an ailt seo—

(a)  measfar 2 dhuine nó níos mó a bheith ag gníomhú de chomhbheart, más rud é, de bhun comhaontaithe, comhshocraíochta nó comhthuisceana, go ndéanfaidh duine amháin acu iarratas faoi fho-alt (3) nó go gcuirfidh sé nó sí sé nó sí faoi deara iarratas den sórt sin a dhéanamh, agus

(b)  measfar, in aon chás áirithe, nach bhfolóidh talamh atá i ngarchomharsanacht talún eile talamh is faide ná 400 méadar ón dara talamh a luaitear san fho-alt seo.

(3)  Féadfaidh duine, sula ndéanfaidh sé nó sí iarratas ar chead i ndáil le forbairt—

(a)  arb é atá inti 4 theach nó níos lú a sholáthar, nó

(b)  le haghaidh tithíochta ar thalamh ar 0.2 heicteár nó níos lú a achar,

iarratas a dhéanamh chuig an údarás pleanála lena mbaineann ar dheimhniú á rá nach mbeidh feidhm ag alt 96 maidir le deonú ceada i leith na forbartha lena mbaineann (dá ngairtear “deimhniú” san alt seo), agus dá réir sin, i gcás ina ndeonóidh an t-údarás pleanála deimhniú, ní bheidh feidhm ag alt 96 maidir le deonú ceada i leith na forbartha lena mbaineann.

(4)  Faoi réir—

(a)  fho-ailt (6) agus (12), agus

(b)  an t-iarratasóir ar dheimhniú do chomhlíonadh fho-alt (8), féadfaidh údarás pleanála a mbeidh iarratas déanta chuige faoin alt seo agus de réir an ailt seo deimhniú a dheonú don iarratasóir.

(5)  Beidh dearbhú reachtúil arna dhéanamh ag an iarratasóir ag gabháil le hiarratas ar dheimhniú, ar dearbhú é—

(a)  ina dtabharfar, i leith na tréimhse 5 bliana roimh an iarratas, cibé sonraí i dtaobh úinéireacht dhlíthiúil agus thairbhiúil na talún, ar a mbeartaítear an fhorbairt lena mbaineann an t-iarratas a dhéanamh, a bheidh ar eolas nó ar fáil ag an iarratasóir,

(b)  ina sainaithneofar aon daoine lena mbeidh an t-iarratasóir ag gníomhú de chomhbheart,

(c)  ina dtabharfar sonraí—

(i)  i dtaobh aon leasa atá ag an iarratasóir, nó a bhí aige nó aici aon tráth le linn na tréimhse sin, in aon talamh i ngarchomharsanacht na talún ar a mbeartaítear an fhorbairt sin a dhéanamh, agus

(ii)  i dtaobh aon leasa atá ag aon duine lena bhfuil an t-iarratasóir ag gníomhú de chomhbheart, nó a bhí aige nó aici aon tráth le linn na tréimhse sin, in aon talamh sa gharchomharsanacht sin, agus a bhfuil fios ina thaobh ag an iarratasóir,

(d)  ina luafar nach eol don iarratasóir aon fhíorais nó imthosca ar forais a bheadh iontu faoi fho-alt (12) ar a ndiúltódh an t-údarás pleanála deimhniú a dheonú,

(e)  ina dtabharfar cibé faisnéis eile a fhorordófar.

(6)  (a)  Féadfaidh údarás pleanála a cheangal ar iarratasóir ar dheimhniú cibé faisnéis nó doiciméid bhreise a thabhairt dó is gá le réasún chun a chumasú dó a fheidhmeanna a chomhlíonadh faoin alt seo.

(b)  I gcás ina ndiúltóidh iarratasóir ceanglas faoi mhír (a) a chomhlíonadh, nó ina mainneoidh sé nó sí, laistigh de thréimhse 8 seachtain ó dháta déanta an cheanglais, é a chomhlíonadh amhlaidh, diúltóidh an t-údarás pleanála lena mbaineann deimhniú a dheonú don iarratasóir.

(7)  Féadfaidh údarás pleanála, chun a fheidhmeanna a chomhlíonadh faoin alt seo, cibé fiosrúcháin bhreise is cuí leis a dhéanamh.

(8)  Beidh de dhualgas ar an iarratasóir ar dheimhniú, gach uile thráth, cibé faisnéis a thabhairt don údarás pleanála lena mbaineann a theastóidh le réasún uaidh chun a chumasú dó a fheidhmeanna a chomhlíonadh faoin alt seo.

(9)  Féadfaidh an tAire rialacháin a dhéanamh i ndáil le hiarratas a dhéanamh faoin alt seo.

(10)  I gcás ina mainneoidh údarás pleanála, laistigh den tréimhse 4 sheachtain—

(a)  ón dáta a ndéanfar iarratas chuige faoin alt seo, nó

(b)  (i gcás ceanglais faoi fho-alt (6)) ón dáta a bhfaighidh sé aon fhaisnéis nó doiciméid lena mbaineann an ceanglas,

deimhniú a dheonú, nó diúltú deimhniú a dheonú, measfar ag deireadh na tréimhse sin gur dheonaigh an t-údarás pleanála deimhniú don iarratasóir lena mbaineann.

(11)  Déanfar sonraí i dtaobh deimhnithe a dheonófar faoin alt seo a thaifeadadh ar an gclár.

(12)  Ní dheonóidh údarás pleanála deimhniú i ndáil le forbairt más rud é, maidir leis an iarratasóir ar an deimhniú sin, nó maidir le haon duine lena bhfuil an t-iarratasóir ag gníomhú de chomhbheart—

(a)  go ndearnadh, tráth nach luaithe ná 5 bliana roimh dháta an iarratais, deimhniú i ndáil le forbairt a dheonú dó nó di, agus go bhfuil an deimhniú i bhfeidhm fós tráth an iarratais, nó

(b)  go ndearna sé nó sí forbairt dá dtagraítear i bhfo-alt (3), nó gur deonaíodh cead dó nó di forbairt den sórt sin a dhéanamh, tráth nach luaithe ná—

(i)  5 bliana roimh dháta an iarratais, agus

(ii)  bliain tar éis don alt seo teacht i ngníomh,

i ndáil leis an talamh ar a mbeartaítear an fhorbairt chéadluaite a dhéanamh, nó le talamh i ngarchomharsanacht na talún sin, mura rud é—

(I)  nár mhó ná 4 theach comhiomlán aon fhorbartha lena mbaineann mír (a)(b), agus na forbartha céadluaite, dá ndéanfaí iad, nó

(II)  (in imthosca inar mó an comhiomlán sin ná 4 theach) nach mó ná 0.2 heicteár comhiomlán na talún ar a mbeidh aon fhorbairt lena mbaineann mír (a)(b), agus na talún ar a mbeartaítear an fhorbairt chéadluaite a dhéanamh.

(13)  I gcás ina ndiúltóidh údarás pleanála deimhniú a dheonú, déanfaidh sé na cúiseanna ar ar dhiúltaigh sé an deimhniú a dheonú amhlaidh a chur in iúl, le fógra i scríbhinn, don iarratasóir.

(14)  (a)  I gcás ina ndiúltóidh údarás pleanála a mbeidh iarratas déanta chuige faoi fho-alt (3) deimhniú a dheonú don iarratasóir, féadfaidh sé nó sí, tráth nach déanaí ná 3 sheachtain ón dáta a bhfaighidh an t-iarratasóir fógra faoi dhiúltú an údaráis pleanála an deimhniú a dheonú, nó cibé dáta is déanaí ná sin a cheadóidh an chúirt, achomharc a dhéanamh chun na cúirte ar ordú á ordú don údarás pleanála deimhniú i ndáil leis an bhforbairt a dheonú don iarratasóir.

(b)  Féadfaidh an chúirt tráth a bheidh achomharc á éisteacht faoi mhír (a)

(i)  an t-achomharc a dhíbhe agus daingniú a dhéanamh ar dhiúltú an údaráis pleanála an deimhniú a dheonú, nó

(ii)  an t-achomharc a cheadú agus a ordú don údarás pleanála deimhniú i ndáil leis an bhforbairt lena mbaineann a dheonú don iarratasóir.

(15)  Comhlíonfaidh údarás pleanála ordachán ón gcúirt faoin alt seo.

(16)  (a)  Faoi réir mhír (b), déanfaidh údarás pleanála deimhniú a chúlghairm, ar iarratas chuige sin a bheith déanta chuige ag úinéir na talún lenar bhain an deimhniú, nó ag aon duine eile a bheidh ag gníomhú le cead an úinéara sin.

(b)  Ní dhéanfaidh údarás pleanála deimhniú a chúlghairm faoin bhfo-alt seo i gcás ina mbeidh cead deonaithe i leith na forbartha lena mbaineann an deimhniú.

(17)  Aon duine a dhéanfaidh, go feasach nó go meargánta—

(a)  dearbhú reachtúil faoi fho-alt (5), nó

(b)  i gcomhlíonadh airbheartaithe ceanglais faoi fho-alt (6), faisnéis nó doiciméid a thabhairt d'údarás pleanála,

atá bréagach nó míthreorach i bponc ábhartha, nó a chreideann nach fíor aon dearbhú reachtúil den sórt sin a dhéanfaidh sé nó sí nó aon fhaisnéis nó doiciméid a thabharfaidh sé nó sí i gcomhlíonadh airbheartaithe an cheanglais sin, beidh sé nó sí ciontach i gcion agus dlífear—

(i)  ar é nó í a chiontú go hachomair, fíneáil nach mó ná £1,500 nó príosúnacht ar feadh téarma nach faide ná 6 mhí, nó iad araon, a chur air nó uirthi, nó

(ii)  ar é nó í a chiontú ar díotáil, fíneáil nach mó ná £500,000 nó príosúnacht ar feadh téarma nach faide ná 5 bliana, nó iad araon, a chur air nó uirthi.

(18)  Aon duine—

(a)  a bhrionnóidh deimhniú a airbheartaíonn a bheith deonaithe faoin alt seo (dá ngairtear “deimhniú brionnaithe” anseo ina dhiaidh seo san fho-alt seo) nó a rithfidh deimhniú den sórt sin, agus a fhios aige nó aici é a bheith brionnaithe,

(b)  a athróidh, le hintinn calaoise nó meabhlaireachta, deimhniú (dá ngairtear “deimhniú athraithe” anseo ina dhiaidh seo san fho-alt seo) nó a rithfidh deimhniú den sórt sin, agus a fhios aige nó aici é a bheith athraithe amhlaidh, nó

(c)  a mbeidh, gan údarás dleathach nó leithscéal réasúnach eile, deimhniú brionnaithe nó deimhniú athraithe ina sheilbh nó ina seilbh aige nó aici,

beidh sé nó sí ciontach i gcion agus dlífear—

(i)  ar é nó í a chiontú go hachomair, fíneáil nach mó ná £1,500 nó príosúnacht ar feadh téarma nach faide ná 6 mhí, nó iad araon, a chur air nó uirthi, nó

(ii)  ar é nó í a chiontú ar díotáil, fíneáil nach mó ná £500,000 nó príosúnacht ar feadh téarma nach faide ná 5 bliana, nó iad araon, a chur air nó uirthi.

(19)  I gcás ina gciontófar duine ar díotáil i gcion faoi fho-alt (17)(18), féadfaidh an chúirt, i dteannta aon fhíneála nó téarma príosúnachta a fhorchuirfidh an chúirt faoin bhfo-alt sin, a ordú go n-íocfaidh an duine isteach sa chúirt méid atá comhionann, i dtuairim na cúirte, le méid aon ghnóchain a fhabhraíonn chuig an duine sin de bhíthin deimhniú a dheonú ar scór an dearbhaithe reachtúil, na faisnéise nó na ndoiciméad, de réir mar a bheidh, lena mbaineann an cion, agus beidh an tsuim sin, nuair a íocfar de réir an ordaithe sin í, arna forghéilleadh.

(20)  Déanfar na suimeanna go léir a bheidh arna bhforghéilleadh faoi fho-alt (19) a íoc leis an údarás pleanála a dheonaigh an deimhniú lena mbaineann agus tabharfar cuntas iontu sa chuntas dá dtagraítear in alt 96(13) agus ní chuirfear chun feidhme iad ach amháin chun na gcríoch a shonraítear san alt sin.

(21)  I gcás ina gciontófar duine i gcion faoi fho-alt (17), féadfaidh an chúirt deimhniú a deonaíodh ar scór dearbhaithe reachtúil, faisnéise nó doiciméad lena mbaineann an cion a chúlghairm, ar iarratas chuige sin a bheith déanta chuici ag an údarás pleanála a dheonaigh an deimhniú.

(22)  Ní bheidh duine i dteideal, de bhíthin amháin gur deonaíodh deimhniú dó nó di, go ndeonófaí cead dó nó di i leith na forbartha lena mbaineann an deimhniú.

Tithíocht incheannaithe a leithroinnt.

98. —(1)  Ní fhéadfar tithíocht incheannaithe a dhíol nó a ligean ar léas ach amháin le daoine cáilithe a cháileoidh de réir scéime a bhunóidh údarás pleanála faoi fho-alt (2).

(2)  Chun críocha fho-alt (1), déanfaidh gach údarás pleanála scéim a bhunú lena gcinnfear an t-ord tosaíochta a bheidh le tabhairt do dhaoine cáilithe.

(3)  Gan dochar do ghinearáltacht fho-alt (2), beidh aird ag an údarás pleanála, le linn dó scéim dá dtagraítear san fho-alt sin a bhunú, ar na nithe seo a leanas:

(a)  riachtanais chóiríochta daoine cáilithe, go háirithe daoine cáilithe nach mbeidh teach ceannaithe nó tógtha acu roimhe sin lena n-áitiú acu féin nó chun aon chríche eile;

(b)  dálaí tithíochta reatha daoine cáilithe;

(c)  ioncaim nó dálaí airgeadais eile daoine cáilithe (agus féadfar tosaíocht a thabhairt do dhaoine cáilithe arb ísle a leibhéal ioncaim ná leibhéal ioncaim daoine cáilithe eile);

(d)  an tréimhse ar ar a feadh a bhí cónaí ar dhaoine cáilithe i limistéar an phlean forbartha;

(e)  cibé acu a shealbhaíonn nó nach sealbhaíonn daoine cáilithe tithe nó tailte i limistéar an phlean forbartha nó in áit eile;

(f)  fad tithíochta incheannaithe ó áiteanna fostaíochta daoine cáilithe;

(g)  cibé nithe eile a mheasfaidh an t-údarás pleanála is iomchuí nó a fhorordófar chun críocha an ailt seo.

(4)  Maidir le húdarás pleanála—

(a)  déanfaidh sé, le linn dó plean forbartha a dhéanamh nó a athbhreithniú faoi Chuid II, agus

(b)  féadfaidh sé, aon tráth eile,

scéim a dhéanfar faoin alt seo a athbhreithniú agus, de réir mar is cuí leis, leasuithe a dhéanamh ar an scéim nó scéim nua a dhéanamh.

(5)  Is feidhmeanna forchoimeádta iad scéim a dhéanamh faoin alt seo agus leasú a dhéanamh ar aon scéim den sórt sin.

(6)  Chun críocha leithroinnte faoin alt seo, féadfaidh údarás pleanála, ó am go ham, cibé líon nó cion sonraithe de thithe incheannaithe a chur i leataobh do cibé daoine cáilithe nó do cibé aicmí daoine cáilithe is cuí leis.

(7)  San alt seo agus in alt 99, ciallaíonn “léas” léas úinéireachta roinnte de réir bhrí alt 2 d'Acht na dTithe (Forálacha Ilghnéitheacha), 1992.

Rialuithe maidir le hathdhíol tithe áirithe.

99. —(1)  I gcás ina soláthrófar tithe nó ina gcuirfear láithreáin ar fáil de réir alt 96(9)(10), beidh díol nó léas na dtithe nó na láithreán sin faoi réir cibé coinníollacha (más ann) a shonróidh an t-údarás pleanála.

(2)  Gan dochar do ghinearáltacht fho-alt (1), féadfar foráil a dhéanamh, i dtéarmaí agus i gcoinníollacha faoi na fo-ailt sin, maidir leis na nithe seo a leanas—

(a)  fógra a thabhairt don údarás pleanála i dtaobh aon teach nó talamh a athdhíol, agus

(b)  an bonn ar a bhféadfar aon teach nó talamh a dhíolfar nó a ligfear ar léas faoin gCuid seo a áitiú.

(3)  (a)  Ceanglófar i dtéarmaí agus i g coinníollacha faoin alt seo, faoi réir mhíreanna (b) agus (c), i gcás ina ndéanfar aon teach nó talamh a dhíolfar le haon duine de réir fho-alt (1) a athdhíol den chéad uair roimh dheireadh 20 bliain ó dháta an cheannaigh, go ndéanfaidh an duine a bheidh ag díol an tí nó na talún méid atá comhionann le céatadán de na fáltais a íoc leis an údarás pleanála as fáltais an díola, ar céatadán é a ríomhfar de réir na foirmle seo a leanas—

 

Y × 100

Z

i gcás—

arb é Y an difríocht idir margadhluach an tí nó na talún tráth an díola leis an duine agus an praghas a íocadh iarbhír, agus

arb é Z margadhluach an tí tráth an díola leis an duine.

(b)  Déanfar an méid is iníoctha faoi mhír (a) a laghdú 10 faoin gcéad i leith gach bliana iomláine tar éis an 10ú bliain ar lena linn a bhí an duine ar díoladh an teach nó an talamh leis nó léi ag áitiú an tí nó na talún mar ghnáth-áit chónaithe.

(c)  I gcás ina ndéanfadh an méid is iníoctha faoi mhír (a) fáltais an díola (gan táillí agus costais aturnae agus gníomhaire eastáit a áireamh) a laghdú faoi bhun an phraghais a íocadh iarbhír, déanfar an méid is iníoctha a laghdú a mhéid is gá chun an toradh sin a sheachaint.

(d)    (i) Nuair a bheidh an méid is iníoctha faoi mhír (a) á ríomh, déanfar aon fheabhsúcháin ábhartha a rinne an duine ar díoladh an teach nó an talamh leis nó léi a chur i gcuntas go cuí.

(ii)  Chun críche na míre seo, ciallaíonn “feabhsúcháin ábhartha” feabhsúcháin a rinneadh ar an teach (chun é a leathnú, a mhéadú, a dheisiú nó a athchóiriú), ach ní fholaíonn sé maisiú, nó aon fheabhsúcháin a rinneadh ar an talamh lena n-áirítear foirgniú tí.

(4)  Déanfar aon airgead a fhabhróidh chuig údarás pleanála as aon teach nó talamh a athdhíol, faoi réir téarmaí agus coinníollacha de réir fho-alt (1), a íoc isteach sa chuntas ar leithligh dá dtagraítear in alt 96(13) agus beidh sé faoi réir cheanglais eile an fho-ailt sin.

Rialacháin faoin gCuid seo.

100. —(1)  Féadfaidh an tAire rialacháin a dhéanamh—

(a)  ina sonrófar na critéir chun méid na cóiríochta a theastóidh ó dhaoine cáilithe, lena n-áirítear ceanglais íosmhéide agus uasmhéide, a chinneadh, ag féachaint d'aon treoirlínte a shonróidh an tAire i leith soláthair tithíochta faoi Achtanna na dTithe, 1966 go 1998,

(b)  ina rialófar cinneadh ioncaim chun críocha alt 93,

(c)  ina sonrófar nithe chun críocha alt 94(5)98(3), agus

(d)  ina leagfar amach ceanglais a bhaineann le téarmaí agus coinníollacha dá dtagraítear in alt 99(1).

(2)  Féadfaidh rialacháin a dhéanfar faoi fho-alt (1) feidhm a bheith acu i gcoitinne nó faoi threoir aicme shonraithe nó aicmí sonraithe daoine cáilithe nó faoi threoir aon ní eile a mheasfaidh an tAire is cuí.

Feidhmeanna údarás tithíochta agus údarás pleanála.

101. —(1)  I gcás nach é an t-údarás tithíochta do limistéar na feidhme údarás pleanála a chomhlíonfaidh aon fheidhm faoin gCuid seo, rachaidh an t-údarás pleanála i gcomhairle leis an údarás tithíochta don limistéar maidir le comhlíonadh na feidhme sin.

(2)  San alt seo, aon tagairt do “údarás tithíochta”, ciallaíonn sí údarás tithíochta mar a mhínítear é de bhun alt 23(2) d'Acht na dTithe (Forálacha Ilghnéitheacha), 1992.

(1) O.J. Uimh. L 199/54, 9.7.1993.