An Chéad Lch. Lch. Roimhe Seo (Caibidil II Eagraíocht, Foireann, etc.) Ar Aghaidh (CUID VII Nochtadh Leasanna, etc.)

30 2000

An tAcht Um Pleanáil Agus Forbairt, 2000

Caibidil III

Nósanna Imeachta Achomhairc, etc.

Achomhairc agus tarchuir is cúram don Bhord.

125. —Beidh feidhm ag an gCaibidil seo maidir le hachomhairc agus tarchuir chun an Bhoird ach amháin nach mbeidh feidhm aige maidir le hachomhairc faoi alt 182(4)(b).

Dualgas agus cuspóir an Bhoird i ndáil le hachomhairc agus tarchuir.

126. —(1)  Beidh de dhualgas ar an mBord a chinntiú go ndéanfar achomhairc agus tarchuir a chur de láimh ar mhodh a bheidh chomh dlúsúil agus is féidir agus, chun na críche sin, na bearta sin go léir a bheidh ar fáil dó a ghlacadh chun a chinntiú nach mbeidh, a mhéid is indéanta, aon mhoill inseachanta ann ag aon chéim i dtaca le breith a thabhairt ar achomhairc agus ar tharchuir.

(2)  Gan dochar do ghinearáltacht fho-alt (1) agus faoi réir fho-ailt (3), (4) agus (5), beidh sé mar chuspóir ag an mBord a chinntiú go dtabharfar breith ar gach achomharc nó tarchur—

(a)  laistigh de thréimhse 18 seachtain dar tosach an dáta a bhfaighidh an Bord an t-achomharc nó an tarchur, nó

(b)  laistigh de cibé tréimhse eile a fhorordóidh an tAire de réir fho-alt (4), i gcoitinne nó i leith aicme nó aicmí áirithe achomharc nó tarchur.

(3)  (a)  I gcás inar dealraitheach don Bhord nárbh fhéidir nó nár chuí, mar gheall ar imthosca áirithe achomhairc nó tarchuir nó mar gheall ar líon na n-achomharc agus na dtarchur a bheidh curtha faoi bhráid an Bhoird, breith a thabhairt ar an achomharc nó ar an tarchur laistigh den tréimhse dá dtagraítear i mír (a)(b) d'fho-alt (2), de réir mar a bheidh, déanfaidh an Bord, le fógra i scríbhinn a sheirbheálfar ar na páirtithe san achomharc nó sa tarchur roimh éag don tréimhse sin, na cúiseanna nárbh fhéidir nó nár chuí breith a thabhairt ar an achomharc nó ar an tarchur laistigh den tréimhse sin a chur in iúl do na páirtithe sin agus sonróidh sé an dáta a mbeartaíonn an Bord gur roimhe a thabharfar breith ar an achomharc nó ar an tarchur, agus seirbheálfaidh sé fógra den sórt sin freisin ar gach duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur.

(b)  I gcás inar seirbheáladh fógra faoi mhír (a), glacfaidh an Bord na bearta sin go léir a bheidh ar fáil dó chun a chinntiú go dtabharfar breith ar an achomharc nó ar an tarchur roimh an dáta a bheidh sonraithe san fhógra.

(4)  Féadfaidh an tAire le rialacháin an tréimhse dá dtagraítear i bhfo-alt (2)(a) a athrú, i gcoitinne nó i leith aicme nó aicmí áirithe achomharc nó tarchur i gcás inar dealraitheach dó nó di gur gá, de bhua imthosca eisceachtúla, déanamh amhlaidh agus, fad a bheidh na rialacháin sin i bhfeidhm, forléireofar an t-alt seo agus beidh éifeacht leis dá réir sin.

(5)  I gcás ina measfaidh an tAire gur gá nó gur fóirsteanach breith a thabhairt—

(a)  ar achomhairc i gcoinne cinntí (d'aicme shonraithe nó d'aicmí sonraithe) de chuid údarás pleanála faoi alt 34, nó

(b)  ar tharchuir d'aicme shonraithe nó d'aicmí sonraithe,

i ndáil le forbairt d'aicme nó d'aicmí lena bhfuil tábhacht speisialta straitéiseach, eacnamaíoch nó shóisialach don Stát ar mhodh a bheidh chomh dlúsúil agus is féidir ar comhréir le pleanáil chuí agus forbairt inchothaithe, féadfaidh an tAire ordachán a thabhairt don Bhord tosaíocht a thabhairt don aicme nó do na haicmí achomharc nó tarchur lena mbaineann, agus comhlíonfaidh an Bord an tordachán sin.

(6)  Áireoidh an Bord, i ngach tuarascáil a thabharfar faoi alt 118, ráiteas maidir le líon na n-achomharc agus na dtarchur a mbeidh breith tugtha aige orthu laistigh de thréimhse dá dtagraítear i mír (a)(b) d'fho-alt (2) agus cibé faisnéis eile a ordóidh an tAire maidir leis an am a thóg sé breith a thabhairt ar achomhairc agus ar tharchuir.

Forálacha maidir le hachomhairc agus tarchuir a dhéanamh.

127. —(1)  Maidir le hachomharc nó tarchur—

(a)  is i scríbhinn a dhéanfar é,

(b)  luafar ann ainm agus seoladh an achomharcóra nó an duine a dhéanfaidh an tarchur agus an duine, más ann, a bheidh ag gníomhú thar a cheann nó thar a ceann,

(c)  luafar ann ábhar an achomhairc nó an tarchuir,

(d)  luafar go hiomlán ann na forais achomhairc nó tarchuir agus na cúiseanna, na cúinsí agus na hargóintí ar a bhfuil siad bunaithe,

(e)  i gcás achomhairc faoi alt 37 ó dhuine a rinne aighneachtaí nó a thug tuairimí de réir na rialachán ceada, beidh admháil ón údarás pleanála, á rá go bhfuair sé na haighneachtaí nó na tuairimí, ag gabháil leis,

(f)  beidh cibé táille (más ann) a bheidh iníoctha i leith an achomhairc sin nó an tarchuir sin de réir alt 144 ag gabháil leis, agus

(g)  déanfar é laistigh den tréimhse a shonrófar chun an t-achomharc nó an tarchur a dhéanamh.

(2)  (a)  Aon achomharc nó tarchur nach gcomhlíonfaidh ceanglais fho-alt (1), beidh sé neamhbhailí.

(b)  Beidh feidhm ag ceanglas fho-alt (1)(d) cibé acu a dhéanfaidh nó nach ndéanfaidh an t-achomharcóir nó an duine a dhéanfaidh an tarchur, nó a bheartóidh nó nach mbeartóidh sé nó sí, a iarraidh de réir alt 134 go ndéanfar an t-achomharc nó an tarchur a éisteacht ó bhéal.

(3)  Gan dochar d'alt 131134, ní bheidh achomharcóir nó duine a dhéanfaidh an tarchur i dteideal mionléiriú i scríbhinn a dhéanamh ar na forais achomhairc nó tarchuir a luafar san achomharc nó sa tarchur, ná aighneachtaí breise i scríbhinn a dhéanamh i ndáil leis na forais sin, ná forais bhreise achomhairc nó tarchuir a chur isteach agus ní bhreithneoidh an Bord aon mhionléiriú, aighneachtaí nó forais bhreise den sórt sin a gheobhaidh sé.

(4)  (a)  Maidir le hachomharc nó tarchur, beidh cibé doiciméid, sonraí nó faisnéis eile i ndáil leis an achomharc nó leis an tarchur ag gabháil leis a mheasfaidh an t-achomharcóir nó an duine a dhéanfaidh an tarchur is gá nó is cuí.

(b)  Gan dochar d'alt 132, ní bhreithneoidh an Bord aon doiciméid, sonraí nó faisnéis eile a chuirfidh achomharcóir nó duine a dhéanfaidh an tarchur faoina bhráid, seachas na doiciméid, na sonraí nó an fhaisnéis eile a bhí ag gabháil leis an achomharc nó leis an tarchur.

(5)  Déanfar achomharc nó tarchur—

(a)  tríd an achomharc nó an tarchur a chur leis an bpost réamhíoctha chuig an mBord,

(b)  tríd an achomharc nó an tarchur a fhágáil le fostaí de chuid an Bhoird in oifigí an Bhoird le linn uaireanta oifige (de réir mar a chinnfidh an Bord), nó

(c)  ar cibé modh eile a bheidh forordaithe.

Údaráis phleanála do chur doiciméad, etc. faoi bhráid an Bhoird.

128. —I gcás ina ndéanfar achomharc nó tarchur chun an Bhoird déanfaidh an t-údarás pleanála lena mbaineann, laistigh de thréimhse 2 sheachtain dar tosach an lá a chuirfidh an Bord cóip den achomharc nó den tarchur chucu, na nithe seo a leanas a chur faoi bhráid an Bhoird—

(a)  i gcás achomhairc faoi alt 37

(i)  cóip den iarratas pleanála lena mbaineann agus cóip d'aon líníochtaí, léarscáileanna, sonraí, fianaise, ráiteas tionchair timpeallachta, staidéar eile i scríbhinn nó faisnéis bhreise a bheidh faighte acu ón iarratasóir de réir rialachán faoin Acht seo,

(ii)  cóip d'aon tuarascáil a d'ullmhaigh an t-údarás pleanála, nó a ullmhaíodh don údarás pleanála, i ndáil leis an iarratas pleanála, agus

(iii)  cóip de chinneadh an údaráis pleanála i leith an iarratais pleanála agus cóip den fhógra i dtaobh an chinnidh a tugadh don iarratasóir;

(b)  i gcás aon achomhairc nó tarchuir eile, aon fhaisnéis nó doiciméid a bheidh ina seilbh agus is iomchuí maidir leis an ní sin.

Aighneachtaí nó tuairimí ó pháirtithe eile.

129. —(1)  Déanfaidh an Bord, a luaithe is féidir tar éis achomharc nó tarchur a fháil, cóip den chéanna a thabhairt do gach páirtí eile.

(2)  (a)  Féadfaidh gach páirtí eile aighneachtaí i scríbhinn a dhéanamh chuig an mBord nó tuairimí i scríbhinn a thabhairt dó i ndáil leis an achomharc nó leis an tarchur laistigh de thréimhse 4 sheachtain dar tosach an lá a chuirfidh an Bord cóip den achomharc nó den tarchur chuig an bpáirtí sin.

(b)  Ní bhreithneoidh an Bord aon aighneachtaí nó tuairimí a gheobhaidh an Bord tar éis dheireadh na tréimhse dá dtagraítear i mír (a).

(3)  I gcás nach mbeidh aon aighneachtaí ná tuairimí faighte ó pháirtí laistigh den tréimhse dá dtagraítear i bhfo-alt (2), féadfaidh an Bord, gan a thuilleadh fógra a thabhairt don pháirtí sin, breith a thabhairt ar an achomharc nó ar an tarchur.

(4)  Gan dochar d'alt 131134, ní bheidh páirtí i dteideal mionléiriú i scríbhinn a dhéanamh ar aon aighneachtaí a rinneadh ná ar aon tuairimí a tugadh de réir fho-alt (2) ná aon aighneachtaí breise i scríbhinn a dhéanamh ná tuairimí breise i scríbhinn a thabhairt i ndáil leis an achomharc nó leis an tarchur agus ní bhreithneoidh an Bord aon mhionléiriú, aighneachtaí nó tuairimí den sórt sin a gheobhaidh sé.

Aighneachtaí nó tuairimí ó dhaoine seachas páirtithe.

130. —(1) (a)  Féadfaidh aon duine, seachas páirtí, aighneachtaí i scríbhinn a dhéanamh chuig an mBord nó tuairimí i scríbhinn a thabhairt dó i ndáil le hachomharc nó le tarchur, seachas tarchur faoi alt 96(5).

(b)  Gan dochar d'fho-alt (4), féadfar aighneachtaí a dhéanamh nó tuairimí a thabhairt laistigh den tréimhse a shonraítear i bhfo-alt (3) agus ní bhreithneoidh an Bord aon aighneachtaí nó tuairimí a gheobhaidh an Bord tar éis dheireadh na tréimhse sin.

(c)  Maidir le haighneacht nó tuairim—

(i)  is i scríbhinn a dhéanfar nó a thabharfar í,

(ii)  luafar inti ainm agus seoladh an duine a dhéanfaidh an aighneacht nó a thabharfaidh an tuairim mar aon le hainm agus seoladh aon duine a bheidh ag gníomhú thar a cheann nó thar a ceann,

(iii)  luafar inti ábhar na haighneachta nó na tuairime,

(iv)  luafar go hiomlán inti na cúiseanna, na cúinsí agus na hargóintí ar a bhfuil an aighneacht nó an tuairim bunaithe, agus

(v)  beidh cibé táille (más ann) a bheidh iníoctha de réir alt 144 ag gabháil léi.

(2)  Aon aighneacht nó tuairim nach gcomhlíonfaidh fo-alt (1), beidh sí neamhbhailí.

(3)  Is í an tréimhse dá dtagraítear i bhfo-alt (1)(b)

(a)  i gcás ina ndéanfar, de réir rialachán faoi alt 171(5), fógra a fhoilsiú i dtaobh ráiteas tionchair timpeallachta a fháil, an tréimhse 4 sheachtain dar tosach an lá a fhoilseofar aon fhógra a cheanglaítear faoi na rialacháin sin,

(b)  i gcás ina gceanglóidh an Bord fógra a thabhairt faoi alt 142(4), an tréimhse 4 sheachtain dar tosach an lá a fhoilseofar an fógra a cheanglaítear a thabhairt,

(c)  in aon achomharc eile faoin Acht seo, an tréimhse 4 sheachtain dar tosach an lá a gheobhaidh an Bord an t-achomharc nó, i gcás ina mbeidh breis agus achomharc amháin ann i gcoinne chinneadh an údaráis pleanála, an lá is déanaí a gheobhaidh an Bord achomharc, nó

(d)  i gcás tarchuir, an tréimhse 4 sheachtain dar tosach an lá a gheobhaidh an Bord an tarchur.

(4)  Gan dochar d'alt 131134, ní bheidh duine a dhéanfaidh aighneachtaí chuig an mBord nó a thabharfaidh tuairimí dó de réir an ailt seo i dteideal mionléiriú i scríbhinn a dhéanamh ar na haighneachtaí ná ar na tuairimí ná aighneachtaí breise i scríbhinn a dhéanamh ná tuairimí breise i scríbhinn a thabhairt i ndáil leis an achomharc nó le haon ní eile agus ní bhreithneoidh an Bord aon mhionléiriú, aighneachtaí nó tuairimí den sórt sin a gheobhaidh sé.

(5)  Ní bheidh feidhm ag forálacha fho-ailt (1)(b) agus (4) maidir le haighneachtaí a dhéanfaidh nó tuairimí a thabharfaidh Ballstát de na Comhphobail Eorpacha (de réir bhrí Acht na gComhphobal Eorpach, 1972) nó stát eile is páirtí sa Choinbhinsiún Trasteorann, ag éirí as comhchomhairliúchán de réir na Treorach ón gComhairle nó de réir an Choinbhinsiúin Trasteorann, de réir mar a bheidh, i ndáil leis na héifeachtaí a bheadh ag an bhforbairt, lena mbaineann an t-achomharc faoi alt 37, ar an gcomhshaol.

Cumhacht an Bhoird aighneachtaí nó tuairimí a iarraidh.

131. —Más é tuairim an Bhoird, in imthosca áirithe achomhairc nó tarchuir, gur cuí, ar mhaithe leis an gceartas, a iarraidh—

(a)  ar aon pháirtí san achomharc nó sa tarchur,

(b)  ar aon duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur, nó

(c)  ar aon duine nó comhlacht eile,

aighneachtaí a dhéanamh nó tuairimí a thabhairt i ndáil le haon ní a bheidh tagtha chun cinn i ndáil leis an achomharc nó leis an tarchur, féadfaidh an Bord, dá rogha féin, d'ainneoin alt 127(3), 129(3), 130(4)137(4) (b), fógra faoin alt seo a sheirbheáil ar aon duine den sórt sin—

(i)  á iarraidh ar an duine sin, laistigh de thréimhse a shonrófar san fhógra (nach lú ná 2 sheachtain ná nach mó ná 4 sheachtain dar tosach dáta seirbheála an fhógra) aighneachtaí nó tuairimí a chur faoi bhráid an Bhoird maidir leis an ní a bheidh i gceist, agus

(ii)  á lua gurb amhlaidh, mura bhfaighfear aighneachtaí nó tuairimí roimh dheireadh na tréimhse a shonrófar san fhógra, go ndéanfaidh an Bord, tar éis dheireadh na tréimhse sin agus gan a thuilleadh fógra a thabhairt don duine, de bhun alt 133, breith a thabhairt ar an achomharc nó ar an tarchur.

Cumhacht an Bhoird a cheangal doiciméid, etc. a chur faoina bhráid.

132. —(1)  Más é tuairim an Bhoird go bhféadfaidh go mbeidh gá le haon doiciméad, sonraí nó faisnéis eile chun a chumasú dó breith a thabhairt ar achomharc nó ar tharchur, féadfaidh an Bord, dá lánrogha féin, fógra faoin alt seo a sheirbheáil ar aon pháirtí, nó ar aon duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur, mar is cuí, ar fógra é—

(a)  ina gceanglófar ar an duine sin, laistigh de thréimhse a shonrófar san fhógra (is tréimhse nach lú ná 2 sheachtain dar tosach dáta seirbheála an fhógra) an doiciméad sin, na sonraí sin nó an fhaisnéis eile sin, mar a shonrófar san fhógra, a chur faoi bhráid an Bhoird, agus

(b)  ina luafar gurb amhlaidh, mura gcomhlíonfar ceanglais an fhógra, go ndéanfaidh an Bord, de bhun alt 133, tar éis dheireadh na tréimhse a shonrófar amhlaidh agus gan a thuilleadh fógra a thabhairt don duine, an t-achomharc nó an tarchur a dhíbhe nó breith a thabhairt air ar shlí eile.

(2)  Ní fhorléireofar aon ní san alt seo mar ní a dhéanann difear d'aon chumhacht eile a thugtar don Bhord faoin Acht seo chun a cheangal faisnéis nó doiciméid eile nó bhreise a chur isteach.

Cumhacht an Bhoird i gcás ina seirbheálfar fógra faoi alt 131132.

133. —I gcás inar seirbheáladh fógra faoi alt 131132, féadfaidh an Bord, aon tráth tar éis dheireadh na tréimhse a shonrófar san fhógra, tar éis dó aon aighneachtaí nó tuairimí nó aon doiciméad, sonraí nó faisnéis eile a bheidh curtha isteach ag an duine ar seirbheáladh an fógra air nó uirthi a bhreithniú, agus gan a thuilleadh fógra a thabhairt don duine sin, breith a thabhairt ar an achomharc nó ar an tarchur nó, i gcás fógra arna sheirbheáil faoi alt 132, é a dhíbhe.

Éisteachtaí ó bhéal ar achomhairc nó ar tharchuir.

134. —(1)  Féadfaidh an Bord, dá lánrogha féin, achomharc, nó tarchur faoi alt 5, a éisteacht ó bhéal.

(2)  (a)  Féadfaidh páirtí in achomharc nó i dtarchur faoi alt 5 a iarraidh go ndéanfar an t-achomharc nó an tarchur a éisteacht ó bhéal.

(b)  (i)  Is i scríbhinn chuig an mBord a dhéanfar iarraidh go ndéanfar achomharc nó tarchur a éisteacht ó bhéal agus beidh cibé táille (más ann) a bheidh iníoctha i leith na hiarrata de réir alt 144 ag gabháil léi.

(ii)  Ní bhreithneoidh an Bord iarraidh go ndéanfar achomharc nó tarchur a éisteacht ó bhéal mura mbeidh cibé táille (más ann) a bheidh iníoctha i leith na hiarrata ag gabháil léi.

(c)  (i)  Déanfaidh achomharcóir éisteacht ó bhéal ar achomharc faoi alt 37 a iarraidh laistigh den tréimhse chuí dá dtagraítear san alt sin agus ní bhreithneoidh an Bord aon iarraidh a gheobhaidh an Bord tar éis dheireadh na tréimhse sin.

(ii)  Más rud é, maidir le foráil den Acht seo, seachas ailt 37 agus 254(6), lena n-údaraítear achomharc a dhéanamh chun an Bhoird, nach gcumasaíonn sí achomharc a dhéanamh ach amháin laistigh de thréimhse shonraithe nó roimh dheireadh tréimhse sonraithe nó roimh lá sonraithe, ní fhéadfaidh achomharcóir a iarraidh go ndéanfar achomharc a éisteacht ó bhéal ach amháin laistigh den tréimhse shonraithe nó roimh dheireadh na tréimhse sonraithe nó roimh an lá sonraithe agus ní bhreithneoidh an Bord aon iarraidh ar éisteacht ó bhéal nach mbeidh faighte amhlaidh ag an mBord.

(iii)  Maidir le hiarraidh ó dhuine a dhéanfaidh tarchur nó ó achomharcóir faoi alt 254(6) go ndéanfar an tarchur nó an t-achomharc, de réir mar a bheidh, a éisteacht ó bhéal, beidh an iarraidh sin ag gabháil leis an tarchur nó leis an achomharc, agus ní bhreithneoidh an Bord aon iarraidh ar éisteacht ó bhéal a gheobhaidh an Bord seachas iarraidh a bheidh ag gabháil leis an tarchur nó leis an achomharc.

(d)  Maidir le hiarraidh ó pháirtí in achomharc nó i dtarchur, seachas an t-achomharcóir, go ndéanfar achomharc nó tarchur a éisteacht ó bhéal, déanfar í laistigh den tréimhse dá dtagraítear in alt 129(2)(a) ar laistigh di a fhéadfaidh an páirtí aighneachtaí a dhéanamh chuig an mBord nó tuairimí a thabhairt dó i ndáil leis an achomharc nó leis an tarchur, agus ní bhreithneoidh an Bord aon iarraidh den sórt sin a gheobhaidh an Bord tar éis dheireadh na tréimhse sin.

(3)  I gcás ina n-iarrfar ar an mBord éisteacht ó bhéal maidir le hachomharc nó tarchur a thionól agus go gcinnfidh sé breith a thabhairt ar an achomharc nó ar an tarchur gan éisteacht ó bhéal, déanfaidh an Bord fógra maidir lena chinneadh a sheirbheáil ar an duine a d'iarr an éisteacht agus ar gach páirtí eile san achomharc nó sa tarchur agus ar gach duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur.

(4)  (a)  Féadfar iarraidh ar éisteacht ó bhéal a tharraingt siar tráth ar bith.

(b)  Más rud é, tar éis iarraidh ar éisteacht ó bhéal a tharraingt siar faoi mhír (a), go mbeidh breith le tabhairt ar an achomharc nó ar an tarchur gan éisteacht ó bhéal, tabharfaidh an Bord fógra do gach páirtí eile san achomharc nó sa tarchur agus do gach duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur.

Forálacha forlíontacha a bhaineann le héisteachtaí ó bhéal.

135. —(1)  Féadfaidh an Bord nó fostaí de chuid an Bhoird a bheidh údaraithe go cuí ag an mBord duine a shannadh chun éisteacht ó bhéal maidir le hachomharc nó tarchur a sheoladh thar ceann an Bhoird.

(2)  Beidh rogha ag an duine a bheidh ag seoladh éisteachta ó bhéal maidir le haon achomharc nó tarchur i dtaca leis an gcaoi a seolfar an éisteacht agus go háirithe—

(a)  seolfaidh sé nó sí an éisteacht gan aon fhoirmiúlacht mhíchuí,

(b)  cinnfidh sé nó sí an t-ord ina láithreoidh daoine ag an éisteacht,

(c)  ceadóidh sé nó sí d'aon duine láithriú i bpearsa nó duine eile a bheith aige nó aici chun feidhmiú thar a cheann nó thar a ceann,

(d)  tabharfaidh sé nó sí éisteacht do dhuine seachas duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur i gcás ina measfar gur cuí, ar mhaithe leis an gceartas, cead a thabhairt don duine éisteacht a fháil.

(3)  Féadfaidh aon duine a mbeidh éisteacht ó bhéal á sheoladh aige nó aici maidir le haon achomharc nó tarchur a cheangal ar aon oifigeach d'údarás pleanála aon fhaisnéis i ndáil leis an achomharc nó leis an tarchur a thabhairt dó nó di, ar faisnéis í a theastóidh uaidh nó uaithi le réasún chun críocha an achomhairc nó an tarchuir, agus beidh de dhualgas ar an oifigeach an ceanglas a chomhlíonadh.

(4)  Féadfaidh aon duine a mbeidh éisteacht ó bhéal á sheoladh aige nó aici maidir le haon achomharc nó tarchur fianaise a ghlacadh faoi mhionn nó faoi dhearbhasc agus chun na críche sin féadfaidh sé nó sí daoine a chur faoi mhionn nó faoi dhearbhasc, agus beidh aon duine a thabharfaidh fianaise ag aon éisteacht den sórt sin i dteideal na ndíolúintí agus na bpribhléidí céanna a bheadh aige nó aici dá mba fhinné os comhair na hArd-Chúirte é nó í.

(5)  (a)  Faoi réir mhír (b), féadfaidh an Bord, i ndáil le héisteacht ó bhéal maidir le haon achomharc nó tarchur, trí fhógra i scríbhinn chuige sin a thabhairt d'aon duine, a cheangal ar an duine sin ceachtar de na nithe seo a leanas nó iad araon a dhéanamh:

(i)  freastal ag cibé tráth agus i cibé áit a shonrófar san fhógra chun fianaise a thabhairt i ndáil le haon ní a bheidh i gceist ag an éisteacht;

(ii)  aon leabhair, gníomhais, conarthaí, cuntais, dearbháin, léarscáileanna, pleananna, doiciméid nó faisnéis eile a bheidh ina sheilbh nó ina seilbh, faoina choimeád nó faoina coimeád nó faoina rialú aige nó aici agus a bhaineann le haon ní den sórt sin a thabhairt ar aird.

(b)  I gcás ina dtabharfar fógra do dhuine faoi mhír (a):

(i)  déanfaidh an Bord cibé caiteachais réasúnacha cothaithe agus taistil a chinnfidh an Bord, de réir na rátaí is infheidhme de thuras na huaire maidir le hoifigigh shinsearacha údaráis pleanála, a íoc le haon duine nó a thairiscint d'aon duine a gceanglaítear air nó uirthi freastal a dhéanamh;

(ii)  maidir le haon duine a d'fhreastail, i gcomhlíonadh fógra, in aon áit, déanfaidh an Bord, ach amháin a mhéid a bheidh caiteachais réasúnacha riachtanacha an fhreastail íoctha leis nó léi cheana féin, na caiteachais sin a íoc leis nó léi, agus beidh na caiteachais sin, mura n-íocfar amhlaidh iad, inghnóthaithe mar fhiach conartha shimplí in aon chúirt dlínse inniúla.

(6)  Gach duine a mbeidh fógra faoi fho-alt (5) tugtha dó nó di agus a dhiúltóidh, nó a mhainneoidh go toiliúil, freastal de réir an fhógra nó a dhéanfaidh go toiliúil aon doiciméad nó faisnéis eile lena mbaineann an fógra a athrú, a choinneáil siar, a cheilt nó a dhíothú nó, tar éis dó nó di freastal amhlaidh, a dhiúltóidh fianaise a thabhairt nó a dhiúltóidh, nó a mhainneoidh go toiliúil, aon doiciméad nó faisnéis eile lena mbaineann an fógra a thabhairt ar aird, beidh sé nó sí ciontach i gcion.

(7)  I gcás aon duine—

(a)  a thabharfaidh, go toiliúil, fianaise atá ábhartha maidir leis an éisteacht ó bhéal agus is eol dó nó di a bheith bréagach nó nach gcreideann sé nó sí a bheith fíor,

(b)  a dhéanfaidh, trí ghníomh nó neamhghníomh, treampán nó cosc a chur ar an duine a bheidh ag seoladh na héisteachta ó bhéal agus é nó í ag comhlíonadh a fheidhmeanna nó a feidhmeanna,

(c)  a dhiúltóidh mionn a ghlacadh nó dearbhasc a dhéanamh nuair a cheanglóidh duine a bheidh ag tionól na héisteachta ó bhéal go dleathach air nó uirthi déanamh amhlaidh,

(d)  a dhiúltóidh aon cheist a fhreagairt a bhféadfaidh an duine a bheidh ag seoladh na héisteachta ó bhéal a cheangal le dlí freagra a thabhairt uirthi, nó

(e)  a dhéanfaidh aon rud eile, nó a mhainneoidh aon rud eile a dhéanamh, a bheadh, dá mba í an Ard-Chúirt a rinne an fiosrúchán, ina dhíspeagadh ar an gcúirt sin,

beidh an duine ciontach i gcion.

(8)  (a)  Féadfar éisteacht ó bhéal a sheoladh trí mheán na Gaeilge nó trí mheán an Bhéarla.

(b)  I gcás ina mbaineann éisteacht ó bhéal le forbairt laistigh den Ghaeltacht, seolfar an éisteacht trí mheán na Gaeilge, mura gcomhaontóidh na páirtithe san achomharc nó sa tarchur lena mbaineann an éisteacht gur cóir an éisteacht a sheoladh i mBéarla.

(c)  I gcás ina mbaineann éisteacht ó bhéal le forbairt lasmuigh den Ghaeltacht, seolfar an éisteacht trí mheán an Bhéarla, mura gcomhaontóidh na páirtithe san achomharc nó sa tarchur lena mbaineann an éisteacht gur cóir an éisteacht a sheoladh i nGaeilge.

Cruinnithe a chomóradh maidir le tarchuir.

136. —(1)  I gcás inar dealraitheach don Bhord go bhfuil sé fóirsteanach nó caoithiúil d'fhonn breith a thabhairt maidir le tarchur faoi alt 34(5), 96(5)193(2), féadfaidh an Bord dá lánrogha féin cruinniú de na páirtithe a chomóradh.

(2)  Coimeádfaidh an Bord taifead i scríbhinn ar chruinniú a chomórfar de réir an ailt seo agus cuirfear agus coimeádfar cóip den taifead leis na doiciméid lena mbaineann an tarchur áirithe agus, i gcás ina bhfuil baint ag an tarchur le hachomharc, leis na doiciméid lena mbaineann an t-achomharc áirithe.

Nithe seachas nithe a bheidh dúisithe ag páirtithe.

137. —(1)  Féadfaidh an Bord, le linn dó breith a thabhairt ar achomharc nó ar tharchur, nithe a chur i gcuntas seachas iad sin a bheidh dúisithe ag na páirtithe nó ag aon duine a rinne aighneachtaí chuig an mBord nó a thug tuairimí dó i ndáil leis an achomharc nó leis an tarchur más nithe iad a bhféadfaidh an Bord aird a bheith aige orthu de bhua an Achta seo.

(2)  Tabharfaidh an Bord fógra i scríbhinn do gach ceann de na páirtithe agus do gach duine de na daoine a rinne aighneachtaí nó a thug tuairimí i ndáil leis an achomharc nó leis an tarchur i dtaobh na nithe a bheartaíonn sé a chur i gcuntas faoi fho-alt (1) agus cuirfidh sé in iúl san fhógra sin—

(a)  i gcás ina mbeartaíonn an Bord éisteacht ó bhéal a thionól maidir leis an achomharc nó leis an tarchur, nó i gcás ina mbeifear tar éis éisteacht ó bhéal maidir leis an achomharc nó leis an tarchur a chríochnú agus go measfaidh an Bord é a bheith fóirsteanach an éisteacht a athoscailt, go bhféadfar aighneachtaí i ndáil leis na nithe a dhéanamh chuig an duine a bheidh ag seoladh na héisteachta, nó

(b)  i gcás nach mbeartaíonn an Bord éisteacht ó bhéal a thionól maidir leis an achomharc nó leis an tarchur, nó i gcás ina mbeifear tar éis éisteacht ó bhéal maidir leis an achomharc nó leis an tarchur a críochnú agus nach measfaidh an Bord é a bheith fóirsteanach an éisteacht a athoscailt, go bhféadfar aighneachtaí i ndáil leis na nithe a dhéanamh chuig an mBord, nó tuairimí i ndáil leis na nithe a thabhairt dó, i scríbhinn, laistigh de thréimhse a shonrófar san fhógra (ar tréimhse í nach lú ná 2 sheachtain nó nach mó ná 4 sheachtain dar tosach dáta seirbheála an fhógra).

(3)  I gcás ina mbeidh fógra tugtha ag an mBord, de réir fho-alt (2)(a), ceadófar do na páirtithe agus d'aon duine eile a dtabharfar fógra dó nó di, má bhíonn siad i láthair ag an éisteacht ó bhéal, aighneachtaí a dhéanamh chuig an mBord i ndáil leis na nithe ab ábhar don fhógra nó is iomchuí, i dtuairim an duine a bheidh ag seoladh na héisteachta, maidir leis an achomharc nó leis an tarchur.

(4)  (a)  Ní bhreithneoidh an Bord aighneachtaí nó tuairimí a gheobhaidh an Bord tar éis dheireadh na tréimhse dá dtagraítear i bhfo-alt (2)(b).

(b)  Faoi réir alt 131, i gcás ina ndéanfaidh páirtí nó duine dá dtagraítear i bhfo-alt (1) aighneachtaí chuig an mBord nó ina dtabharfaidh sé nó sí tuairimí dó de réir fho-alt (2)(b), ní bheidh an páirtí sin nó an duine sin i dteideal mionléiriú i scríbhinn a dhéanamh ar na haighneachtaí sin nó ar na tuairimí sin ná aighneachtaí breise i scríbhinn a dhéanamh ná tuairimí breise i scríbhinn a thabhairt i ndáil leis na nithe dá dtagraítear i bhfo-alt (1) agus ní bhreithneoidh an Bord aon mhionléiriú, aighneachtaí nó tuairimí den sórt sin a gheobhaidh sé.

Féadfaidh an Bord achomhairc nó tarchuir a dhíbhe más achomhairc nó tarchuir chráiteacha, etc., iad.

138. —(1)  Beidh lánrogha ag an mBord achomharc nó tarchur a dhíbhe—

(a)  más rud é, tar éis forais an achomhairc nó an tarchuir a bhreithniú, gurb é tuairim an Bhoird maidir leis an achomharc nó leis an tarchur—

(i)  go bhfuil sé cráiteach nó suaibhreosach nó nach bhfuil substaint ná bunús leis, nó

(ii)  nach bhfuil sé á dhéanamh ach amháin le hintinn moill a chur ar an bhforbairt nó go bhfuil sé á dhéanamh le hintinn a áirithiú go n-íocfaidh aon duine airgead, bronntanais, comaoin nó aslach eile,

(b)  i gcás inar deimhin leis an mBord nach cóir dó, sna himthosca áirithe, an t-achomharc nó an tarchur a bhreithniú tuilleadh ag féachaint do na nithe seo a leanas—

(i)  an cineál achomhairc atá ann (lena n-áirítear aon cheist a eascraíonn, i dtuairim an Bhoird, as an achomharc nó as an tarchur), nó

(ii)  aon chead roimhe sin a mheasfaidh sé is iomchuí.

(2)  Luafar i gcinneadh a dhéanfar faoin alt seo na príomhchúiseanna agus na príomhchúinsí ar a bhfuil an cinneadh bunaithe.

(3)  Féadfaidh an Bord, dá lánrogha féin, éisteacht ó bhéal a thionól faoi alt 134 chun breith a thabhairt i dtaobh an bhfuil achomharc nó tarchur á dhéanamh agus ní dá dtagraítear i bhfo-alt (1)(a)(ii) ar intinn.

Achomhairc i gcoinne coinníollacha.

139. —(1)  Más rud é—

(a)  go ndéanfar achomharc i gcoinne cinnidh ag údarás pleanála cead a dheonú,

(b)  nach mbaineann an t-achomharc ach le coinníoll nó le coinníollacha a bhforáiltear leis an gcinneadh go mbeidh an cead faoina réir, agus

(c)  gur deimhin leis an mBord, ag féachaint do chineál an choinníll nó na gcoinníollacha, nach ndlífí den Bhord breith a thabhairt ar an iarratas iomchuí amhail is dá mba chuige féin a rinneadh é sa chéad ásc,

ansin, faoi réir an Bord do chomhlíonadh fho-alt (2), féadfaidh an Bord, dá lánrogha féin, cibé ordacháin is cuí leis a thabhairt don údarás pleanála iomchuí maidir leis an údarás sin do chur isteach, do leasú nó do bhaint amach an choinníll nó na gcoinníollacha lena mbaineann an t-achomharc nó do chur isteach, do leasú nó do bhaint amach coinníollacha eile.

(2)  I bhfeidhmiú na cumhachta a thugtar dó le fo-alt (1), cé is moite de bhreithniú a dhéanamh ar an gcoinníoll nó ar na coinníollacha lena mbaineann an t-achomharc iomchuí, ní bhreithneoidh an Bord ach—

(a)  na nithe atá leagtha amach in alt 34(2)(a), agus

(b)  téarmaí aon cheada roimhe sin a mheasfaidh an Bord a bheith iomchuí.

Achomhairc, iarratais agus tarchuir a tharraingt siar.

140. —(1) (a)  Aon duine a mbeidh achomharc, iarratas pleanála lena mbaineann achomharc nó tarchur déanta aige nó aici, féadfaidh sé nó sí an t-achomharc, an t-iarratas pleanála nó an tarchur a tharraingt siar, i scríbhinn, aon tráth sula dtabharfaidh an Bord breith ar an achomharc nó ar an tarchur sin.

(b)  A luaithe is féidir tar éis tarraingt siar a fháil, cuirfidh an Bord an tarraingt siar in iúl do gach páirtí eile nó do gach duine eile a rinne aighneachtaí nó a thug tuairimí maidir leis an achomharc nó leis an tarchur.

(2)  (a)  Gan dochar d'fho-alt (1), i gcás inarb é tuairim an Bhoird go ndearnadh achomharc, nó iarratas pleanála lena mbaineann achomharc, nó tarchur, a thréigean, féadfaidh an Bord fógra a sheirbheáil ar an duine a rinne an t-achomharc, an t-iarratas nó an tarchur, de réir mar is cuí, á rá gurb é sin a thuairim agus á cheangal ar an duine sin, laistigh de thréimhse a shonrófar san fhógra (is tréimhse nach lú ná dhá sheachtain nó nach mó ná ceithre sheachtain dar tosach dáta seirbheála an fhógra) aighneacht i scríbhinn a dhéanamh chuig an mBord i dtaobh cén fáth nach cóir a mheas gur tarraingíodh siar an t-achomharc, an t-iarratas nó an tarchur.

(b)  I gcás inar seirbheáladh fógra faoi mhír (a), féadfaidh an Bord, aon tráth tar éis dheireadh na tréimhse a bheidh sonraithe san fhógra, agus tar éis an aighneacht (más ann) a bheidh déanta chuig an mBord de bhun an fhógra a bhreithniú, a dhearbhú go measfar gur tarraingíodh siar an t-achomharc, an t-iarratas nó an tarchur, de réir mar is cuí.

(3)  Más rud é, de bhun an ailt seo, go ndéanfaidh duine iarratas pleanála lena mbaineann achomharc a tharraingt siar, nó go ndearbhóidh an Bord go measfar gur tarraingíodh iarratas siar, beidh feidhm ag na forálacha seo a leanas maidir leis an iarratas:

(a)  measfar gur tarraingíodh siar aon achomharc i ndáil leis an iarratas agus dá réir sin ní thabharfaidh an Bord breith air, agus

(b)  d'ainneoin aon chinneadh roimhe sin faoi alt 34 ag údarás pleanála maidir leis an iarratas, ní dheonóidh an t-údarás aon chead faoin alt sin ar scór an iarratais.

Am le haghaidh cinntí agus achomharc, etc.

141. —(1)  I gcás ina gceanglaítear, le ceanglas den Acht seo nó faoin Acht seo, go dtabharfaidh údarás pleanála nó an Bord cinneadh laistigh de thréimhse shonraithe agus gur lá saoire poiblí (de réir bhrí an Achta um Laethanta Saoire (Fostaithe), 1973) nó aon lá eile ar a mbeidh oifigí an údaráis pleanála nó an Bhoird dúnta an lá deiridh den tréimhse sin, beidh an cinneadh bailí más rud é go dtabharfar é ar an gcéad lá eile ina dhiaidh sin a mbeidh oifigí an údaráis pleanála nó an Bhoird, de réir mar a bheidh, ar oscailt.

(2)  I gcás gur Satharn, Domhnach, lá saoire poiblí (de réir bhrí an Achta um Laethanta Saoire (Fostaithe), 1973) nó aon lá eile ar a mbeidh oifigí an Bhoird dúnta an lá deiridh den tréimhse a bheidh sonraithe chun achomharc nó tarchur a dhéanamh, beidh achomharc nó tarchur bailí (d'ainneoin aon fhorála eile den Acht seo) mar achomharc nó tarchur a rinneadh in am más rud é go bhfaighidh an Bord é ar an gcéad lá eile ina dhiaidh sin a mbeidh oifigí an Bhoird ar oscailt.

(3)  I gcás ina gceanglaítear, le ceanglas den Acht seo nó faoin Acht seo, go ndéanfar aighneachtaí nó iarraidh chuig an mBord, go dtabharfar tuairimí dó nó go gcuirfear doiciméid, sonraí nó faisnéis eile faoina bhráid laistigh de thréimhse shonraithe agus gur lá saoire poiblí (de réir bhrí an Achta um Laethanta Saoire (Fostaithe), 1973) nó aon lá eile a mbeidh oifigí an Bhoird dúnta an lá deiridh den tréimhse sin, measfar go bhfuarthas na haighneachtaí, na tuairimí nó an iarraidh ar dhoiciméid, ar shonraí nó ar fhaisnéis eile (de réir mar a bheidh) roimh dheireadh na tréimhse sin más rud é go bhfaighidh an Bord iad ar an gcéad lá eile ina dhiaidh sin a mbeidh oifigí an Bhoird ar oscailt.

Rialacháin i ndáil le hachomhairc agus tarchuir.

142. —(1)  Féadfaidh an tAire le rialacháin—

(a)  foráil a dhéanamh maidir le cibé nithe breise, teagmhasacha, iarmhartacha nó forlíontacha, i dtaca le nós imeachta i leith achomharc, is dealraitheach don Aire a bheith riachtanach nó fóirsteanach, agus

(b)  cibé foráil a dhéanamh i dtaca le nós imeachta i leith tarchur is dealraitheach don Aire a bheith riachtanach nó fóirsteanach.

(2)  Gan dochar do ghinearáltacht fho-alt (1), féadfar le rialacháin faoin alt seo a chumasú don Bhord, i gcás ina mbeidh breith á tabhairt aige maidir le hachomharc faoi alt 37, a iarraidh ar iarratasóir, agus a chumasú d'iarratasóir a mbeidh iarrtha amhlaidh air nó uirthi, pleananna athbhreithnithe nó líníochtaí eile lena modhnaítear an fhorbairt lena mbaineann an t-achomharc, nó sonraí eile lena ndéantar socrú chun an fhorbairt sin a mhodhnú, a chur faoi bhráid an Bhoird.

(3)  I gcás ina gcuirfear pleananna, líníochtaí nó sonraí dá dtagraítear i bhfo-alt (2) faoi bhráid an Bhoird de réir rialachán faoin alt seo, féadfaidh an Bord, le linn dó breith a thabhairt ar an achomharc, cead a dheonú i leith na forbartha iomchuí arna modhnú le gach ceann nó le haon cheann de na pleananna, de na líníochtaí nó de na sonraí.

(4)  Gan dochar do ghinearáltacht fho-alt (1), féadfaidh an Bord a cheangal ar aon pháirtí in achomharc nó i dtarchur cibé fógra poiblí a shonróidh an Bord a thabhairt ina thaobh agus féadfaidh sé a cheangal, go háirithe, fógra a thabhairt ag an láithreán nó trína fhoilsiú i nuachtán a scaiptear sa cheantar ina bhfuil an talamh nó an déanmhas lena mbaineann an t-achomharc nó an tarchur.

Beidh aird ag an mBord ar bheartais agus cuspóirí áirithe.

143. —(1)  Beidh aird ag an mBord, le linn dó a fheidhmeanna a chomhlíonadh, ar na beartais agus ar na cuspóirí, de thuras na huaire, de chuid an Rialtais, údaráis Stáit, an Aire, údarás pleanála agus aon chomhlachta eile is údarás poiblí a bhfuil baint, nó a bhféadfadh baint a bheith, ag a fheidhmeanna le pleanáil chuí agus forbairt inchothaithe cathracha, bailte nó limistéar eile, uirbeach nó tuaithe.

(2)  San alt seo ciallaíonn “údarás poiblí” aon chomhlacht arna bhunú le reacht nó faoi reacht a mbeidh sé dearbhaithe de thuras na huaire, le rialachán arna dhéanamh ag an Aire, gur údarás poiblí é chun críocha an ailt seo.

Táillí is iníoctha leis an mBord.

144. —(1)  Faoi réir cheadú an Aire, féadfaidh an Bord táillí a chinneadh i ndáil le hachomhairc, le tarchuir, le hiarratas a dhéanamh faoi alt 37(5), le haighneachtaí a dhéanamh chuig an mBord nó le tuairimí a thabhairt dó faoi alt 130, agus le hiarrataí ar éisteachtaí ó bhéal faoi alt 134, agus féadfaidh sé foráil a dhéanamh maidir le táillí éagsúla a íoc i ndáil le hachomhairc agus tarchuir d'aicmí nó de thuairiscí éagsúla, maidir le díolúine a thabhairt ó tháillí a íoc in imthosca sonraithe, agus maidir le táillí a tharscaoileadh, a mhaitheamh nó a aisíoc go hiomlán nó go páirteach in imthosca sonraithe.

(2)  Déanfaidh an Bord na táillí a chinnfear faoi fho-alt (1) a athbhreithniú ó am go ham, ach gach trí bliana ar a laghad, ag féachaint d'aon athrú sa treoirphraghas do thomhaltóirí ó chinneadh na dtáillí a bheidh i bhfeidhm de thuras na huaire, agus féadfaidh sé na táillí a leasú chun torthaí an athbhreithnithe sin a léiriú, gan ceadú an Aire faoi fho-alt (1) a bheith riachtanach.

(3)  Chun críocha an ailt seo, ciallaíonn “athrú sa treoirphraghas do thomhaltóirí” an difríocht idir an Treoir-Uimhir Praghasanna do Thomhaltóirí — Gach Ítim is deireanaí a d'fhoilsigh an Phríomh-Oifig Staidrimh roimh dháta an chinnidh faoin alt seo agus an uimhir sin is déanaí a foilsíodh roimh dháta an athbhreithnithe faoi fho-alt (2), arna shloinneadh mar chéatadán den uimhir is déanaí a luaitear.

(4)  I gcás ina gcinnfidh nó ina leasóidh an Bord táillí de réir an ailt seo, tabharfaidh sé fógra maidir leis na táillí i nuachtán amháin ar a laghad a scaiptear sa Stát, tráth nach lú ná 8 seachtain sula dtiocfaidh na táillí in éifeacht.

(5)  Leanfaidh táillí, arna gcinneadh de réir rialachán faoi alt 10(1)(b) d'Acht 1982, de bheith iníoctha leis an mBord de réir na rialachán sin go dtí go gcinnfidh an Bord táillí de réir an ailt seo.

(6)  Sonróidh an Bord táillí chun cóipeanna a dhéanamh faoi alt 5(6)(a), is táillí nach mó ná an costas a ghabhann leis na cóipeanna a dhéanamh.

Caiteachais achomhairc nó tarchuir.

145. —(1)  Más rud é go ndéanfar achomharc nó tarchur chuig an mBord—

(a)  féadfaidh an Bord, más cuí leis é agus is cuma cad é toradh an achomhairc nó an tarchuir, a ordú don údarás pleanála—

(i)  cibé suim a shonróidh an Bord, dá lánrogha féin, a íoc leis an achomharcóir nó leis an duine a dhéanfaidh an tarchur mar chúiteamh sa chaiteachas a bhain dó nó di i ndáil leis an achomharc nó an tarchur, agus

(ii)  cibé suim a shonróidh an Bord, dá lánrogha féin, a íoc leis an mBord mar chúiteamh don Bhord faoi chomhair an chaiteachais a thabhaigh an Bord i ndáil leis an achomharc nó an tarchur,

agus

(b)  i gcás ina ndaingneofar nó ina n-athrófar cinneadh an údaráis pleanála i ndáil le hachomharc nó le tarchur, mura ndéanfaidh an Bord, le linn dó breith a thabhairt ar an achomhairc nó ar an tarchur, géilleadh do bhrí na bhforas achomhairc nó tarchuir, nó más dóigh leis an mBord go ndearnadh an t-achomharc nó an tarchur le hintinn moill a chur ar an bhforbairt nó go bhfaighidh tríú páirtí gnóchan airgeadaíochta, féadfaidh an Bord, más cuí leis, a ordú don achomharcóir nó don duine a dhéanfaidh an tarchur—

(i)  cibé suim a shonróidh an Bord, dá lánrogha féin, a íoc leis an údarás pleanála mar chúiteamh don údarás pleanála sa chaiteachas a bhain dó i ndáil leis an achomharc nó leis an tarchur,

(ii)  cibé suim a shonróidh an Bord, dá lánrogha féin, a íoc le haon cheann de na páirtithe eile san achomharc nó sa tarchur, mar chúiteamh don pháirtí sa chaiteachas a bhain dó nó di i ndáil leis an achomharc nó leis an tarchur, agus

(iii)  cibé suim a shonróidh an Bord, dá lánrogha féin, a íoc leis an mBord mar chúiteamh don Bhord faoi chomhair an chaiteachais a thabhaigh an Bord i ndáil leis an achomharc nó leis an tarchur.

(2)  Beidh aon suim a ordófar faoin alt seo a íoc inghnóthaithe, mura n-íocfar í, mar fhiach conartha shimplí in aon chúirt dlínse inniúla.

Tuarascálacha agus doiciméid de chuid an Bhoird.

146. —(1)  Féadfaidh an Bord nó fostaí de chuid an Bhoird a bheidh údaraithe go cuí ag an mBord, i dtaca le comhlíonadh aon cheann d'fheidhmeanna an Bhoird faoin Acht seo, duine a shannadh chun tuarascáil a thabhairt thar ceann an Bhoird maidir le haon ní.

(2)  Tabharfaidh duine a shannfar de réir fho-alt (1) tuarascáil i scríbhinn, a mbeidh moladh inti, maidir leis an ní don Bhord,, agus breithneoidh an Bord an tuarascáil agus an moladh sula dtabharfaidh sé breith maidir leis an ní.

(3)  (a)  Déanfar na doiciméid a bhaineann le haon achomharc nó tarchur nó le cinneadh ag an mBord faoi alt 175 nó faoi Chuid XIV a chur ar fáil ag oifigí an Bhoird lena niniúchadh ag daoine den phobal agus féadfar iad a chur ar fáil ag cibé áiteanna eile a chinnfidh an Bord laistigh de 3 lá oibre i ndiaidh an chinnidh iomchuí.

(b)  Déanfar cóipeanna de na doiciméid, agus de shleachta as na doiciméid sin, a chur ar fáil ag oifigí an Bhoird, nó ag cibé áiteanna eile a chinnfidh an Bord, ar tháille nach mó ná an costas réasúnach a ghabhann leis an gcóip a dhéanamh.

(4)  Déanfar na doiciméid lena mbaineann fo-alt (3) a chur ar fáil ar feadh tréimhse 5 bliana ar a laghad dar tosach an tríú lá oibre tar éis chinneadh an Bhoird i ndáil leis an ní.