An Chéad Lch. Lch. Roimhe Seo (CUID IX Criosanna Forbartha Straitéisí) Ar Aghaidh (CUID XI Forbairt ag Údaráis Áitiúla agus Údaráis Stáit, etc.)

30 2000

An tAcht Um Pleanáil Agus Forbairt, 2000

CUID X

Measúnacht Tionchair Timpeallachta

Ceanglas maidir le ráiteas tionchair timpeallachta.

172. —(1)  I gcás ina ndéanfar iarratas pleanála i leith forbartha nó aicme forbartha dá dtagraítear i rialacháin faoi alt 176, déanfar, i dteannta ceanglais na rialachán ceada a bheith comhlíonta i dtaca leis an iarratas, ráiteas tionchair timpeallachta a chur ag gabháil leis.

(2)  I dteannta na nithe atá leagtha amach in alt 33(2), féadfaidh an tAire rialacháin cheada a dhéanamh i ndáil le hiarratais phleanála nach foláir ráitis tionchair timpeallachta a bheith ag gabháil leo a chur isteach.

(3)  (a)  Ar iarraidh ó iarratasóir nó ó dhuine a mbeidh ar intinn aige nó aici iarratas a dhéanamh ar chead, féadfaidh an Bord, tar éis deis a thabhairt don údarás pleanála lena mbaineann tuairimí a thabhairt maidir leis an iarraidh, agus i gcás inar deimhin leis an mBord gur cóir é a dhéanamh de bharr imthosca eisceachtúla, díolúine a dheonú, i leith forbartha beartaithe, ó cheanglas de chuid rialachán, nó faoi rialacháin, faoin alt seo ráiteas tionchair timpeallachta a ullmhú, ach amháin nach bhféadfar aon díolúine a dheonú i leith forbartha beartaithe más rud é go bhfuil Ballstát eile de na Comhphobail Eorpacha nó stát eile is páirtí sa Choinbhinsiún Trasteorann, tar éis faisnéis a bheith tugtha dó maidir leis an bhforbairt bheartaithe agus na héifeachtaí is dócha a bheadh aici ar an timpeallacht sa Stát sin, tar éis a chur in iúl go bhfuil ar intinn aige tuairimí a thabhairt maidir leis na héifeachtaí sin.

(b)  Déanfaidh an Bord, le linn dó díolúine faoi mhír (a) a dheonú, breithniú ar na nithe seo a leanas—

(i)  an cóir na héifeachtaí, más ann, a bheidh ag an bhforbairt bheartaithe ar an gcomhshaol a mheasúnú ar mhodh éigin eile, agus

(ii)  an cóir an fhaisnéis a éireoidh as an measúnacht a chur ar fáil do dhaoine den phobal,

agus féadfaidh an Bord cibé ceanglais maidir leis na nithe seo a mheasfaidh sé is gá nó is cuí a chur chun feidhme i ndáil leis an iarratas ar chead.

(c)  Déanfaidh an Bord, a luaithe is féidir, cinneadh an Bhoird ar aon iarraidh arna déanamh faoi mhír (a), agus aon cheanglais arna gcur chun feidhme faoi mhír (b), a chur in iúl don údarás pleanála lena mbaineann.

(d)  Déanfar, a luaithe is féidir, fógra i dtaobh aon díolúine a bheidh deonaithe faoi mhír (a), i dtaobh na gcúiseanna a bhí leis an díolúine a dheonú, agus i dtaobh aon cheanglais arna gcur chun feidhme faoi mhír (b)

(i)  a fhoilsiú san Iris Oifigiúil agus i nuachtán laethúil amháin ar a laghad a fhoilsítear sa Stát,

(ii)  a thabhairt, mar aon le cóip den fhaisnéis, más ann, a bheidh curtha ar fáil do dhaoine den phobal de réir mhír (b), do Choimisiún na gComhphobal Eorpach.

(4)  (a)  Aon duine a dhéanfaidh iarraidh chuig an mBord ar dhíolúine faoi fho-alt (3), cuirfidh sé nó sí in iúl don údarás pleanála lena mbaineann, a luaithe is féidir, go ndearnadh an iarraidh agus cén dáta a rinneadh í.

(b)  D'ainneoin fho-alt (8) d'alt 34, maidir leis an tréimhse chun cinneadh a dhéanamh dá dtagraítear san fho-alt sin, ní áireofar inti, i gcás ina ndéanfar iarraidh chuig an mBord faoi fho-alt (3) den alt seo, an tréimhse dar tosach an lá a dhéanfar an iarraidh agus dar críoch an lá a gheobhaidh an t-údarás pleanála lena mbaineann fógra i dtaobh chinneadh an Bhoird ar an iarraidh.

(5)  I dteannta na nithe dá bhforáiltear faoi Chuid VI, Caibidil III, féadfaidh an tAire ceanglais bhreise a fhorordú maidir le hachomhairc nach foláir ráitis tionchair timpeallachta a bheith ag gabháil leo a chur faoi bhráid an Bhoird.

Cead le haghaidh forbartha ar gá measúnacht tionchair timpeallachta ina leith.

173. —(1)  I dteannta cheanglais alt 34(3), i gcás iarratais a ndearnadh ráiteas tionchair timpeallachta a chur faoi bhráid an údaráis pleanála ina leith de réir alt 172, beidh aird ag an údarás pleanála, agus ag an mBord ar achomharc, ar an ráiteas, ar aon fhaisnéis fhorlíontach a thabharfar i ndáil leis an ráiteas agus ar aon aighneachtaí nó tuairimí a thabharfar maidir le héifeachtaí na forbartha beartaithe ar an gcomhshaol.

(2)  (a)  Má iarrann iarratasóir nó duine a bhfuil ar intinn aige nó aici iarratas a dhéanamh ar chead amhlaidh, tabharfaidh an t-údarás pleanála lena mbaineann tuairim scríofa maidir leis an bhfaisnéis a bheidh i ráiteas tionchair timpeallachta, faoi réir aon chomhchomhairliúchán forordaithe a bheidh le déanamh ag an údarás pleanála i ndáil le tuairim den sórt sin, sula gcuirfidh an duine sin isteach an t-iarratas go ndeonófar cead pleanála.

(b)  Ní dochar tuairim scríofa a thabhairt de réir mhír (a) d'fheidhmiú a chumhachtaí faoin Acht seo, nó faoi aon rialacháin a dhéanfar faoi, ag an údarás pleanála lena mbaineann chun a cheangal ar an duine a rinne an iarraidh faisnéis bhreise a chur isteach maidir leis an iarratas lena mbaineann.

(c)  Féadfaidh an tAire, le rialacháin, foráil a dhéanamh maidir le nithe breise, teagmhasacha, iarmhartacha nó forlíontacha ó thaobh nós imeachta i dtaca le tuairim scríofa a sholáthar faoi mhír (a).

(3)  (a)  I gcás ina gceanglaítear ar dhuine, leis an Acht seo nó faoi, ráiteas tionchair timpeallachta a chur faoi bhráid an Bhoird, féadfaidh sé nó sí, sula gcuirfidh sé nó sí an ráiteas isteach, a iarraidh ar an mBord a thuairim a sholáthar dó nó di i dtaobh na faisnéise ba chóir a bheith sa ráiteas sin, agus déanfaidh an Bord, ar iarraidh den sórt sin a fháil, an tuairim sin a sholáthar i scríbhinn.

(b)  Ní dochar tuairim scríofa a thabhairt de réir mhír (a) d'fheidhmiú a chumhachtaí de bhun an Achta seo, nó de bhun aon rialachán faoin Acht seo, ag an mBord chun a cheangal ar an iarratasóir faisnéis shonraithe a sholáthar i ndáil le haon achomharc lena mbaineann an ráiteas tionchair timpeallachta.

(c)  Féadfaidh an tAire rialacháin a dhéanamh i ndáil le déanamh iarrata nó soláthar tuairime lena mbaineann an fo-alt seo.

Tionchair thimpeallachta trasteorann.

174. —(1)  (a)  Féadfaidh an tAire rialacháin a dhéanamh i leith iarratas ar fhorbairt ar gá ráiteas tionchair timpeallachta a chur isteach ina leith, i gcás inarb eol don údarás pleanála, nó don Bhord ar achomharc, gur dóigh go mbeidh éifeachtaí suntasacha ag an bhforbairt ar an gcomhshaol i mBallstát eile de na Comhphobail Eorpacha nó i stát is páirtí sa Choinbhinsiún Trasteorann nó i gcás ina measann an Stát eile lena mbaineann gur dóigh go mbeadh éifeachtaí den sórt sin ag an bhforbairt.

(b)  Gan dochar do ghinearáltacht mhír (a), féadfar foráil a dhéanamh le rialacháin faoin bhfo-alt seo le haghaidh na nithe seo a leanas:

(i)  fógra a thabhairt don Aire maidir leis an iarratas;

(ii)  faisnéis a chur faoi bhráid an Aire maidir leis an iarratas;

(iii)  fógra a thabhairt don Stát eile lena mbaineann agus faisnéis a chur ar fáil don Stát sin;

(iv)  tuairimí a thabhairt agus aighneachtaí a dhéanamh maidir leis an iarratas ón Stát eile lena mbaineann, agus comhchomhairliúchán a dhéanamh leis an Stát sin;

(v)  teorainneacha ama chun cinntí a dhéanamh faoin Acht seo a fhadú.

(2)  I dteannta cheanglais ailt 173(1) agus 34(3), beidh aird ag an údarás pleanála nó ag an mBord, de réir mar a bheidh, i gcás inar cuí sin, ar thuairimí aon Bhallstáit de na Comhphobail Eorpacha nó páirtí eile sa Choinbhinsiún Trasteorann i ndáil le héifeachtaí na forbartha beartaithe ar an gcomhshaol.

(3)  D'ainneoin aon fhorálacha eile den Acht seo, féadfaidh údarás pleanála nó an Bord, de réir mar a bheidh, tar éis dó aon aighneachtaí nó tuairimí a gheofar a bhreithniú nó tar éis aon chomhchomhairliúchán a dhéanfaidh údarás pleanála nó an Bord, coinníollacha a fhorchur ar dheonú ceada chun éifeachtaí trasteorann a d'fhéadfadh a bheith ag aon fhorbairt bheartaithe a laghdú nó chun deireadh a chur leo.

(4)  I gcás ina n-iarrfaidh údarás pleanála nó údarás Stáit go ndéanfaí é sin, nó in aon chás eile más rud é go gcinnfidh an tAire ar shlí eile é a dhéanamh, féadfaidh an tAire a iarraidh ar Bhallstát eile de na Comhphobail Eorpacha nó ar pháirtí eile sa Choinbhinsiún Trasteorann faisnéis a chur ar aghaidh i leith aon fhorbartha a bheidh faoi réir na Treorach ón gComhairle nó an Choinbhinsiúin Trasteorann agus ar dóigh go mbeidh éifeachtaí suntasacha aici ar an gcomhshaol in Éirinn.

(5)  (a)  Féadfaidh an tAire nó údarás Stáit nó údarás pleanála, tar éis dó dul i gcomhairle leis an Aire, a chinneadh aighneachtaí nó tuairimí a chur ar aghaidh chuig an stát eile lena mbaineann, nó comhchomhairliúcháin a dhéanamh leis, i leith na forbartha dá dtagraítear i bhfo-alt (4) maidir leis na héifeachtaí trasteorann a d'fhéadfadh a bheith ag an bhforbairt sin agus leis na bearta a shamhlaítear chun na héifeachtaí sin a laghdú nó chun deireadh a chur leo.

(b)  Féadfaidh an tAire rialacháin a dhéanamh maidir le fógra poiblí a sholáthar i dtaobh aon ráitis tionchair timpeallachta nó aon fhaisnéise eile a gheobhaidh an Aire, an t-údarás Stáit nó an t-údarás pleanála faoi fho-alt (4), agus maidir le haighneachtaí a dhéanamh nó tuairimí a thabhairt maidir leis an bhfaisnéis.

(6)  Féadfaidh an tAire comhaontú a dhéanamh le haon Bhallstát eile de na Comhphobail Eorpacha nó aon pháirtí eile sa Choinbhinsiún Trasteorann maidir leis na nósanna imeachta mionsonraithe a bheidh le leanúint i leith comhchomhairliúchán i dtaobh forbairtí beartaithe ar dóigh go mbeidh éifeachtaí suntasacha trasteorann acu.

Measúnacht tionchair timpeallachta ar fhorbairt áirithe arna déanamh ag údaráis áitiúla nó thar a gceann.

175. —(1)  Más rud é, maidir le forbairt a bhaineann le haicme forbartha a bheidh sainaitheanta chun críocha alt 176

(a)  go mbeartaíonn údarás áitiúil, ar údarás pleanála é, í a dhéanamh cibé acu ina cháil mar údarás pleanála nó in aon cháil eile, nó

(b)  go mbeartaíonn duine éigin eile í a dhéanamh thar ceann údaráis áitiúil den sórt sin, nó i gcomhar nó i gcomhpháirtíocht le húdarás áitiúil den sórt sin, de bhun conartha arna dhéanamh ag an údarás áitiúil sin cibé acu ina cháil mar údarás pleanála nó in aon cháil eile,

laistigh de limistéar feidhme an údaráis áitiúil lena mbaineann (dá ngairtear “forbairt bheartaithe” ina dhiaidh seo san alt seo), ullmhóidh an t-údarás áitiúil, nó cuirfidh sé faoi deara go nullmhófar, ráiteas tionchair timpeallachta ina leith.

(2)  Ní dhéanfar forbairt bheartaithe a mbeidh ráiteas tionchair timpeallachta ullmhaithe ina leith de réir fho-alt (1) ach amháin i gcás ina mbeidh sí ceadaithe ag an mBord, fara modhnuithe nó dá n-éagmais.

(3)  I gcás ina mbeidh ráiteas tionchair timpeallachta ullmhaithe de bhun fho-alt (1), déanfaidh an t-údarás áitiúil iarratas chuig an mBord chun ceadú a fháil.

(4)  Sula ndéanfaidh údarás áitiúil iarratas ar cheadú faoi fho-alt (3), déanfaidh sé—

(a)  fógra a fhoilsiú, i nuachtán amháin nó níos mó a scaiptear sa limistéar ina mbeartaítear an fhorbairt a dhéanamh, ina gcuirfear in iúl cineál agus suíomh na forbartha beartaithe agus—

(i)  ina luafar—

(I)  go bhfuil beartaithe aige ceadú an Bhoird a lorg le haghaidh na forbartha beartaithe,

(II)  gur ullmhaíodh ráiteas tionchair timpeallachta i leith na forbartha beartaithe,

(ii)  ina sonrófar cé na tráthanna ar féidir agus cé na háiteanna inar féidir, agus cén tréimhse (nach lú ná 6 sheachtain) inar féidir, cóip den ráiteas tionchair timpeallachta a iniúchadh saor in aisce nó a cheannach, agus

(iii)  ina n-iarrfar go ndéanfaí aighneachtaí chuig an mBord agus go dtabharfaí tuairimí don Bhord le linn na tréimhse sin—

(I)  i ndáil le himpleachtaí na forbartha beartaithe do phleanáil chuí agus forbairt inchothaithe sa limistéar lena mbaineann, agus

(II)  i ndáil leis na héifeachtaí is dóigh a bheidh ag an bhforbairt bheartaithe ar an gcomhshaol,

dá ndéanfaí í,

agus

(b)  cóip den iarratas agus den ráiteas tionchair timpeallachta a chur chuig na húdaráis fhorordaithe mar aon le fógra ina luafar go bhféadfar, le linn na tréimhse dá dtagraítear i mír (a)(ii), aighneachtaí a dhéanamh i scríbhinn chuig an mBord nó tuairimí a thabhairt i scríbhinn dó—

(i)  i ndáil leis na héifeachtaí is dóigh a bheidh ag an bhforbairt bheartaithe ar an gcomhshaol, agus

(ii)  i ndáil le himpleachtaí na forbartha beartaithe do phleanáil chuí agus forbairt inchothaithe sa limistéar lena mbaineann,

dá ndéanfaí í.

(5)  (a)  Féadfaidh an Bord, i gcás ina measfaidh sé gur gá déanamh amhlaidh, a cheangal ar údarás áitiúil a rinne iarratas ar cheadú le haghaidh forbartha beartaithe cibé faisnéis bhreise a shonróidh an Bord a thabhairt don Bhord i ndáil le héifeachtaí na forbartha beartaithe ar an gcomhshaol.

(b)  Déanfaidh an Bord, i gcás ina measfaidh sé, maidir leis an bhfaisnéis bhreise a bheidh faighte de bhun mhír (a), go bhfuil sonraí breise suntasacha inti—

(i)  maidir leis na héifeachtaí is dóigh a bheidh ag an bhforbairt bheartaithe ar an gcomhshaol, agus

(ii)  maidir leis na hiarmhairtí is dóigh a bheidh ag an bhforbairt sin do phleanáil chuí agus forbairt inchothaithe sa limistéar ina mbeartaítear an fhorbairt thuasluaite a shuíomh,

a cheangal ar an údarás áitiúil—

(I)  fógra a fhoilsiú i nuachtán amháin nó níos mó a scaiptear sa limistéar ina mbeadh an fhorbairt bheartaithe suite ina luafar go bhfuil faisnéis bhreise i ndáil leis an bhforbairt bheartaithe tugtha don Bhord, ina gcuirfear in iúl cé na tráthanna ar féidir, cén tréimhse (nach lú ná 3 sheachtain) inar féidir agus cén áit, nó cé na háiteanna, inar féidir cóip den fhaisnéis bhreise a iniúchadh saor in aisce nó a cheannach, agus go bhféadfar aighneachtaí nó tuairimí i ndáil leis an bhfaisnéis bhreise a chur faoi bhráid an Bhoird roimh dheireadh na tréimhse a bheidh curtha in iúl, agus

(II)  fógra i dtaobh an fhaisnéis bhreise a thabhairt don Bhord, agus cóip den fhaisnéis a bheidh tugtha, a chur chuig aon údarás forordaithe ar tugadh fógra dó de bhun fho-alt (4)(b), agus a chur in iúl don údarás go bhféadfar aighneachtaí nó tuairimí i ndáil leis an bhfaisnéis bhreise a chur faoi bhráid an Bhoird roimh dheireadh tréimhse (nach lú ná 3 sheachtain) dar tosach an lá a chuirfidh an t-údarás áitiúil an fógra chuig an údarás forordaithe.

(6)  Sula ndéanfaidh an Bord cinneadh i leith forbartha beartaithe faoin alt seo, breithneoidh sé—

(a)  an ráiteas tionchair timpeallachta a cuireadh isteach de bhun fho-alt (1), aon aighneachtaí a rinneadh nó aon tuairimí a tugadh de réir fho-alt (4) agus aon fhaisnéis eile a tugadh de réir fho-alt (5)

(i)  maidir leis na héifeachtaí is dóigh a bheidh ag an bhforbairt bheartaithe ar an gcomhshaol, agus

(ii)  maidir leis na hiarmhairtí is dóigh a bheidh ag an bhforbairt sin maidir le pleanáil chuí agus forbairt inchothaithe sa limistéar ina mbeartaítear an fhorbairt thuasluaite a shuíomh,

(b)  tuairimí aon Bhallstáit eile de na Comhphobail Eorpacha nó stáit is páirtí sa Choinbhinsiún Trasteorann ar cuireadh cóip den ráiteas tionchair timpeallachta chuige, agus

(c)  an tuarascáil agus aon mholtaí ón duine a sheolfaidh éisteacht dá dtagraítear i bhfo-alt (7) más rud é go néistfear fianaise ag éisteacht den sórt sin a bhaineann—

(i)  leis na héifeachtaí is dóigh a bheidh ag an bhforbairt bheartaithe ar an gcomhshaol, agus

(ii)  leis na hiarmhairtí is dóigh a bheidh ag an bhforbairt sin maidir le pleanáil chuí agus forbairt inchothaithe sa limistéar ina mbeartaítear an fhorbairt thuasluaite a shuíomh.

(7)  Beidh an duine a sheolfaidh éisteacht ó bhéal i ndáil le ceannach éigeantach talún a bhaineann go hiomlán nó go páirteach le forbairt bheartaithe faoin alt seo, ar forbairt í a ndearna údarás pleanála iarratas ar cheadú ina leith, i dteideal fianaise a éisteacht—

(a)  maidir leis na héifeachtaí is dóigh a bheidh ag an bhforbairt bheartaithe ar an gcomhshaol, agus

(b)  maidir leis na hiarmhairtí is dóigh a bheidh ag an bhforbairt sin do phleanáil chuí agus forbairt inchothaithe sa limistéar ina mbeartaítear an fhorbairt thuasluaite a shuíomh.

(8)  (a)  Féadfaidh an Bord, i gcás inar deimhin leis gur cóir é a dhéanamh de bharr imthosca eisceachtúla, díolúine a dheonú, i leith forbartha beartaithe, ó cheanglas faoi fho-alt (1) ráiteas tionchair timpeallachta a ullmhú, ach amháin nach bhféadfar aon díolúine a dheonú i leith forbartha beartaithe más rud é go bhfuil Ballstát eile de na Comhphobail Eorpacha nó Stát is páirtí sa Choinbhinsiún Trasteorann tar éis a chur in iúl gur mian leis tuairimí a thabhairt maidir le héifeachtaí na forbartha beartaithe ar an gcomhshaol sa Stát sin.

(b)  Déanfaidh an Bord, le linn dó díolúine faoi mhír (a) a dheonú, breithniú ar na nithe seo a leanas—

(i)  an cóir na héifeachtaí, más ann, a bheidh ag an bhforbairt bheartaithe ar an gcomhshaol a mheasúnú ar mhodh éigin eile, agus

(ii)  an cóir an fhaisnéis a éireoidh as measúnacht den sórt sin a chur ar fáil do dhaoine den phobal,

agus féadfaidh sé cibé ceanglais maidir leis na nithe a mheasfaidh sé is gá nó is cuí a chur chun feidhme i ndáil leis an iarratas ar cheadú.

(c)  Déanfar, a luaithe is féidir, fógra i dtaobh aon díolúine a bheidh deonaithe faoi mhír (a), i dtaobh na gcúiseanna a bhí leis an díolúine a dheonú, agus i dtaobh aon cheanglais arna gcur chun feidhme faoi mhír (b)

(i)  a fhoilsiú san Iris Oifigiúil agus i nuachtán amháin eile ar a laghad a fhoilsítear sa Stát, agus

(ii)  a thabhairt, mar aon le cóip den fhaisnéis, más ann, a bheidh curtha ar fáil do dhaoine den phobal de réir mhír (b), do Choimisiún na gComhphobal Eorpach.

(9)  Maidir le forbairt bheartaithe faoin alt seo, féadfaidh an Bord—

(a)  í a cheadú,

(b)  í a cheadú, faoi réir coinníollacha, nó

(c)  diúltú í a cheadú.

(10)  (a)  I gcás ina mbaineann iarratas faoin alt seo le forbairt bheartaithe arb éard í gníomhaíocht, nó ar chun críocha gníomhaíochta í, a bhfuil gá le ceadúnas um rialú comhtháite ar thruailliú nó le ceadúnas dramhaíola ina leith, ní dhéanfaidh an Bord, i gcás ina gcinnfidh sé an fhorbairt bheartaithe a cheadú, an ceadú sin a chur faoi réir coinníollacha ar coinníollacha iad—

(i)  chun astaíochtaí ó oibriú na gníomhaíochta a rialú, lena n-áirítear na hastaíochtaí sin a chosc, a theorannú, a mhaolú nó a laghdú nó chun deireadh a chur leo, nó

(ii)  chun astaíochtaí a bhaineann le scor d'oibriú na gníomhaíochta, nó a leanfaidh as an scor sin, a rialú.

(b)  I gcás ina mbaineann iarratas faoin alt seo le forbairt bheartaithe arb éard í ghníomhaíocht, nó ar chun críocha gníomhaíochta í, a bhfuil gá le ceadúnas um rialú comhtháite ar thruailliú nó le ceadúnas dramhaíola ina leith, féadfaidh an Bord, maidir le haon fhorbairt bheartaithe arb éard í an ghníomhaíocht nó ar chun críocha na gníomhaíochta í, a chinneadh an fhorbairt bheartaithe a dhiúltú, i gcás ina measfaidh an Bord nach féidir, d'ainneoin cheadúnú na gníomhaíochta, glacadh leis an bhforbairt ar fhorais timpeallachta, ag féachaint do phleanáil chuí agus d'fhorbairt inchothaithe an limistéir ina bhfuil nó ina mbeidh an fhorbairt.

(c)  (i)  Sula ndéanfaidh an Bord cinneadh i leith forbartha beartaithe arb éard í gníomhaíocht nó ar chun críocha gníomhaíochta í, féadfaidh sé a iarraidh ar an nGníomhaireacht um Chaomhnú Comhshaoil tuairimí a thabhairt laistigh de cibé tréimhse (ar tréimhse í nach lú, in aon chás, ná 3 sheachtain ó dháta na hiarrata) a shonróidh an Bord i ndáil leis an bhforbairt bheartaithe.

(ii)  Le linn dó a chinneadh a dhéanamh, beidh aird ag an mBord ar na tuairimí, más ann, a bheidh faighte ón nGníomhaireacht laistigh den tréimhse a bheidh sonraithe faoi fhomhír (i).

(d)  Féadfaidh an Bord, aon tráth tar éis dheireadh na tréimhse a bheidh sonraithe ag an mBord faoi mhír (c) (i) chun tuairimí a thabhairt, a chinneadh ar an iarratas a dhéanamh.

(e)  Má thugann an Ghníomhaireacht tuairimí faoin alt seo, ní dochar é sin d'aon fheidhm eile de chuid na Gníomhaireachta faoin Acht seo.

(11)  (a)  Féadfaidh an tAire rialacháin a dhéanamh chun foráil a dhéanamh maidir le cibé nithe a bhaineann le nós imeachta agus riarachán is dealraitheach don Aire a bheith riachtanach nó fóirsteanach i leith iarratas ar cheadú faoin alt seo.

(b)  Gan dochar do ghinearáltacht mhír (a), féadfar, le rialacháin faoin bhfo-alt seo, foráil a dhéanamh—

(i)  chun a chumasú d'údarás áitiúil a iarraidh ar an mBord tuairim scríofa a thabhairt maidir leis an bhfaisnéis a bheidh i ráiteas tionchair timpeallachta,

(ii)  maidir le nithe a bhaineann le nós imeachta i dtaca leis an nGníomhaireacht um Chaomhnú Comhshaoil do thabhairt tuairimí faoin alt seo agus le nithe a bhaineann leis an méid sin,

(iii)  maidir le fógra a thabhairt do Bhallstát eile de na Comhphobail Eorpacha nó do pháirtithe eile sa Choinbhinsiún Trasteorann i ndáil le forbairt bheartaithe, maidir le tuairimí agus aighneachtaí a fháil ón Stát nó ón bpáirtí agus maidir le comhchomhairliúcháin a dhéanamh leo, agus

(iv)  chun a cheangal ar an mBord faisnéis a thabhairt i leith a chinnidh maidir leis an bhforbairt bheartaithe a lorgaítear ceadú ina leith.

(12)  Le linn don Bhord breithniú a dhéanamh faoi fho-alt (6) ar fhaisnéis a bheidh tugtha i dtaca leis na harmhairtí is dóigh a bheidh ag forbairt bheartaithe do phleanáil chuí agus forbairt inchothaithe sa limistéar ina mbeartaítear an fhorbairt sin a shuíomh, beidh aird aige—

(a)  ar fhorálacha an phlean forbartha don limistéar,

(b)  ar fhorálacha aon ordaithe um limistéar taitneamhachta speisialta a bhaineann leis an limistéar,

(c)  más láithreán Eorpach nó limistéar a bheidh forordaithe chun críocha alt 10(2)(c) an limistéar nó cuid den limistéar, ar an méid sin,

(d)  i gcás inar iomchuí sin, ar bheartais an Rialtais, an Aire nó aon Aire eile den Rialtas, agus

(e)  ar fhorálacha an Achta seo agus rialachán faoin Acht seo, i gcás inar iomchuí sin.

(13)  Beidh duine a sháróidh coinníoll a fhorchuirfidh an Bord faoin alt seo ciontach i gcion.

(14)  Ní bheidh feidhm ag an alt seo maidir le forbairt bheartaithe bóithre de réir bhrí Acht na mBóithre, 1993, ag údarás bóithre nó thar a cheann.

Aicmí forordaithe forbartha ar gá measúnacht ina leith.

176. —(1)  Féadfaidh an tAire rialacháin a dhéanamh, i dtaca leis an Treoir ón gComhairle nó thairis sin—

(a)  ina ndéanfar forbairt a bhféadfadh éifeachtaí suntasacha a bheith aici ar an gcomhshaol a shainaithint, agus

(b)  ina sonrófar an modh ina gcinnfear an dóchúlacht go mbeadh éifeachtaí suntasacha ag an bhforbairt sin ar an gcomhshaol.

(2)  Gan dochar do ghinearáltacht fho-alt (1), féadfar, le rialacháin faoin bhfo-alt sin, foráil a dhéanamh maidir le gach ní nó le haon ní amháin nó níos mó de na nithe seo a leanas:

(a)  tairseacha nó critéir a bhunú d'fhonn a chinneadh cé na haicmí forbartha ar dóigh dóibh éifeachtaí suntasacha a bheith acu ar an gcomhshaol;

(b)  tairseacha nó critéir éagsúla den sórt sin a bhunú i leith aicmí éagsúla limistéar;

(c)  na forbairtí ar dóigh dóibh éifeachtaí suntasacha a bheith acu ar an gcomhshaol a chinneadh, ar bhonn cáis ar chás, i dteannta tairseacha nó critéir a úsáid;

(d)  i gcás nach mbunófar tairseacha nó critéir, na forbairtí ar dóigh dóibh éifeachtaí suntasacha a bheith acu ar an gcomhshaol a chinneadh ar bhonn cáis ar chás;

(e)  critéir roghnóireachta a shainaithint—

(i)  i ndáil le tairseacha nó critéir a bhunú d'fhonn a chinneadh cé na haicmí forbartha ar dóigh dóibh éifeachtaí suntasacha a bheith acu ar an gcomhshaol, nó

(ii)  i ndáil leis na forbairtí ar dóigh dóibh éifeachtaí suntasacha a bheith acu ar an gcomhshaol a chinneadh ar bhonn cáis ar chás.

(3)  Maidir le haon tagairt in achtachán d'fhorbairt d'aicme a shonraítear faoi Airteagal 24 de Rialacháin na gComhphobal Eorpach (Measúnacht Tionchair Timpeallachta), 1989 (I.R. Uimh. 349 de 1989), measfar gur tagairt í d'aicme forbartha arna forordú faoin alt seo.

Faisnéis fhorordaithe maidir le ráitis tionchair timpeallachta.

177. —(1)  Féadfaidh an tAire an fhaisnéis a bheidh i ráiteas tionchair timpeallachta a fhorordú.

(2)  Maidir le haon tagairt in achtachán don fhaisnéis a bheidh i ráiteas tionchair timpeallachta a shonraítear faoi Airteagal 25 de Rialacháin na gComhphobal Eorpach (Measúnacht Tionchair Timpeallachta), 1989, measfar gur tagairt í d'fhaisnéis arna forordú faoin alt seo.