An Chéad Lch. Lch. Roimhe Seo (CUID XVII Forálacha Airgeadais) Ar Aghaidh (CUID XIX Tosach Feidhme, Aisghairm agus Buanú)

30 2000

An tAcht Um Pleanáil Agus Forbairt, 2000

CUID XVIII

Ilghnéitheach

Comhchomhairliúcháin i ndáil le forbairt bheartaithe.

247. —(1)  Aon duine a bhfuil leas aige nó aici i dtalamh agus a bhfuil ar intinn aige nó aici iarratas pleanála a dhéanamh, féadfaidh sé nó sí, le comhaontú an údaráis pleanála lena mbaineann (is comhaontú nach gcoimeádfar siar go míréasúnach), comhchomhairliúcháin a dhéanamh leis an údarás pleanála chun aon fhorbairt bheartaithe i ndáil leis an talamh a phlé agus féadfaidh an t-údarás pleanála comhairle a thabhairt don duine sin maidir leis an iarratas beartaithe.

(2)  In aon chomhchomhairliúcháin faoi fho-alt (1), tabharfaidh an t-údarás pleanála eolas don duine lena mbaineann i dtaobh na nósanna imeachta a ghabhann le hiarratas pleanála a bhreithniú, lena n-áirítear aon cheanglais de chuid na rialachán ceada, agus cuirfidh sé in iúl, a mhéid is féidir, na cuspóirí iomchuí den phlean forbartha a d'fhéadfadh fearadh ar chinneadh an údaráis pleanála.

(3)  Ní dochar comhchomhairliúcháin a dhéanamh do chomhlíonadh aon fheidhmeanna eile dá chuid ag údarás pleanála faoin Acht seo nó faoi aon rialacháin arna ndéanamh faoin Acht seo agus ní féidir brath air sa phróiseas foirmiúil pleanála nó in imeachtaí dlíthiúla.

(4)  (a)  Chun ceanglais an ailt seo a chomhlíonadh, féadfaidh údarás pleanála a shonrú go bhféadfar comhchomhairliúcháin a sheoladh tráthanna áirithe agus in ionaid áirithe agus ní bheidh d'oibleagáid ar an údarás comhchomhairliúcháin a dhéanamh ar shlí seachas mar a shonróidh sé.

(b)  I gcás ina gcinnfidh údarás pleanála comhchomhairliúcháin a sheoladh de réir mhír (a), déanfaidh sé, uair amháin ar a laghad gach bliain, fógra i dtaobh na dtráthanna a sheolfar, agus na n-ionad ina seolfar, comhchomhairliúcháin a fhoilsiú i nuachtán amháin nó níos mó a scaiptear i limistéar an údaráis.

(5)  Coimeádfaidh an t-údarás pleanála taifead i scríbhinn ar aon chomhchomhairliúcháin faoin alt seo a bhaineann le forbairt bheartaithe, lena n-áirítear ainmneacha na ndaoine a bhí páirteach sna comhchomhairliúcháin, agus déanfar cóip den taifead sin a thaisceadh agus a choinneáil leis na doiciméid lena mbaineann aon iarratas pleanála i leith na forbartha beartaithe.

(6)  Beidh comhalta nó oifigeach d'údarás pleanála ciontach i gcion má ghlacann, nó má iarrann, sé nó sí aon fhabhar, sochar nó íocaíocht, díreach nó neamhdhíreach (thar a cheann nó thar a ceann féin nó thar ceann aon duine nó comhlachta eile), i dtaca le haon chomhchomhairliúchán a dhéanfar nó le haon chomhairle a thabharfar faoin alt seo.

Faisnéis atá le soláthar i bhfoirm leictreonach.

248. —(1)  Faoi réir fho-alt (2), aon doiciméad nó faisnéis eile a gceanglaítear nó a gceadaítear faoin Acht seo nó faoi aon rialacháin arna ndéanamh faoi Acht seo go ndéanfadh an tAire, an t-údarás pleanála, an Bord nó aon duine eile é nó í a thabhairt i scríbhinn, féadfar é nó í a thabhairt i bhfoirm leictreonach.

(2)  Ní fhéadfar doiciméad nó faisnéis dá dtagraítear i bhfo-alt (1) a thabhairt i bhfoirm leictreonach ach amháin—

(a)  más rud é, an tráth a tugadh é nó í, go raibh sé réasúnach a bheith ag súil go mbeadh sé nó sí sorochtana ag an údarás pleanála, ag an mBord nó ag aon duine eile a raibh sé nó sí dírithe chuige nó chuici, chun tagairt dó nó di nó lena úsáid nó lena húsáid dá éis sin,

(b)  i gcás ina gceanglaítear nó ina gceadaítear an doiciméad nó an fhaisnéis sin a thabhairt d'údarás pleanála nó don Bhord agus ina dtoilíonn an t-údarás pleanála nó an Bord leis an bhfaisnéis a thabhairt san fhoirm sin, ach ina gceanglaíonn sé—

(i)  go dtabharfar an fhaisnéis de réir teicneolaíochta faisnéise agus ceanglas nós imeachta áirithe, nó

(ii)  go ndéanfar gníomh áirithe chun a fhíorú go bhfuarthas an fhaisnéis,

má comhlíonadh ceanglais an údaráis pleanála nó an Bhoird agus má rinneadh na ceanglais sin a phoibliú agus má tá siad oibiachtúil, trédhearcach, comhréireach agus neamh-idirdhealaitheach, agus

(c)  i gcás ina gceanglaítear nó ina gceadaítear an doiciméad sin nó an fhaisnéis sin a thabhairt do dhuine nach údarás pleanála é nó í ná nach é nó í an Bord é nó í, má thoilíonn an duine a gceanglaítear nó a gceadaítear an doiciméad nó an fhaisnéis eile a thabhairt dó nó di leis an bhfaisnéis a thabhairt san fhoirm sin.

(3)  Aon doiciméad nó faisnéis a cheanglaítear ar an údarás pleanála nó ar an mBord, nó a cheadaítear don údarás pleanála nó don Bhord, a choimeád nó a thabhairt ar aird, cibé acu ar feadh tréimhse áirithe nó ar shlí eile, agus cibé acu ina fhoirm nó ina foirm bhunaidh nó ar shlí eile, féadfar é nó í a choimeád nó a thabhairt ar aird amhlaidh, de réir mar a bheidh, i bhfoirm leictreonach.

(4)  Ní dochar fo-ailt (1), (2) agus (3) d'aon dlí eile lena gceanglaítear nó lena gceadaítear doiciméid nó faisnéis eile a thabhairt, a choimeád nó a thabhairt ar aird, de réir mar a bheidh, de réir ceanglas sonraithe nós imeachta nó de réir teicneolaíochta faisnéise áirithe.

(5)  Féadfaidh an tAire rialacháin a dhéanamh lena ndéanfar foráil maidir le húsáid teicneolaíochta faisnéise áirithe nó le ceanglais eile nós imeachta, nó lena gceanglaítear an céanna, i ndáil le haicme shonraithe nó le haicmí sonraithe doiciméad nó faisnéise eile a thabhairt, a choimeád nó a thabhairt ar aird i bhfoirm leictreonach.

(6)  Gan dochar do ghinearáltacht fho-alt (5), féadfaidh feidhm a bheith ag na rialacháin maidir le haicme shonraithe nó le haicmí sonraithe doiciméad nó faisnéise eile, nó ar feadh tréimhse áirithe.

(7)  Tá feidhm ag an alt seo maidir le ceanglas nó le cead chun doiciméid nó faisnéis eile a thabhairt cibé acu a úsáidfear an focal “tabhairt”, “déanamh”, “cur ar fáil”, “cur faoi bhráid”, “tabhairt ar aird” nó focal nó abairt dá shamhail.

(8)  (a)  Ní dochar an t-alt seo do na ceanglais faoi alt 250 i ndáil le fógra nó cóip d'ordú a sheirbheáil nó a thabhairt mura mbeidh sé forordaithe i rialacháin a dhéanfar faoi mhír (b).

(b)  Féadfaidh an tAire, le rialachán, feidhm an ailt seo a leathnú chuig fógra nó cóip d'ordú a sheirbheáil nó a thabhairt faoi alt 250, i gcás inar dóigh leis an Aire nár dhochar do leas an phobail é déanamh amhlaidh agus beidh feidhm, dá réir sin, ag an alt arna leathnú amhlaidh.

(9)  San alt seo—

folaíonn “doiciméid nó faisnéis eile” na nithe seo a leanas, ach ní bheidh sé teoranta dóibh—

(a)  plean forbartha nó aon dréacht de nó athrú air,

(b)  iarratas ar chead nó aon doiciméad eile a shonraítear in alt 38(1),

(c)  aon léarscáil, plean nó líníocht eile, agus

(d)  aighneachtaí nó tuairimí scríofa;

ciallaíonn “foirm leictreonach” faisnéis a ghintear, a chuirtear i bhfios, a phróiseáiltear, a sheoltar, a fhaightear, a thaifeadtar, a stóráiltear nó a thaispeántar ar mhodh leictreonach agus ar féidir í a úsáid chun cóip nó atáirgeadh inléite a dhéanamh den fhaisnéis sin a chuirtear i bhfios, ach ní fholaíonn sé faisnéis a chuirtear i bhfios i bhfoirm urlabhra, agus folaíonn modh leictreonach den sórt sin teicneolaíocht leictreach, dhigiteach, mhaighnéadach, optúil, leictreamaighnéadach, bhithmhéadrach, fhótónach agus aon fhoirm teicneolaíochta gaolmhaire eile.

Ceanglais bhreise maidir le fógra a thabhairt don phobal.

249. —(1)  I gcás ina gceanglaítear le haon fhoráil den Acht seo fógra a thabhairt i nuachtán amháin nó níos mó a scaiptear i limistéar údaráis pleanála, féadfaidh an t-údarás pleanála, i dteannta cheanglais na forála áirithe agus a mhéid is cuí leo, an fógra a thabhairt nó aird an phobail a tharraingt ar an bhfógra trí fhoirmeacha eile meán lena n-áirítear na meáin chraolacháin agus úsáid a bhaint as foirmeacha leictreonacha chun faisnéis a sholáthar.

(2)  I gcás ina gceanglaítear le haon fhoráil den Acht seo fógra a thabhairt d'aon duine a rinne uiríll nó aighneachtaí chuig údarás pleanála nó a thug tuairimí dó, féadfaidh an t-údarás pleanála an ceanglas sin a ligean thar ceal más rud é—

(a)  go mbeidh líon mór uiríoll nó aighneachtaí déanta chuig an údarás pleanála, nó líon mór tuairimí tugtha dó, mar chuid d'fheachtas eagraithe, nó

(b)  nach féidir go héasca ainm agus seoladh iomlán na ndaoine sin a rinne na huiríll nó na haighneachtaí nó a thug na tuairimí a fhionnadh go cinnte,

ar choinníoll go n-úsáidfidh an t-údarás modh éigin eile chun fógra a thabhairt don phobal, ar modh é ar deimhin leis an údarás gur féidir leis aird an phobail a tharraingt go leormhaith ar an bhfógra sin lena n-áirítear, i gcás feachtais eagraithe dá dtagraítear i mír (a), fógra a thabhairt d'aon duine a rinne, i dtuairim an údaráis pleanála, an feachtas a eagrú.

Fógraí a sheirbheáil, etc.

250. —(1)  I gcás ina gceanglaítear nó ina n-údaraítear leis an Acht seo nó le haon ordú nó rialachán a dhéanfar faoin Acht seo fógra nó cóip d'ordú a sheirbheáil ar dhuine nó a thabhairt do dhuine, déanfar é nó í a dhíriú chuige nó chuici agus a sheirbheáil air nó uirthi nó a thabhairt dó nó di ar cheann de na slite seo a leanas—

(a)  más faoina ainm nó faoina hainm a bheidh sé nó sí dírithe chuig an duine, trína sheachadadh nó trína seachadadh air nó uirthi;

(b)  trína fhágáil nó trína fágáil ag an seoladh ag a bhfuil gnáthchónaí air nó uirthi nó, i gcás ina mbeidh seoladh le haghaidh seirbheála tugtha, ag an seoladh sin;

(c)  trína chur nó trína cur leis an bpost i litir chláraithe réamhíoctha a bheidh dírithe chuige nó chuici ag an seoladh ag a bhfuil gnáthchónaí air nó uirthi, nó i gcás ina mbeidh seoladh le haghaidh seirbheála tugtha, ag an seoladh sin;

(d)  más rud é nach féidir an seoladh ag a bhfuil gnáthchónaí air nó uirthi a fhionnadh trí fhiosrú réasúnach agus go gceanglaítear nó go n-údaraítear amhlaidh an fógra nó an chóip a thabhairt nó a sheirbheáil i leith aon talún nó áitribh, trína sheachadadh nó trína seachadadh ar dhuine éigin atá os cionn 16 bliana d'aois agus a chónaíonn nó atá ar fostú ar an talamh nó san áitreabh, nó trína ghreamú nó trína greamú in áit fheiceálach ar an talamh nó ar an áitreabh, nó gar dó;

(e)  i dteannta na modhanna seirbheála a ndéantar foráil ina leith i míreanna (a), (b), (c) agus (d), trína sheachadadh nó trína seachadadh (i gcás fógra forfheidhmiúcháin) ar dhuine éigin atá os cionn 16 bliana d'aois agus atá ar fostú, nó atá fruilithe ar shlí eile, i dtaca leis an bhforbairt lena mbaineann an fógra a dhéanamh, nó trína ghreamú nó trína greamú in áit fheiceálach ar an talamh nó ar an áitreabh lena mbaineann.

(2)  I gcás ina gceanglaítear leis an Acht seo nó le haon ordú nó rialachán a dhéanfar faoin Acht seo fógra nó cóip d'ordú a sheirbheáil ar úinéir nó ar áititheoir aon talún nó áitribh, nó a thabhairt dó nó di, agus nach féidir ainm an úinéara nó an áititheora a fhionnadh trí fhiosrú réasúnach, féadfar é nó í a dhíriú chuig “an t-úinéir” nó “an t-áititheoir”, de réir mar is gá sa chás, gan é nó í a ainmniú.

(3)  Chun críocha an ailt seo, measfar gnáthchónaí a bheith ar chuideachta arna clárú faoi Achtanna na gCuideachtaí, 1963 go 1999, ag a hoifig chláraithe, agus measfar gnáthchónaí a bheith ar gach comhlacht corpraithe eile agus ar gach comhlacht neamhchorpraithe ag a phríomhoifig nó ag a phríomháit ghnó.

(4)  I gcás ina ndéanfar fógra nó cóip d'ordú a sheirbheáil ar dhuine nó a thabhairt do dhuine trína ghreamú nó trína greamú faoi fho-alt (1)(d), déanfar, laistigh de dhá sheachtain dá éis sin, cóip den fhógra nó den ordú a fhoilsiú i nuachtán amháin ar a laghad a scaiptear sa limistéar deireanach arb eol cónaí a bheith ar an duine ann.

(5)  Aon duine a dhéanfaidh, tráth ar bith le linn na tréimhse 12 sheachtain tar éis fógra a ghreamú faoi fho-alt (1)(d), an fógra a dhíchur, a dhamáistiú nó a aghlot gan údarás dleathach, beidh sé nó sí ciontach i gcion.

(6)  Aon duine a dhéanfaidh, gan údarás dleathach, fógra a cheanglaítear a thógáil ar láithreán forbartha faoi na rialacháin cheada nó ag an mBord faoi alt 142(4) a dhíchur, a dhamáistiú nó a aghlot, beidh sé nó sí ciontach i gcion.

(7)  I gcás inar deimhin leis an Aire nó leis an mBord go bhfuil forais réasúnacha ann chun seirbheáil nó tabhairt fógra nó cóipe d'ordú faoin Acht seo nó faoi aon ordú nó rialachán a dhéanfar faoin Acht seo a ligean thar ceal agus nach ndéanfaidh sé díobháil nó éagóir seirbheáil nó tabhairt an fhógra nó na cóipe a ligean thar ceal, féadfaidh an tAire nó an Bord seirbheáil nó tabhairt an fhógra nó na cóipe a ligean thar ceal agus beidh éifeacht le gach ligean thar ceal den sórt sin de réir a bhrí.

(8)  Féadfar ligean thar ceal faoi fho-alt (7) a thabhairt roimh an tráth nó tar éis an trátha a gceanglófaí, murach an ligean thar ceal, an fógra nó an chóip a sheirbheáil nó a thabhairt agus sula ndéanfar aon ghníomh, nó tar éis aon ghníomh a dhéanamh, ar réamhchoinníoll a ghabhfadh leis, murach an ligean thar ceal, an fógra nó an chóip.

(9)  San alt seo, folaíonn “fógra” litir rabhaidh.

Tréimhse chuí agus teorainneacha ama eile thar laethanta saoire a ríomh.

251. —(1)  I gcás ina ndéanfar aon tréimhse chuí nó aon teorainn ama eile dá dtagraítear san Acht seo nó in aon rialacháin a dhéanfar faoin Acht seo a ríomh, tabharfar neamhaird ar an tréimhse idir an 24ú lá de Nollaig agus an chéad lá d'Eanáir, agus an dá lá sin san áireamh.

(2)  Ní bheidh feidhm ag fo-alt (1) maidir le haon tréimhse ama a shonraítear i gCuid II den Acht seo.

Cumhacht duine údaraithe chun dul isteach ar thalamh.

252. —(1)  Féadfaidh duine údaraithe, faoi réir fhorálacha eile an ailt seo, dul isteach ar aon talamh gach tráth réasúnach idir 9 a.m. agus 6 p.m., nó le linn uaireanta gnó i leith áitribh a bhíonn ar oscailt de ghnáth lasmuigh de na huaireanta sin, chun aon chríche a bhaineann leis an Acht seo.

(2)  Féadfaidh duine údaraithe a rachaidh isteach ar thalamh faoin alt seo gach rud a dhéanamh is gá le réasún chun na críche ar chuici a rachfar isteach agus, go háirithe, féadfaidh sé nó sí suirbhéireacht a dhéanamh, iniúchtaí a sheoladh, pleananna a dhéanamh, grianghraif a thógáil, leibhéil a ghlacadh, tochailt a dhéanamh, agus scrúdú a dhéanamh ar dhoimhneacht agus ar chineál na fo-ithreach.

(3)  Sula rachaidh duine údaraithe isteach ar aon talamh faoin alt seo, gheobhaidh an t-údarás cuí toiliú an áititheora (i gcás talún áitithe) nó (i gcás talún neamháitithe) toiliú an úinéara nó tabharfaidh sé don úinéir nó don áititheoir, de réir mar a bheidh, fógra 14 lá ar a laghad i scríbhinn á rá go bhfuil ar intinn dul isteach air.

(4)  Maidir le duine a mbeidh fógra tugtha dó nó di faoin alt seo ag an údarás cuí á rá go bhfuil ar intinn dul isteach ar thalamh, féadfaidh sé nó sí, tráth nach déanaí ná 14 lá tar éis an fógra a thabhairt, iarratas a dhéanamh, iar bhfógra don údarás, chuig an mbreitheamh den Chúirt Dúiche ag a bhfuil dlínse sa dúiche cúirte dúiche ina bhfuil an talamh nó cuid den talamh, ar ordú chun an dul isteach a thoirmeasc, agus, ar an iarratas a éisteacht, féadfaidh an breitheamh an dul isteach a thoirmeasc ar fad nó coinníollacha a shonrú a bheidh le comhlíonadh ag an duine a rachaidh isteach ar an talamh.

(5)  I gcás ina gcuirfidh breitheamh den Chúirt Dúiche toirmeasc faoin alt seo ar dhul isteach beartaithe ar thalamh, ní dleathach do dhuine ar bith dul isteach faoin alt seo ar an talamh, agus i gcás ina sonróidh breitheamh den Chúirt Dúiche faoin alt seo coinníollacha a bheidh le comhlíonadh ag daoine a bheidh ag dul isteach ar thalamh, ní foláir do gach duine a rachaidh isteach faoin alt seo ar an talamh na coinníollacha a shonrófar amhlaidh a chomhlíonadh.

(6)  (a)  Más rud é (i gcás talún áitithe) go ndiúltóidh an t-áititheoir nó (i gcás talún neamháitithe) go ndiúltóidh an t-úinéir cead a thabhairt cumhacht a thugtar leis an alt seo do dhuine údaraithe a fheidhmiú, féadfaidh an t-údarás cuí iarratas a dhéanamh chuig an gCúirt Dúiche chun an dul isteach a cheadú.

(b)  Déanfar iarratas faoin bhfo-alt seo, iar bhfógra don duine a dhiúltaigh cead a thabhairt an chumhacht chun dul isteach a fheidhmiú, chuig an mbreitheamh den Chúirt Dúiche ag a bhfuil dlínse sa dúiche cúirte dúiche ina bhfuil an talamh nó cuid den talamh.

(7)  Ní bheidh feidhm ag fo-ailt (3), (4) agus (5) maidir le dul isteach chun críocha Chuid III agus, i gcás ina mbeidh aon dul isteach den sórt sin beartaithe, má dhiúltaíonn an t-áititheoir (i gcás talún áitithe) nó an t-úinéir (i gcás talún neamháitithe) cead a thabhairt dul isteach—

(a)  ní rachfar isteach mura mbeidh sé sin údaraithe le hordú ón mbreitheamh den Chúirt Dúiche ag a bhfuil dlínse sa dúiche cúirte dúiche ina bhfuil an talamh nó cuid den talamh agus, i gcás talún áitithe, go dtí go mbeidh fógra 24 uaire an chloig ar a laghad á rá go bhfuil ar intinn dul isteach, agus i dtaobh an chuspóra atá leis an dul isteach sin, tugtha don áititheoir,

(b)  déanfar iarratas ar ordú den sórt sin iar bhfógra (i gcás talún áitithe) don áititheoir nó (i gcás talún neamháitithe) don úinéir.

(8)  Féadfaidh duine údaraithe, i bhfeidhmiú aon chumhachta a thugtar dó nó di leis an Acht seo, i gcás ina mbeidh coinne aige nó aici go gcuirfear aon bhac air nó uirthi i bhfeidhmiú aon chumhachta eile a thugtar dó nó di leis an Acht seo nó faoi, a iarraidh ar chomhalta den Gharda Síochána cabhrú leis nó léi cumhacht den sórt sin a fheidhmiú agus déanfaidh aon chomhalta den Gharda Síochána a n-iarrfaidh duine údaraithe air nó uirthi amhlaidh an tiarratas a chomhlíonadh.

(9)  Gach duine a dhéanfaidh, trí ghníomh nó neamhghníomh, duine údaraithe a bhac le linn na cumhachtaí a thugtar dó nó di leis an alt seo a fheidhmiú go dleathach, beidh sé nó sí ciontach i gcion.

(10)  Tabharfar deimhniú a cheaptha nó a ceaptha do gach duine údaraithe agus nuair a bheidh aon chumhacht a thugtar dó nó di leis an Acht seo nó faoi á feidhmiú aige nó aici, déanfaidh an duine údaraithe, má iarrann aon duine dá ndéantar difear é, an deimhniú a thabhairt ar aird don duine sin.

(11)  San alt seo agus in alt 253

ciallaíonn “údarás cuí”—

(a)  i gcás inar údarás áitiúil a cheap an duine údaraithe — an t-údarás sin,

(b)  i gcás inarbh é nó í an tAire a cheap an duine údaraithe — an tAire, agus

(c)  i gcás inarbh é an Bord a cheap an duine údaraithe — an Bord;

ciallaíonn “duine údaraithe” comhalta den Bhord nó duine a bheidh ceaptha ag údarás áitiúil, ag an Aire nó ag an mBord chun bheith ina dhuine údaraithe nó ina duine údaraithe chun críocha an ailt seo agus alt 253.

Cumhachtaí chun dul isteach i ndáil le forfheidhmiú.

253. —(1)  D'ainneoin alt 252, féadfaidh duine údaraithe, chun aon chríche a bhaineann le Cuid VIII, gach tráth réasúnach, nó tráth ar bith má tá forais réasúnacha aige nó aici chun a chreidiúint go bhfuil forbairt neamhúdaraithe déanta nó á déanamh nó gur dóigh go ndéanfar í, dul isteach in aon áitreabh agus cibé daoine (lena n-áirítear comhaltaí den Gharda Síochána) nó trealamh is dóigh leis nó léi is gá chun na críche a thabhairt isteach san áitreabh sin.

(2)  Faoi réir fho-alt (4), ní rachaidh duine údaraithe, seachas le toiliú an áititheora, isteach i dteach príobháideach faoi fho-alt (1), mura mbeidh fógra 24 uaire an chloig ar a laghad á rá go bhfuil ar intinn aige nó aici dul isteach ann tugtha aige nó aici i scríbhinn d'áititheoir an tí.

(3)  Aon uair a rachaidh duine údaraithe isteach in aon áitreabh de bhun fho-alt (1), féadfaidh an duine údaraithe na cumhachtaí atá leagtha amach in alt 252(2) a fheidhmiú agus, de réir mar is cuí, i dteannta an mhéid sin—

(a)  cibé faisnéis a éileamh ar áititheoir de chuid an áitribh nó ar aon duine atá fostaithe san áitreabh nó ar aon duine eile atá san áitreabh, nó

(b)  a cheangal go dtabharfar ar aird cibé taifid agus doiciméid agus iad a iniúchadh, agus cóipeanna a dhéanamh díobh nó sleachta a thógáil astu, nó iad a thabhairt chun siúil, má mheastar gur gá é chun iniúchadh nó scrúdú a dhéanamh ar aon taifid nó doiciméid den sórt sin,

a mheasfaidh an duine údaraithe, ag féachaint do na himthosca go léir, is gá chun aon chumhacht a thugtar dó nó di leis an Acht seo nó faoi a fheidhmiú.

(4)  (a)  Más rud é, i bhfeidhmiú a chumhachtaí nó a cumhachtaí faoi fho-alt (1), go gcoiscfear ar dhuine údaraithe dul isteach in aon áitreabh nó go mbeidh cúis aige nó aici chun a chreidiúint go bhféadfadh fianaise a bhaineann le cion amhrasta faoin Acht seo a bheith in aon áitreabh agus go bhféadfaí an fhianaise a aistriú ón áitreabh sin nó a dhíothú nó go bhféadfaí aon déanmhas áirithe a dhamáistiú nó a dhíothú, féadfaidh an duine údaraithe nó an duine a cheap é nó í iarratas a dhéanamh chuig breitheamh den Chúirt Dúiche ar bharántas faoin bhfo-alt seo á údarú don duine údaraithe dul isteach san áitreabh.

(b)  Más rud é, ar iarratas a bheith déanta chuige nó chuici faoin bhfo-alt seo, gur deimhin le breitheamh den Chúirt Dúiche, ar fhaisnéis faoi mhionn ón iarratasóir, go ndearnadh an duine údaraithe lena mbaineann a chosc ar dhul isteach in áitreabh nó go bhfuil forais réasúnacha ag an duine údaraithe chun na nithe eile dá dtagraítear i mír (a) a chreidiúint, féadfaidh an breitheamh barántas a eisiúint faoina láimh á údarú don duine sin, agus cibé líon comhaltaí den Gharda Síochána a bheidh sonraithe sa bharántas in éineacht leis nó léi, más dóigh leis an mbreitheamh gur cuí foráil a dhéanamh amhlaidh, dul isteach, le forneart más gá, san áitreabh lena mbaineann aon tráth laistigh de 4 sheachtain ó dháta eisiúna an bharántais, ar an mbarántas a thabhairt ar aird má iarrtar amhlaidh air nó uirthi é, agus na cumhachtaí dá dtagraítear i bhfo-alt (3) a fheidhmiú.

Fearais agus cáblaí, etc., ar bhóithre poiblí a cheadúnú.

254. —(1)  Faoi réir fho-alt (2), ní dhéanfaidh duine aon cheann díobh seo a leanas a thógáil, a fhoirgniú, a shuíomh nó a chothabháil—

(a)  inneall díola,

(b)  léarscáil de bhaile nó de thírdhreach chun treonna nó áiteanna a thaispeáint,

(c)  clárlach, fál nó scafall,

(d)  déanmhas fógráin,

(e)  cábla, sreang nó píblíne,

(f)  both nó uaithne gutháin, nó

(g)  aon fhearas, gaireas nó déanmhas eile a fhorordófar mar ní ar gá ceadúnas a fháil ina leith faoin alt seo,

ar bhóthar poiblí nó faoi nó thairis nó ar a fheadh, ach amháin de réir ceadúnais arna dheonú ag údarás pleanála faoin alt seo.

(2)  Ní bheidh feidhm ag an alt seo maidir leis na nithe seo a leanas—

(a)  fearas, gaireas nó déanmhas a bheidh údaraithe de réir ceada pleanála arna dheonú faoi Chuid III;

(b)  clárlach, fál nó scafall sealadach a bheidh tógtha de réir coinníll a ghabhann le cead pleanála arna dheonú faoi Chuid III;

(c)  cábla, sreang nó píblíne a thógáil, a fhoirgniú, a shuíomh nó a chothabháil faoi bhóthar poiblí ag gnóthaire reachtúil.

(3)  Aon duine a dhéanfaidh iarratas ar cheadúnas faoin alt seo, tabharfaidh sé nó sí don údarás pleanála cibé pleananna agus faisnéis eile maidir le suíomh, dearadh agus acmhainn an fhearais, an ghairis nó an déanmhais a éileoidh an t-údarás.

(4)  Féadfaidh an t-údarás pleanála ceadúnas a dheonú faoin alt seo ar feadh cibé tréimhse agus ar cibé coinníollacha a shonróidh an t-údarás, lena n-áirítear coinníollacha i ndáil le suíomh agus dearadh agus i gcás inarb é tuairim an údaráis pleanála, de dheasca méadú nó athrú sa trácht ar an mbóthar nó de dheasca an bóthar a leathnú nó aon fheabhsú ar an mbóthar nó i ndáil leis, gur bacainn an fearas, an gaireas nó an déanmhas nó go bhfuil sé éirithe contúirteach, féadfaidh an t-údarás, trí fhógra i scríbhinn, an ceadúnas a tharraingt siar agus a cheangal ar an gceadúnaí an fearas, an gaireas nó an déanmhas a dhíchur ar a chostas nó ar a costas féin.

(5)  Le linn dó breithniú a dhéanamh ar iarratas ar cheadúnas faoin alt seo, beidh aird ag an údarás pleanála, nó ag an mBord ar achomharc, ar na nithe seo a leanas—

(a)  pleanáil chuí agus forbairt inchothaithe an limistéir,

(b)  aon fhorálacha iomchuí den phlean forbartha, nó de phlean limistéir áitiúil,

(c)  líon agus suíomh na bhfearas, na ngaireas nó na ndéanmhas láithreach ar an mbóthar poiblí nó faoi nó thairis nó ar a fheadh, agus

(d)  caoithiúlacht agus sábháilteacht úsáidirí bóthair lena n-áirítear coisithe.

(6)  (a)  Féadfaidh aon duine achomharc a dhéanamh chun an Bhoird i ndáil le ceadúnas faoin alt seo a dheonú, a dhiúltú, a tharraingt siar nó a leanúint i bhfeidhm, nó leis na coinníollacha a shonróidh an t-údarás pleanála maidir le ceadúnas den sórt sin.

(b)  I gcás ina ngéillfear d'achomharc faoin alt seo, tabharfaidh an Bord cibé ordacháin is cuí maidir le ceadúnas faoin alt seo a tharraingt siar, a dheonú nó a athrú, agus comhlíonfaidh an t-údarás pleanála na hordacháin sin.

(7)  Is forbairt dhíolmhaithe chun críocha an Achta seo forbairt a dhéanfar de réir ceadúnais faoin alt seo.

(8)  Ní bheidh duine i dteideal, de bhíthin ceadúnais faoin alt seo agus dá bhíthin sin amháin, aon fhearas, gaireas nó déanmhas a thógáil, a fhoirgniú, a shuíomh nó a chothabháil ar bhóthar poiblí nó faoi nó thairis nó ar a fheadh.

(9)  Faoi réir fho-alt (10), aon duine a dhéanfaidh—

(a)  fearas, gaireas nó déanmhas dá dtagraítear i bhfo-alt (1) a thógáil, a fhoirgniú, a shuíomh nó a chothabháil ar bhóthar poiblí nó faoi nó thairis nó ar a fheadh gan ceadúnas faoin alt seo a bheith aige nó aici chun déanamh amhlaidh,

(b)  fearas, gaireas nó déanmhas den sórt sin a thógáil, a fhoirgniú, a shuíomh nó a chothabháil ar bhóthar poiblí nó faoi nó thairis nó ar a fheadh ar shlí seachas de réir ceadúnais faoin alt seo, nó

(c)  aon choinníoll ar faoina réir a tugadh ceadúnas faoin alt seo dó nó di a shárú,

beidh sé nó sí ciontach i gcion.

(10)  (a)  Féadfaidh údarás pleanála, de bhua an fho-ailt seo, aon fhearas, gaireas nó déanmhas dá dtagraítear i bhfo-alt (1) a thógáil, a fhoirgniú, a shuíomh nó a chothabháil é féin ar bhóthar poiblí nó faoi nó thairis nó ar a fheadh, agus ní gá don údarás pleanála ceadúnas faoin alt seo a bheith aige.

(b)  Ní dhéanfar aon ní san fho-alt seo a fhorléiriú mar ní a thugann cumhacht d'údarás pleanála bac a chur le húsáid réasúnach bóthair phoiblí ag an bpobal nó ag aon duine atá i dteideal é a úsáid nó mar ní a thugann cumhacht d'údarás pleanála núis a chruthú d'úinéir nó d'áititheoir áitribh atá in aice leis an mbóthar poiblí.

(11)  I gcás nach é an t-údarás pleanála an t-údarás bóithre chun críocha bóithre náisiúnta nó réigiúnacha ina limistéar, ní dheonóidh sé ceadúnas faoin alt seo i leith aon fhearais, gairis nó déanmhais ar bhóthar náisiúnta nó réigiúnach nó faoi nó thairis nó ar a fheadh, ná aon fhearas, gaireas nó déanmhas a thógáil, a fhoirgniú, a shuíomh nó a chothabháil ar bhóthar náisiúnta nó réigiúnach nó faoi nó thairis nó ar a fheadh, ach amháin tar éis dul i gcomhairle leis an údarás arb é an t-údarás bóithre é chun na gcríoch sin.

Comhlíonadh feidhmeanna ag údaráis phleanála.

255. —(1)  Soláthróidh údarás pleanála don Aire cibé faisnéis maidir le comhlíonadh a fheidhmeanna a iarrfaidh sé nó sí ó am go ham.

(2)  (a)  Déanfaidh údarás pleanála, ag cibé eatraimh is oiriúnach leis nó a ordóidh an tAire, athbhreithnithe a sheoladh ar a eagrú agus ar na córais agus na nósanna imeachta a úsáideann sé i ndáil lena fheidhmeanna faoin Acht seo.

(b)  I gcás ina dtabharfaidh an tAire ordachán faoin bhfo-alt seo, tabharfaidh an t-údarás pleanála tuarascáil don Aire maidir le torthaí an athbhreithnithe arna sheoladh de bhun an ordacháin agus comhlíonfaidh sé aon treoir a thabharfaidh an tAire, tar éis dul i gcomhairle leis an údarás pleanála maidir leis na torthaí sin, i ndáil le gach ní nó le haon ní de na nithe ab ábhar don athbhreithniú.

(3)  Féadfaidh an tAire duine nó comhlacht, nach é nó í an t-údarás pleanála lena mbaineann é nó í, a cheapadh chun athbhreithniú a dhéanamh de réir fho-alt (2).

(4)  Gan dochar do chumhachtaí an Aire faoin Acht Rialtais Áitiúil, 1941, i gcás ina mbeidh an tAire tagtha ar an tuairim, ó fhaisnéis a bheidh ar fáil dó nó di—

(a)  go bhféadfadh sé nach bhfuil údarás pleanála ag comhlíonadh a fheidhmeanna de réir cheanglais an Achta seo nó ceanglas faoin Acht seo,

(b)  nach bhfuil údarás pleanála ag comhlíonadh treoirlínte arna n-eisiúint faoi alt 28, treorach arna heisiúint faoi alt 29, nó ordacháin arna eisiúint faoi alt 31,

(c)  go bhféadfadh go bhfuil aon fheidhm dá fheidhmeanna á seoladh ag údarás pleanála ar bhealach míchuí, nó

(d)  go bhfuil díbharainneachtaí nó mí-éifeachtúlachtaí tromchúiseacha i seoladh a fheidhmeanna ag údarás pleanála,

féadfaidh sé nó sí, i gcás inar dóigh leis nó léi gur gá nó gur cuí é, coimisinéir a cheapadh, ar chúiseanna sonraithe, chun feidhmeanna uile, nó aon fheidhm amháin nó níos mó d'fheidhmeanna, an údaráis pleanála faoin Acht seo a chomhlíonadh agus chun bheith freagrach go hiomlán as an gcéanna agus, le linn don Aire déanamh amhlaidh, féadfaidh sé nó sí idirdhealú a dhéanamh idir feidhmeanna forchoimeádta agus feidhmeanna eile.

(5)  Le linn dó nó di breithniú a dhéanamh i dtaobh an gá nó an fóirsteanach coimisinéir a cheapadh faoin alt seo, féadfaidh an tAire aird a bheith aige nó aici ar aon chailleadh muiníne ag an bpobal as comhlíonadh a fheidhmeanna ag an údarás agus ar an ngá atá ann an mhuinín sin a thabhairt ar ais.

(6)  Déanfar coimisinéir a cheapfar faoin alt seo a cheapadh de réir cibé téarmaí agus coinníollacha agus ar feadh cibé tréimhse a shonróidh an tAire.

(7)  Féadfaidh údarás pleanála, ar fhorais a luafar agus a bheith bunaithe ar fhorálacha fho-alt (4), le rún, a iarraidh ar an Aire coimisinéir a cheapadh chun gach feidhm nó aon fheidhm d'fheidhmeanna an údaráis faoin Acht seo a chomhlíonadh agus beidh aird ag an Aire ar aon iarraidh den sórt sin.

(8)  Beidh sé de dhualgas ar gach comhalta agus ar gach oifigeach d'údarás pleanála comhoibriú le haon choimisinéir a cheapfar faoin alt seo.

Leasú ar an Acht fán nGníomhaireacht um Chaomhnú Comhshaoil, 1992.

256. —Leasaítear leis seo an tAcht fán nGníomhaireacht um Chaomhnú Comhshaoil, 1992, in alt 98—

(a)  trí na fo-ailt seo a leanas a chur in ionad fho-alt (1)—

“(1)  D'ainneoin alt 34 den Acht um Pleanáil agus Forbairt, 2000, nó aon fhorála eile den Acht sin, i gcás inar deonaíodh ceadúnas nó ceadúnas athleasaithe faoin gCuid seo, nó ina bhfuil nó ina mbeidh gá leis an gcéanna i ndáil le gníomhaíocht, ní dhéanfaidh údarás pleanála ná an Bord Pleanála, i gcás ina gcinnfidh sé cead a dheonú faoi alt 34 den Acht sin i leith aon fhorbartha arb éard í an ghníomhaíocht nó ar chun críocha na gníomhaíochta í, an cead a chur faoi réir coinníollacha ar coinníollacha iad—

(a)  chun astaíochtaí ó oibriú na gníomhaíochta a rialú, lena n-áirítear na hastaíochtaí sin a chosc, a theorannú, a mhaolú nó a laghdú nó deireadh a chur leo, nó

(b)  chun astaíochtaí a bhaineann le scor d'oibriú na gníomhaíochta, nó a leanfaidh as an scor sin, a rialú.

(1A)  I gcás inar deonaíodh ceadúnas nó ceadúnas athleasaithe faoin gCuid seo, nó ina bhfuil nó ina mbeidh gá leis an gcéanna i ndáil le gníomhaíocht, féadfaidh údarás pleanála nó an Bord Pleanála, i leith aon fhorbartha arb éard í an ghníomhaíocht nó ar chun críocha na gníomhaíochta í, a chinneadh deonú ceada faoi alt 34 den Acht um Pleanáil agus Forbairt, 2000, a dhiúltú i gcás ina measfaidh an t-údarás nó an Bord Pleanála nach féidir, d'ainneoin cheadúnú na gníomhaíochta faoin gCuid seo, glacadh leis an bhforbairt ar fhorais timpeallachta, ag féachaint do phleanáil chuí agus d'fhorbairt inchothaithe an limistéir ina bhfuil nó ina mbeidh an fhorbairt.

(1B)  (a)  Sula ndéanfaidh sé cinneadh i leith forbartha arb éard í gníomhaíocht nó ar chun críocha gníomhaíochta í, féadfaidh údarás pleanála nó an Bord Pleanála a iarraidh ar an nGníomhaireacht tuairimí a thabhairt laistigh de cibé tréimhse (ar tréimhse í nach giorra in aon chás ná 3 sheachtain ó dháta na hiarrata) a shonróidh an t-údarás nó an Bord i ndáil leis an bhforbairt, lena n-áirítear tuairimí i ndáil le haon ráiteas tionchair timpeallachta a bheidh curtha isteach.

(b)  Le linn dó a chinneadh a dhéanamh, beidh aird ag an údarás nó ag an mBord Pleanála, de réir mar a bheidh, ar na tuairimí, más ann, a bheidh faighte ón nGníomhaireacht laistigh den tréimhse a bheidh sonraithe faoi mhír (a).

(1C)  Féadfaidh an t-údarás pleanála nó an Bord Pleanála, aon tráth tar éis dheireadh na tréimhse a bheidh sonraithe ag an údarás nó ag an mBord Pleanála faoi fho-alt (1B)(a) chun tuairimí a thabhairt, a chinneadh a dhéanamh ar an iarratas nó ar an achomharc.

(1D)  Féadfaidh an tAire rialacháin a dhéanamh lena ndéanfar cibé foráil theagmhasach, iarmhartach nó fhorlíontach is dóigh leis nó léi is gá nó is cuí chun lánéifeacht a thabhairt d'aon cheann d'fhorálacha an ailt seo.

(1E)  Gan dochar do ghinearáltacht fho-alt (1D), féadfar foráil a dhéanamh, le rialacháin arna ndéanamh faoin alt seo, maidir le nithe a bhaineann le nós imeachta i ndáil leis an iarraidh ar thuairimí ón nGníomhaireacht nó i ndáil leis an nGníomhaireacht do thabhairt tuairimí faoin alt seo agus maidir le nithe gaolmhara.

(1F)  Má thugann an Ghníomhaireacht tuairimí faoin alt seo, ní dochar é sin d'aon fheidhm eile de chuid na Gníomhaireachta faoin Acht seo.”,

agus

(b)  i bhfo-alt (3)(a), trí “alt 34 den Acht um Pleanáil agus Forbairt, 2000” a chur in ionad “Chuid IV d'Acht 1963”.

Leasú ar an Acht um Bainistiú Dramhaíola, 1996.

257. —Leasaítear leis seo an tAcht um Bainistiú Dramhaíola, 1996, in alt 54—

(a)  trí na fo-ailt seo a leanas a chur in ionad fho-alt (3):

“(3)  D'ainneoin alt 34 den Acht um Pleanáil agus Forbairt, 2000, nó aon fhorála eile den Acht sin, i gcás inar deonaíodh ceadúnas dramhaíola nó ina bhfuil nó ina mbeidh gá leis an gcéanna i ndáil le gníomhaíocht, ní dhéanfaidh údarás pleanála ná an Bord Pleanála, i gcás ina gcinnfidh sé cead a dheonú faoi alt 34 den Acht sin i leith aon fhorbartha arb éard í an ghníomhaíocht nó ar chun críocha na gníomhaíochta í, an cead a chur faoi réir coinníollacha ar coinníollacha iad—

(a)  chun astaíochtaí ó oibriú na gníomhaíochta a rialú, lena n-áirítear na hastaíochtaí sin a chosc, a theorannú, a mhaolú nó a laghdú nó deireadh a chur leo, nó

(b)  chun astaíochtaí a bhaineann le scor d'oibriú na gníomhaíochta, nó a leanfaidh as an scor sin, a rialú.

(3A)  I gcás inar deonaíodh ceadúnas dramhaíola faoin gCuid seo nó ina bhfuil nó ina mbeidh gá leis an gcéanna i ndáil le gníomhaíocht, féadfaidh údarás pleanála nó an Bord Pleanála, i leith aon fhorbartha arb éard í an ghníomhaíocht nó ar chun críocha na gníomhaíochta í, a chinneadh deonú ceada faoi alt 34 den Acht um Pleanáil agus Forbairt, 2000, a dhiúltú i gcás ina measfaidh an t-údarás nó an Bord Pleanála nach féidir, d'ainneoin cheadúnú na gníomhaíochta faoin gCuid seo, glacadh leis an bhforbairt ar fhorais timpeallachta, ag féachaint do phleanáil chuí agus d'fhorbairt inchothaithe an limistéir ina bhfuil nó ina mbeidh an fhorbairt.

(3B)  (a)  Sula ndéanfaidh sé cinneadh i leith forbartha arb éard í gníomhaíocht nó ar chun críocha gníomhaíochta í, féadfaidh údarás pleanála nó an Bord Pleanála a iarraidh ar an nGníomhaireacht tuairimí a thabhairt laistigh de cibé tréimhse (ar tréimhse í nach giorra in aon chás ná 3 sheachtain ó dháta na hiarrata) a shonróidh an t-údarás nó an Bord i ndáil leis an bhforbairt, lena n-áirítear tuairimí i ndáil le haon ráiteas tionchair timpeallachta a bheidh curtha isteach.

(b)  Le linn dó a chinneadh a dhéanamh, beidh aird ag an údarás nó ag an mBord Pleanála, de réir mar a bheidh, ar na tuairimí, más ann, a bheidh faighte ón nGníomhaireacht laistigh den tréimhse a bheidh sonraithe faoi mhír (a).

(3C)  Féadfaidh an t-údarás pleanála nó an Bord Pleanála, aon tráth tar éis dheireadh na tréimhse a bheidh sonraithe ag an údarás nó ag an mBord Pleanála faoi fho-alt (3B)(a) chun tuairimí a thabhairt, a chinneadh a dhéanamh ar an iarratas nó ar an achomharc.

(3D)  Féadfaidh an tAire rialacháin a dhéanamh lena ndéanfar cibé foráil theagmhasach, iarmhartach nó fhorlíontach is dóigh leis nó léi is gá nó is cuí chun lánéifeacht a thabhairt d'aon cheann d'fhorálacha an ailt seo.

(3E)  Gan dochar do ghinearáltacht fho-alt (3D), féadfar foráil a dhéanamh, le rialacháin arna ndéanamh faoin alt seo, maidir le nithe a bhaineann le nós imeachta i ndáil leis an iarraidh ar thuairimí ón nGníomhaireacht nó i ndáil leis an nGníomhaireacht do thabhairt tuairimí faoin alt seo agus maidir le nithe gaolmhara.

(3F)  Má thugann an Ghníomhaireacht tuairimí faoin alt seo, ní dochar é sin d'aon fheidhm eile de chuid na Gníomhaireachta faoin Acht seo.”,

(b)  i bhfo-alt (4), trí “alt 34 den Acht um Pleanáil agus Forbairt, 2000” a chur in ionad “Chuid IV d'Acht 1963” gach áit a bhfuil sé, agus

(c)  i bhfo-alt (5), trí “an Achta um Pleanáil agus Forbairt, 2000 agus ní dhéanfaidh coinníoll a ghabhann le cead faoi alt 34 den Acht sin” a chur in ionad “na nAchtanna Rialtais Áitiúil (Pleanáil agus Forbairt), 1963 go 1993, agus ní dhéanfaidh coinníoll a ghabhann le cead arna dheonú faoi Chuid IV d'Acht 1963”.

Teorannú ar cheangal le séaraigh de chuid údaráis sláintíochta.

258. —(1)  Beidh feidhm ag an alt seo maidir le haon déanmhas a fhoirgneofar, a thógfar nó a dhéanfar an 10ú lá de Mheitheamh, 1990, nó dá éis, nó nach bhfuil i gceangal le séarach de chuid údaráis sláintíochta.

(2)  Ní bheidh feidhm ag alt 27 den Public Health (Ireland) Act, 1878, i ndáil le déanmhas lena mbaineann an t-alt seo.

(3)  D'ainneoin alt 23 den Public Health (Ireland) Act, 1878, nó aon achtacháin eile, ní bheidh úinéir nó áititheoir déanmhais lena mbaineann an t-alt seo i dteideal a chuid draenacha nó a cuid draenacha a cheangal le haon séarach de chuid an údaráis sláintíochta ar ina limistéar feidhme atá an déanmhas, ach amháin le toiliú an údaráis sláintíochta agus féadfaidh an t-údarás sláintíochta an toiliú sin a thabhairt faoi réir cibé coinníollacha is dóigh leis a bheith réasúnach.

(4)  Aon duine a cheanglóidh draein, nó a chuirfidh faoi deara draein a cheangal, le séarach de chuid údaráis sláintíochta de shárú ar fho-alt (3), beidh sé nó sí ciontach i gcion.

(5)  Féadfaidh an t-údarás sláintíochta aon cheangal idir draein agus séarach, a rinneadh de shárú ar fho-alt (3), a dhúnadh agus féadfaidh sé aon chaiteachais a thabhóidh an t-údarás faoin bhfo-alt seo a ghnóthú ón duine a rinne an ceangal nó a chuir faoi deara an ceangal a dhéanamh agus, mura n-íocfar na caiteachais leis an údarás, beidh siad inghnóthaithe mar fhiach conartha shimplí in aon chúirt dlínse inniúla.

(6)  I gcás ina nglacfaidh fógra faoi alt 8(1) den Acht Rialtais Áitiúil (Seirbhísí Sláintíochta), 1962, éifeacht i ndáil le haon áitreabh, ní gá, faoi fho-alt (3) den alt seo, toiliú ón údarás sláintíochta a sheirbheáil an fógra a fháil chun an déanmhas a cheangal le séarach cuí an údaráis sláintíochta.

(7)  Mura gcuirfear a mhalairt in iúl, measfar, maidir le deonú ceada faoi Chuid III, i ndáil le déanmhas lena mbaineann an t-alt seo, go bhfolaíonn sé toiliú ón údarás sláintíochta faoi fho-alt (3) leis an déanmhas sin a cheangal le séarach cuí an údaráis sláintíochta.

(8)  Le linn dó breithniú a dhéanamh i dtaobh an cóir toiliú a thabhairt faoi fho-alt (3), beidh údarás sláintíochta i dteideal aird a bheith aige ar na sriantachtaí a thuairiscítear ag mír 1 den Cheathrú Sceideal sa mhéid go mbaineann siad sin le soláthar saoráidí séarachais acu.

(9)  San alt seo, tá le “draein”, “údarás sláintíochta” agus “séarach” na bríonna a shanntar dóibh sna hAchtanna Rialtais Áitiúil (Seirbhísí Sláintíochta), 1878 go 1995.

Teorannú le halt 53 den Waterworks Clauses Act, 1847.

259. —(1)  Ní bheidh feidhm ag alt 53 den Waterworks Clauses Act, 1847, ná ag aon achtachán eile lena dtugtar ceart chun soláthair uisce chun críocha tí, i ndáil le teach ar déanmhas neamhúdaraithe é nó ar úsáid neamhúdaraithe an úsáid a bhaintear as.

(2)  Ní chuirfidh aon ní san alt seo srian le hoibriú alt 8(2) den Acht Rialtais Áitiúil (Seirbhísí Sláintíochta), 1962.

Cosaint do shéadchomharthaí náisiúnta.

260. —Ní shrianfaidh ná ní dhochróidh aon ní san Acht seo feidhmeanna, ná ní dhéanfaidh aon ní san Acht seo difear d'fheidhmeanna, an Aire Ealaíon, Oidhreachta, Gaeltachta agus Oileán faoi Achtanna na Séadchomharthaí Náisiúnta, 1930 go 1994, i ndáil le séadchomharthaí náisiúnta mar a mhínítear leis na hAchtanna sin nó i ndáil le haon séadchomharthaí áirithe.

Cairéil a rialú.

261. —(1)  Déanfaidh úinéir nó oibritheoir cairéil lena mbaineann an t-alt seo, tráth nach déanaí ná bliain ón dáta a thiocfaidh an t-alt seo i ngníomh, faisnéis maidir le hoibriú an chairéil ag tosach feidhme an ailt seo a thabhairt don údarás pleanála ar ina limistéar feidhme atá an cairéal, agus, ar an bhfaisnéis sin a fháil, déanfaidh an t-údarás pleanála, de réir alt 7, í a thaifeadadh sa chlár.

(2)  Gan dochar do ghinearáltacht fho-alt (1), sonrófar na nithe seo a leanas i bhfaisnéis a thabharfar faoin bhfo-alt seo—

(a)  achar an chairéil, lena n-áirítear an t-achar asbhainte arna léiriú ar léarscáil,

(b)  an t-ábhar atá á asbhaint agus á phróiseáil (má tá),

(c)  an dáta a thosaigh oibríochtaí cairéalachta ar an talamh (má tá sé ar eolas),

(d)  na huaireanta an chloig sa lá a mbíonn an cairéal á oibriú lena linn,

(e)  an trácht a ghintear ó oibriú an chairéil lena n-áirítear cineál na bhfeithiclí a théann isteach sa chairéal agus a fhágann é agus a mhinice a théann siad isteach ann agus a fhágann siad é,

(f)  na leibhéil torainn agus deannaigh a ghintear ó na hoibríochtaí sa chairéal,

(g)  aon athruithe ábhartha sna sonraí dá dtagraítear i míreanna (a) go (f) le linn na tréimhse dar tosach dáta thosach feidhme an ailt seo agus an dáta a chuirtear an fhaisnéis ar fáil,

(h)  cibé acu—

(i)  a deonaíodh cead pleanála i leith an chairéil faoi Chuid IV d'Acht 1963 agus, má deonaíodh, na coinníollacha, más ann, a bhfuil an cead faoina réir, nó

(ii)  a tosaíodh ar an gcairéal a oibriú roimh 1 Deireadh Fómhair, 1964,

agus

(i)  cibé nithe eile i ndáil le hoibríochtaí an chairéil a fhorordófar.

(3)  Féadfaidh údarás pleanála a cheangal ar dhuine a chuir faisnéis isteach de réir an ailt seo cibé faisnéis bhreise a shonróidh sé, i ndáil le hoibriú an chairéil lena mbaineann, a chur isteach laistigh de cibé tréimhse a shonróidh sé, agus, ar an bhfaisnéis bhreise sin a fháil, déanfaidh an t-údarás pleanála an fhaisnéis a thaifeadadh sa chlár.

(4)  (a)  Déanfaidh údarás pleanála, tráth nach déanaí ná 6 mhí tar éis dháta cláraithe cairéil de réir an ailt seo, fógra i dtaobh an chláraithe a fhoilsiú i nuachtán amháin nó níos mó a scaiptear sa limistéar ina bhfuil an cairéal.

(b)  Luafar i bhfógra faoi mhír (a)

(i)  gur cláraíodh an cairéal de réir an ailt seo,

(ii)  i gcás inar deonaíodh cead pleanála i leith an chairéil, gur deonaíodh amhlaidh é agus cibé acu atá breithniú á dhéanamh ag an údarás pleanála i dtaobh coinníollacha a ghabhann leis an gcead pleanála a athlua, a mhodhnú nó cur leis na coinníollacha sin de réir fho-alt (6)(a)(ii), nó

(iii)  i gcás nár deonaíodh cead pleanála i leith an chairéil, nár deonaíodh amhlaidh é agus cibé acu atá breithniú á dhéanamh ag an údarás pleanála—

(I)  i dtaobh coinníollacha a fhorchur ar oibriú an chairéil de réir fho-alt (6)(a)(i), nó

(II)  i dtaobh ceanglais á cheangal iarratas pleanála a dhéanamh agus ráiteas tionchair timpeallachta a ullmhú i leith an chairéil de réir fho-alt (7),

(iv)  an áit nó na háiteanna inar féidir agus na tráthanna ag ar féidir an clár a iniúchadh,

(v)  go bhféadfar aighneachtaí nó tuairimí maidir le hoibriú an chairéil a dhéanamh chuig an údarás pleanála nó a thabhairt dó laistigh de 4 sheachtain ó dháta foilsithe an fhógra.

(c)  Féadfaidh fógra faoin bhfo-alt seo baint a bheith aige le cairéal amháin nó níos mó a bheidh cláraithe de réir an ailt seo.

(5)  (a)  I gcás ina mbeartaíonn údarás pleanála—

(i)  coinníollacha ar oibriú an chairéil a fhorchur, a athlua, a mhodhnú nó cur leis na coinníollacha sin faoin alt seo, nó

(ii)  a cheangal, faoi fho-alt (7), iarratas pleanála a dhéanamh agus ráiteas tionchair timpeallachta a chur isteach i leith an chairéil de réir an ailt seo,

déanfaidh sé, a luaithe is féidir tar éis dheireadh na tréimhse chun tuairimí a thabhairt nó aighneachtaí a dhéanamh de bhun fógra faoi fho-alt (4)(b), fógra maidir lena thograí a sheirbheáil ar úinéir nó ar oibritheoir an chairéil.

(b)  Luafar i bhfógra dá dtagraítear i mír (a)

(i)  na cúiseanna atá leis na tograí, agus

(ii)  go bhféadfaidh úinéir nó oibritheoir an chairéil aighneachtaí maidir leis na tograí a dhéanamh chuig an údarás pleanála, nó tuairimí maidir leo a thabhairt dó, laistigh de cibé tréimhse a shonrófar san fhógra, is tréimhse nach lú ná 6 sheachtain ó dháta seirbheála an fhógra.

(c)  Déanfaidh údarás pleanála aighneachtaí a bheidh déanta nó tuairimí a bheidh tugtha de bhun fógra faoi mhír (b) a chur san áireamh le linn dó a fheidhmeanna a chomhlíonadh faoi fho-alt (6)(7).

(6)  (a)  Tráth nach déanaí ná 2 bhliain tar éis dháta cláraithe cairéil faoin alt seo, féadfaidh údarás pleanála, ar mhaithe le pleanáil chuí agus forbairt inchothaithe, agus ag féachaint don phlean forbartha agus d'aighneachtaí a bheidh déanta agus do thuairimí a bheidh tugtha (más ann) de bhun fógra faoi fho-alt (4)(5)

(i)  i ndáil le cairéal ar tosaíodh ar é a oibriú roimh 1 Deireadh Fómhair, 1964, coinníollacha a fhorchur ar oibriú an chairéil sin, nó

(ii)  i ndáil le cairéal ar deonaíodh cead pleanála ina leith faoi Chuid IV d'Acht 1963, coinníollacha a forchuireadh ar oibriú an chairéil sin a athlua, a mhodhnú nó cur leis na coinníollacha sin,

agus déanfar, a luaithe is féidir dá éis sin, fógra i scríbhinn ina gcuirfear an méid sin in iúl a thabhairt d'úinéir agus d'oibritheoir an chairéil lena mbaineann.

(b)  Más rud é, i ndáil le deonú ceada pleanála, go ndearnadh coinníollacha a athlua, a mhodhnú nó gur cuireadh leis na coinníollacha sin de réir mhír (a), measfar, chun críocha an Achta seo, gur deonaíodh an cead pleanála faoi alt 34 agus beidh éifeacht le haon choinníoll arna athlua, arna mhodhnú nó arna chur leis na coinníollacha sin amhail is dá mba rud é gur faoi alt 34 a forchuireadh iad.

(c)  D'ainneoin mhír (a), i gcás inar deonaíodh ceadúnas um rialú comhtháite ar thruailliú i ndáil le cairéal, ní dhéanfaidh údarás pleanála, nó an Bord ar achomharc, coinníollacha a athlua nó a mhodhnú nó ní chuirfidh sé leo nó ní dhéanfaidh sé iad a fhorchur faoin bhfo-alt seo ar coinníollacha iad—

(i)  i ndáil le hastaíochtaí ón gcairéal a rialú (lena n-áirítear na hastaíochtaí sin a chosc, a theorannú, a mhaolú nó a laghdú nó deireadh a chur leo), nó

(ii)  i ndáil le hastaíochtaí a bhaineann le scor d'oibriú an chairéil, nó a leanfaidh as an scor sin, a rialú.

(7)  (a)  Más rud é, maidir le hoibriú leanúnach cairéil—

(i)  (I)  ar mó ná 5 heicteár a achar asbhainte, nó

(II)  a bheidh suite i láithreán Eorpach nó in aon limistéar eile a bheidh forordaithe chun críche alt 10(2)(c), nó ar thalamh a bhfuil feidhm ag ordú faoi alt 15, 16 nó 17 den Acht um Fhiadhúlra, 1976, maidir leis,

agus

(ii)  ar tosaíodh ar é a oibriú roimh 1 Deireadh Fómhair, 1964,

gur dhóigh dó éifeachtaí suntasacha a bheith aige ar an gcomhshaol (ag féachaint d'aon chritéir roghnóireachta a fhorordóidh an tAire faoi alt 176(2)(e)), ní fhorchuirfidh údarás pleanála coinníollacha ar oibriú cairéil faoi fho-alt (6), ach déanfaidh sé, tráth nach déanaí ná bliain tar éis dháta cláraithe an chairéil, a cheangal trí fhógra i scríbhinn ar úinéir nó ar oibritheoir an chairéil iarratas a dhéanamh ar chead pleanála agus ráiteas tionchair timpeallachta a chur faoi bhráid an údaráis pleanála tráth nach déanaí ná 6 mhí tar éis dháta seirbheála an fhógra, nó cibé tréimhse eile a chomhaontófar leis an údarás pleanála.

(b)  Ní bheidh feidhm ag alt 172(1) maidir le forbairt lena mbaineann iarratas a dhéanfar de bhun ceanglais faoi mhír (a).

(c)  Déanfaidh údarás pleanála nó an Bord ar achomharc, le linn dó breithniú a dhéanamh ar iarratas ar chead pleanála a dhéanfar de bhun ceanglais faoi mhír (a), aird a thabhairt ar úsáid láithreach na talún mar chairéal.

(8)  (a)  Más rud é, i ndáil le cairéal ar deonaíodh cead ina leith faoi Chuid IV d'Acht 1963, go gcuirfidh údarás pleanála le coinníollacha nó go ndéanfaidh sé coinníollacha a mhodhnú faoin alt seo ar coinníollacha iad atá níos sriantaí ná coinníollacha láithreacha arna bhforchur i ndáil leis an gcead sin, féadfaidh úinéir nó oibritheoir an chairéil cúiteamh a éileamh faoi alt 197, agus déanfar tagairtí san alt sin do chomhlíonadh coinníollacha maidir le leanúint d'aon úsáid a dhéanamh de thalamh de dhroim fógra faoi alt 46 a fhorléiriú mar thagairtí a fholaíonn tagairtí do chomhlíonadh na gcoinníollacha a cuireadh amhlaidh le coinníollacha nó do chomhlíonadh coinníollacha arna modhnú amhlaidh, ach amháin nach bhféadfar aon éileamh den sórt sin a dhéanamh i leith aon choinníll a bhaineann le ní a shonraítear i mír (a), (b)(c) d'alt 34(4), nó i leith coinníll a bhaineann le hastaíochtaí ón gcairéal a chosc, a theorannú nó a rialú, nó le talamh ar a bhfuil an cairéal a athbhunú.

(b)  Más rud é, i ndáil le cairéal lena mbaineann fo-alt (7), go ndiúltóidh údarás pleanála, nó an Bord ar achomharc, cead forbartha faoi alt 34 nó go ndeonóidh sé cead faoin alt sin faoi réir coinníollacha ar oibriú an chairéil, beidh úinéir nó oibritheoir an chairéil i dteideal cúiteamh a éileamh faoi alt 197, agus chun na críche sin déanfar an tagairt i bhfo-alt (1) den alt sin d'fhógra faoi alt 46 a fhorléiriú mar thagairt do chinneadh faoi alt 34 agus déanfar an tagairt in alt 197(2) d'alt 46 a fhorléiriú mar thagairt d'alt 34, ach amháin nach bhféadfar aon éileamh den sórt sin a dhéanamh i leith aon choinníll a bhaineann le ní a shonraítear i mír (a), (b)(c) d'alt 34(4), nó i leith coinníll a bhaineann le hastaíochtaí ón gcairéal a chosc, a theorannú nó a rialú, nó le talamh ar a bhfuil an cairéal a athbhunú.

(9)  (a)  Féadfaidh duine a thabharfaidh faisnéis d'údarás pleanála de réir fho-alt (1) nó i gcomhlíonadh ceanglais faoi fho-alt (3) achomharc i gcoinne cinnidh ón údarás pleanála coinníollacha a fhorchur, a athlua nó a mhodhnú, nó cur leo, de réir fho-alt (6), a dhéanamh chuig an mBord laistigh de 4 sheachtain ón dáta a gheofar an fógra ón údarás maidir leis na coinníollacha sin.

(b)  Féadfaidh an Bord, nuair a thabharfar breith ar achomharc faoi mhír (a), cinneadh an údaráis pleanála a dhaingniú fara modhnuithe nó dá n-éagmais nó an cinneadh sin a neamhniú.

(10)  (a)  Is forbairt neamhúdaraithe cairéal a bhfuil feidhm ag an alt seo maidir leis agus a mainneoidh an t-úinéir nó an toibritheoir ina leith faisnéis a thabhairt i ndáil le hoibríochtaí an chairéil de réir fho-alt (1) nó de réir ceanglais faoi fho-alt (3).

(b)  Is forbairt neamhúdaraithe aon chairéal a bhfuil feidhm ag fógra faoi fho-alt (7) ina leith, mura gcuirfear iarratas pleanála i leith an chairéil faoi bhráid an údaráis pleanála laistigh den tréimhse dá dtagraítear san fho-alt sin.

(11)  Beidh feidhm ag an alt seo—

(a)  maidir le cairéal ar deonaíodh cead pleanála ina leith faoi Chuid IV d'Acht 1963 breis agus 5 bliana roimh theacht i ngníomh don alt seo, agus

(b)  maidir le haon chairéal eile a bheidh á oibriú ar theacht i ngníomh don alt seo nó dá éis, ar cairéal é nár deonaíodh cead pleanála ina leith faoin gCuid sin.

(12)  Féadfaidh an tAire treoirlínte a eisiúint d'údaráis phleanála maidir le comhlíonadh a bhfeidhmeanna faoin alt seo agus beidh aird ag údarás pleanála ar aon treoirlínte den sórt sin.

(13)  San alt seo—

ciallaíonn “astaíocht”—

(a)  truailleán, de réir bhrí an Achta um Thruailliú Aeir, 1987, a astú isteach san atmaisféar,

(b)  ábhar truailliúcháin, eisilteach séarachta nó eisilteach trádála de réir bhrí an Achta Rialtais Áitiúil (Truailliú Uisce), 1977, a scardadh in uiscí nó i séaraigh de réir bhrí an Achta sin,

(c)  dramhaíl a dhiúscairt, nó

(d)  torann;

ciallaíonn “oibritheoir” duine atá, gach tráth ábhartha i gceannas ar sheoladh gníomhaíochtaí cairéalachta ag cairéal nó a seoltar gníomhaíochtaí den sórt sin faoina rialú;

tá le “cairéal” an bhrí a shanntar dó le halt 3 den Acht um Mianaigh agus Cairéil, 1965.

Rialacháin i gcoitinne.

262. —(1)  Féadfaidh an tAire rialacháin a dhéanamh lena bhforordófar aon ní dá dtagraítear san Acht seo mar ní atá forordaithe nó atá le forordú, nó i ndáil le haon ní dá dtagraítear san Acht seo mar ní is ábhar do rialacháin.

(2)  Féadfaidh cibé forálacha teagmhasacha, forlíontacha agus iarmhartacha, is dóigh leis an Aire is gá nó is fóirsteanach, a bheith i rialacháin faoin Acht seo.

(3)  Sula ndéanfaidh an tAire aon rialacháin faoin Acht seo, rachaidh sé nó sí i gcomhairle le haon údarás Stáit iomchuí i gcás ina mbaineann na rialacháin le feidhmeanna an údaráis Stáit sin.

(4)  I gcás ina mbeartaítear rialacháin a dhéanamh faoi alt 4(2), 19(3), 25(5), 100(1)(b), (c)(d), 126(4), 176, 179(1), 181(1), 221(4), 230(1)246, leagfar dréacht de na rialacháin faoi bhráid gach Tí den Oireachtas agus ní dhéanfar na rialacháin mura mbeidh rún ag ceadú an dréachta rite ag gach Teach acu sin.

(5)  Déanfar gach rialachán arna dhéanamh faoin Acht seo (seachas rialachán dá dtagraítear i bhfo-alt (4)) a leagan faoi bhráid gach Tí den Oireachtas a luaithe is féidir tar éis a dhéanta agus má dhéanann ceachtar Teach acu sin, laistigh den 21 lá a shuífidh an Teach sin tar éis an rialachán a leagan faoina bhráid, rún a rith ag neamhniú an rialacháin, beidh an rialachán ar neamhní dá réir sin, ach sin gan dochar do bhailíocht aon ní a rinneadh roimhe sin faoin rialachán.