An Chéad Lch. Lch. Roimhe Seo (CUID XIX Tosach Feidhme, Aisghairm agus Buanú) Ar Aghaidh (AN CHÉAD SCEIDEAL Na críocha ar féidir cuspóirí a thaispeáint ina leith i bPlean Forbartha)

30 2000

An tAcht Um Pleanáil Agus Forbairt, 2000

CUID XX

Leasuithe ar Acht na mBóithre, 1993

Leasú ar alt 57 d'Acht na mBóithre, 1993.

271. —Leasaítear leis seo alt 57 d'Acht na mBóithre, 1993—

(a)  tríd an méid seo a leanas a chur in ionad fho-alt (1):

“(1)  Féadfaidh údarás bóithre scéim a ullmhú chun córas dolaí a bhunú i leith bóthar poiblí a úsáid.”,

(b)  i bhfo-alt (2), trí “Le linn scéim a ullmhú faoi fho-alt (1)” a chur in ionad “Le linn dola-scéim a dhéanamh”,

(c)  i bhfo-alt (3), trí “Maidir le scéim arna hullmhú faoi fho-alt (1)” a chur in ionad “Maidir le dola-scéim”,

(d)  i bhfo-alt (4), trí “scéim faoi fho-alt (1)” a chur in ionad “dola-scéim”,

(e)  tríd an méid seo a leanas a chur in ionad fho-alt (5):

“(5)  Féadfaidh údarás bóithre scéim a ullmhú lena leasaítear dola-scéim arna glacadh aige faoi alt 58.”,

(f)  i bhfo-alt (6), trí “scéime arna hullmhú faoi fho-alt (1)” a chur in ionad “dola-scéime”, agus

(g)  tríd an méid seo a leanas a chur in ionad fho-alt (7):

“(7)  (a)  Déanfaidh an tÚdarás, sula ndéanfaidh sé scéim i ndáil le bóthar náisiúnta agus arna hullmhú faoi fho-alt (1) a ghlacadh faoi alt 58, cóip den scéim a chur chuig an údarás bóithre cuí faoi alt 13 agus fógra a sheirbheáil ar an údarás bóithre á rá—

(i)  go bhfuil scéim faoi fho-alt (1) ullmhaithe, agus

(ii)  go bhféadfar uiríll a dhéanamh i scríbhinn chuig an Údarás i ndáil leis an scéim roimh cibé dáta a bheidh sonraithe san fhógra (ar dáta é nach luaithe ná 6 sheachtain ó dháta seirbheála an fhógra).

(b)  Breithneoidh an tÚdarás aon uiríll a dhéanfar chuige de bhun fógra faoi mhír (a).

(c)  Is feidhm fhorchoimeádta é údarás bóithre do dhéanamh uiríoll faoin bhfo-alt seo agus ní dochar do cheart an údaráis sin agóidí a dhéanamh chuig an Údarás faoi alt 58 an t-údarás bóithre do dhéanamh uiríoll faoin bhfo-alt seo.”.

Scéim arna hullmhú faoi alt 57 d'Acht na mBóithre, 1993, le glacadh ag údarás bóithre.

272. —Leasaítear leis seo Acht na mBóithre, 1993, tríd an alt seo a leanas a chur in ionad alt 58:

“58.—(1)  Foilseoidh údarás bóithre fógra i nuachtán amháin nó níos mó a scaiptear sa limistéar ina bhfuil an dola-bhóthar beartaithe suite nó ina bhfuil sé le bheith suite—

(a)  á rá go bhfuil dréacht-dola-scéim ullmhaithe,

(b)  á chur in iúl cé na tráthanna ar féidir, cén tréimhse (ar tréimhse í nach lú ná aon mhí amháin ón gcéad uair a fhoilsítear an fógra) ar lena linn is féidir, agus cén áit inar féidir, cóip den scéim a bheidh ullmhaithe faoi alt 57, aon léarscáil dá dtagraítear sa scéim sin agus an ráiteas míniúcháin a bhaineann leis an scéim a iniúchadh, agus

(c)  á rá go bhféadfar agóidí i gcoinne na dréacht-dolascéime a dhéanamh i scríbhinn chuig an údarás bóithre roimh cibé dáta a bheidh sonraithe san fhógra (ar dáta é nach luaithe ná 2 sheachtain ó dheireadh na tréimhse le haghaidh iniúchadh dá dtagraítear i mír (b)).

(2)  (a)  Faoi réir mhír (b), féadfaidh údarás bóithre scéim a bheidh ullmhaithe aige faoi fho-alt (1) a ghlacadh, fara modhnuithe nó dá n-éagmais agus, faoi réir fho-alt (3), gairtear “dola-scéim” anseo ina dhiaidh seo san Acht seo de scéim arna glacadh amhlaidh.

(b)  Má dhéantar agóid chuig an údarás bóithre i gcoinne dréacht-dola-scéime agus mura dtarraingeofar siar an agóid, cuirfidh an t-údarás bóithre faoi deara, sula gcinnfidh sé cibé acu a ghlacfaidh sé nó nach nglacfaidh sé an dréacht-dola-scéim, go ndéanfaidh duine a cheapfaidh an t-údarás bóithre éisteacht ó bhéal a sheoladh maidir leis na nithe lena mbaineann an agóid, agus breithneoidh an t-údarás bóithre aon mholadh a dhéanfaidh an duine a cheapfar amhlaidh.

(3)  (a)  Tiocfaidh dola-scéim a bheidh glactha ag an údarás bóithre faoin alt seo i bhfeidhm fairis na modhnuithe, más ann, arna ndéanamh ag an údarás bóithre uirthi, cibé lá a chinnfidh an t-údarás bóithre.

(b)  Déanfaidh an t-údarás bóithre fógra i dtaobh an lae a bheidh dola-scéim le teacht i bhfeidhm a fhoilsiú aon mhí amháin ar a laghad roimh an lá sin i nuachtán amháin nó níos mó a scaiptear sa limistéar ina bhfuil nó ina mbeidh an dola-bhóthar lena mbaineann an scéim suite.”.

Leasú ar alt 60 d'Acht na mBóithre, 1993.

273. —Leasaítear leis seo alt 60 d'Acht na mBóithre, 1993, tríd an méid seo a leanas a chur in ionad an ailt sin—

“60.—(1)  Féadfaidh údarás bóithre, le hordú, dola-scéim a bheidh glactha aige faoi alt 58 a chúlghairm.

(2)  I gcás ina mbeartaíonn údarás bóithre ordú a dhéanamh faoi fho-alt (1), déanfaidh sé, sula ndéanfaidh sé an t-ordú amhlaidh, fógra a fhoilsiú i nuachtán amháin nó níos mó a scaiptear sa limistéar ina bhfuil an dola-bhóthar—

(a)  á rá go bhfuil sé beartaithe aige an scéim a chúlghairm,

(b)  á chur in iúl cé na tráthanna ar féidir, cén tréimhse (ar tréimhse í nach lú ná aon mhí amháin ón gcéad uair a fhoilsítear an fógra) ar lena linn is féidir, agus cén áit inar féidir, cóip den togra a iniúchadh,

(c)  á rá go bhféadfar agóidí nó uiríll a dhéanamh i scríbhinn chuig an údarás bóithre i ndáil leis an togra roimh cibé dáta a bheidh sonraithe san fhógra (ar dáta é nach luaithe ná 2 sheachtain ó dheireadh na tréimhse le haghaidh an togra a iniúchadh).

(3)  Sula ndéanfaidh sé ordú faoi fho-alt (1), breithneoidh an t-údarás bóithre aon agóidí nó uiríll a bheidh déanta chuige de réir fógra faoi fho-alt (2).

(4)  Féadfaidh údarás bóithre dá rogha féin a chur faoi deara go déanfaidh duine a cheapfaidh an t-údarás bóithre éisteacht ó bhéal a sheoladh maidir le haon ní lena mbaineann agóidí nó uiríll a bheidh déanta de réir fógra faoi fho-alt (2) agus nach mbeidh tarraingthe siar, agus i gcás ina gcuirfidh údarás bóithre faoi deara go seolfar éisteacht ó bhéal amhlaidh, déanfaidh sé, sula gcúlghairfidh sé an dola-scéim faoi fho-alt (3), tuarascáil an duine sin agus aon mholadh a bheidh déanta ag an duine sin a bhreithniú.

(5)  Déanfaidh an t-údarás bóithre fógra maidir le haon ordú a dhéanamh faoi fho-alt (1) a fhoilsiú i nuachtán amháin nó níos mó a scaiptear sa limistéar ina bhfuil an dola-bhóthar.

(6)  Is feidhm fhorchoimeádta é ordú a dhéanamh faoin alt seo i ndáil le bóthar réigiúnach nó bóthar áitiúil.”.

Leasú ar alt 61 d'Acht na mBóithre, 1993.

274. —Leasaítear leis seo alt 61 d'Acht na mBóithre, 1993—

(a)  trí fho-alt (5) a scriosadh,

(b)  tríd an bhfo-alt seo a leanas a chur in ionad fho-alt (6):

“(6)  Sula ndéanfaidh sé fodhlíthe, foilseoidh údarás bóithre fógra i nuachtán amháin nó níos mó a scaiptear sa limistéar ina bhfuil an dola-bhóthar lena mbaineann na fodhlíthe suite nó ina bhfuil sé le bheith suite—

(a)  á chur in iúl go bhfuil sé beartaithe na fodhlíthe sin a dhéanamh agus ina luafar cuspóir na bhfodhlíthe,

(b)  á chur in iúl cé na tráthanna ar féidir, cén tréimhse (ar tréimhse í nach lú ná aon mhí amháin ón gcéad uair a fhoilsítear an fógra) ar lena linn is féidir, agus cén áit inar féidir, cóip de na dréacht-fhodhlíthe a iniúchadh,

(c)  á rá go bhféadfar agóidí nó uiríll a dhéanamh i scríbhinn chuig an údarás bóithre i ndáil leis na dréacht-fhodhlíthe roimh cibé dáta a bheidh sonraithe san fhógra (ar dáta é nach luaithe ná 2 sheachtain ó dheireadh na tréimhse le haghaidh na dréacht-fhodhlíthe a iniúchadh), agus

(d)  á rá go bhféadfar cóip de na dréacht-fhodhlíthe a cheannach ar cibé táille a bheidh sonraithe san fhógra a íoc, ar táille í nach mó ná an costas réasúnach a thabhaítear le linn an chóip sin a dhéanamh.”,

(c)  tríd an bhfo-alt seo a leanas a chur in ionad fho-alt (7):

“(7)  Sula ndéanfaidh sé fodhlíthe, breithneoidh an t-údarás bóithre aon agóidí nó uiríll a bheidh déanta chuige de réir fógra faoi fho-alt (6) agus nach mbeidh tarraingthe siar.”,

(d)  tríd an bhfo-alt seo a leanas a chur in ionad fho-alt (8):

(8)  Tiocfaidh fodhlíthe a dhéanfaidh údarás bóithre faoin alt seo in éifeacht cibé dáta a bheidh sonraithe sna fodhlíthe sin.”,

agus

(e)  i bhfo-alt (9), trí “tar éis iad a dhéanamh” a chur in ionad “tar éis iad a cheadú”.

Leasú ar alt 63 d'Acht na mBóithre, 1993.

275. —Leasaítear leis seo alt 63 d'Acht na mBóithre, 1993—

(a)  i bhfo-alt (1), trí “I gcás ina nglacfaidh údarás bóithre dola-scéim, féadfaidh an t-údarás bóithre” a chur in ionad “I gcás ina gceadóidh an tAire dola-scéim, féadfaidh údarás bóithre, le toiliú an Aire,”, agus

(b)  i bhfo-alt (3), trí “, le toiliú an Aire,” a scriosadh.

Leasú ar alt 65 d'Acht na mBóithre, 1993.

276. —Leasaítear leis seo Acht na mBóithre, 1993, in alt 65 trí “alt 58” a chur in ionad “alt 57”.

Leasú breise ar Chuid V d'Acht na mBóithre, 1993.

277. —Leasaítear leis seo Cuid V d'Acht na mBóithre, 1993, trí na hailt seo a leanas a chur isteach i ndiaidh alt 66—

“Treoracha beartais ón Aire maidir le dolaí a mhuirearú ar bhóithre.

66A.—(1)  Féadfaidh an tAire, ó am go ham, treoracha beartais a eisiúint chuig údaráis bhóithre maidir le haon fheidhm dá gcuid faoi Chuid V a fheidhmiú nó maidir le haon ní atá comhghaolmhar leis sin agus comhlíonfaidh údaráis bhóithre aon treoracha den sórt sin.

(2)  Féadfaidh an tAire treoir bheartais a eiseofar faoin alt seo a chúlghairm nó a leasú.

(3)  Cuirfidh an tAire faoi deara go ndéanfar cóip d'aon treoir bheartais a eiseofar faoin alt seo a leagan faoi bhráid gach Tí den Oireachtas.

(4)  Déanfaidh údarás bóithre aon treoir bheartais a eiseofar chuige faoin alt seo a chur ar fáil lena hiniúchadh ag daoine den phobal.

(5)  Ní eiseoidh an tAire treoir a bhaineann le scéim áirithe maidir le dolaí a mhuirearú.

Scéimeanna, fodhlíthe agus comhaontuithe láithreacha a bhuanú.

66B.—D'ainneoin na Coda seo, maidir le gach comhaontú agus gach dola-scéim nó fodhlí a dhéanfaidh údarás bóithre agus a bheidh i bhfeidhm díreach roimh thosach feidhme an ailt seo leanfaidh sé nó sí de bheith i bhfeidhm amhail is dá mba rud é go ndearnadh é nó í faoin gCuid seo arna leasú leis an Acht um Pleanáil agus Forbairt, 2000.

Forálacha idirthréimhseacha maidir le dola-scéimeanna.

66C.—Más rud é, roimh thosach feidhme Chuid XX den Acht um Pleanáil agus Forbairt, 2000, go mbeidh aon dola-scéim, aon togra chun dola-scéim a chúlghairm nó aon fhodhlí curtha faoi bhráid an Aire faoi Chuid V agus nach mbeidh breith tugtha ag an Aire ar an ní, beidh an bhreith i ndáil leis an ní le tabhairt fós ag an Aire agus ní bheidh feidhm ag Cuid V arna leasú le Cuid XX den Acht um Pleanáil agus Forbairt, 2000, maidir leis an ní.”.