An Chéad Lch. Lch. Roimhe Seo (AN TRÍÚ SCEIDEAL Forbairt nach mbeidh Cúiteamh Iníoctha i gcás Cead a Dhiúltú ina Leith) Ar Aghaidh (AN CÚIGIÚ SCEIDEAL Coinníollacha is féidir a Fhorchur, gan Cúiteamh a Íoc, ar Dheonú Ceada chun Talamh a Fhorbairt)

30 2000

An tAcht Um Pleanáil Agus Forbairt, 2000

AN CEATHRÚ SCEIDEAL

Cúiseanna le Cead a Dhiúltú nach mbeidh Cúiteamh iníoctha ina Leith

Alt 191.

1.  Go mbeadh sé ró-luath forbairt den chineál beartaithe a dhéanamh ar an talamh, ag féachaint d'aon sriantacht amháin nó níos mó díobh seo a leanas agus don tréimhse a bhféadfaí le réasún a bheith ag súil go mbeadh deireadh leis na sriantachtaí atá i gceist—

(a)  aon easnamh láithreach ar sholáthar soláthairtí uisce nó saoráidí séarachais,

(b)  acmhainn na soláthairtí uisce nó na saoráidí séarachais, láithreach nó ionchasach, a bheidh ag teastáil le haghaidh forbartha ionchasaí a bhfuil deonú ceada faoi Chuid III den Acht seo, gealltanas faoi Chuid VI d'Acht 1963 nó fógra faoi alt 13 d'Acht 1990 nó faoi alt 192 den Acht seo ar marthain ina leith,

(c)  acmhainn na soláthairtí uisce nó na saoráidí séarachais, láithreach nó ionchasach, a bheidh ag teastáil le haghaidh forbartha ionchasaí cuid eile de limistéar feidhme an údaráis pleanála, mar atá luaite sa phlean forbartha,

(d)  acmhainn na soláthairtí uisce nó na saoráidí séarachais, láithreach nó ionchasach, a bheidh ag teastáil le haghaidh aon fhorbartha ionchasaí eile nó le haghaidh aon chuspóra forbartha, mar atá luaite sa phlean forbartha,

(e)  aon easnamh láithreach ar an ngréasán bóithre a fhreastalaíonn ar limistéar na forbartha beartaithe, lena n-áirítear cúinsí a bhaineann le hacmhainn, leithead, ailíniú nó le dromchla nó bail struchtúrach na pábhála, a d'fhágfadh go mbeadh an gréasán sin, nó aon chuid de, mí-oiriúnach chun an trácht méadaithe is dócha a bheadh ar na bóithre, de bharr na forbartha, a iompar,

(f)  aon easnamh ionchasach (lena n-áirítear na cúinsí a shonraítear i bhfomhír (e)) ar an ngréasán bóithre a fhreastalaíonn ar limistéar na forbartha beartaithe ar easnamh é—

(i)  a thiocfadh i gceist mar gheall ar an trácht méadaithe is dócha a bheadh ar na bóithre de bharr na forbartha sin agus de bharr forbartha ionchasaí a bhfuil deonú ceada faoi Chuid III , gealltanas faoi Chuid VI d'Acht 1963 nó fógra faoi alt 13 d'Acht 1990 nó faoi alt 192 ar marthain ina leith, nó

(ii)  a thiocfadh i gceist mar gheall ar an trácht méadaithe is dócha a bheadh ar na bóithre de bharr na forbartha sin agus de bharr aon fhorbartha ionchasaí eile nó aon chuspóra forbartha, mar a bheidh luaite sa phlean forbartha, agus

a d'fhágfadh go mbeadh an gréasán bóithre sin, nó aon chuid de, mí-oiriúnach chun an trácht méadaithe is dócha a bheadh ar na bóithre, de bharr na forbartha beartaithe, a iompar.

2.  Go mbeadh sé ró-luath forbairt den chineál beartaithe a dhéanamh go dtí go mbeidh breith tugtha ag an údarás pleanála nó ag an údarás bóithre maidir le leagan amach bóithre don limistéar nó d'aon chuid de.

3.  Go mbeadh sé ró-luath forbairt den chineál beartaithe a dhéanamh ag féachaint don ord tosaíochta, más ann, le haghaidh forbartha atá luaite sa phlean forbartha nó go dtí go nglacfar plean limistéir áitiúil de réir an phlean forbartha.

4.  Go gcuirfeadh an fhorbairt bheartaithe sábháilteacht an phobail i mbaol mar gheall ar ghuais tráchta nó ar bhacadh úsáidirí bóthair nó ar shlí eile.

5.  Maidir leis an bhforbairt bheartaithe—

(a)  go bhféadfadh sí, mar gheall ar an bpriacal mórthionóisce nó dá dtarlódh mórthionóisc, a bheith ina cúis le baol tromchúiseach do shláinte an duine nó don chomhshaol, nó

(b)  go bhfuil sí i limistéar inar gá teorainn a chur leis an bpriacal go mbeadh aon bhaol tromchúiseach ann do shláinte an duine nó don chomhshaol.

6.  Go bhfuil an fhorbairt bheartaithe i limistéar ina bhfuil priacal tuile.

7.  Go ndéanfadh an fhorbairt bheartaithe, inti féin nó mar gheall ar an bhfasach a bhunófaí d'fhorbairt iomchuí eile dá ndeonófaí cead lena haghaidh, dochar d'úsáid bóthair náisiúnta nó príomhbhóthair eile ag an trácht.

8.  Go gcuirfeadh an fhorbairt bheartaithe isteach ar shainghné an tírdhreacha nó ar radharc nó ar amharc a bhfuil luachmhaireacht speisialta taitneamhachta nó spéisiúlacht ó thaobh an nádúir de nó áilleacht nádúrtha ag gabháil leis agus ar ní é aon cheann díobh is gá a shlánchoimeád.

9.  Go mbeadh an fhorbairt bheartaithe ina bun le haerthruailliú nó uiscethruailliú tromchúiseach, le truailliú tromchúiseach de dheasca torainn nó tonnchreatha nó le truailliú a bhaineann le diúscairt dramhaíola.

10.  I gcás forbartha ina n-áirítear aon déanmhas, nó aon bhreis nó méadú ar aon déanmhas, gurbh amhlaidh don déanmhas, don bhreis nó don mhéadú—

(a)  go mbrisfeadh sé nó sí líne foirgníochta láithreach nó, i gcás nach bhfuil a leithéid ann, líne foirgníochta arna cinneadh ag an údarás pleanála nó ag an mBord,

(b)  go mbeadh sé nó sí faoi bhóthar poiblí,

(c)  go ndéanfadh sé nó sí díobháil mhór do thaitneamhachtaí, nó go laghdódh sé nó sí luach, maoine sa chomharsanacht,

(d)  gur dhóigh dó nó di a bheith ina chúis nó ina cúis le haon bhrú mór tráchta,

(e)  go gcuirfeadh sé nó sí sábháilteacht aerárthaí nó loingseoireacht shábháilte éifeachtúil aerárthaí i mbaol nó go gcuirfeadh sé nó sí isteach ar an gcéanna,

(f)  go gcuirfeadh sé nó sí sláinte nó sábháilteacht daoine a bheidh ag áitiú an déanmhais nó aon déanmhais atá tadhlach leis, nó a bheidh ar fostú sa chéanna, i mbaol, nó

(g)  go mbeadh sé nó sí dochrach do shláinte an phobail.

11.  Go sáródh an fhorbairt, go hábhartha, coinníoll atá ag gabháil le cead forbartha láithreach.

12.  Go ndéanfadh an fhorbairt bheartaithe díobháil do shéadchomhartha stairiúil, nó go gcuirfeadh sé isteach ar shéadchomhartha stairiúil, atá arna chlárú i gClár na Séadchomharthaí Stairiúla faoi alt 5 d'Acht na Séadchomharthaí Náisiúnta (Leasú), 1987, nó atá suite i limistéar seandálaíochta atá cláraithe amhlaidh.

13.  Go ndéanfadh an fhorbairt bheartaithe dochar do limistéar caomhantais ailtireachta.

14.  Go ndéanfadh an fhorbairt bheartaithe dochar d'oidhreacht teanga nó chultúir na Gaeltachta.

15.  Go sáródh an fhorbairt bheartaithe, go hábhartha, cuspóir atá luaite i bplean limistéir áitiúil don limistéar.

16.  Go mbeadh an fhorbairt bheartaithe contrártha d'aon treoirlínte ón Aire a eiseofar chuig údaráis phleanála faoi alt 28 nó d'aon treoir bheartais ón Aire a eiseofar chuig údaráis phleanála faoi alt 29.

17.  Go ndéanfadh an fhorbairt bheartaithe dochar do limistéar caomhantais tírdhreacha.

18.  De réir alt 35, gur dóigh leis an údarás pleanála go bhfuil priacal réadach substaintiúil ann nach ndéanfaí an fhorbairt a bhfuil cead á lorg ina leith a thabhairt chun críche de réir aon cheada nó aon choinníll a mbeadh cead den sórt sin faoina réir.

19.  Maidir leis an bhforbairt bheartaithe—

(a)  go sáródh sé, go hábhartha, cuspóir forbartha atá luaite sa phlean forbartha chun láithreán Eorpach a chaomhnú agus a shlánchoimeád sa mhéid go ndéanfadh an fhorbairt bheartaithe dochar do cheann amháin nó níos mó díobh seo a leanas—

(i)  (I)  cineálacha sonracha gnáthóige nádúrtha in Iarscríbhinn I den Treoir um Ghnáthóga, nó

(II)  speicis shonracha in Iarscríbhinn II den Treoir um Ghnáthóga a ghnáthaíonn an láithreán,

agus a roghnaigh an tAire Ealaíon, Oidhreachta, Gaeltachta agus Oileán de réir Iarscríbhinn III (Céim 1) den Treoir sin,

(ii)  speicis shonracha éan nó a ngnáthóg nó gnáthóg eile a shonraítear in Airteagal 4 den Treoir um Éin, agus a bhí mar bhonn le haicmiú an láithreáin sin,

(b)  go mbeadh éifeacht dhochrach shuntasach aici ar aon limistéir eile a fhorordaítear chun críche alt 10(2)(c).

20.  Go sáródh an fhorbairt, go hábhartha, cuspóir forbartha atá luaite sa phlean forbartha chun talamh a chriosú d'fhonn limistéir áirithe a úsáid d'aon toisc nó go príomha chun críoch áirithe (cibé acu críocha cónaithe, tráchtála, tionscail, talmhaíochta, áineasa, mar spás oscailte nó ar shlí eile nó meascán de na húsáidí sin).

21.  (a)  Faoi réir mhír 22, ní bheidh feidhm ag míreanna 19 agus 20 i gcás ina raibh feidhm maidir leis an talamh ag cuspóir forbartha le haghaidh na húsáide a shonraítear i mír 20 tráth ar bith le linn tréimhse plean forbartha agus ina ndearnadh a cuspóir forbartha a athrú mar thoradh ar athrú ar an bplean le linn na tréimhse sin roimh an dáta a rinneadh an t-iarratas iomchuí ar chead chun an talamh a fhorbairt, agus nach sáródh an fhorbairt an cuspóir forbartha sin go hábhartha.

(b)  Ní bheidh feidhm ag mír 20 i gcás ina ndéanfaidh údarás pleanála, de thoradh ordacháin ón Aire faoi alt 31(2) arna thabhairt laistigh de bhliain tar éis plean forbartha a dhéanamh, cuspóir forbartha dá dtagraítear in mír 19 a leasú nó a chúlghairm ach sin gan dochar d'aon cheart chun cúitimh a éireoidh ar shlí eile i leith aon diúltú cead a dheonú faoi Chuid III i leith iarratais arna dhéanamh sular eisigh an tAire an t-ordachán sin.

22.  Ní bheidh feidhm ag mír 21 i gcás ina bhfuair duine a leas sa talamh—

(a)  tar éis don chuspóir forbartha dá dtagraítear i mír 1920 teacht i ngníomh, nó

(b)  tar éis fógra a bheith foilsithe,

(i)  de réir alt 1213, i dtaobh plean forbartha nua bheartaithe nó i dtaobh athruithe beartaithe ar phlean forbartha, de réir mar a bheidh, nó

(ii)  de réir alt 12, i dtaobh athrú ábhartha ar an dréacht lena mbaineann,

ina luaitear, i ndréacht, an cuspóir forbartha dá dtagraítear i mír 1920, nó

(c)  i gcás mhír 19, tar éis fógra a bheith foilsithe ag an Aire Ealaíon, Oidhreachta, Gaeltachta agus Oileán á rá go bhfuil ar intinn aige nó aici a mholadh go roghnófaí an talamh mar láithreán Eorpach.

23.  Chun críocha mhír 22, beidh dualgas ar dhuine na fíorais ábhartha go léir a bhaineann lena leas sa talamh a chruthú chun sástacht an údaráis pleanála.

24.  Sa Sceideal seo, tá le “údarás bóithre” agus “bóthar náisiúnta” na bríonna a shanntar dóibh in Acht na mBóithre, 1993.