Uimhir 11 de 2007

AN tACHT AIRGEADAIS 2007

[An tiontú oifigiúil]

RIAR NA nALT

CUID 1

Cáin Ioncaim, Cáin Chorparáideach agus Cáin Ghnóchan Caipitiúil

Caibidil 1

Léiriú

Alt

1 . Léiriú (Cuid 1)

Caibidil 2

Cáin Ioncaim

2 . Leasú ar alt 15 (ráta muirir) den Phríomh-Acht.

3 . Creidmheasanna cánach pearsanta.

4 . Díolúine aoise.

5 . Leasú ar alt 473 (liúntas maidir le cíos a íocann tionóntaí áirithe) den Phríomh-Acht.

6 . Leasú ar alt 244 (faoiseamh i leith úis a íocadh ar iasachtaí áirithe tí cónaithe) den Phríomh-Acht.

7 . Leasú ar alt 122 (socruithe maidir le hiasacht tosaíochta) den Phríomh-Acht.

8 . Fostaithe de chuid gníomhaireachtaí áirithe: liúntais seirbhíse coigríche.

9 . Faoisimh phearsanta: tuairisceáin faisnéise áirithe ó thríú páirtithe, etc.

10 . Leasú ar alt 126 (mar a dhéileálfar, ó thaobh cánach, le sochair áirithe is iníoctha faoi na hAchtanna Leasa Shóisialaigh) den Phríomh-Acht.

11 . Díolúine ó cháin ar ioncam áirithe.

12 . Díolúine i leith íocaíochtaí caiteachais áirithe.

13 . Leasú ar Sceideal 13 (daoine cuntasacha chun críocha Chaibidil 1 de Chuid 18) den Phríomh-Acht.

14 . Leasú ar alt 216A (faoiseamh maidir le seomra a ligean ar cíos) den Phríomh-Acht.

15 . Leasú ar alt 216C (faoiseamh seirbhísí cúraim leanaí) den Phríomh-Acht.

16 . Leasú ar alt 664 (faoiseamh le haghaidh ioncaim áirithe ó thalamh feirme a léasú) den Phríomh-Acht.

17 . Sochair scoir.

18 . Forálacha a bhaineann le Caibidil 2A (teorannú ar mhéid faoiseamh áirithe arna n-úsáid ag pearsana aonair áirithe atá ar ard-ioncam) de Chuid 15 den Phríomh-Acht.

Caibidil 3

Cáin Ioncaim, Cáin Chorparáide agus Cáin Ghnóchan Caipitiúil

19 . Leasú ar Chuid 16 (faoiseamh ó cháin ioncaim i leith infheistíochta i dtrádálacha corpraithe — an scéim um leathnú gnó agus an scéim síolchaipitil) den Phríomh-Acht.

20 . Leasú ar Chuid 40 (achomhairc) den Phríomh-Acht.

21 . Leasú ar alt 373 (léiriú (Cuid 11)) den Phríomh-Acht.

22 . Leasú ar alt 657A (cánachas ar íocaíochtaí áirithe feirme) den Phríomh-Acht.

23 . Cúnamh athstruchtúraithe le haghaidh fásóirí biatais siúcra.

24 . Leasú ar Chaibidil 2 (feirmeoireacht: faoiseamh i leith méadaithe ar luachanna stoic) de Chuid 23 den Phríomh-Acht.

25 . Leasú ar alt 669A (léiriú) den Phríomh-Acht.

26 . Cánachas ar bhrabúis agus ar ghnóchain ó staileanna.

27 . Leasú ar Sceideal 26A (deonacháin do chomhlachtaí ceadaithe, etc.) a ghabhann leis an bPríomh-Acht.

28 . Liúntais chaipitiúla le haghaidh aonad cónaithe cáilithe a bhaineann le tithe banaltrais cláraithe.

29 . Scéim infheistíochta bonneagair turasóireachta chonair na Sionainne Láir.

30 . Leasú ar alt 1008 (measúnacht ar leithligh ar chomhpháirtithe) den Phríomh-Acht.

31 . Leasú ar Chaibidil 2 (íocaíochtaí le fochonraitheoirí i dtionscail áirithe) de Chuid 18 den Phríomh-Acht.

32 . Leasú ar Chuid 36A (cuntais dreasachta coigiltis speisialta) den Phríomh-Acht.

33 . Leasú ar Chuid 36B (pinsin: creidmheasanna cánach dreasachta) den Phríomh-Acht.

34 . Íocaíochtaí áirithe úis ag glacadóirí taisce.

35 . Faoiseamh ó chánachas dúbailte.

36 . Faoiseamh aontaobhach ó chánachas dúbailte.

37 . Leasú ar alt 81 (riail ghinearálta maidir le hasbhaintí) den Phríomh-Acht.

38 . Cáin iarchoimeádta díbhinne.

39 . Leasú ar Chuid 27 (iontaobhais aonad agus cistí eischósta) den Phríomh-Acht.

40 . Gnóthais infheistíochta agus cistí eischósta áirithe: cánachas ar ghnóthais infheistíochta punainne pearsanta.

41 . Leasú ar alt 739D (gnóchan a éiríonn as teagmhas inmhuirearaithe) den Phríomh-Acht.

42 . Leasú ar alt 730H (léiriú agus feidhm) den Phríomh-Acht.

43 . Leasú ar Chaibidil 5 (sealbhóirí polasaithe — bonn nua) de Chuid 26 den Phríomh-Acht.

44 . Leasú ar Chaibidil 1 (sócmhainní a aistriú as an Stát) de Chuid 33 den Phríomh-Acht.

45 . Leasú ar alt 234 (ioncam áirithe ó ríchíosanna paitinne) den Phríomh-Acht.

Caibidil 4

Cáin Chorparáide

46 . Leasú ar alt 766 (creidmheas cánach le haghaidh caiteachais taighde agus forbartha) den Phríomh-Acht.

47 . Leasú ar alt 958 (dáta le cáin a íoc) den Phríomh-Acht.

48 . Grúpfhaoiseamh i leith caillteanas coigríche áirithe.

49 . Leasú ar alt 79B (sócmhainní airgeadra coigríche a chomhoiriúnú le scairchaipiteal airgeadra coigríche áirithe) den Phríomh-Acht.

50 . Leasú ar alt 452 (feidhm alt 130 maidir le hús áirithe) den Phríomh-Acht.

51 . Leasú ar alt 486B (faoiseamh i leith infheistíochta i nginiúint fuinnimh in-athnuaite) den Phríomh-Acht.

Caibidil 5

Cáin Ghnóchan Caipitiúil

52 . Leasú ar Chaibidil 6 (aistrithe sócmhainní gnó) de Chuid 19 den Phríomh-Acht.

53 . Leasú ar alt 603A (láithreán a dhiúscairt chuig leanbh) den Phríomh-Acht.

54 . Leasú ar Sceideal 15 (liosta comhlachtaí chun críocha alt 610) a ghabhann leis an bPríomh-Acht.

55 . Leasú ar alt 746 (gnóchain ioncaim eischósta a fhabhraíonn chuig daoine a bhfuil cónaí nó sainchónaí orthu thar lear) den Phríomh-Acht.

56 . Leasú ar alt 980 (asbhaint ón gcomaoin i leith sócmhainní áirithe a dhiúscairt) den Phríomh-Acht.

CUID 2

Mál

57 . Leasú ar alt 144 (cumhacht chun déileáil le hurghabhálacha, roimh dhaoradh agus dá éis) den Acht Airgeadais 2001.

58 . Aisghairmeacha ilghnéitheacha maidir le mál.

59 . Rátaí cánach ola mianra.

60 . Rátaí cánach ola mianra do bhreoslaí ionaid.

61 . Cionta cánach ola mianra.

62 . Rátaí cánach ar tháirgí tobac.

63 . Leasú ar alt 130 (léiriú) den Acht Airgeadais 1992.

64 . Leasú ar alt 135 (díolúine shealadach ó chlárú) den Acht Airgeadais 1992.

65 . Loghadh nó aisíoc i leith cánach cláraithe feithiclí ar fheithiclí leictreacha hibrideacha áirithe, nó ar fheithiclí breosla sholúbtha áirithe, nó ar fheithiclí leictreacha áirithe.

66 . Leasú ar alt 21 (uaireanta gnó in áitreabh cláraithe) den Acht um Gheall-Chur 1931.

67 . Dleacht máil ar chlárú déileálaithe arm tine.

68 . Dleacht máil ar dheimhniú airm tine.

69 . Dleacht máil ar dheimhniú airm tine do neamhchónaitheoir.

70 . Dleacht máil ar chlub raidhfilí nó chlub piostal nó raon lámhaigh a údarú.

71 . Dleacht máil ar dheimhniú oiliúna arm tine.

72 . Dleacht máil ar cheadúnas chun amuinisean a athlódáil.

73 . Dleacht máil ar údarú chun arm tine srianta a shealbhú, a úsáid, a iompar, a dhíol nó a thaispeáint lena dhíol.

74 . Mál: áitreabh daingean a ainmniú chun earraí coinnithe nó urghafa a choimeád.

CUID 3

Cáin Bhreisluacha

75 . Léiriú (Cuid 3).

76 . Leasú ar alt 3 (soláthar earraí) den Phríomh-Acht.

77 . Leasú ar alt 5 (soláthar seirbhísí) den Phríomh-Acht.

78 . Leasú ar alt 7 (díolúine a tharscaoileadh) den Phríomh-Acht.

79 . Leasú ar alt 8 (daoine inchánach) den Phríomh-Acht.

80 . Leasú ar alt 10 (an méid ar ar inmhuirir cáin) den Phríomh-Acht.

81 . Leasú ar alt 10A (earraí imeallscéime) den Phríomh-Acht.

82 . Leasú ar alt 10B (scéim speisialta do cheantálaithe) den Phríomh-Acht.

83 . Leasú ar alt 12 (asbhaint i leith cáin a iompraíodh nó a íocadh) den Phríomh-Acht.

84 . Leasú ar alt 12A (forálacha speisialta i leith cánach arna sonrasc ag feirmeoirí cothrom-ráta) den Phríomh-Acht.

85 . Leasú ar alt 12B (scéim speisialta i leith córacha iompair arna soláthar ag déileálaithe inchánach) den Phríomh-Acht.

86 . Leasú ar alt 12C (scéim speisialta i leith innealra talmhaíochta) den Phríomh-Acht.

87 . Leasú ar alt 14 (an cháin a bheidh dlite a chinneadh faoi threoir fáltas airgid) den Phríomh-Acht.

88 . Leasú ar alt 15B (earraí faoi bhealach (forálacha breise)) den Phríomh-Acht.

89 . Leasú ar alt 16 (dualgas taifid a choimeád) den Phríomh-Acht.

90 . Leasú ar alt 17 (sonraisc) den Phríomh-Acht.

91 . Leasú ar alt 25 (achomhairc) den Phríomh-Acht.

92 . Leasú ar alt 32 (rialacháin) den Phríomh-Acht.

93 . Leasú ar an gCéad Sceideal a ghabhann leis an bPríomh-Acht.

94 . Leasú ar an Dara Sceideal a ghabhann leis an bPríomh-Acht.

95 . Leasú ar an gCeathrú Sceideal a ghabhann leis an bPríomh-Acht.

96 . Leasú ar an Séú Sceideal a ghabhann leis an bPríomh-Acht.

97 . Leasuithe ilghnéitheacha a bhaineann le Treoir 2006/112/CE ón gComhairle.

98 . Cúlghairm, etc. (Cuid 3).

CUID 4

Dleachtanna Stampa

99 . Léiriú (Cuid 4).

100 . Morgáistí.

101 . Bearta maidir le simpliú.

102 . Leasú ar alt 81A (faoiseamh breise ó dhleacht stampa i leith aistrithe chuig feirmeoirí óga oilte) den Phríomh-Acht.

103 . Aistrithe chuig feirmeoirí óga oilte agus cáilíochtaí.

104 . Faoiseamh breise comhdhlúthúcháin feirme.

105 . Comhlachtaí spóirt ceadaithe.

106 . Leasú ar alt 83A (láithreán a aistriú chuig leanbh) den Phríomh-Acht.

107 . Aistriú feirmeacha teaghlaigh áirithe.

108 . Leasú ar alt 92B (faoiseamh ceannaitheora céaduaire maoine cónaithe) den Phríomh-Acht.

109 . Leasú ar Chuid 6 (forálacha speisialta a bhaineann le hurrúis neamhdheimhnithe) den Phríomh-Acht.

110 . Talamh: forálacha speisialta.

111 . Leasú ar alt 159A (teorainneacha ama chun aisíocaíocht dleachta stampa a éileamh) den Phríomh-Acht.

CUID 5

Cáin Fháltas Caipitiúil

112 . Léiriú (Cuid 5).

113 . Leasú ar alt 18 (cáin a ríomh) den Phríomh-Acht.

114 . Leasú ar alt 21 (feidhm an Achta seo) den Phríomh-Acht.

115 . Leasú ar alt 51 (cáin agus ús ar cháin a íoc) den Phríomh-Acht.

116 . Leasú ar alt 86 (díolúine a bhaineann le teaghaisí áirithe) den Phríomh-Acht.

117 . Leasú ar alt 89 (forálacha a bhaineann le maoin talmhaíochta) den Phríomh-Acht.

CUID 6

Cáin Mhaoine Cónaithe

118 . Leasú ar alt 110A (imréiteach tar éis maoin chónaithe áirithe a dhíol) den Acht Airgeadais 1983.

CUID 7

Ilghnéitheach

119 . Léiriú (Cuid 7).

120 . Leasú ar alt 1001 (cáin etc. a bheith dlite de shealbhóir muirir shocraithe ar fhiacha leabhair de chuid cuideachta) den Phríomh-Acht.

121 . Leasú ar fhorálacha a bhaineann le hús ar aisíocaíochtaí.

122 . Leasú ar alt 1003A (cáin a íoc trí dheonachán maoine oidhreachta a thabhairt d’iontaobhas oidhreachta Éireannach) den Phríomh-Acht.

123 . Leasú ar Chuid 38 (tuairisceáin ar ioncam agus gnóchain, oibleagáidí agus tuairisceáin eile, agus cumhachtaí ioncaim) den Phríomh-Acht.

124 . Leasú ar Chaibidil 4 (cumhachtaí ioncaim) de Chuid 38 den Phríomh-Acht.

125 . Leasú ar alt 1003 (cáin a íoc ar mhodh deonacháin ítimí oidhreachta) den Phríomh-Acht.

126 . Leasú ar alt 1078 (cionta ioncaim) den Phríomh-Acht.

127 . Na hAchtanna Custam: áitreabh daingean a ainmniú chun earraí coimeádta nó earraí urghafa a choinneáil.

128 . Leasuithe ilghnéitheacha teicniúla i ndáil le cáin.

129 . Cúram agus bainistiú cánacha agus dleachtanna.

130 . Gearrtheideal, forléiriú agus tosach feidhme.

SCEIDEAL 1

Leasuithe de dhroim Athruithe ar Chreidmheasanna Cánach Pearsanta

SCEIDEAL 2

Leasuithe Teicniúla Ilghnéitheacha i ndáil leis na socruithe maidir le Faoiseamh ó Chánachas Dúbailte

SCEIDEAL 3

Leasuithe Ilghnéitheacha a bhaineann le Treoir 2006/112/CE ón gComhairle

SCEIDEAL 4

Leasuithe Teicniúla Ilghnéitheacha i ndáil le Cáin

Na hAchtanna dá dTagraítear

Uimhir 11 de 2007

AN tACHT AIRGEADAIS 2007

[An tiontú oifigiúil]

ACHT DO DHÉANAMH SOCRÚ MAIDIR LE FORCHUR, AISGHAIRM, LOGHADH, ATHRÚ AGUS RIALÁIL CÁNACHAIS, DLEACHTANNA STAMPA AGUS DLEACHTANNA A BHAINEANN LE MÁL AGUS DO DHÉANAMH SOCRÚ EILE THAIRIS SIN I dTAOBH AIRGEADAIS LENA nÁIRÍTEAR RIALÁIL CUSTAM.

[2 Aibreán, 2007]

ACHTAÍTEAR AG AN OIREACHTAS MAR A LEANAS:

CUID 1

Cáin Ioncaim, Cáin Chorparáideach agus Cáin Ghnóchan Caipitiúil

Caibidil 1

Léiriú

1 .— Sa Chuid seo ciallaíonn “Príomh-Acht” an tAcht Comhdhlúite Cánacha 1997.

Caibidil 2

Cáin Ioncaim

2 .— Maidir leis an mbliain mheasúnachta 2007 agus le blianta measúnachta dá héis, leasaítear alt 15 den Phríomh-Acht—

(a) trí “€25,000” a chur in ionad “€23,000” (a cuireadh isteach leis an Acht Airgeadais 2006) i bhfo-alt (3), agus

(b) tríd an Tábla seo a leanas a chur in ionad an Tábla (arna chur isteach amhlaidh) a ghabhann leis an alt sin:

“AN TÁBLA

CUID 1

CUID 2

CUID 3

”.

3 .— (1) Más rud é, faoi fhoráil den Phríomh-Acht a luaitear i gcolún (1) den Tábla a ghabhann leis an bhfo-alt seo, go mbeidh pearsa aonair i dteideal go ndéanfar an cháin ioncaim a bheidh le muirearú ar an bpearsa aonair, ar shlí seachas de réir fhorálacha alt 16(2) den Phríomh-Acht, a laghdú don bhliain mheasúnachta 2007 nó d’aon bhliain mheasúnachta dá héis agus gurbh é méid an laghdaithe, mura mbeadh an t-alt seo, méid arb é an méid is lú díobh seo a leanas—

(a) an méid atá sonraithe i gcolún (2) den Tábla sin, agus

(b) an méid a laghdaíonn an dliteanas sin go nialas,

is é méid an laghdaithe de réir mhír (a) méid an chreidmheasa cánach atá sonraithe i gcolún (3) den Tábla.

AN TÁBLA

(2) Beidh éifeacht le halt 3 (arna leasú leis an Acht Airgeadais 2006) den Acht Airgeadais 2002 faoi réir fhorálacha an ailt seo.

(3) Beidh feidhm ag Sceideal 1 chun fo-alt (1) a fhorlíonadh.

4 .— Maidir leis an mbliain mheasúnachta 2007 agus le blianta measúnachta dá héis, leasaítear alt 188 den Phríomh-Acht, i bhfo-alt (2), trí “€38,000” a chur in ionad “€34,000” (a cuireadh isteach leis an Acht Airgeadais 2006) agus “€19,000” a chur in ionad “€17,000” (a cuireadh isteach amhlaidh).

5 .— Leasaítear alt 473 den Phríomh-Acht maidir leis an mbliain mheasúnachta 2007 agus blianta measúnachta dá héis tríd an míniú seo a leanas a chur in ionad an mhínithe ar “teorainn shonraithe” (a cuireadh isteach leis an Acht Airgeadais 2006), i bhfo-alt (1):

“ciallaíonn ‘teorainn shonraithe’, i ndáil le pearsa aonair do bhliain mheasúnachta—

(a) i gcás na ndaoine seo a leanas—

(i) duine pósta a mheasúnaítear i leith cánach de réir alt 1017, nó

(ii) baintreach,

€3,600; ach má bhí an phearsa aonair 55 bliana d’aois nó os a chionn aon tráth i rith na bliana measúnachta, ciallaíonn ‘teorainn shonraithe’ €7,200, agus

(b) in aon chás eile, €1,800; ach, má bhí an phearsa aonair 55 bliana d’aois nó os a chionn aon tráth i rith na bliana measúnachta, ciallaíonn ‘teorainn shonraithe’ €3,600;”.

6 .— Maidir leis an mbliain mheasúnachta 2007 agus blianta measúnachta dá héis, leasaítear alt 244 den Phríomh-Acht sa mhíniú ar “ús infhaoisimh” i bhfo-alt (1)(a)—

(a) trí “€6,000” a chur in ionad “€5,080”,

(b) trí “€3,000” a chur in ionad “€2,540”,

(c) trí “€16,000” a chur in ionad ”€8,000”, agus

(d) trí “€8,000” a chur in ionad “€4,000”.

7 .— Maidir leis an mbliain mheasúnachta 2007 agus blianta measúnachta dá héis, leasaítear alt 122 den Phríomh-Acht sa mhíniú ar “an ráta sonraithe” i bhfo-alt (1)(a)—

(a) trí “4.5 faoin gcéad” a chur in ionad “3.5 faoin gcéad” (a cuireadh isteach leis an Acht Airgeadais 2004) sa dá áit ina bhfuil sé, agus

(b) trí “12 faoin gcéad” a chur in ionad “11 faoin gcéad” (a cuireadh isteach leis an Acht Airgeadais 2003).

8 .— (1) Leasaítear an Príomh-Acht i gCaibidil 1 de Chuid 7 tríd an méid seo a leanas a chur isteach i ndiaidh alt 196A (a cuireadh isteach leis an Acht Airgeadais 2005):

“196B.— (1) (a) San alt seo, ciallaíonn “díolaíochtaí” díolaíochtaí lena mbaineann alt 985A.

(b) Is iad seo a leanas na gníomhaireachtaí lena mbaineann an t-alt seo:

(i) Fiontraíocht Éireann;

(ii) An Bord Bia;

(iii) Turasóireacht Éireann Teo;

(iv) An Ghníomhaireacht Forbartha Tionscail (Éire).

(2) I gcás ina ndéanfaidh an tAire Airgeadais, tar éis dul i gcomhairle leis an Aire Gnóthaí Eachtracha, nó le cibé Aire den Rialtas is cuí leis an Aire Airgeadais sna himthosca, aon liúntas d’fhostaithe de chuid na ngníomhaireachtaí lena mbaineann an t-alt seo, nó aon díolaíochtaí dá gcuid, a dheimhniú mar ní atá in ionannas cúitimh as costas breise an riachtanais cónaí lasmuigh den Stát d’fhonn a dhualgais nó a dualgais a chomhlíonadh, ní áireofar an liúntas nó na díolaíochtaí sin mar ioncam chun críocha na nAchtanna Cánach Ioncaim.”.

(2) Meastar éifeacht a bheith leis an alt seo ar an agus ón 1 Eanáir 2007.

9 .— (1) Leasaítear an Príomh-Acht—

(a) in alt 459 tríd an méid seo a leanas a chur isteach i ndiaidh fho-alt (5):

“(6) Más rud é, ar bhonn na faisnéise a thabharfar dóibh faoi alt 894A(2) nó aon fhaisnéise eile ina seilbh, go mbeidh na Coimisinéirí Ioncaim sásta maidir le teideal duine aonair chun faoisimh faoi aon cheann de na forálacha a shonraítear sa Tábla atá ag gabháil le halt 458 nó faoi alt 187 nó 188, ansin, d’ainneoin aon fhorála eile dá mhalairt sna Achtanna Cánach Ioncaim, más cuí leis na Coimisinéirí Ioncaim é sna himthosca, féadfar an faoiseamh a bheidh dlite a thabhairt don duine aonair gan éileamh ar an bhfaoiseamh sin a dhéanamh agus a chruthú.”,

(b) in alt 469

(i) i bhfo-alt (1)—

(I) i mír (i) den mhíniú ar “costais sláinte” trí “duine” a chur in ionad “cleithiúnaí de chuid an duine aonair dá dtagraítear i míreanna (a) agus (b)(ii) den mhíniú ar chleithiúnaí”, agus

(II) trí na mínithe ar “cleithiúnaí”, “duine cáilithe” agus “gaol” a scriosadh,

(ii) tríd an méid seo a leanas a chur in ionad fho-alt (2):

“(2) Faoi réir an ailt seo, i gcás ina gcruthóidh pearsa aonair, do bhliain mheasúnachta, gur íoc sé nó sí sa bhliain mheasúnachta costais sláinte a tabhaíodh chun aireachas sláinte a sholáthar, beidh an phearsa aonair i dteideal, d’fhonn a fhionnadh cad é méid an ioncaim a mbeidh cáin ioncaim le muirearú air nó uirthi ina leith, go ndéanfar an méid a chruthófar a bheith íoctha amhlaidh a asbhaint as a ioncam nó a hioncam iomlán.”,

agus

(iii) tríd an méid seo a leanas a chur isteach i ndiaidh fho-alt (6):

“(7) I gcás ina dtabharfar faoiseamh faoin alt seo d’aon phearsa aonair i leith méid arna úsáid chun costais sláinte a íoc, ní thabharfar faoiseamh don phearsa aonair sin faoi aon fhoráil eile de chuid na nAchtanna Cánach Ioncaim i leith an mhéid sin.”,

(c) in alt 472C (a cuireadh isteach leis an Acht Airgeadais 2001)—

(i) i bhfo-alt (7), trí “féadfaidh” a chur in ionad “déanfaidh”, agus

(ii) tríd an méid seo a leanas a chur isteach i ndiaidh fho-alt (7):

“(7A) D’ainneoin fhorálacha aon achtacháin eile, i gcás ina ndéanfaidh fostóir suibscríobhanna ceardchumainn de chuid fhostaithe an fhostóra a asbhaint as díolaíochtaí na bhfostaithe sin agus a chur ar aghaidh chuig an gceardchumann lena mbaineann, féadfaidh an fostóir, chun a chumasú don cheardchumann sin tuairisceán a thabhairt faoi fhorálacha fho-alt (7) agus chun na críche sin amháin, ar iarraidh chuige sin a fháil ón gceardchumann, ainmneacha agus Uimhreacha Pearsanta Seirbhíse Poiblí na bhfostaithe is comhaltaí den cheardchumann sin, agus ainmneacha agus Uimhreacha Pearsanta Seirbhíse Poiblí na bhfostaithe sin amháin, a mbeidh na hasbhaintí sin déanta as a gcuid díolaíochtaí, a thabhairt don cheardchumann.”,

(d) in alt 473A (a cuireadh isteach leis an Acht Airgeadais 2001)—

(i) i bhfo-alt (1), tríd an míniú ar “cleithiúnaí” a scriosadh,

(ii) i bhfo-alt (2), trí “, thar a cheann féin nó thar a ceann féin, nó thar ceann a chleithiúnaí nó a cleithiúnaí,” a scriosadh,

(iii) i bhfo-alt (4), trí “an duine atá, nó a bhí, ag gabháil don chúrsa” a chur in ionad “a chleithiúnaí nó a cleithiúnaí”,

(iv) i bhfo-alt (6)(c) trí “ag an bpearsa aonair nó a chleithiúnaí nó a cleithiúnaí” a scriosadh, agus

(v) tríd an méid seo a leanas a chur isteach i ndiaidh fho-alt (8):

“(9) I gcás ina dtabharfar faoiseamh faoin alt seo d’aon phearsa aonair i leith táillí cáilitheacha a íoc, ní thabharfar faoiseamh faoi aon fhoráil eile de na hAchtanna Cánach Ioncaim don phearsa aonair sin i leith na híocaíochta sin.”,

agus

(e) i gCaibidil 3 de Chuid 38, tríd an méid seo a leanas a chur isteach i ndiaidh alt 894:

“Tuairisceáin ó thríú páirtithe i ndáil le faoisimh phearsanta.

894A.— (1) San alt seo—

ciallaíonn ‘Uimhir PSP’ i ndáil le pearsa aonair, Uimhir Phearsanta Seirbhíse Poiblí na pearsan aonair de réir bhrí alt 262 den Acht Comhdhlúite Leasa Shóisialaigh 2005;

ciallaíonn ‘faoiseamh pearsanta’ faoiseamh faoi aon cheann de na forálacha a shonraítear sa Tábla a ghabhann le halt 458.

(2) I gcás ina mbeidh faisnéis ag duine a bhaineann le caiteachas a d’íoc pearsa aonair agus is iomchuí maidir le teideal na pearsan aonair sin chun faoisimh phearsanta, nó maidir le méid faoisimh den sórt sin, a shuíomh, féadfaidh an duine sin, d’ainneoin aon ní in aon achtachán eile nó aon oibleagáide chun rúndacht a chaomhnú nó aon sriain eile ar nochtadh faisnéise, mionsonraí maidir le méid an chaiteachais sin a thabhairt do na Coimisinéirí Ioncaim má iarrann siad ar an duine sin déanamh amhlaidh.

(3) Mura n-ordóidh na Coimisinéirí Ioncaim a mhalairt, beidh faisnéis a thabharfar do na Coimisinéirí Ioncaim de réir fho-alt (2) i bhformáid leictreonach arna ceadú ag na Coimisinéirí Ioncaim agus beidh inti ainm agus seoladh agus, má tá sí ar eolas, Uimhir PSP na pearsan aonair ar i ndáil leis nó léi a bheidh an fhaisnéis á tabhairt.

(4) D’ainneoin aon fhorála eile dá mhalairt, d’fhonn tuairisceán a thabhairt faoi fho-alt (3), beidh duine nach mbeidh Uimhir PSP pearsan aonair aige nó aici i dteideal an uimhir sin a iarraidh ar an bpearsa aonair agus cuirfidh sé nó sí in iúl don phearsa aonair cén cuspóir atá leis an uimhir a iarraidh.

(5) Ní úsáidfidh na Coimisinéirí Ioncaim faisnéis a thabharfar dóibh de réir fho-alt (2) ach amháin chun teideal pearsa aonair chun an fhaoisimh phearsanta lena mbaineann, nó chun méid an fhaoisimh sin, a shuíomh agus, d’ainneoin alt 872, ní úsáidfear í chun aon chríche eile.

(6) Féadfaidh aon duine d’oifigigh na gCoimisinéirí Ioncaim atá ag gníomhú faoina n-údarás aon ghníomh atá le déanamh, nó aon fheidhm atá le comhlíonadh, ag na Coimisinéirí Ioncaim, ar gníomh é nó ar feidhm í a údaraítear leis an alt seo, a dhéanamh nó a chomhlíonadh.”.

(2) (a) Tá feidhm ag míreanna (a), (c) agus (e) d’fho-alt (1) le héifeacht ó dháta rite an Achta seo.

(b) Tá feidhm ag míreanna (b) agus (d) d’fho-alt (1) maidir leis an mbliain mheasúnachta 2007 agus le blianta measúnachta dá héis.

10 .— Leasaítear alt 126 den Phríomh-Acht—

(a) tríd an méid seo a leanas a chur in ionad fho-alt (1):

“(1) San alt seo ciallaíonn ‘na hAchtanna’ na hAchtanna Leasa Shóisialaigh.”,

(b) i bhfo-alt (3)—

(i) i mír (b) trí “de réir bhrí alt 2(3) den Acht Comhdhlúite Leasa Shóisialaigh 2005” a chur in ionad “de réir bhrí alt 2(3)(a) den Acht Leasa Shóisialaigh (Comhdhlúthú), 1993”,

(ii) tríd an méid seo a leanas a chur isteach i ndiaidh mhír (b):

“(c) (i) Sa mhír seo tá le ‘fostaíocht ghearr-ama’ an bhrí chéanna atá leis chun críocha na nAchtanna.

(ii) D’ainneoin mhíreanna (a) agus (b) agus an Ordaithe um an Acht Airgeadais 1992 (Tosach Feidhme Alt 15) (Sochar Dífhostaíochta agus Sochar Pá-Choibhneasa) 1994 (I.R. Uimh. 19 de 1994), ní bheidh feidhm ag mír (b) i ndáil le sochar dífhostaíochta arna íoc nó is iníoctha le duine atá fostaithe i bhfostaíocht ghearr-ama.”,

agus

(c) trí fho-alt (8) a scriosadh.

11 .— Leasaítear an Príomh-Acht—

(a) sa mhíniú ar “ioncam iomchuí” in alt 189(2)(a), trí “alt 59, 745 nó 747E” a chur in ionad “alt 59 nó alt 745”,

(b) sa mhíniú ar “ioncam iomchuí” in alt 189A(4)(a) trí “alt 59, 745 nó 747E” a chur in ionad “alt 59 nó alt 745”, agus

(c) in alt 192(2) trí “alt 59, 745 or 747E” a chur in ionad “alt 59 nó alt 745”.

12 .— Maidir leis an mbliain mheasúnachta 2007 agus blianta measúnachta dá héis, leasaítear an Príomh-Acht tríd an méid seo a leanas a chur isteach i ndiaidh alt 195:

“195A.— (1) San alt seo—

ciallaíonn ‘comhlacht’ comhlacht neamhchorpraithe daoine nó comhlacht corpraithe, arb é atá ann—

(a) aon bhord, comhairle nó coiste, cibé caoi ina sonraítear é nó í, nó

(b) aon chomhlacht daoine a fheidhmíonn cuid d’fheidhmeanna, nó feidhmeanna uile, boird, comhairle nó coiste den sórt sin,

más rud é, maidir leis na dualgais a ghabhann le hoifig comhaltaí den chomhlacht, seachas dualgais theagmhasacha amhail freastal ar chomhdhálacha nó ar chruinnithe mar thoscairí thar ceann an chomhlachta, go ndéantar iad a urscaoileadh i gcúrsa cruinnithe den chomhlacht lena mbaineann, nó i gcúrsa ullmhúcháin le haghaidh cruinnithe den sórt sin;

tá le ‘státseirbhíseach’ an bhrí a shanntar do ‘stát-sheirbhíseach’ le halt 1(1) d’Acht Rialuithe na Stát-Sheirbhíse 1956;

ciallaíonn ‘comhalta’ i ndáil le comhlacht, duine a shealbhaíonn oifig mar chomhalta den chomhlacht sin, ar duine é nó í—

(a) nach bhfuil aon dualgas eile aige nó aici go díreach nó go neamhdhíreach i ndáil leis an gcomhlacht sin, cibé acu mar fhostaí de chuid an chomhlachta nó de chuid duine atá bainteach leis an gcomhlacht sin, agus

(b) maidir le méid bliantúlaithe a dhíolaíochtaí nó a díolaíochtaí ón oifig don bhliain mheasúnachta 2006 agus do gach bliain dá héis inar comhalta den chomhlacht an duine, seachas íocaíochtaí lena mbaineann an t-alt seo, nach mó an méid sin—

(i) i gcás comhalta arb é nó arb í cathaoirleach an chomhlachta é nó í, nach comhlacht dá dtagraítear i mír (b) den mhíniú ar ‘comhlacht’, ná €24,000, agus

(ii) in aon chás eile, ná €24,000;

ciallaíonn ‘comhlacht neamhthráchtála’ comhlacht—

(a) arna eagrú d’aon toisc chun críoch seachas brabús, i gcás inar féidir críocha dearbhaithe an chomhlachta a fhionnadh ó dhoiciméid ar taifid iad,

(b) a oibríonn, iarbhír, d’aon toisc chun críoch seachas brabús agus, chun na críche sin, maidir le haon ghníomhaíocht a sheolann an comhlacht agus a ghineann ioncam ar gníomhaíocht í—

(i) a sheoltar d’fhonn cuidiú leis an gcomhlacht a chríocha a bhaint amach, agus

(ii) a n-úsáidtear an t-ioncam uaithi chun na gcríoch sin,

measfar í a bheith á hoibriú chun críoch seachas brabús, agus

(c) nach féidir aon sochar dá chuid, nó aon chuid dá ioncam nó dá ioncam carnaithe, a íoc le haon oifigeach, fostaí nó comhalta den chomhlacht, nó a chur ar fáil ar shlí eile d’aon oifigeach, fostaí nó comhalta den chomhlacht, chun sochair phearsanta an duine sin nó duine atá bainteach leis an duine sin, seachas na nithe seo a leanas—

(i) aon phá, tuarastal, táillí nó airgead onóra i leith seirbhísí arna dtabhairt don chomhlacht ach sin más rud é amháin nach mó na méideanna arna n-íoc ná méideanna réasúnacha a d’íocfaí in idirbheart ar neamhthuilleamaí i leith seirbhísí dá samhail arna soláthar ag comhlacht a eagraítear d’aon toisc chun críoch seachas brabús, ar comhlacht é a oibríonn de réir mhír (b),

(ii) aon íocaíocht lena mbaineann an t-alt seo,

(iii) aon íocaíocht le hoifigigh, fostaithe nó comhaltaí chun cuidiú a thabhairt i ndáil le caiteachais a íoc maidir le freastal ar chomhdhálacha nó ar chruinnithe mar thoscairí thar ceann an chomhlachta i gcás ina ndéantar an freastal sin chun críocha an chomhlachta a chur ar aghaidh, agus

(iv) i gcás an t-oifigeach, an fostaí nó an comhalta lena mbaineann, nó duine atá bainteach leis an oifigeach, leis an bhfostaí nó leis an gcomhalta sin, a bheith ina chuspóir nó ina cuspóir do chríocha an chomhlachta, sochar atá ann chun críocha an chomhlachta a chur ar aghaidh.

(2) Tá feidhm ag an alt seo maidir le híocaíochtaí arna ndéanamh ag comhlacht neamhthráchtála le comhalta den chomhlacht nó thar a cheann nó thar a ceann i leith caiteachas taistil agus cothaithe arna dtabhú ag an gcomhalta le linn dó nó di freastal ar chruinnithe den chomhlacht.

(3) Chun críocha uile na nAchtanna Cánach Ioncaim, déanfar neamhshuim den mhéid sin d’aon íocaíochtaí lena mbaineann an t-alt seo nach mó ná an ráta uachtarach d’aon ráta nó rátaí iomchuí arna leagan síos ó am go ham ag an Aire Airgeadais i ndáil le caiteachais taistil agus cothaithe státseirbhísigh a íoc.”.

13 .— (1) Leasaítear Sceideal 13 a ghabhann leis an bPríomh-Acht—

(a) tríd an méid seo a leanas a chur in ionad mhír 5:

“5. Seirbhís Aisíocaíochta i leith Cúraim Phríomha.”,

(b) tríd an méid seo a leanas a chur in ionad mhír 118:

“118. Údarás Forbartha an Champais Náisiúnta Spórt.”,

(c) trí mhíreanna 4 agus 147 a scriosadh, agus

(d) tríd an méid seo a leanas a chur isteach i ndiaidh mhír 157 (a cuireadh isteach leis an Acht Airgeadais 2006):

“158. An tÚdarás um Shábháilteacht ar Bhóithre.

159. Gníomhaireacht Forbartha Ghráinseach Ghormáin.

160. An Coimisiún Sábháilteachta Iarnróid.

161. An Chomhairle Mhúinteoireachta.

162. EirGrid.

163. Comhairle na nDámhachtainí Ardoideachais agus Oiliúna.

164. Údarás Maoirseachta, Iniúchta agus Cuntasaíochta na hÉireann.”.

(2) (a) Meastar gur tháinig fo-alt (1)(a) in éifeacht ar an agus ón 1 Eanáir 2005.

(b) Meastar gur tháinig fo-alt (1)(b) in éifeacht amhail ar an agus ón 1 Eanáir 2007.

(c) Meastar gur tháinig fo-alt (1)(c) in éifeacht amhail ar an agus ón 1 Eanáir 2007.

(d) Beidh feidhm ag fo-alt (1)(d) amhail ar an agus ón 1 Bealtaine 2007.

14 .— Maidir leis an mbliain mheasúnachta 2007 agus le blianta measúnachta dá éis, leasaítear alt 216A den Phríomh-Acht tríd an méid seo a leanas a chur isteach i ndiaidh fho-alt (3):

“(3A) Ní bheidh feidhm ag fo-alt (2) maidir le bliain mheasúnachta i gcás ina bhfaighfear na suimeanna iomchuí a eascraíonn chuig an bpearsa aonair ó leanbh de chuid na pearsan aonair.”.

15 .— Leasaítear alt 216C den Phríomh-Acht i bhfo-alt (5) trí “€15,000” a chur in ionad “€10,000”.

16 .— (1) Leasaítear alt 664 den Phríomh-Acht—

(a) i bhfo-alt (1)(a) sa mhíniú ar “an méid sonraithe”—

(i) i mír (ii)(VI)(B) den mhíniú sin trí “nó” a scriosadh san áit dheireanach a bhfuil sé,

(ii) tríd an méid seo a leanas a chur in ionad mhír (ii)(VII) den mhíniú sin:

“(VII) sa tréimhse dar tosach an 1 Eanáir 2006 agus dar críoch an 31 Nollaig 2006—

(A) €15,000, i gcás gur ar feadh téarma cinnte 7 mbliana nó níos faide an léas cáilitheach nó na léasanna cáilitheacha, agus

(B) €12,000, in aon chás eile,

nó

(VIII) an 1 Eanáir 2007 nó dá éis—

(A) €20,000, i gcás gur ar feadh téarma cinnte 10 mbliana nó níos faide an léas cáilitheach nó ná léasanna cáilitheacha,

(B) €15,000, i gcás gur ar feadh téarma cinnte 7 mbliana nó níos faide an léas cáilitheach nó na léasanna cáilitheacha, seachas cás lena mbaineann clásal (A), agus

(C) €12,000, in aon chás eile,”,

agus

(iii) i mír (iii) den mhíniú sin trí “fhomhír (I), (II), (III), (IV), (V), (VI), (VII) nó (VIII), de réir mar is cuí, de mhír (ii) den mhíniú seo” a chur in ionad “chlásal (I), (II), (III), (IV) nó (V), de réir mar is cuí, d’fhomhír (ii)”,

agus

(b) i bhfo-alt (1)(b) tríd an méid seo a leanas a chur in ionad fhomhír (v):

“(v) ó léas cáilitheach nó ó léasanna cáilitheacha arna dhéanamh nó arna ndéanamh sa tréimhse dar tosach an 1 Eanáir 2006 agus dar críoch an 31 Nollaig 2006, agus ó léas cáilitheach arna dhéanamh roimh an 1 Eanáir 2006, ní mó an méid sonraithe ná—

(I) €15,000, i gcás gur ar feadh téarma cinnte 7 mbliana nó níos mó an léas cáilitheach nó na léasanna cáilitheacha, agus

(II) €12,000, in aon chás eile;

(vi) ó léas cáilitheach nó ó léasanna cáilitheacha a rinneadh an 1 Eanáir 2007 nó dá éis, agus ó léas cáilitheach a rinneadh aon tráth eile, ní bheidh an méid sonraithe níos mó ná na méideanna seo a leanas—

(I) €20,000, más rud é, maidir leis an léas cáilitheach nó maidir leis na léasanna cáilitheacha, gur léas é, nó gur léasanna iad, ar feadh théarma cinnte 10 mbliana nó níos mó,

(II) €20,000, más rud é, maidir leis an léas cáilitheach nó maidir leis na léasanna cáilitheacha, gur léas é, nó gur léasanna iad, ar feadh théarma cinnte 7 mbliana nó níos mó, seachas cás ina bhfuil feidhm ag clásal (I), agus

(III) €12,000, in aon chás eile.”.

(2) (a) Faoi réir mhír (b), tá feidhm ag fo-alt (1) mar a leanas—

(i) maidir le fomhíreanna (i) agus (ii) de mhír (a) agus mír (b), amhail ar an agus ón 1 Eanáir 2007; agus

(ii) maidir le mír (a)(iii), amhail ar an agus ón 1 Feabhra 2007.

(b) Tagann fo-alt (1) i ngníomh tar éis don Aire Airgeadais ordú a dhéanamh chuige sin.

17 .— (1) Leasaítear Cuid 30 den Phríomh-Acht—

(a) i gCaibidil 1 tríd an méid seo a leanas a chur isteach i ndiaidh alt 772:

“Táirgí sochar scoir a cheadú.

772A.— (1) San alt seo—

ciallaíonn ‘tionscnóir’ duine a dhéanann gnó deonaithe blianachtaí ar shaol daonna a sheoladh go dleathach agus, más rud é maidir leis an duine sin—

(a) nach gcónaíonn sé nó sí sa Stát, nó

(b) nach bhfuil sé nó sí ag trádáil sa Stát trí bhunáit ghnó,

is gnóthas árachais an duine sin arna údarú chun gnó árachais a dhéanamh sa Stát faoi Threoir 2002/83/CE an 5 Samhain 2002 ó Pharlaimint na hEorpa agus ón gComhairle ¹ ;

ciallaíonn ‘táirge sochar scoir’ táirge chun sochair iomchuí a sholáthar ar ina leith a bheidh iarratas ar cheadú déanta ag tionscnóir chuig na Coimisinéirí Ioncaim faoin alt seo agus ar fúthu a fhéadfar, má cheadaítear é agus nuair a cheadaítear é, scéim shochar scoir aon-chomhalta a bhunú ar mhodh conartha arna dhéanamh leis an tionscnóir chun an scéim a urrú;

ciallaíonn ‘scéim shochar scoir aon-chomhalta’, i ndáil le táirge sochar scoir, scéim shochar scoir a bhaineann le fostaí aonair;

ciallaíonn ‘téarmaí agus rialacha’, i ndáil le táirge sochar scoir, na forálacha lena rialaítear scéim shochar scoir atá le bunú faoin táirge, is cuma cén t-ainm a thugtar ar na forálacha sin.

(2) Faoi réir an ailt seo, féadfaidh na Coimisinéirí Ioncaim, más cuí leo é, agus faoi réir cibé coinníollacha, más ann, is cuí leo a chur ag gabháil leis an gceadú, táirge sochar scoir a cheadú chun críocha na Caibidle seo.

(3) Faoi réir fho-alt (6), measfar, maidir le scéim shochar scoir, arna bunú faoi tháirge sochar scoir atá arna cheadú de thuras na huaire ag na Coimisinéirí Ioncaim faoi fho-alt (2), gur scéim shochar scoir í atá arna ceadú de thuras na huaire ag na Coimisinéirí Ioncaim chun críocha na Caibidle seo, agus beidh feidhm ag forálacha na Caibidle seo dá réir sin, ach amháin mar a fhoráiltear a mhalairt leis an alt seo.

(4) Chun críocha ceadaithe faoi fho-alt (2), déanfaidh tionscnóir táirge sochar scoir iarratas i scríbhinn chun na gCoimisinéirí Ioncaim agus beidh an t-iarratas i cibé foirm, agus beidh cibé faisnéis agus sonraí ann, a chinnfidh na Coimisinéirí Ioncaim ó am go ham.

(5) Ní cheadóidh na Coimisinéirí Ioncaim táirge sochar scoir mura rud é go bhforáiltear mar a leanas leis na téarmaí agus na rialacha—

(a) maidir le ranníocaí atá le híoc in aon bhliain, cibé acu ag fostaí nó ag fostóir, nó thar ceann fostóra, i leith an fhostaí sin, nach bhféadfaidh siad, nuair a chomhiomlánaítear iad, a bheith níos mó ná an méid comhiomlán ranníocaí bliantúla a lamháiltear a asbhaint in aon bhliain ag pearsa aonair de réir alt 774(7)(c), agus

(b) go mbeidh feidhm ag forálacha alt 772(3A).

(6) I gcás athrú a bheith déanta ar na téarmaí agus ar na rialacha lena rialaítear scéim shochar scoir arna bunú faoi tháirge sochar scoir atá ceadaithe de thuras na huaire ag na Coimisinéirí Ioncaim faoi fho-alt (2), ansin, maidir le haon cheadú a mheastar a bheith tugtha don scéim de thuras na huaire faoi fho-alt (3) roimh dháta an athraithe, ní bheidh feidhm aige tar éis dháta an athraithe mura rud é go mbeidh an t-athrú ceadaithe ag na Coimisinéirí Ioncaim.

(7) Más é tuairim na gCoimisinéirí Ioncaim nach gá, mar gheall ar na fíorais i dtaca le haon táirge sochar scoir, go leanfaidh siad feasta den scéim a cheadú, ansin féadfaidh siad, aon tráth, le fógra i scríbhinn chuig an tionscnóir, a gceadú a tharraingt siar ar cibé forais, agus ó cibé dáta, a shonrófar san fhógra.

(8) I gcás ina ndéanfar ceadú táirge a tharraingt siar de bhun fho-alt (7), déanfar cibé measúnachtaí nó cibé leasuithe ar mheasúnachtaí is cuí chun aon fhaoiseamh arna thabhairt faoin gCaibidil seo de dhroim an ceadú a dheonú a tharraingt siar.

(9) I gcás athrú a bheith déanta ar tháirge sochar scoir, ansin, maidir le haon cheadú arna thabhairt i ndáil leis an táirge roimh an athrú, ní bheidh feidhm aige tar éis dháta an athraithe mura rud é go mbeidh an t-athrú ceadaithe ag na Coimisinéirí Ioncaim.”,

(b) i gCaibidil 2, in alt 784A(1BA)(b) trí “tráth nach déanaí na an dara mí den bhliain mheasúnachta” a chur in ionad “sa chéad mhí den bhliain mheasúnachta”, agus

(c) i gCaibidil 2C—

(i) in alt 787O, tríd an méid seo a leanas a chur isteach i ndiaidh fho-alt (4):

“(5) (a) San fho-alt seo—

ciallaíonn an briathar ‘úsáid’, i ndáil le méid an aistrithe, an méid aistrithe arna úsáid de réir fho-alt (5), (6), (8) nó (9) d’alt 12 den Acht um an Dlí Teaghlaigh 1995 nó, de réir mar a bheidh, de réir fho-alt (5), (6), (8) nó (9) d’alt 17 den Acht um an Dlí Teaghlaigh (Colscaradh) 1996;

ciallaíonn ‘ordú coigeartaithe pinsin’ ordú arna dhéanamh de réir alt 12(2) den Acht um an Dlí Teaghlaigh 1995 nó, de réir mar a bheidh, alt 17(2) den Acht um an Dlí Teaghlaigh (Colscaradh) 1996 nó aon athrú ar ordú den sórt sin arna dhéanamh le hordú faoi alt 18(2) nó, de réir mar a bheidh, alt 22(2), faoi seach, de na hAchtanna sin, ar athrú é nár fionraíodh (nó má fionraíodh, nó má fionraíodh tuilleadh, nár athbheodh) nó nár urscaoileadh a oibriú le hordú arna dhéanamh faoin alt sin 18(2) nó, de réir mar a bheidh, faoin alt sin 22(2) de na hAchtanna sin;

tá le ‘sochar ainmnithe’ agus ‘méid an aistrithe’ an bhrí agus an forléiriú a shanntar dóibh, faoi seach, in alt 12 den Acht um an Dlí Teaghlaigh 1995 nó, de réir mar a bheidh, in alt 17 den Acht um an Dlí Teaghlaigh (Colscaradh) 1996;

(b) Chun críocha na Caibidle seo agus Sceideal 23B, más rud é, ar an dáta sonraithe nó dá éis, go bhfuil pearsa aonair ina chomhalta nó ina comhalta de shocrú pinsin iomchuí agus go bhfuil an socrú pinsin iomchuí, nó go dtagann sé chun bheith, faoi réir ordaithe coigeartaithe pinsin, ansin, d’ainneoin an ordaithe coigeartaithe pinsin, le linn an méid arna chriostalú trí theagmhas criostalaithe sochair a tharlaíonn ar an dáta sonraithe nó dá éis i ndáil leis an bpearsa aonair faoin socrú pinsin iomchuí a ríomh, déanfar—

(i) an sochar ainmnithe is iníoctha de bhun an ordaithe, nó

(ii) i gcás ina mbeidh méid an aistrithe úsáidte, an sochar ainmnithe a bheadh iníoctha de bhun an ordaithe mura mbeadh méid an aistrithe úsáidte amhlaidh,

a chur san áireamh, i leith an teagmhais criostallaithe sochair sin, sa ríomh sin amhail is dá mba rud é nach ndearnadh an t-ordú coigeartaithe pinsin.”,

agus

(ii) in alt 787R(1)(a), trí “de réir ráta 41 faoin gcéad” a chur in ionad “de réir ráta 42 faoin gcéad”.

(2) (a) Faoi réir mhíreanna (b), (c) agus (d), tá éifeacht le fo-alt (1) amhail ar an agus ó dháta rite an Achta seo.

(b) Measfar éifeacht a bheith le mír (b) d’fho-alt (1) amhail ar an agus ón 1 Eanáir 2006.

(c) Measfar éifeacht a bheith le mír (c)(i) d’fho-alt (1) amhail ar an agus ón 7 Nollaig 2005.

(d) Beidh éifeacht le mír (c) (ii) d’fho-alt (1) amhail ar an agus ón 1 Eanáir 2007.

18 .— (1) Leasaítear Caibidil 2A de Chuid 15 den Phríomh-Acht—

(a) in alt 485C—

(i) i bhfo-alt (1)—

(I) trí “Sa Chaibidil seo agus i Sceidil 25B agus 25C,” a chur in ionad “Sa Chaibidil seo agus i Sceideal 25B,”,

(II) tríd an méid seo a leanas a chur in ionad fhorléiriú “T” san fhoirmle a ghabhann leis an míniú ar “ioncam coigeartaithe”:

“gurb é T méid ioncaim inchánach na pearsan aonair don bhliain chánach, arna chinneadh ar an bhforas—

(a) nach bhfuil feidhm ag an gCaibidil seo, seachas alt 485F, maidir leis an bpearsa aonair don bhliain chánach, agus

(b) más inmheasúnaithe an phearsa aonair, ar duine pósta é nó í, i leith cánach don bhliain chánach ar shlí eile seachas faoi alt 1016, go modhnaítear na forálacha a mbeidh an duine inmheasúnaithe fúthu de réir mhíreanna (i) go (vi) d’alt 485FA,”,

(III) tríd an méid seo a leanas a chur isteach i ndiaidh an mhínithe ar “faoiseamh ar bharrachas”:

“ciallaíonn ‘Oifigeach Ioncaim’ oifigeach do na Coimisinéirí Ioncaim;”,

(IV) trí na míreanna seo a leanas a chur in ionad an mhír (b) den mhíniú ar “ioncam imfhálaithe”:

“(b) ioncam dá dtagraítear in alt 261B nó 267M,

(c) ioncam a mhuirearófar i leith cánach de réir chlásal (I) nó (II)(B) d’alt 730J(1)(a)(i) nó alt 730K(1)(b), agus

(d) ioncam a mhuirearófar i leith cánach de réir alt 747D(a)(i) nó alt 747E(1)(b);”,

agus

(V) trí “aon fhaoiseamh a éireoidh faoi aon cheann de na forálacha, nó dá bua,” a chur in ionad “aon cheann de na faoisimh” sa mhíniú ar “faoiseamh sonraithe”,

(ii) trí na míreanna seo a leanas a chur in ionad mhír (a) d’fho-alt (3):

“(a) más rud é, i ndáil le haon bhliain chánach agus leis na liúntais chaipitiúla a bhfuil éifeacht le tabhairt dóibh sa bhliain sin, go gceanglaítear le haon fhoráil de na hAchtanna Cánach go dtabharfar éifeacht do liúntais le haghaidh tréimhse amháin (dá ngairtear na ‘liúntais chéadluaite’ sa mhír seo), nó go measfar go dtabharfar éifeacht dóibh, i dtosaíocht ar liúntais le haghaidh tréimhse eile (dá ngairtear na ‘dara liúntais a luaitear’ sa mhír seo), ansin—

(i) maidir leis na liúntais chéadluaite, tabharfar éifeacht, nó measfar éifeacht a bheith tugtha, de réir mar a bheidh, le haghaidh liúntais nach faoiseamh sonraithe i dtosaíocht ar aon liúntas den sórt sin is liúntas sonraithe agus i dtosaíocht ar na dara liúntais a luaitear, agus

(ii) maidir leis na dara liúntais a luaitear, tabharfar éifeacht, nó measfar éifeacht a bheith tugtha, de réir mar a bheidh, le haghaidh liúntais nach faoiseamh sonraithe i dtosaíocht ar aon liúntas den sórt sin is liúntas sonraithe,

(ab) lamhálfar asbhaint a údaraítear le fo-alt (2) d’alt 97 i leith ní dá ndéantar tagairt go sonrach san fho-alt sin i dtosaíocht ar asbhaint a údaraítear a dhéanamh faoin bhfo-alt sin de bhua faoisimh shonraithe,

(ac) déanfar asbhaint as ioncam iomlán i leith faoisimh a bheidh dlite do bhliain chánach nach faoiseamh sonraithe i dtosaíocht ar aon asbhaint den sórt sin a bheidh dlite don bhliain chánach is faoiseamh sonraithe,”,

agus

(iii) tríd an méid seo a leanas a chur in ionad fho-alt (4):

“(4) Beidh éifeacht le Sceidil 25B agus 25C chun críocha na Caibidle seo.”,

(b) in alt 485D(b), trí “na bhfaoiseamh sonraithe arna n-úsáid ag an bpearsa aonair i leith na bliana cánach” a chur in ionad “na bhfaoiseamh sonraithe arna n-úsáid ag an bpearsa aonair sa bhliain chánach”,

(c) trí “ailt 485F agus 485FA” a chur in ionad “alt 485F” d’fhorléiriú “T” san fhoirmle in alt 485E,

(d) tríd an méid seo a leanas a chur in ionad alt 485F:

“Forálacha a bhaineann le cánachas ar dhaoine pósta a oiriúnú.

485FA.— I gcás ina mbeidh feidhm ag an gCaibidil seo maidir le pearsa aonair nó a chéile nó a céile do bhliain chánach, agus—

(a) ina mbeidh éifeacht le rogha faoi alt 1018 don bhliain chánach (lena n-áirítear rogha a mheastar faoin alt sin) go ndéanfaí iad a mheasúnú i leith cánach de réir alt 1017,

(b) ina mbeidh éifeacht don bhliain sin le hiarratas faoi alt 1023, nó

(c) ina mbeidh feidhm ag forálacha alt 1019(3) don bhliain sin,

i leith na pearsan aonair agus a chéile nó a céile, ansin beidh feidhm ag na forálacha seo a leanas:

(i) beidh feidhm ag an míniú ar ‘cáin inmhuirearaithe’ in alt 3(1) amhail is dá mba thagairtí d’ioncam inchánach na tagairtí d’ioncam iomlán;

(ii) beidh feidhm ag fo-alt (1) d’alt 1017 amhail is dá gcuirfí an mhír seo a leanas in ionad mhír (a) den fho-alt sin:

‘(a) déanfar an fearchéile a mheasúnú agus a mhuirearú i leith cánach ioncaim, ní amháin i leith a chuid ioncaim inchánach (más ann) don bhliain sin, ach i leith ioncam inchánach a bhanchéile (más ann) freisin d’aon chuid den bhliain mheasúnachta sin a mbeidh sí ina cónaí leis lena linn agus, chun na críche sin agus chun críocha na nAchtanna Cánach Ioncaim, measfar gur leis an t-ioncam an t-ioncam deiridh sin a luadh,’;

(iii) déanfar na tagairtí d’ioncam iomlán—

(I) i bhfo-alt (3),

(II) i mír (a) d’fho-alt (4) seachas na tagairtí i bhfomhír (ii) den mhír sin, agus

(III) i bhfo-alt (4)(b),

d’alt 1019 a fhorléiriú mar thagairtí d’ioncam inchánach;

(iv) déanfar an tagairt do mheasúnaithe agus do mhuirearaithe amhlaidh do gach bliain mheasúnachta dá éis in alt 1019(4)(a) a fhorléiriú mar thagairt—

(I) do mheasúnaithe agus do mhuirearaithe i leith a hioncaim inchánach (más ann) agus ioncam inchánach (más ann) a fearchéile do gach bliain mheasúnachta dá éis, i gcás ina bhfuil feidhm ag an gCaibidil seo, do bhliain cánach, maidir le ceachtar céile nó maidir leis an dá chéile, agus

(II) do mheasúnaithe agus do mhuirearaithe i leith a hioncaim iomláin (más ann) agus ioncam iomlán (más ann) a fearchéile do gach bliain mheasúnachta dá éis, in aon chás eile;

(v) déanfar an tagairt in alt 1019(4)(b) don bhean chéile a mheasúnú amhlaidh i leith cánach ioncaim don bhliain mheasúnachta ina ndéanfar an fógra sin nó an t-iarratas sin a tharraingt siar agus do gach bliain mheasúnachta dá éis a fhorléiriú mar thagairt dóibh seo a leanas—

(I) an bhean chéile a mheasúnú i leith cánach ioncaim maidir lena hioncam inchánach féin (más ann) agus maidir leis an ioncam inchánach (más ann) a bheidh ag a fearchéile don bhliain mheasúnachta ina ndéanfar an fógra sin nó an t-iarratas sin a tharraingt siar agus do gach bliain mheasúnachta dá éis, i gcás ina bhfuil feidhm ag an gCaibidil seo, do bhliain chánach, maidir le ceachtar céile nó maidir leis an dá chéile, agus

(II) an bhean chéile a mheasúnú i leith cánach ioncaim maidir lena hioncam iomlán féin (más ann) agus maidir leis an ioncam iomlán (más ann) a bheidh ag a fearchéile don bhliain mheasúnachta ina ndéanfar an fógra sin nó an t-iarratas sin a tharraingt siar agus do gach bliain mheasúnachta dá éis, in aon chás eile;

agus

(vi) i gcás ina mbeidh feidhm ag mír (a) nó (c) maidir le pearsa aonair agus lena chéile nó lena céile do bhliain chánach, ansin—

(I) a mhéid is mó an sochar ó cibé asbhaintí a shonraítear sna forálacha dá dtagraítear i gCuid 1 den Tábla a ghabhann le halt 458 don bhliain chánach ná an cháin ioncaim is inmhuirearaithe ar ioncam na pearsan aonair don bhliain chánach, úsáidfear an t-iarmhéid chun an cháin ioncaim is inmhuirearaithe ar ioncam chéile na pearsan aonair don bhliain sin a laghdú, agus

(II) a mhéid is mó an sochar ó na hasbhaintí sin ná an cháin ioncaim is inmhuirearaithe ar ioncam an chéile don bhliain sin, úsáidfear an t-iarmhéid chun an cháin ioncaim is inmhuirearaithe ar ioncam na pearsan aonair don bhliain sin a laghdú.

Ceanglas meastacháin agus faisnéis a sholáthar.

485FB.— (1) San alt seo—

tá le ‘duine inmhuirearaithe’ agus ‘dáta tuairisceáin sonraithe don tréimhse inmhuirearaithe’ na bríonna céanna atá leo i gCuid 41;

ciallaíonn “foirm fhorordaithe” foirm arna forordú ag ag na Coimisinéirí Ioncaim nó foirm arna húsáid faoi údarás na gCoimisinéirí Ioncaim, agus folaíonn sé foirm ina n-áirítear ráiteas a sholáthar trí aon phróiseas leictreonach nó fótagrafach nó trí aon phróiseas eile arna cheadú ag na Coimisinéirí Ioncaim.

(2) I gcás ina bhfuil feidhm ag an gCaibidil seo maidir le pearsa aonair do bhliain chánach, measfar gur duine inmhuirearaithe an phearsa aonair sin don bhliain sin chun críocha Chuid 41, mura rud é gur duine inmhuirearaithe é nó í ar shlí eile.

(3) I gcás feidhm a bheith ag an gCaibidil seo maidir le pearsa aonair do bhliain chánach déanfaidh an phearsa aonair sin, chomh maith leis an tuairisceán is gá a sheachadadh faoi alt 951, ráiteas iomlán fírinneach i bhfoirm fhorordaithe a ullmhú agus a sheachadadh ar an Ard-Bhailitheoir an tráth céanna leis an tuairisceán, agus in éineacht leis an tuairisceán, a cheanglaítear a sheachadadh faoi alt 951 ar an dáta tuairisceáin sonraithe don tréimhse inmhuirearaithe, nó roimhe, ar ráiteas é i dtaobh na mionsonraí a éilítear leis an bhfoirm maidir leis na nithe seo a leanas—

(a) na méideanna arb iad comhiomlán na bhfaoiseamh sonraithe iad,

(b) cinneadh na méideanna sin, agus

(c) na meastacháin a éilítear le fo-alt (4),

agus i dtaobh cibé sonraí eile i ndáil leis an gCaibidil seo a éileofar leis an bhfoirm fhorordaithe.

(4) Is iad na meastacháin a éilítear leis an bhfo-alt seo meastacháin—

(a) ar ioncam inchánach na pearsan aonair don bhliain arna chinneadh amhail is nach raibh feidhm ag an gCaibidil seo, seachas alt 485F, maidir leis an bpearsa aonair don bhliain sin,

(b) ar ioncam inchánach na pearsan aonair arna chinneadh de réir alt 485E, agus

(c) ar an méid cánach is ceart a mheasúnú ar an bpearsa aonair de dhroim an Chaibidil seo a chur chun feidhme,

agus déanfar na meastacháin sin de réir mar is fearr is eol don phearsa aonair agus mar a chreideann sé nó sí.

(5) I gcás feidhm a bheith ag an gCaibidil seo maidir le fearchéile agus banchéile araon, nach daoine iad lena mbaineann alt 1016, ansin beidh gá le ráitis ar leithligh faoin alt seo ón bhfearchéile agus ón mbanchéile araon agus déanfar an dá ráiteas ar an bhfoirm fhorordaithe chéanna (dá ngairtear ‘comhráiteas’ san fho-alt seo) agus folóidh tagairtí san alt seo, seachas san fho-alt seo, do ráiteas is gá a sheachadadh faoin alt seo tagairtí do chomhráiteas.

(6) (a) D’fhonn a chinneadh—

(i) an bhfuil nó nach bhfuil aon mhionsonraí, sonraí nó meastacháin atá sa ráiteas dá dtagraítear i bhfo-alt (3) cruinn, nó

(ii) cibé acu is pearsa aonair lena mbaineann an Chaibidil seo pearsa aonair nár sholáthair ráiteas faoin alt seo nó nach ea,

féadfaidh oifigeach Ioncaim cibé fiosrúcháin a dhéanamh nó cibé bearta a dhéanamh a bhfuil cumhachtaí aige nó aici a dhéanamh agus is dóigh leis nó léi is gá chun na nithe atá leagtha amach i bhfomhír (i) nó (ii) a chinneadh, lena n-áirítear, i gcás fhomhír (ii), a cheangal le fógra i scríbhinn ar an bpearsa aonair mionsonraí i ndáil le gach foráil ar ina leith atá faoiseamh cánach á éileamh ag an bpearsa aonair do bhliain chánach mar aon le méid gach éilimh ar leithligh agus na sonraí i ndáil le gach éileamh ar leithligh faoin bhforáil sin a thabhairt don oifigeach laistigh de cibé tréimhse ama, nach giorra ná 14 lá, dá bhforálfar leis an bhfógra.

(b) Ní bheidh feidhm ag fomhír (ii) de mhír (a) ach amháin maidir le pearsa aonair a mbeidh tuairisceán tugtha aige nó aici faoi alt 951 do bhliain chánach agus a bhfuil a ioncam nó a hioncam, lena n-áirítear ioncam atá díolmhaithe ó cháin, ó gach bunadh agus gan aird a thabhairt ar na hasbhaintí, na liúntais ná na faoisimh chánach eile go léir, ar cóimhéid leis an méid tairsí nó gur mó ná an méid tairsí é.

(7) Beidh feidhm ag fo-ailt (9) agus (10) d’alt 951 maidir le ráiteas is gá a sheachadadh faoin alt seo mar atá feidhm acu maidir le tuairisceán is gá a sheachadadh faoin alt sin, agus chun na críche sin déanfar tagairt sna fo-ailt sin do thuairisceán, seachas tagairt don dáta tuairisceáin sonraithe don tréimhse inmhuirearaithe, a fhorléiriú mar thagairt do ráiteas faoin alt seo.

(8) Beidh feidhm ag alt 1052 maidir le mainneachtain ag pearsa aonair ráiteas faoin alt seo nó na sonraí, na méideanna agus na mionsonraí dá dtagraítear i bhfo-alt (6) a sheachadadh mar atá feidhm aige maidir le mainneachtain tuairisceán dá dtagraítear in alt 1052 a sheachadadh.”,

agus

(e) in alt 485G—

(i) tríd an méid seo a leanas a chur in ionad fhomhír (i) d’fho-alt (2)(a):

“(i) chun críocha Chuid 9 agus na Coda sin mar a chuirtear chun feidhme í chun críocha aon fhorála eile de na hAchtanna Cánach, déanfar méid aon fhaoisimh shonraithe a úsáideann an phearsa aonair sa bhliain chánach a chinneadh gan féachaint d’fheidhm alt 485E maidir leis an bpearsa aonair don bhliain sin,”,

(ii) i bhfomhír (iii) d’fho-alt (2)(a) tríd an méid seo a leanas a chur in ionad “méid fhaoiseamh breise na pearsan aonair don bhliain ina n-éiríonn an muirear cothromaíochta, móide aon fhaoiseamh breise a thugtar ar aghaidh chuig an mbliain sin agus nach n-asbhaintear nó nach n-asbhaintear go hiomlán don bhliain sin”:

“a gcomhshuim seo a leanas—

(I) méid fhaoiseamh breise na pearsan aonair don bhliain ina n-éiríonn an muirear cothromaíochta, agus

(II) méid aon fhaoisimh breise a thugtar ar aghaidh chuig an mbliain sin agus nach n-asbhaintear don bhliain sin,”,

(iii) tríd an méid seo a leanas a chur in ionad chlásal (I) d’fho-alt (2)(b)(i):

“(I) méid bharrachas faoisimh na pearsan aonair a bheidh tugtha ar aghaidh go dtí an bhliain ina n-éireoidh an muirear cothromaíochta agus nach mbeidh asbhainte nó asbhainte go hiomlán don bhliain sin, sula ndéantar aon laghdú faoi threoir mhír (a)(iii), agus”,

agus

(iv) tríd an méid seo a leanas a chur in ionad fho-alt (3):

“(3) (a) I gcás feidhm a bheith ag an gCaibidil seo maidir le pearsa aonair do bhliain chánach, ansin, a mhéid atá ioncam inchánach na pearsan aonair, arna chinneadh de réir alt 485E, níos mó ná méid na mbrabús, na ngnóchan nó an ioncaim ar ina leith atá an phearsa aonair inmhuirearaithe faoi Sceidil C, D, E agus F, measfar, d’ainneoin aon fhorála eile de na hAchtanna Cánach, gurb ionann méid an bharrachais agus méid ioncaim is inmhuirearaithe i leith cánach ioncaim faoi Chás IV de Sceideal D, ach—

(i) ní dhéanfar an méid is inmhuirearaithe amhlaidh a áireamh le linn ioncam iomlán na pearsan aonair don bhliain sin a ríomh, agus

(ii) déanfar neamhshuim den mhír seo chun na nithe seo a leanas a chinneadh—

(I) an ceart feidhm a bheith ag an gCaibidil seo maidir le pearsa aonair do bhliain chánach, agus

(II) méid “T” san fhoirmle sa mhíniú ar ‘ioncam coigeartaithe’ in alt 485C(1) agus san fhoirmle in alt 485E.

(b) Aon mheasúnacht i leith cánach ioncaim a bheidh le déanamh maidir le pearsa aonair do bhliain chánach, déanfar, d’ainneoin aon fhorála eile de na hAchtanna Cánach, aon mhéid is inmhuirearaithe ar an bpearsa aonair i leith cánach ioncaim de bhua mhír (a) a áireamh inti, i dteannta aon ioncaim, brabús nó gnóchan de chuid na pearsan aonair is inmhuirearaithe thairis sin i leith cánach ioncaim, agus beidh feidhm ag forálacha na nAchtanna Cánach, lena n-áirítear go háirithe na forálacha sin a bhaineann le cáin a mheasúnú, a bhailiú agus a ghnóthú agus le hús a íoc ar cháin neamhíoctha, maidir le haon mhéid is inmhuirearaithe i leith cánach ioncaim de bhua mhír (a).

(c) Dá mba rud é, murach an Chaibidil seo, nach ndéanfaí aon mheasúnacht i leith cánach ioncaim ar phearsa aonair do bhliain chánach, ansin déanfaidh oifigeach Ioncaim, d’ainneoin aon fhorála eile de na hAchtanna Cánach, measúnacht i leith cánach ioncam ar an bpearsa aonair go feadh bhreithiúnas an oifigigh maidir leis na méideanna is inmhuirearaithe i leith cánach ioncaim, lena n-áirítear aon mhéid is inmhuirearaithe de bhua mhír (a), agus beidh feidhm ag forálacha na nAchtanna Cánach, lena n-áirítear, go háirithe, na forálacha sin a bhaineann le cáin a mheasúnú, a bhailiú agus a ghnóthú, agus le hús a íoc ar cháin neamhíoctha, maidir leis na nithe seo a leanas—

(i) aon mhéid is inmhuirearaithe i leith cánach ioncaim de bhua mhír (a), agus

(ii) aon mheasúnacht i leith cánach ioncaim arna déanamh ar an bpearsa aonair de bhua na míre seo.”.

(2) Leasaítear Sceideal 25B den Phríomh-Acht—

(a) ag uimhir thagartha 13, i gcolún (3), tríd an méid seo a leanas a chur in ionad fhomhír (iii) de mhír (a):

“(iii) foirgneamh nó déanmhas a meastar gur foirgneamh nó déanmhas é atá á úsáid chun críocha trádála dá dtagraítear in alt 268(1)(g) de bhua alt 268(3B),

ach ní dhéanfar aon liúntas dá dtagraítear in alt 272(3)(c)(iii) a áireamh sa chomhiomlán,”,

(b) tríd an méid seo a leanas a chur isteach i ndiaidh na hiontrála ag uimhir thagartha 15:

“

”,

(c) ag uimhir thagartha 38, i gcolún (3), tríd an méid seo a leanas a chur in ionad mhír (b):

“(b) an méid a chinnfear de réir na foirmle—

(G + E) — (D + R)

más rud é—

gurb é G comhiomlán ollmhéid gach cíosa a gheobhaidh an phearsa aonair le haghaidh na bliana cánach,

gurb é E fáltais iomlána na pearsan aonair ó éasúintí le haghaidh na bliana cánach,

gurb é D an méid iomlán asbhaintí a údaraítear le halt 97(2) a bhfuil an phearsa aonair ina dteideal le haghaidh na bliana cánach ar leith ó aon asbhaint a údaraítear le halt 372AP nó le halt 372AU, agus

gurb é R an méid a gcinnfear faoin Sceideal seo gurb é an méid d’fhaoiseamh sonraithe i leith alt 372AP é, ach ní mó an méid a chinnfear amhlaidh ná an méid a chinnfear de réir na foirmle—

(G + E) — D

i gcás ina bhfuil na bríonna céanna le G, E agus D atá leo sa chéad fhoirmle sa mhír seo,”,

(d) ag uimhir thagartha 41, i gcolún (3), trí “i leith faoisimh shonraithe” a chur in ionad “i leith liúntas caipitiúil, is liúntais ar faoisimh shonraithe iad”,

(e) ag uimhir thagartha 43, i gcolún (3), tríd an méid seo a leanas a chur in ionad an ábhair láithrigh:

“A mhéid atá an barrachas dá dtagraítear in alt 384 inchurtha i leith faoisimh shonraithe, méid an bharrachais nó aon chuid den bharrachas is inchurtha amhlaidh a dtugtar faoiseamh don phearsa aonair ina leith faoin alt sin don bhliain chánach lúide aon chuid den bharrachas sin nach féidir faoiseamh a thabhairt ina leith faoin alt sin don bhliain sin.”,

(f) ag uimhir thagartha 51, i gcolún (3), trí “a baineadh as aon ioncam de chuid na pearsan aonair nó a fritháiríodh ina choinne ” a chur in ionad “a baineadh as ioncam iomlán na pearsan aonair”, agus

(g) ag uimhir thagartha 52, i gcolún (3), trí “a baineadh as aon ioncam de chuid na pearsan aonair, nó a fritháiríodh ina choinne” a chur in ionad “a baineadh as ioncam iomlán na pearsan aonair”.

(3) Leasaítear an Príomh-Acht tríd an méid seo a leanas a chur isteach i ndiaidh Sceideal 25B:

“Alt 485C.

SCEIDEAL 25C

An Méid Faoisimh a Chinneadh a nDéileálfar leis mar Mhéid is Inchurtha i leith Faoiseamh Sonraithe maidir le Faoiseamh a Tugadh ar aghaidh ó Bhliain Cánach 2006 go Bliain Cánach 2007

Cinneadh mhéid na liúntas caipitiúil a tugadh ar aghaidh faoi alt 304 agus is inchurtha i leith faoiseamh sonraithe.

1. (1) Más rud é, i ndáil le haon aon trádáil nó gairm a sheolann pearsa aonair, go dtarlóidh, aon liúntais nó cuid d’aon liúntais den sórt sin arna dtabhairt faoi Chuid 9, lena n-áirítear an Chuid sin arna cur chun feidhme le haon fhoráil eile de na hAchtanna Cánach, do bhliain chánach 2006 i leith na pearsan aonair le linn trádáil nó gairm na pearsan aonair a bheith a chur faoi cháin—

(a) go ndéanfar, de réir alt 304(4), iad a chur le méid na liúntas atá le tabhairt don phearsa aonair faoin gCuid sin don bhliain chánach 2007, nó

(b) mura bhfuil aon liúntais den sórt sin ann sa bhliain 2007, go measfar ina leith, de réir an ailt sin, gurb iad na liúntais iad faoin gCuid sin don bhliain sin,

ansin, déanfar an méid a chuirtear leis amhlaidh nó a mheastar amhlaidh (dá ngairtear an ‘faoiseamh ar aghaidh’ i bhfomhír (2)), ar é an méid é atá le háireamh mar mhéid is inchurtha i leith faoiseamh sonraithe, a chinneadh de réir fhomhír (2) don bhliain chánach 2007.

(2) An méid dá dtagraítear i bhfomhír (1), is méid é arna chinneadh de réir na foirmle—

RF x SR

TR

más rud é—

gurb é RF an faoiseamh ar aghaidh,

gurb é SR comhiomlán mhéideanna na liúntas a tugadh don phearsa aonair faoi Chaibidil 1 de Chuid 9 (ar liúntais iad a tugadh i leith faoisimh shonraithe nó faoiseamh sonraithe) le linn trádáil nó gairm na pearsan aonair a chur faoi cháin i leith na bliana cánach 2006 agus gach ceann de na 3 bliana cánach roimhe sin, seachas aon liúntais den sórt sin nó cuid de liúntais den sórt sin—

(a) a cuireadh leis na liúntais atá le tabhairt le halt 304(4) in aghaidh aon cheann de na blianta sin, nó

(b) a measadh ina leith leis an alt sin gur liúntais iad d’aon cheann de na blianta sin,

agus

gurb é TR comhiomlán na liúntas a tugadh don phearsa aonair faoi Chuid 9, lena n-áirítear an Chuid sin arna cur chun feidhme le haon fhoráil eile de na hAchtanna Cánach, le linn trádáil nó gairm na pearsan aonair a chur faoi cháin i leith na bliana cánach 2006 agus gach ceann de na 3 bliana cánach roimhe sin, seachas aon liúntais den sórt sin nó cuid de liúntais den sórt sin—

(a) a cuireadh leis na liúntais atá le tabhairt le halt 304(4) in aghaidh aon cheann de na blianta sin, nó

(b) ar ina leith a measadh leis an alt sin gurbh iad na liúntais iad d’aon cheann de na blianta sin.

Cinneadh mhéid na gcaillteanas arna dtabhairt ar aghaidh faoi alt 382 agus is inchurtha i leith faoiseamh sonraithe.

2. (1) Más rud é, i ndáil le haon trádáil nó gairm a sheolann pearsa aonair, go ndéantar caillteanas a thabhairt ar aghaidh ón mbliain chánach 2006 go dtí an bhliain chánach 2007 de réir alt 382, ansin déanfar méid an chaillteanais arna thabhairt ar aghaidh amhlaidh (dá ngairtear an ‘faoiseamh a tugadh ar aghaidh’ i bhfomhír (2)), ar méid é atá le háireamh mar chaillteanas is inchurtha i leith faoisimh shonraithe, a chinneadh, chun críocha Sceideal 25B, don bhliain chánach 2007 de réir fhomhír (2).

(2) An méid dá dtagraítear i bhfomhír (1), is é an méid é a chinntear de réir na foirmle—

RF x SR

TR

más rud é—

gurb é RF méid an fhaoisimh a tugadh ar aghaidh,

gurb é SR suim—

(DR + SA)

más rud é—

gurb é DR comhiomlán mhéideanna na n-asbhaintí breise a raibh teideal ag an bpearsa aonair chucu faoi ailt 324, 333, 345, 354 agus faoi mhír 13 de Sceideal 32 i leith na trádála nó na gairme don bhliain chánach 2006 agus na 3 bliana cánach roimhe sin, ach ní bheidh an méid i leith gach bliana atá le cur san áireamh sa chomhiomlán níos mó ná méid a chinnfear de réir na foirmle—

(L — CA)

más rud é—

gurb é L méid an chaillteanais don bhliain sin a raibh an phearsa aonair i dteideal éileamh a dhéanamh ina leith faoi alt 381 i leith na trádála nó na gairme sin, agus

gurb é CA méid aon éilimh arna dhéanamh sa bhliain sin ag an bpearsa aonair i leith na trádála nó na gairme sin de bhua fhorálacha Chaibidil 2 de Chuid 12, agus

agus

gurb é SA comhiomlán mhéideanna na liúntas arna dtabhairt don phearsa aonair faoi Chaibidil 1 de Chuid 9, lena n-áirítear an Chaibidil sin arna cur chun feidhme le haon fhoráil eile de na hAchtanna Cánach, (ar liúntais iad arna dtabhairt i leith faoisimh shonraithe nó faoiseamh sonraithe) le linn trádáil nó gairm na pearsan aonair a chur faoi cháin i leith na bliana cánach 2006 agus gach ceann de na 3 bliana cánach roimhe sin, seachas aon liúntais den sórt sin nó aon chuid de liúntais den sórt sin—

(a) a cuireadh leis na liúntais atá le tabhairt d’aon cheann de na blianta sin le halt 304(4), nó

(b) ar ina leith a measadh leis an alt sin gurbh iad na liúntais iad d’aon cheann de na blianta sin,

ach ní dhéanfar na liúntais a tugadh don phearsa aonair i leith aon bhliana a áireamh sa chomhiomlán ach amháin más rud é go ndearnadh éileamh i leith na liúntas sin don bhliain sin de bhua fhorálacha Chaibidil 2 de Chuid 12,

gurb é TR comhshuim—

(TL + TA)

más rud é—

gurb é TL comhiomlán mhéideanna na gcaillteanas atá cáilithe le haghaidh faoisimh faoi alt 381 i leith na trádála nó na gairme sin don bhliain chánach 2006 agus do gach ceann de na 3 bliana cánach roimhe sin lúide méid aon éilimh arna dhéanamh in aon cheann de na blianta sin ag an bpearsa aonair i leith na trádála nó na gairme sin de bhua fhorálacha Chaibidil 2 de Chuid 12 agus,

gurb é TA comhiomlán mhéideanna na liúntas a tugadh don phearsa aonair faoi Chuid 9, lena n-áirítear an Chuid sin arna cur chun feidhme le haon fhoráil eile de na hAchtanna Cánach, le linn thrádáil nó ghairm na pearsan aonair a chur faoi cháin i leith na bliana cánach 2006 agus i leith gach ceann de na 3 bliana cánach roimhe sin, seachas aon liúntais den sórt sin nó aon chuid de liúntais den sórt sin—

(a) a cuireadh leis na liúntais a bhí le tabhairt le halt 304(4) d’aon cheann de na blianta sin, nó

(b) ar ina leith a measadh leis an alt sin gurbh iad na liúntais iad d’aon cheann de na blianta sin,

ach ní dhéanfar na liúntais a tugadh don phearsa aonair i leith aon bhliana a chur san áireamh sa chomhiomlán, ach amháin más rud é go ndearnadh éileamh i leith na liúntas sin don bhliain sin de bhua fhorálacha Chaibidil 2 de Chuid 12.

Cinneadh mhéid na liúntas caipitiúil arna dtabhairt le linn ioncam a mhuirearú faoi Chás V de Sceideal D agus arna dtabhairt ar aghaidh faoi alt 305 atá inchurtha i leith faoiseamh sonraithe.

3. (1) Más rud é—

(a) maidir le hiarmhéid aon liúntas, nó maidir le cuid de liúntais den sórt sin, arna dtabhairt faoi Chaibidil 1 de Chuid 9, lena n-áirítear an Chaibidil sin arna cur chun feidhme le haon fhoráil eile de na hAchtanna Cánach, don bhliain chánach 2006 do phearsa aonair le linn ioncam a mhuirearú faoi Chás V de Sceideal D, nó

(b) má dhéantar roghnú de réir alt 305(1)(b) i leith na liúntas sin nó cuid de na liúntais sin, maidir le hiarmhéid an bharrachais i leith na bliana sin dá dtagraítear in alt 305(1)(b)(ii),

go bhfuil sé ar fáil, de réir alt 305(1), lena asbhaint ó ioncam na pearsan aonair, nó go ndéantar é a fhritháireamh in aghaidh ioncam na pearsan aonair is inmhuirearaithe faoi Chás V de Sceideal D don bhliain chánach 2007, ansin déanfar méid an iarmhéid nó, de réir mar a bheidh, méid iarmhéid an bharrachais (dá ngairtear an ‘faoiseamh a thugtar ar aghaidh’ i bhfomhír (2)), ar méid é atá le háireamh mar méid atá inchurtha i leith faoiseamh sonraithe, a chinneadh don bhliain chánach 2007 de réir fhomhír (2).

(2) An méid dá dtagraítear i bhfo-mhír (1), is méid é a chinnfear de réir na foirmle—

RF x SR

TR

más rud é—

gurb é RF méid an fhaoisimh a thugtar ar aghaidh,

gurb é SR comhiomlán mhéideanna na liúntas (ar liúntais iad arna dtabhairt i leith faoisimh shonraithe nó faoiseamh sonraithe) a thugtar don phearsa aonair faoi Chaibidil 1 de Chuid 9, lena n-áirítear an Chaibidil sin arna cur chun feidhme le haon fhoráil eile de na hAchtanna Cánach, le linn ioncam na pearsan aonair a mhuirearú don bhliain chánach 2006 agus do gach ceann de na 3 bliana roimhe sin faoi Chás V de Sceideal D, agus

gurb é TR comhiomlán mhéideanna na liúntas arna dtabhairt don phearsa aonair faoi Chaibidil 1 de Chuid 9, lena n-áirítear an Chaibidil sin arna cur chun feidhme le haon fhoráil eile de na hAchtanna Cánach, le linn ioncam na pearsan aonair a mhuirearú don bhliain chánach 2006 agus do gach ceann de na 3 bliana cánach roimhe sin faoi Chás V de Sceideal D.

Cinneadh mhéid an bharrachais a thugtar ar aghaidh faoi alt 384 agus is inchurtha i leith faoiseamh áirithe.

4. (1) Más rud é, de réir alt 384, go ndéanfar barrachas den chineál dá dtagraítear san alt sin a thabhairt ar aghaidh ón mbliain chánach 2006 chuig an mbliain chánach 2007 agus a bheidh ar fáil lena asbhaint ó mhéid bhrabúis nó ghnóchain na pearsan aonair is inmhuirearaithe i leith cánach faoi Chás V de Sceideal D, nó le fritháireamh ina n-aghaidh, ansin déanfar, chun críocha Sceideal 25B, méid an bharrachais arna thabhairt ar aghaidh amhlaidh (dá ngairtear ‘an faoiseamh a thugtar ar aghaidh’ i bhfo-alt (2)) agus atá le háireamh mar mhéid is inchurtha i leith faoiseamh sonraithe a chinneadh, don bhliain chánach 2007, de réir fho-alt (2).

(2) An méid dá dtagraítear i bhfo-alt (1) is méid é a chinnfear de réir na foirmle—

RF x SR

TR

más rud é—

gurb é RF méid an fhaoisimh a thugtar ar aghaidh,

gurb é SR comhiomlán mhéideanna na n-asbhaintí a raibh an phearsa aonair i dteideal iad a asbhaint faoi ailt 372AP agus 372AU, don bhliain chánach 2006 agus do gach ceann de na 3 bliana cánach roimhe sin, agus

gurb é TR comhiomlán mhéideanna na n-asbhaintí a raibh an phearsa aonair i dteideal iad a asbhaint faoi alt 92(2), lena n-áirítear asbhaintí arna n-údarú faoin alt sin de bhua ailt 372AP agus 372AU, don bhliain chánach 2006 agus do gach ceann de na 3 bliana cánach roimhe sin.

Ceart chun bonn cionroinnte éagsúil a lorg.

5. (1) Mura bhfuil an phearsa aonair sásta le cinneadh aon mhéid faoi mhíreanna 1 go 4 féadfaidh sé nó sí, trí fhógra i scríbhinn chun na gCoimisinéirí Ioncaim, iarratas a dhéanamh go gcuirfí ina ionad méid arna chinneadh faoi threoir cibé tréimhse leanúnach is faide nó is gaire roimh an mbliain chánach 2006, ach a mbeidh an bhliain chánach sin i gcónaí ar áireamh inti, is dóigh leis an bpearsa aonair a thabharfaidh toradh is cothroime réasúnaí.

(2) I gcás go ndéanfar iarratas faoi fhomhír (1), eiseoidh na Coimisinéirí Ioncaim cinneadh i scríbhinn chuig an bpearsa aonair, ar cinneadh é, lena nglacfaidh siad leis an méid nó leis na méideanna ar an mbonn á mholadh ag an bpearsa aonair ag leagan amach méid cóir réasúnach arna chinneadh faoi threoir tréimhse ama éigin eile nó, lena ndaingneoidh siad an mhéid a cinneadh faoi mhíreanna 1 go 4.

(3) Murar bhfuil pearsa aonair sásta le cinneadh na gCoimisinéirí Ioncaim faoi fhomhír (2), féadfaidh sé nó sí le fógra i scríbhinn arna thabhairt do na Coimisinéirí Ioncaim laistigh de 30 lá tar éis an cinneadh a fháil faoi fhomhír (2) achomharc a dhéanamh chun na Coimisinéirí Achomhairc.

(4) Déanfaidh na Coimisinéirí Achomhairc achomharc a bheidh déanta chucu faoi fhomhír (3) a éisteacht agus a chinneadh ionann is dá mba achomharc é in aghaidh measúnachta cánach ioncaim agus, beidh feidhm dá réir sin, fara aon mhodhnuithe is gá, ag forálacha na nAchtanna Cánach Ioncaim a bhaineann le hachomharc den sórt sin agus le hachomharc a athéisteacht agus le cás a shonrú chun tuairim na hArd-Chúirte a fháil ar phonc dlí.

(5) Le linn iarratas faoi fhomhír (1) nó achomharc faoi fhomhír (3) a bhreithniú ní thabharfaidh na Coimisinéirí Ioncaim ná na Coimisinéirí Achomhairc aon aird ar iarratas nó achomharc ar ina leith—

(a) nach mór éifeacht a bheith tugtha d’fhaoisimh shonraithe i dtosaíocht ar fhaoisimh nach faoisimh shonraithe iad, mura rud é go n-údaraítear tosaíocht den sórt sin le foráil de na hAchtanna Cánach, nó

(b) faoi réir fho-mhíreanna (1) go (4), nach mór méid a chinneadh ar shlí seachas mar a fhoráiltear leis an Sceideal seo.

(6) I gcás ina ndéanfar méid arna chinneadh de réir na míre seo (dá ngairtear ‘an méid nua’ sa mhír seo) a chur in ionad méid arna chinneadh faoi mhír 1, 2, 3 nó 4, measfar gurb é an méid nua an méid arna chinneadh faoi mhír 1, 2, 3 nó 4, de réir mar a bheidh.”.

(4) Tá feidhm ag an alt seo maidir leis an mbliain mheasúnachta 2007 agus le blianta measúnachta dá héis.

Caibidil 3

Cáin Ioncaim, Cáin Chorparáide agus Cáin Ghnóchan Caipitiúil

19 .— (1) Leasaítear Cuid 16 den Phríomh-Acht—

(a) in alt 488(1) —

(i) i mír (d) den mhíniú ar “tréimhse iomchuí” trí “bliain amháin” a chur in ionad “2 bhliain” sa dá áit ina bhfuil sé, agus

(ii) sa mhíniú ar “cuideachta neamhluaite” trí “Malartán Fiontraíochta na hÉireann” a chur in ionad “Margadh na gCuideachtaí Forásacha” agus “ar Mhalartán Fiontraíochta na hÉireann” a chur in ionad “ar Mhargadh na gCuideachtaí Forásacha”,

(b) in alt 489—

(i) tríd an méid seo a leanas a chur isteach i ndiaidh fho-alt (4B) (a cuireadh isteach leis an Acht Airgeadais 2004):

“(4C) D’ainneoin aon fhorála eile den alt seo, más rud é—

(a) (i) go bhfuil faoiseamh dlite de réir alt 508 maidir le méid arna shuibscríobh, i gcáil ainmnithigh thar ceann pearsan aonair cáilithí, ag bainisteoirí ciste ainmnithe,

(ii) gur suibscríobhadh an méid arna shuibscríobh amhlaidh i leith an chiste ainmnithe sa tréimhse dar tosach an 1 Eanáir 2007 agus dar críoch an 31 Eanáir 2007, agus

(iii) go ndéanfar na scaireanna cáilithe, ar ina leith a suibscríobhadh an méid ag bainisteoirí an chiste ainmnithe, a eisiúint an 31 Nollaig 2007, nó roimhe,

nó

(b) go ndéanfaidh cuideachta cháilitheach scaireanna cáilithe a eisiúint chuig pearsa aonair cháilitheach sa tréimhse dar tosach an 1 Eanáir 2007 agus dar críoch 31 Eanáir 2007,

ansin féadfaidh an phearsa aonair cháilitheach, trí fhógra i scríbhinn chuig an gcigire, a roghnú go ndéanfar an faoiseamh a bheidh dlite a thabhairt mar asbhaint óna ioncam iomlán nó óna hioncam iomlán don bhliain mheasúnachta 2006 in ionad (de réir mar a fhoráiltear i bhfo-alt (3)) é a thabhairt mar asbhaint óna ioncam iomlán nó óna hioncam iomlán don bhliain mheasúnachta 2007 agus, i gcás ina ndéanfar roghnú amhlaidh, is de réir alt 490(2) mar a bhí feidhm aige don bhliain mheasúnachta 2006 a bheidh an faoiseamh a thabharfar don bhliain sin.”,

agus

(ii) i bhfo-alt (15) trí “31 Nollaig 2013” a chur in ionad “31 Nollaig 2006”,

(c) in alt 490—

(i) i bhfo-alt (2) trí “€100,000 i gcás infheistíochta iomchuí, nó €150,000 in aon chás eile” a chur in ionad “€31,750”,

(ii) i bhfo-alt (3)(a) trí “, (4B) nó (4C)” a chur in ionad “nó (4B)”, agus

(iii) i bhfo-ailt (3)(b) agus (4)(b) trí “2013” a chur in ionad “2006”,

(d) in alt 491—

(i) i bhfo-ailt (2)(a) agus (3)(a)—

(I) trí “1 Eanáir 2007” a chur in ionad “1 Eanáir 2002”, agus

(II) tríd an méid seo a leanas a chur in ionad an mhínithe ar “A” san fhoirmle:

“gurb é A €2,000,000,”,

(ii) trí fho-ailt (2)(b) agus (3)(b) a scriosadh, agus

(iii) i bhfo-alt (3A)—

(I) trí “12 mhí” a chur in ionad “6 mhí”, agus

(II) trí “€1,500,000” a chur in ionad “€750,000”,

(e) in alt 493 i bhfo-alt (8)(a)(i) trí “€500,000” a chur in ionad “€317,500”,

(f) in alt 496—

(i) i bhfo-alt (2)(a)—

(I) i bhfomhír (ii)(I), tríd an méid seo a leanas a chur in ionad fhochlásal (A):

“(A) “a cheadaigh Forbairt nó an Ghníomhaireacht Forbartha Tionscail (Éire) deontas a thabhairt chun daoine a fhostú faoi alt 25 den Acht um Fhorbairt Tionscail, 1986 (arna leasú le halt 29 den Acht um Fhorbairt Tionscail (Fondúireacht Eolaíochta Éireann) 2003), nó”,

(II) tríd an méid seo a leanas a chur in ionad fhomhír (v):

“(v) maidir le hinfheistíocht iomchuí, seirbhísí a thabhairt ar seirbhísí iad dá dtagraítear i bhfomhír (ii)agus ar ina leith a sholáthair gníomhaireacht forbartha tionscail nó Bord Fiontar Contae (is bord dá dtagraítear sa Sceideal a ghabhann leis an Acht um Fhorbairt Tionscail 1995) deimhniú á dhaingniú go bhfuil teideal ann chun tacaíocht airgeadais nach lú ná €2,540 a dheonú chun go ngabhfaidh duine a bheidh ceadaithe ag an ngníomhaireacht nó ag an mBord Fiontar Contae do staidéar féidearthachta ar inmharthanacht tráchtála ionchasach na seirbhísí a bheidh le tabhairt,”,

(III) trí “agus” a scriosadh ag deireadh fhomhír (xiii) agus “agus” a chur isteach ag deireadh fhomhír (xv), agus

(IV) tríd an méid seo a leanas a chur isteach i ndiaidh fhomhír (xv):

“(xvi) gníomhaíochtaí athchúrsála i ndáil le dramhábhar, de réir bhrí fho-alt (9A).”,

agus trí “agus” a scriosadh san áit dheireanach a bhfuil sé i mír (a),

agus

(ii) i ndiaidh fho-alt (9), tríd an méid seo a leanas a chur isteach:

“(9A) (a) Chun críocha fho-alt (2)(a)(xvi), ciallaíonn ‘gníomhaíochtaí athchúrsála i ndáil le dramhábhar’ an dramhábhar a chur faoi aon phróis nó cóireáil a bhfuil ábhar breisluacha atá in-athúsáidte de thoradh uirthi agus ar gníomhaíochtaí iad ar chuir gníomhaireacht forbartha tionscail deontas nó cúnamh airgeadais ar fáil ina leith.

(b) Chun críocha mhír (a) ciallaíonn ‘dramhábhar’ aon cheann díobh seo a leanas:

(i) pacáistiú;

(ii) dramhaíl fhoirgníochta agus scartála;

(iii) miotail, adhmad, gloine agus plaistigh;

(iv) trealamh leictreachais agus trealamh leictreonach;

(v) batairí;

(vi) feithiclí inneallghluaiste i ndeireadh a ré.”,

agus

(g) tríd an méid seo a leanas a chur isteach i ndiaidh alt 508:

“Faoiseamh a thuairisciú.

508A.— (1) Déanfaidh duine (is cuideachta cháilitheach nó bainisteoirí ciste ainmnithe), nuair a cheanglóidh na Coimisinéirí Ioncaim air déanamh amhlaidh, cibé faisnéis, i ndáil leis an bhfaoiseamh dá bhforáiltear sa Chuid seo, agus a éileoidh na Coimisinéirí Ioncaim le réasún ón duine sin chun críche na dtuarascálacha bliantúla a cheanglaítear de réir alt 7.1 de na Treoirlínte ón gComhphobal maidir le Cúnamh Stát chun Infheistíochtaí Caipitil Riosca i bhFiontair Bheaga agus Mheánmhéide a Chur chun Cinn² , a thabhairt do na Coimisinéirí Ioncaim laistigh de cibé tréimhse ama a bheidh sonraithe san fhógra (is tréimhse nach giorra ná 30 lá).

(2) D’ainneoin aon oibleagáide maidir le rúndacht a fhorchuirtear orthu leis na hAchtanna nó leis an Acht um Rúin Oifigiúla 1963, féadfaidh na Coimisinéirí Ioncaim an fhaisnéis a gheofar de réir fho-alt (1) a thabhairt don duine a chuirfidh na tuarascálacha bliantúla dá dtagraítear san fho-alt sin faoina mbráid.

(3) Féadfaidh na Coimisinéirí Ioncaim aon oifigeach dá gcuid a ainmniú chun aon fheidhm a chomhall a údaraítear leis an alt seo do na Coimisinéirí Ioncaim a chomhall.

(4) I gcás ina mainneoidh aon duine ceanglas an fhaisnéis a thabhairt de réir fho-alt (1) a chomhlíonadh, dlífear pionós €2,000 a chur ar an duine agus, má leantar den mhainneachtain sin tar éis na tréimhse 30 lá dá dtagraítear san fho-alt sin, dlífear pionós breise €50 a chur ar an duine sin in aghaidh gach lae a leanfar amhlaidh den mhainneachtain.”.

(2) (a) Faoi réir mhír (b), beidh feidhm ag fo-alt (1) mar a leanas—

(i) maidir le míreanna (a)(i) agus (f)(i)(II), i ndáil le hinfheistíochtaí iomchuí arna ndéanamh an 1 Eanáir 2007 nó dá éis,

(ii) maidir le mír (a)(ii), amhail ar an agus ón 12 Aibreán 2005,

(iii) maidir le míreanna (b), (c)(ii), (c)(iii), (d)(ii), (f)(i)(III), (f)(ii) agus (g), amhail ar an agus ón 1 Eanáir 2007,

(iv) maidir le míreanna (c)(i), (d)(i), (d)(iii), (e) agus (f)(i)(IV), i ndáil le scaireanna cáilithe arna n-eisiúint an 1 Eanáir 2007 nó dá éis, agus

(v) maidir le mír (f)(i)(I), i ndáil le suibscríobhanna le haghaidh scaireanna cáilithe arna n-eisiúint an 1 Eanáir 2007 nó dá éis.

(b) Tagann fo-alt (1) i ngníomh tar éis don Aire Airgeadais ordú a dhéanamh chuige sin.

20 .— (1) Leasaítear Cuid 40 den Phríomh-Acht (arna leasú leis an Acht Airgeadais 2005)—

(a) in alt 934, tríd an méid seo a leanas a chur in ionad fho-alt (6):

“(6) I gcás ina gcinnfidh na Coimisinéirí Achomhairc aon achomharc, déanfaidh an cigire nó an t-oifigeach eile, mura rud é—

(a) go n-éileoidh an duine a bheidh measúnaithe go n-athéistfear achomharc an duine sin faoi alt 942, nó

(b) go gceanglófar faoi na hAchtanna Cánach cás a shonrú chun tuairim na hArd-Chúirte a fháil,

éifeacht a thabhairt do chinneadh na gCoimisinéirí Achomhairc agus air sin, más é an cinneadh go seasfaidh an mheasúnacht mar a bheidh nó go leasófar í, beidh an fheidhm agus an éifeacht chéanna leis an measúnacht nó leis an measúnacht leasaithe, de réir mar a bheidh, is a bheadh léi dá mba mheasúnacht í nach mbeadh aon fhógra achomhairc tugtha ina leith.”,

(b) in alt 941, tríd an méid seo a leanas a chur in ionad fho-alt (9):

“(9) Má dhéantar méid na measúnachta a athrú le hordú nó le breithiúnas na Cúirte Uachtaraí nó na hArd-Chúirte, ansin—

(a) má íocadh an iomarca cánach, déanfar an méid a ró-íocadh a aisíoc agus ús air de réir alt 865A, nó

(b) murar íocadh go leor cánach, measfar gur riaráiste cánach (ach amháin a mhéid a thabhófar aon phionós mar gheall ar riaráiste) an méid a bheidh gan íoc, agus déanfar é a íoc agus a ghnóthú dá réir sin.”,

(c) in alt 942, tríd an méid seo a leanas a chur in ionad fho-alt (6):

“(6) I gcás ina gcinnfidh an breitheamh achomharc, déanfaidh an cigire nó an t-oifigeach eile, mura gceanglaítear faoi na hAchtanna Cánach cás a shonrú chun tuairim na hArd-Chúirte a fháil, éifeacht a thabhairt do chinneadh an bhreithimh agus air sin, más é an cinneadh go seasfaidh an mheasúnacht mar a bheidh nó go leasófar í, beidh an fheidhm agus an éifeacht chéanna leis an measúnacht nó leis an measúnacht leasaithe is a bheadh léi dá mba mheasúnacht í nach mbeadh aon fhógra achomhairc tugtha ina leith.”,

agus

(d) in alt 945(2), trí “agus” a chur ag deireadh mhír (h) agus trí mhír (i) a scriosadh.

(2) Tá feidhm ag fo-alt (1) i ndáil le hachomhairc arna gcinneadh ag na Coimisinéirí Achomhairc, nó ag breitheamh den Chúirt Chuarda, ar dháta rite an Achta seo nó dá éis.

21 .— Leasaítear alt 373 den Phríomh-Acht i bhfo-alt (2)—

(a) trí “an 1 Eanáir 2006 nó dá éis;” a chur in ionad “an 1 Eanáir 2006 nó dá éis.” i mír (o) (ii), agus

(b) tríd an méid seo a leanas a chur isteach i ndiaidh mhír (o):

“(p) €24,000, i gcás inar tabhaíodh an caiteachas—

(i) i dtréimhse chuntasaíochta dar chríoch an 1 Eanáir 2007 nó dá éis, nó

(ii) i mbonntréimhse do bhliain mheasúnachta, i gcás ina gcríochnaíonn an bhonntréimhse sin an 1 Eanáir 2007 nó dá éis.”.

22 .— Leasaítear alt 657A den Phríomh-Acht—

(a) i bhfo-alt (1) sa mhíniú ar “pearsa aonair iomchuí”, trí “ don bhliain mheasúnachta chéanna” a chur in ionad “don bhliain mheasúnachta 2005” sa chéad áit a bhfuil sé agus trí “sa bhliain mheasúnachta sin” a chur ina ionad sa dara háit a bhfuil sé,

(b) tríd an méid seo a leanas a chur in ionad fho-alt (3):

“(3) D’ainneoin aon fhorála eile de na hAchtanna Cánach Ioncaim ar leith ó fho-alt (4), i gcás go roghnaíonn pearsa aonair de réir fho-alt (2), ansin, maidir leis an íocaíocht iomchuí nó leis na híocaíochtaí iomchuí—

(a) déanfar neamhshuim di nó díobh maidir leis an ‘bliain mheasúnachta chéanna’ dá dtagraítear sa mhíniú ar ‘pearsa aonair iomchuí’ i bhfo-alt (1), agus

(b) ina ionad sin, déileálfar léi nó leo chun críocha na nAchtanna Cánach Ioncaim mar íocaíocht nó íocaíochtaí a d’eascair i dtráthchodanna comhionanna sa bhliain mheasúnachta arb í an bhliain mheasúnachta chéanna sin í agus sa 2 bhliain mheasúnachta díreach ina dhiaidh sin.”,

agus

(c) tríd an méid seo a leanas a chur in ionad fho-alt (5):

“(5) Aon roghnú faoi fho-alt (2) a dhéanfaidh duine lena mbaineann an t-alt seo, déanfar é le fógra i scríbhinn an 31 Deireadh Fómhair nó roimhe sa bhliain tar éis an ‘bliain mheasúnachta chéanna’ dá dtagraítear sa mhíniú ar ‘pearsa aonair iomchuí’ i bhfo-alt (1), agus áireofar é sa ráiteas bliantúil maidir le brabúis nó gnóchain ó fheirmeoireacht don bhliain mheasúnachta arb í an bhliain mheasúnachta chéanna sin í a cheanglaítear a sheachadadh an dáta sin nó roimhe faoi na hAchtanna Cánach Ioncaim.”.

23 .— Leasaítear Caibidil 23 den Phríomh-Acht tríd an méid seo a leanas a chur isteach i ndiaidh 657A:

“657B.— (1) San alt seo—

ciallaíonn ‘pearsa aonair shonraithe’ pearsa aonair a dhéanann, sa bhliain mheasúnachta 2007 nó in aon bhliain mheasúnachta dá héis, trádáil feirmeoireachta a sheoladh ar ina leith a thagann an phearsa faoi réim an mhuirir i leith cánach faoi Chás I de Sceideal D;

ciallaíonn ‘íocaíocht shonraithe’ íocaíocht le pearsa aonair shonraithe faoi scéim shealadach an AE maidir le hathstruchtúrú an tionscail siúcra sa Chomhphobal, ar scéim í arna hoibriú ag an Roinn Talmhaíochta agus Bia faoi Airteagal 3(6), an chéad fhleasc, de Rialachán CE Uimh. 320/2006 an 20 Feabhra 2006 ón gComhairle³ agus ar ina leith a bheadh an phearsa aonair, ar leith ón alt seo, inmhuirearaithe i leith cánach ioncaim ar na brabúis nó na gnóchain ó fheirmeoireacht don bhliain mheasúnachta 2007 nó d’aon bhliain mheasúnachta dá héis.

(2) Féadfaidh pearsa aonair shonraithe, maidir le comhiomlán na n-íocaíochtaí sonraithe go léir leis an bpearsa aonair shonraithe, ar íocaíochtaí iad a bheadh, ar leith ón alt seo, inmhuirearaithe i leith cánach ioncaim do bhliain chánach, a roghnú go ndéileálfar leis de réir fho-ailt (3) go (6), agus déanfar gach roghnú den sórt sin i cibé foirm, agus beidh cibé faisnéis ann, a éileoidh na Coimisinéirí Ioncaim.

(3) D’ainneoin aon fhorála eile de na hAchtanna Cánach Ioncaim, ar leith ó fho-alt (4), i gcás ina ndéanann pearsa aonair roghnú de réir fho-alt (2), déanfar neamhshuim den íocaíocht shonraithe nó de na híocaíochtaí sonraithe maidir leis an mbliain mheasúnachta dá dtagraítear i bhfo-alt (2) agus, ina ionad sin, déileálfar leo chun críocha na nAchtanna Cánach Ioncaim mar íocaíocht nó mar íocaíochtaí atá inmhuirearaithe i dtráthchodanna comhionanna don bhliain mheasúnachta dá dtagraítear amhlaidh i bhfo-alt (2) agus do na 5 bliana measúnachta ina dhiaidh sin.

(4) I gcás ina scoirtear go buan de thrádáil feirmeoireachta, déanfar cáin a mhuirearú faoi Chás IV de Sceideal D don bhliain mheasúnachta ina dtarlaíonn an scor sin i leith an méid d’aon íocaíocht shonraithe a ndéileálfaí léi, murach an scor sin, de bhua fho-alt (3), mar íocaíocht atá inmhuirearaithe do bhliain mheasúnachta nó do bhlianta measúnachta dar críoch dáta tar éis an scoir sin.

(5) Maidir le roghnú, faoi fho-alt (2), ag pearsa aonair lena mbaineann an t-alt seo, déanfar é trí fhógra i scríbhinn an 31 Deireadh Fómhair, nó roimhe, sa bhliain mheasúnachta tar éis na bliana measúnachta dá dtagraítear i bhfo-alt (2).

(6) Faoi réir fho-alt (4), ní dhéanfar roghnú arna dhéanamh faoi fho-alt (2) a athrú le linn na tréimhse lena mbaineann sé.”.

24 .— (1) Leasaítear Caibidil 2 de Chuid 23 den Phríomh-Acht—

(a) in alt 666(4), trí “31 Nollaig 2008” a chur in ionad “31 Nollaig 2006” i mír (a) agus “an bhliain 2008” a chur in ionad “an bhliain 2006” i mír (b),

(b) in alt 667A, trí “31 Nollaig 2008” a chur in ionad “31 Nollaig 2006” i bhfo-alt (6)(b), agus

(c) tríd an alt nua seo a leanas a chur isteach i ndiaidh alt 667A:

“Socruithe nua d’fheirmeoirí cáilitheacha.

667B.— (1) San alt seo ciallaíonn ‘feirmeoir cáilitheach’ pearsa aonair—

(a) a chéadcháilíonn, sa bhliain 2007 nó in aon bhliain mheasúnachta dá héis, i gcomhair cúnaimh deontais faoin scéim um Chúnamh Suiteála le haghaidh Feirmeoirí Óga atá á hoibriú ag an Roinn Talmhaíochta agus Bia faoi Rialachán (CEE) Uimh. 797/85 an 12 Márta⁴ ón gComhairle nó faoin Rialachán sin arna leasú ó am go ham, nó

(b) (i) a thagann chun bheith inmhuirearaithe den chéad uair i leith cánach ioncaim faoi Chás I de Sceideal D maidir le brabúis nó gnóchain ó thrádáil na feirmeoireachta don bhliain 2007 nó d’aon bhliain mheasúnachta dá héis,

(ii) nach mbeidh 35 bliana d’aois slánaithe aige nó aici i dtosach na bliana measúnachta dá dtagraítear i bhfomhír (i), agus

(iii) a chomhlíonann na coinníollacha atá leagtha amach i bhfo-alt (2) nó (3) aon tráth sa bhliain mheasúnachta dá dtagraítear amhlaidh.

(2) Is iad na coinníollacha a cheanglaítear leis an bhfo-alt seo ná go bhfuil an phearsa aonair, dá dtagraítear sa mhíniú ar ‘feirmeoir cáilitheach’ i bhfo-alt (1), ina shealbhóir nó ina sealbhóir ar cháilíocht atá leagtha amach sa Tábla a ghabhann leis an alt seo (dá ngairtear ‘an Tábla’ san alt seo).

(3) Is iad na coinníollacha a cheanglaítear leis an bhfo-alt seo ná go bhfuil an phearsa aonair, dá dtagraítear sa mhíniú ar ‘feirmeoir cáilitheach’ i bhfo-alt (1), ina shealbhóir nó ina sealbhóir ar litir deimhnithe ó Theagasc á dheimhniú gur críochnaíodh cúrsa oiliúna go sásúil ar chúrsa é, arna cheadú ag Teagasc, do dhaoine a bhfuil, i dtuairim Theagaisc, a gcumas foghlama srianta mar gheall ar mhíchumas coirp, céadfa nó intleachtúil nó mar gheall ar mheabhair-shláinte.

(4) Chun críocha fho-alt (2), i gcás ina ndeimhneoidh Teagasc—

(a) go bhfreagraíonn aon cháilíocht eile do cháilíocht atá leagtha amach sa Tábla, agus

(b) go measann Údarás Náisiúnta Cáilíochtaí na hÉireann an cháilíocht eile sin a bheith ar a laghad ag leibhéal comhionann le leibhéal na cáilíochta atá leagtha amach sa Tábla,

ansin déileálfar leis an gcáilíocht eile sin amhail is dá mba í an cháilíocht atá leagtha amach sa Tábla í.

(5) I gcás feirmeora cháilithigh—

(a) beidh feidhm ag alt 666(1) amhail is dá gcuirfí ‘100 faoin gcéad’ in ionad ‘25 faoin gcéad’, agus

(b) beidh feidhm ag mír (a) le linn brabúis thrádála duine do thréimhse chuntasaíochta a ríomh i gcás pearsan aonair a thagann chun bheith ina fheirmeoir nó ina feirmeoir cáilitheach aon tráth sa tréimhse dar tús an 1 Eanáir 2007 nó dá éis agus dar críoch an 31 Nollaig 2008 nó roimhe, don bhliain mheasúnachta ina dtagann an phearsa aonair chun bheith ina fheirmeoir nó ina feirmeoir cáilitheach agus do gach bliain de na 3 bliana measúnachta díreach ina dhiaidh sin.

(6) Aon phearsa aonair a chomhlíonann, aon tráth roimh an 31 Márta 2008, na coinníollacha dá dtagraítear i mír (b)(iii) den mhíniú ar ‘feirmeoir cáilitheach’ in alt 667A(1), measfar go gcomhlíonann sé nó sí na coinníollacha dá dtagraítear i mír (b)(iii) den mhíniú ar ‘feirmeoir cáilitheach’ i bhfo-alt (1).

AN TÁBLA

1. Cáilíochtaí arna ndámhachtain ag Comhairle na nDámhachtainí Breisoideachais agus Oiliúna:

(a) Ardteastas Leibhéal 6 san Fheirmeoireacht;

(b) Ardteastas Leibhéal 6 sa Talmhaíocht;

(c) Ardteastas Leibhéal 6 sa Bhainistíocht Tréad Déiríochta;

(d) Ardteastas Leibhéal 6 sa Bhainistíocht Stoic Thirim;

(e) Ardteastas Leibhéal 6 sa Mheicniú Talmhaíochta;

(f) Ardteastas Leibhéal 6 sa Bhainistíocht Feirme;

(g) Ardteastas Leibhéal 6 sa Bhainistíocht Innealra agus Barr;

(h) Ardteastas Leibhéal 6 sa Ghairneoireacht;

(i) Ardteastas Leibhéal 6 san Fhoraoiseacht;

(j) Ardteastas Leibhéal 6 sa Bhainistíocht Graíona;

(k) Ardteastas Leibhéal 6 san Eachaíocht.

2. Cáilíochtaí arna ndámhachtain ag Comhairle na nDámhachtainí Ardoideachais agus Oiliúna:

(a) Ardteastas sa Talmhaíocht;

(b) Baitsiléir Eolaíochta sa Talmhaíocht;

(c) Ardteastas san Eolaíocht Talmhaíochta;

(d) Baitsiléir Eolaíochta san Eolaíocht Talmhaíochta;

(e) Baitsiléir Eolaíochta (Onóracha) sa Bhainistíocht Talún, Talmhaíocht;

(f) Baitsiléir Eolaíochta (Onóracha) sa Bhainistíocht Talún, Gairneoireacht;

(g) Baitsiléir Eolaíochta (Onóracha) sa Bhainistíocht Talún, Foraoiseacht;

(h) Ardteastas san Innealtóireacht sa Mheicniú Talmhaíochta;

(i) Baitsiléir Eolaíochta san Fhiontraíocht Tuaithe agus san Agra-Ghnó;

(j) Baitsiléir Eolaíochta sa Talmhaíochta agus sa Bhainistíocht Timpeallachta;

(k) Baitsiléir Eolaíochta sa Ghairneoireacht;

(l) Baitsiléir Ealaíon (Onóracha) sa Bhainistíocht Ghairneoireachta;

(m) Baitsiléir Eolaíochta san Fhoraoiseacht;

(n) Ardteastas sa Ghnó i Staidéir Eachaí;

(o) Baitsiléir Eolaíochta sa Ghnó i Staidéir Eachaí.

3. Cáilíochtaí arna ndámhachtain ag forais eile tríú leibhéal:

(a) Baitsiléir Eolaíochta Talmhaíochta — Táirgeadh Barr Ainmhithe arna dhámhachtain ag Coláiste Ollscoile Bhaile Átha Cliath;

(b) Baitsiléir Eolaíochta Talmhaíochta — Eolaíocht Ainmhithe arna dhámhachtain ag Coláiste Ollscoile Bhaile Átha Cliath;

(c) Baitsiléir Eolaíochta Talmhaíochta — Bainistíocht Bhia agus Agra-Ghnó arna dhámhachtain ag Coláiste Ollscoile Bhaile Átha Cliath;

(d) Baitsiléir Eolaíochta Talmhaíochta — Foraoiseacht arna dhámhachtain ag Coláiste Ollscoile Bhaile Átha Cliath;

(e) Baitsiléir Eolaíochta Talmhaíochta — Bainistíocht Ghairneoireachta, Tírdhreacha agus Fóid Spórt arna dhámhachtain ag Coláiste Ollscoile Bhaile Átha Cliath;

(f) Baitsiléir Tréidliachta arna dhámhachtain ag Coláiste Ollscoile Bhaile Átha Cliath;

(g) Baitsiléir Eolaíochta san Eolaíocht Eachaí arna dhámhachtain ag Ollscoil Luimnigh;

(h) Dioplóma san Eolaíocht Eachaí arna dhámhachtain ag Ollscoil Luimnigh.”.

(2) Tagann fo-alt (1) i ngníomh tar éis don Aire Airgeadais ordú a dhéanamh chuige sin.

25 .— Leasaítear alt 669A den Phríomh-Acht sa mhíniú ar “caiteachas cáilitheach” tríd an méid seo a leanas a chur in ionad mhír (b)(ii):

“(ii) méid an chaiteachais chaipitiúil a thabhófaí ar cheannach an chuóta bainne sin dá mba rud é go ndearnadh an praghas a íocadh a shocrú ar shlí seachas ag an Aire Talmhaíochta agus Bia chun críocha Scéime Athstruchtúraithe Cuótaí Bainne sa limistéar ina bhfuil an talamh lena mbaineann an cuóta bainne sin suite;”.

26 .— (1) Leasaítear an Príomh-Acht—

(a) in alt 381, tríd an méid seo a leanas a chur isteach i ndiaidh fho-alt (2):

“(2A) Scoirfidh fo-alt (2) d’éifeacht a bheith leis maidir le caillteanais a éiríonn an 1 Lúnasa 2008 nó dá éis agus, maidir leis an tréimhse inmhuirearaithe ina mbeidh an 1 Lúnasa 2008, déanfar méid na gcaillteanas sin a chinneadh de réir na foirmle—

A x B

C

más rud é—

gurb é A méid iomlán na gcaillteanas a éiríonn sa tréimhse inmhuirearaithe,

gurb é B fad na tréimhse dar tús an 1 Lúnasa 2008 agus dar críoch an lá deireanach den tréimhse inmhuirearaithe ina mbeidh an 1 Lúnasa 2008, arna ríomh ina laethanta, agus

gurb é C fad na tréimhse inmhuirearaithe arna ríomh ina laethanta.”,

agus

(b) tríd an gCaibidil seo a leanas a chur isteach i gCuid 23 i ndiaidh Chaibidil 3:

“Caibidil 4

Cánachas ar bhrabúis agus ar ghnóchain ó staileanna

Léiriú (Caibidil 4).

669G.— Sa Chaibidil seo—

tá le ‘faoiseamh barrachais’ an bhrí chéanna atá leis in alt 485C;

ciallaíonn ‘luach tosaigh’ i ndáil le stail a margadhluach—

(a) ar an 1 Lúnasa 2008, agus

(b) ar an lá a fhaightear i gcomhair gníomhaíochtaí graí í, nó a leithreasaítear chuig gníomhaíochtaí graí í, de réir mar a bheidh,

cibé acu is déanaí, agus folaíonn aon tagairt do stail tagairt do leas i stail;

ciallaíonn ‘margadhluach’, aon tráth i ndáil le stail, an praghas a mbeifí ag súil leis go réasúnach a gheofaí ar an stail ar í a dhíol ar an margadh oscailte agus i gcás ina bhfaigheann duine (‘an ceannaitheoir’) an stail ó dhuine eile (‘an díoltóir’)—

(a) ar neamhthuilleamaí, agus

(b) nach daoine bainteacha (de réir bhrí alt 10) iad an ceannaitheoir agus an díoltóir,

ansin is é an margadhluach an praghas a íocadh;

ciallaíonn ‘méid iomchuí’, i ndáil le bliain mheasúnachta agus pearsa aonair, méid arna chinneadh de réir na foirmle—

A — B

más rud é—

gurb é A an méid cánach ioncaim is iníoctha ag an bpearsa aonair don bhliain mheasúnachta, agus

gurb é B an méid cánach ioncaim ab iníoctha ag an bpearsa aonair don bhliain mheasúnachta dá mba rud é—

(a) nach n-achtófaí an iontráil ag Uimhir Thagartha 6 de Sceideal 25B, agus

(b) chun críocha na hiontrála ag Uimhir Thagartha 1 de Sceideal 25B, nach mbeadh brabúis nó gnóchain nár muirearaíodh cáin orthu de bhua alt 231 san áireamh sa mhíniú ar ‘brabúis dhíolmhaithe’ in alt 140(1);

ciallaíonn ‘faoiseamh barrachais iomchuí’, i ndáil le bliain mheasúnachta agus le pearsa aonair, méid arna chinneadh de réir na foirmle—

C — D

más rud é—

gurb é C an méid faoisimh barrachais a thugtar ar aghaidh chun na chéad bhliana measúnachta eile agus a bhfuil an phearsa aonair i dteideal é a asbhaint as a ioncam nó as a hioncam iomlán don bhliain sin, agus

gurb é D an méid faoisimh barrachais a thabharfaí ar aghaidh chun na chéad bhliana measúnachta eile agus a mbeadh an phearsa aonair i dteideal é a bhaint as a ioncam nó as a hioncam iomlán don bhliain sin dá mba rud é—

(a) nach n-achtófaí an taifead ag Uimhir Thagartha 6 de Sceideal 25B, agus

(b) chun críocha na hiontrála ag Uimhir Thagartha 1 de Sceideal 25B, nach mbeadh brabúis nó gnóchain nár muirearaíodh cáin orthu de bhua alt 231 san áireamh sa mhíniú ar ‘brabúis dhíolmhaithe’ in alt 140(1);

ciallaíonn ‘iarmharluach’, aon tráth, i ndáil le stail—

(a) méid atá comhionann le luach tosaigh na staile, nó

(b) más lú ná an méid sin é, an méid ar mó luach tosaigh na staile ná—

(i) an méid a lamháladh mar asbhaint faoi alt 669I do thréimhse inmhuirearaithe a chríochnaíonn roimh an tráth sin, nó

(ii) i gcás níos mó ná méid amháin den sórt sin a bheith ann, comhiomlán na méideanna sin.

Forálacha maidir le muirearú.

669H.— (1) Maidir leis na brabúis nó na gnóchain a éiríonn in aon tréimhse inmhuirearaithe chuig úinéir nó páirtúinéir staile ó staileáil láracha ag an stail nó cearta chun na staileála sin a dhíol, beidh siad inmhuirearaithe i leith cánach ioncaim nó cánach corparáide, de réir mar a bheidh, de réir fho-alt (2).

(2) (a) I gcás ina ndéanann úinéir nó páirtúinéir staile trádáil na feirmeoireachta, ar ina leith a thagann an t-úinéir nó an páirtúinéir faoi réim muirir cánach faoi Chás I de Sceideal D, a sheoladh sa tréimhse inmhuirearaithe dá dtagraítear i bhfo-alt (1), beidh na brabúis nó na gnóchain dá dtagraítear i bhfo-alt (1) agus aon mhéid is inmhuirearaithe faoi fho-alt (3)(c) d’alt 669I inmhuirearaithe faoin gCás sin den Sceideal sin mar chuid den trádáil sin.

(b) I gcás seachas cás dá dtagraítear i mír (a), beidh na brabúis nó na gnóchain dá dtagraítear i bhfo-alt (1) agus aon mhéid is inmhuirearaithe faoi fho-alt (3)(c) d’alt 669I inmhuirearaithe faoi Chás IV de Sceideal D.

Forálacha maidir le hasbhaintí.

669I.— (1) I gcás ina bhfaigheann aon duine úinéireacht nó páirtúinéireacht ar stail, a bhfuil na brabúis nó na gnóchain i ndáil léi inmhuirearaithe de réir alt 669H(2), ansin, le linn an méid ioncaim a ríomh atá le muirearú i leith cánach faoi na hAchtanna Cánach d’aon tréimhse inmhuirearaithe, ní bheidh an duine sin i dteideal, seachas de réir fho-alt (2), aon asbhaint a fháil i leith caiteachais arna thabhú ar an úinéireacht nó ar an bpáirtúinéireacht sin a fháil.

(2) (a) I gcás ina bhfuil na brabúis nó na gnóchain dá dtagraítear i bhfo-alt (1) inmhuirearaithe de réir alt 669H(2)(a), do gach ceann de 4 thréimhse inmhuirearaithe chomhleanúnacha, a dtosaíonn an chéad cheann díobh leis an tréimhse inmhuirearaithe—

(i) ina bhfuil an 1 Lúnasa 2008, i gcás an stail a bheith ar úinéireacht nó ar pháirtúinéireacht an lá sin, nó

(ii) in aon chás eile, ina bhfaightear an stail le haghaidh gníomhaíochtaí graí, nó ina leithreasaítear an stail le haghaidh gníomhaíochtaí graí, de réir mar a bheidh,

beidh úinéir nó páirtúinéir na staile, le linn ioncam trádála na trádála feirmeoireachta dá dtagraítear san alt sin a ríomh chun críocha cánach, i dteideal asbhainte faoin alt seo ar asbhaint í atá comhionann le 25 faoin gcéad de luach tosaigh na staile, amhail is dá mba rud é gur chaiteachas trádála an asbhaint arna thabhú sa tréimhse inmhuirearaithe.

(b) Faoi réir alt 669K(3), i gcás ina bhfuil na brabúis nó na gnóchain dá dtagraítear i bhfo-alt (1) inmhuirearaithe de réir alt 669H(2)(b), le linn an méid ioncaim atá le muirearú i leith cánach faoi Chás IV de Sceideal D a chinneadh, déanfar an t-ioncam sin a ríomh de réir na bhforálacha is infheidhme maidir le Cás I de Sceideal D, agus an Chaibidil seo á cur i gcuntas.

(3) Más rud é, in aon tréimhse inmhuirearaithe, go ndiúscraítear stail lena mbaineann an Chaibidil seo nó go bhfaigheann stail lena mbaineann an Chaibidil seo bás, ansin—

(a) ní lamhálfar aon asbhaint, a lamhálfaí thairis sin faoi fho-alt (2)(a) nó (2)(b), de réir mar a bheidh, i leith luach tosaigh na staile sin don tréimhse inmhuirearaithe sin nó d’aon tréimhse inmhuirearaithe dá éis sin,

(b) déanfar asbhaint de mhéid atá comhionann le hiarmharluach na staile tráth a diúscartha nó a báis a lamháil don tréimhse inmhuirearaithe sin amhail is dá mba rud é gur asbhaint faoi fho-alt (2)(a) í, agus

(c) beidh úinéir nó páirtúinéir na staile inmhuirearaithe i leith cánach ioncaim nó cánach corparáide, de réir mar a bheidh—

(i) ar an méid a fuarthas in airgead nó luach airgid, i leith dhiúscairt nó bhás na staile, nó

(ii) i gcás diúscartha, más mó é, ar an bpraghas a mbeifí ag súil leis go réasúnach a gheofaí ar an stail tráth a diúscartha ar dhíol, ar neamhthuilleamaí idir daoine nach bhfuil bainteach lena chéile (de réir bhrí alt 10), ar an margadh oscailte.

Creidmheas i leith cánach a íocadh.

669J.— (1) Faoi réir fhorálacha an ailt seo, maidir le haon phearsa aonair lena mbaineann Caibidil 2A de Chuid 15 d’aon bhliain mheasúnachta agus a mbeidh íocaíocht déanta aige nó aici a bhfuil méid iomchuí san áireamh inti i leith na bliana measúnachta sin, measfar, gan dochar don íocaíocht arna déanamh amhlaidh, íocaíocht a bheith déanta aige nó aici ar chuntas cánach ioncaim ar íocaíocht í atá comhionann leis an méid iomchuí.

(2) Maidir leis an oiread sin d’íocaíocht cánach ó phearsa aonair (dá ngairtear ‘an íocaíocht a mheastar a bheith déanta ar chuntas cánach’ san alt seo) do bhliain mheasúnachta a ndéileáiltear leis de réir fho-alt (1), déanfar é a fhritháireamh, a mhéid is féidir, i gcoinne aon dliteanais de chuid na pearsan aonair i leith cánach ioncaim, don bhliain mheasúnachta tar éis na bliana measúnachta céadluaite.

(3) A mhéid nach mbeifear tar éis an íocaíocht a mheastar a bheith íoctha ar chuntas cánach a fhritháireamh de réir fho-alt (2), déanfar an t-iarmhéid a bheidh fágtha a fhritháireamh i gcoinne dliteanais i leith cánach ioncaim d’aon bhliain mheasúnachta ina dhiaidh sin de chuid na pearsan aonair a ndéileáiltear leis nó léi mar dhuine a rinne an íocaíocht, san ord go ndéanfar é a fhritháireamh i gcoinne dliteanais i leith tréimhse is luaithe i dtosaíocht ar dhliteanas i leith tréimhse is déanaí.

(4) Ní fhéadfar aon mhéid a aisíoc ach amháin barrachas ró-íocaíochta cánach ioncaim d’aon bhliain mheasúnachta thar an íocaíocht a mheastar a bheith íoctha ar chuntas cánach atá le déanamh don bhliain mheasúnachta sin de bhua an ailt seo, agus ní bheidh ús iníoctha i leith aon chuid den ró-íocaíocht sin seachas an barrachas.

(5) Más rud é, in aon bhliain mheasúnachta, go mbeidh feidhm ag alt 485E maidir le pearsa aonair, ansin chun críocha alt 485F déanfar an faoiseamh barrachais don bhliain a laghdú de mhéid atá comhionann le méid an fhaoisimh barrachais iomchuí.

Ilghnéitheach (Caibidil 4).

669K.— (1) Chun margadhluach staile lena mbaineann an Chaibidil seo a chinneadh, féadfaidh na Coimisinéirí Ioncaim dul i gcomhairle le cibé duine nó comhlacht daoine is dóigh leo a d’fhéadfadh cabhrú leo.

(2) D’ainneoin aon fhorálacha eile de na hAchtanna Cánach, chun críocha uile alt 666, déanfar neamhshuim de stoc trádála arb é atá ann staileanna.

(3) I gcás ina dtarlaíonn caillteanas, in aon tréimhse inmhuirearaithe, de thoradh ar ríomh an mhéid d’ioncam duine atá le muirearú i leith cánach faoi Chás IV de Sceideal D faoin gCaibidil seo, ansin, d’ainneoin alt 383, ní fhéadfar méid an chaillteanais a asbhaint as ioncam eile a mhuirearaítear i leith cánach faoi Chás IV de Sceideal D agus a éiríonn sa tréimhse inmhuirearaithe sin, nó a fhritháireamh i gcoinne an ioncaim sin, ná ní fhéadfar aon chaillteanas, nuair a thugtar ar aghaidh é go dtí tréimhse inmhuirearaithe dá éis sin, a asbhaint ach amháin as ioncam lena mbaineann alt 669H(2)(b) agus a éiríonn sa tréimhse inmhuirearaithe sin dá éis sin, nó a fhritháireamh i gcoinne an ioncaim sin.”.

(2) Tagann fo-alt (1) i ngníomh tar éis don Aire Airgeadais ordú a dhéanamh chuige sin.

27 .— (1) Leasaítear Sceideal 26A a ghabhann leis an bPríomh-Acht—

(a) i gCuid 1—

(i) trí “sa Stát” a scriosadh gach áit a bhfuil sé i míreanna 3 go 7, agus

(ii) trí mhíreanna 8 go 16, agus mír 18, a scriosadh,

agus

(b) i gCuid 2, tríd an méid seo a leanas a chur in ionad an mhínithe ar “comhlacht ceadaithe” i mír 1:

“ciallaíonn ‘comhlacht ceadaithe’ aon chomhlacht nó institiúid a bheidh ceadaithe ag an Aire Airgeadais agus ar comhlacht é nó institiúid í—

(a) a sholáthraíonn aon chúrsa a mbaineann ceann dá choinníollacha iontrála le torthaí Scrúdú na hArdteistiméireachta, scrúdú máithreánach de chuid ollscoile aitheanta sa Stát nó scrúdú comhionann a sheoltar lasmuigh den Stát, nó

(b) (i) atá bunaithe ar bhonn buan d’aon toisc chun ábhar ceadaithe amháin nó níos mó a chur ar aghaidh,

(ii) a thugann cabhair maidir le cur ar aghaidh an ábhair nó na n-ábhar sin ar bhonn náisiúnta nó réigiúnach, agus

(iii) atá toirmiscthe, de réir a bhunreachta nó a bunreachta, ó aon sócmhainní nó brabúis dá chuid nó dá cuid a dháileadh ar a chomhaltaí;”.

(2) Tá feidhm ag fo-alt (1) amhail ar an agus ón 1 Feabhra 2007.

28 .— (1) Leasaítear Cuid 9 den Phríomh-Acht―

(a) in alt 268―

(i) i bhfo-alt (3A)

(I) trí “Faoi réir fho-ailt (3B) go (3E), san alt seo” a chur in ionad “San alt seo”, agus

(II) tríd an méid seo a leanas a chur in ionad fhomhír (i) de mhír (d):

“(i) léasaithe le duine agus, de réir mar a bheidh, arb é nó arb í céile an duine sin―

(I) duine atá nó, de réir mar a bheidh, nach bhfuil bainteach (de réir bhrí alt 10) leis an léasóir,

(II) duine nó daoine a bheidh roghnaithe mar áititheoir nó mar átitheoirí an tí ag an dteach banaltrais cláraithe, agus

(III) go mbeidh duine a bheidh cláraithe i gClár Ginearálta na Lia-Chleachtóirí tar éis a dheimhniú gur gá cóiríocht den sórt sin don duine nó do chéile an duine mar gheall ar sheanaois nó éiglíocht,

nó”,

(ii) tríd an méid seo a leanas a chur in ionad fho-alt (3B):

“(3B) (a) Chun críocha an ailt seo tá le ‘teach’, i ndáil le haonad cónaithe cáilitheach, an bhrí chéanna atá leis in alt 372AK.

(b) Ach amháin chun críocha liúntais agus muirir a dhéanamh faoin gCuid seo agus faoi réir fho-alt (3C) agus ailt 270 agus 316 ( arna leasú leis an Acht Airgeadais 2007), i ndáil le caiteachas a thabhófar sa tréimhse dar tosach an 25 Márta 2002 agus dar críoch an 30 Aibreán 2010, measfar gur foirgneamh a bheidh á úsáid chun críocha trádála dá dtagraítear i bhfo-alt (1)(g) foirgneamh a bheidh á úsáid mar aonad cónaithe cáilitheach.”,

agus

(iii) tríd an méid seo a leanas a chur isteach i ndiaidh fho-alt (3C):

“(3D) I gcás ina mbeidh an leas iomchuí i ndáil le caiteachas caipitiúil a thabhaítear ar na haonaid cónaitheacha cáilitheacha uile i bhforbairt á shealbhú ag cuideachta (de réir bhrí alt 4(1)) ansin beidh feidhm ag fo-alt (3A) amhail is dá ndéanfaí fomhíreanna (iv) agus (v) den fho-alt sin a scriosadh.

(3E) Ní bheidh teach ina aonad cónaitheach cáilitheach chun críocha an ailt seo mura rud é―

(a) go mbeidh an duine atá i dteideal an leasa iomchuí i ndáil leis an gcaiteachas caipitiúil a thabhaítear ar fhoirgniú nó ar athfheistiú an tí, lena tharchur ar aghaidh chuig an Aire Sláinte agus Leanaí agus an Aire Airgeadais:

(i) méid an chaiteachais chaipitiúil a tabhaíodh iarbhír ag foirgniú nó ag athfheistiú an tí;

(ii) líon agus cineál na n-infheisteoirí atá ag infheistiú sa teach;

(iii) an méid a bheidh le hinfheistiú ag gach infheisteoir; agus

(iv) cineál na struchtúr atá á mbunú chun infheistíocht sa teach a éascú,

mar aon le cibé faisnéis eile a shonróidh an tAire Airgeadais, i gcomhairle leis an Aire Sláinte agus Leanaí, go mbeidh sé ina chúnamh i gcostais, lena n-áirítear costais státchiste ach gan bheith teoranta dóibh, agus na sochair a eascróidh as faoiseamh cánach faoin gCuid seo a oibriú d’aonaid chónaitheacha cáilitheacha a mheas,

(b) go n-eiseoidh Feidhmeannacht na Seirbhíse Sláinte, i gcomhairle leis an Aire Sláinte agus Leanaí, deimhniú i scríbhinn, tar éis go léasaítear an teach i gcéaduair nó, i gcás inar tabhaíodh caiteachas caipitiúil ar theach a athfheisitiú, go léasaítear an teach i gcéaduair tar éis an caiteachas sin a thabhú ina ndeir sí gur deimhin léi―

(i) go gcomhlíonann an teach agus an fhorbairt ina bhfuil sé na coinníollacha uile a luaitear i míreanna (a), (b), (c) agus (d) d’fho-alt (3A), agus

(ii) gur soláthraíodh an fhaisnéis a éilítear de réir mhír (a) den fho-alt seo,

agus

(c) go soláthróidh an duine atá i dteideal an leasa iomchuí i ndáil le caiteachas caipitiúil a tabhaíodh ar an dteach a fhoirgniú nó a athfheistiú tuarascáil bhliantúil i scríbhinn d’Fheidhmeannacht na Seirbhíse Sláinte, lena tarchur ar aghaidh chuig an Aire Sláinte agus Leanaí agus chuig an Aire Airgeadais,faoi dheireadh gach bliana sa tréimhse 20 bliain dá dtagraítear in alt 272(4)(fa) (a cuireadh isteach leis an Acht Airgeadais 2007),

(i) a dhearbhaíonn go leanann nó nach leanann an teach agus an fhorbairt ina bhfuil sé de na coinníollacha uile a luaitear i míreanna (a), (b), (c) agus (d) d’fho-alt (3A) a chomhlíonadh, agus

(ii) a sholáthraíonn sonraí maidir le leibhéal áitithe an tí don bhliain roimhe sin lena n-áirítear aois na n-áititheoirí agus, de réir mar a bheidh, cineál éiglíocht na n-áititheoirí.”,

(b) in alt 270 tríd an méid seo a leanas a chur isteach i ndiaidh fho-alt (7):

“(8) I gcás ina dtabhaítear caiteachas an 1 Bealtaine 2007 nó dá eis faoi chonradh nó comhaontú a dhéanfar an dáta sin nó dá éis chun aonad cónaithe cáilitheach dá dtagraítear i bhfo-alt (4)(i) a fhoirgniú, a athfheistiú nó a fhorbairt, ansin―

(a) beidh feidhm ag fo-alt (4) amhail is dá mba thagairt do ‘31 Iúil 2010’ an tagairt do ‘31 Iúil 2008’,

(b) beidh feidhm ag fo-alt (5) amhail is―

(i) dá mba thagairt do ‘faoi réir fho-ailt (6) go (8)’ an tagairt do ‘faoi réir fho-alt (6) agus (7)’, agus

(ii) dá gcuirfí na míreanna seo a leanas in ionad mhíreanna (a) agus (b):

‘(a) i gcás caiteachas a thabhóidh cuideachta (de réir bhrí alt 4(1)) sa tréimhse ón 1 Bealtaine 2007 go 30 Aibreán 2010, go dtí 75 faoin gcéad, agus

(b) i gcás caiteachas a thabhóidh duine seachas cuideachta (de réir bhrí alt 4(1)) sa tréimhse ón 1 Bealtaine 2007 go 30 Aibreán 2010, go dtí 50 faoin gcéad,’,”,

(c) in alt 272(4)―

(i) i mír (f), trí “faoi réir mhír (fa),” a chur isteach roimh “i ndáil le”, agus

(ii) tríd an mír seo a leanas a chur isteach i ndiaidh mhír (f):

“(fa) i gcás ina mbeidh feidhm ag fo-alt (8) d’alt 270 i ndáil le haonad cónaithe cáilitheach dá dtagraítear i bhfo-alt (4)(i) den alt sin―

(i) 20 bliain dar tosach an tráth ar úsáideadh an t-aonad i gcéaduair, nó

(ii) i gcás ina dtabhaítear caiteachas caipitiúil ar an aonad a athfheistiú, 20 bliain dar tosach an tráth ar úsáideadh an t-aonad i gcéaduair tar éis gur tabhaíodh an caiteachas sin,”,

(d) in alt 274(1)(b)―

(i) i bhfomhír (iia), trí “faoi réir fhomhír (iib) a chur isteach roimh “i ndáil le”, agus

(ii) tríd an bhfomhír seo a leanas a chur isteach i ndiaidh fhomhír (iia):

“(iib) i gcás ina mbeidh feidhm ag fo-alt (8) d’alt 270 i ndáil le haonad cónaithe cáilitheach dá dtagraítear i bhfo-alt (4)(i) den alt sin―

(I) 20 bliain tar éis gur úsáideadh an t-aonad i gcéaduair, nó

(II) i gcás ina dtabhaítear caiteachas caipitiúil ar an aonad a athfheistiú, 20 bliain dar tosach an tráth ar úsáideadh an t-aonad i gcéaduair tar éis gur tabhaíodh an caiteachas sin,”,

agus

(e) in alt 316(2B)―

(i) trí “nó” a scriosadh i ndeireadh mhír (b) agus “31 Iúil 2008, nó” a chur in ionad “31 Iúil 2008,” i mír (c), agus

(ii) tríd an mír seo a leanas a chur isteach i ndiaidh mhír (c):

“(d) i gcás ina mbeidh feidhm ag fo-alt (8) d’alt 270 i ndáil le haonad cónaithe cáilitheach dá dtagraítear i bhfo-alt (4)(i) den alt sin, an tréimhse ón 1 Bealtaine 2007 go 30 Aibreán 2010,”.

(2) Tá feidhm ag fo-alt (1) den alt seo maidir le caiteachas caipitiúil arna thabhú an 1 Bealtaine 2007 nó dá éis faoi chonradh nó faoi chomhaontú a dhéantar an dáta sin nó dá éis chun aonad cónaithe cáilitheach (de réir bhrí alt 268(3A) den Phríomh-Acht) a fhoirgniú, a athfheistiú nó a fhorbairt.”.

29 .— (1) Leasaítear an Príomh-Acht—

(a) i gCuid 10, tríd an méid seo a leanas a chur isteach i ndiaidh Chaibidil 11:

“Caibidil 12

Scéim Infheistíochta Bonneagair Turasóireachta Chonair na Sionainne Láir

Léiriú, iarratais ar cheadú agus ar dheimhniú.

372AW.— (1) Sa Chaibidil seo—

ciallaíonn ‘ foirgneamh cóiríochta ’, i ndáil le tionscadal, foirgneamh nó déanmhas, nó cuid d’fhoirgneamh nó de dhéanmhas, arb é atá ann saoráidí cóiríochta nó atá le húsáid, nó atá oiriúnach lena úsáid, chun saoráidí den sórt sin a sholáthar;

ciallaíonn ‘ margadhluach ’, i ndáil le foirgneamh nó le déanmhas, an praghas a gheofaí ar fheo simplí neamhualaithe an fhoirgnimh nó an déanmhais dá ndíolfaí é ar an margadh oscailte ar cibé modh agus faoi réir cibé coinníollacha ba dhóigh le réasún a tharraingeodh an praghas ab fhearr ar an bhfoirgneamh nó ar an déanmhas don díoltóir, lúide an chuid den phraghas sin ab inchurtha i leith fháil na talún, nó fháil ceart sa talamh nó thar an talamh, ar a bhfoirgnítear an foirgneamh nó an déanmhas;

ciallaíonn ‘ conair na Sionainne Láir ’ an chonair talún arb é atá inti limistéir cháilitheacha uile na Sionainne Láir;

ciallaíonn ‘Bord Bonneagair Turasóireachta na Sionainne Láir’ bord nach mó ná 5 an líon duine atá air ar daoine iad a roghnóidh an tAire i gcomhairle leis an Aire Airgeadais chun críocha na Caibidle seo;

ciallaíonn ‘ Aire ’ an tAire Ealaíon, Spóirt agus Turasóireachta;

ciallaíonn ‘tionscadal’ foirgniú nó athfheistiú foirgneamh agus déanmhas arb é atá iontu—

(a) campa saoire den chineál dá dtagraítear in alt 372AX(1)(b), nó

(b) saoráid cháilitheach bonneagair turasóireachta amháin nó níos mó,

a bhfuil a suíomh nó a suíomh nó a suímh go hiomlán laistigh de limistéar cáilitheach de chuid na Sionainne Láir;

ciallaíonn ‘forbróir maoine’ duine a sheolann trádáil arb é atá inti, go hiomlán nó go formhór, foirgnimh nó déanmhais a fhoirgniú nó a athfheistiú d’fhonn iad a dhíol;

ciallaíonn ‘limistéar cáilitheach de chuid na Sionainne Láir’ aon limistéar a thuairiscítear i Sceideal 8B;

ciallaíonn ‘tréimhse cháilitheach’ tréimhse 3 bliana dar tosach an dáta a thagann an Chaibidil seo in éifeacht;

ciallaíonn ‘saoráidí cáilitheacha bonneagair turasóireachta’ cibé aicme nó aicmí saoráidí, nach bhfuil iontu ach ach foirgnimh agus déanmhais, de réir mar a cheadóidh an tAire, i gcomhairle leis an Aire Airgeadais, chun críocha na Caibidle seo agus a fhoilseofar sna treoirlínte iomchuí;

ciallaíonn ‘athfheistiú’, i ndáil le foirgneamh nó le déanmhas, aon obair foirgníochta, athfhoirgníochta, deisiúcháin nó athnuachana, lena n-áirítear saoráidí uisce, séarachais nó téacháin a sholáthar nó a fheabhsú, ar nithe iad a dhéantar—

(a) le linn deisiú nó a athréiteach a dhéanamh, nó

(b) le linn cothabháil, de chineál deisithe nó athréitigh, a dhéanamh,

ar an bhfoirgneamh nó ar an déanmhas;

ciallaíonn ‘treoirlínte iomchuí’ treoirlínte arna n-eisiúint de réir fho-alt (3) den alt seo nó aon treoirlínte a eiseofar de réir an fho-ailt sin agus lena leasófar na treoirlínte céadluaite nó a chuirfear in ionad na dtreoirlínte céadluaite.

(2) (a) D’ainneoin ailt 372AX agus 372AY, ach faoi réir na bhforálacha sin ina dhiaidh seo den alt seo agus faoi réir alt 372AZ, ní fhéadfar aon fhaoiseamh ó cháin ioncaim nó ó cháin chorparáide, de réir mar a bheidh, a dheonú de bhua na Caibidle seo i leith caiteachais chaipitiúil a thabhófar sa tréimhse cháilitheach ar fhoirgniú nó ar athfheistiú foirgnimh nó déanmhais, mura rud é, maidir le Bord Bonneagair Turasóireachta na Sionainne Láir—

(i) gur dheonaigh sé ceadú i bprionsabal i ndáil le foirgniú nó athfheistiú an fhoirgnimh nó an déanmhais roimh an gcaiteachas sin a thabhú, ach sin faoi réir mhír (b), agus

(ii) go ndearna sé, tar éis an caiteachas a thabhú, a dheimhniú i scríbhinn, maidir leis an bhfoirgniú nó leis an athfheistiú a rinneadh, go bhfuil sé de réir na gcritéar a shonraítear sna treoirlínte iomchuí, ag féachaint d’aon choinníollacha agus ceanglais iomchuí arna bhforchur ag an mBord sa cheadú arna dheonú faoi fhomhír (i).

(b) Ní dhéanfar ceadú i bprionsabal a dheonú de réir mhír (a)(i) mura rud é go mbeidh iarratas ar cheadú den sórt sin, ina mbeidh an fhaisnéis agus na sonraí is gá de réir fho-alt (3)(h), faighte ag Bord Bonneagair Turasóireachta na Sionainne Láir laistigh de thréimhse bliana dar tosach an dáta a thagann an Chaibidil seo in éifeacht.

(3) Faoi réir fho-alt (4), chun críocha ceadaithe agus deimhnithe de réir fho-alt (2) agus, de réir mar a bheidh, chun críocha deimhnithe de réir fho-alt 372AX(1)(d) nó 372AY(1)(g), déanfaidh an tAire, i gcomhairle leis an Aire Airgeadais, treoirlínte a eisiúint ar a dtabharfaidh Bord Bonneagair Turasóireachta na Sionainne Láir aird le linn dó cinneadh a dhéanamh i dtaobh ceadú i bprionsabal a dheonú nó deimhniú a eisiúint i ndáil le haon fhoirgneamh nó déanmhas agus féadfaidh critéir a bheith san áireamh sna treoirlínte sin i ndáil le gach ceann nó aon cheann áirithe nó níos mó de na nithe seo a leanas—

(a) an chaoi agus an méid a théann an tionscadal, a bhfuil an foirgneamh nó an déanmhas san áireamh ann, chun tairbhe d’fhorbairt na turasóireachta i gconair na Sionainne Láir nó sa limistéar cáilitheach de chuid na Sionainne Láir;

(b) comhréireacht leis an straitéis turasóireachta náisiúnta;

(c) íogaireacht maidir leis an gcomhshaol, ag féachaint go háirithe d’aon limistéar arb é atá ann—

(i) láithreán Eorpach de réir bhrí Rialacháin na gComhphobal Eorpach (Gnáthóga Nádúrtha) 1997 (I.R. Uimh. 94 de 1997), nó

(ii) limistéar oidhreachta nádúrtha, anaclann dúlra nó tearmann fauna chun críocha na nAchtanna um Fhiadhúlra 1976 agus 2000;

(d) na taitneamhachtaí agus na saoráidí is gá a sholáthar i ngach cineál tionscadail;

(e) an cineál foirgneamh cóiríochta (más ann), agus a mhéid ar fad is inlamháilte iad i ngach cineál tionscadail;

(f) caighdeáin shonracha deartha agus foirgníochta i ndáil le foirgnimh agus déanmhais a d’fhéadfadh cáiliú le haghaidh faoisimh faoin gCaibidil seo;

(g) nithe iomchuí a bhaineann le pleanáil, lena n-áirítear an gá le comhréireacht i ndáil le ceanglais plean forbartha nó plean limistéir áitiúil de réir bhrí na dtéarmaí sin san Acht um Pleanáil agus Forbairt 2000;

(h) na sonraí agus an fhaisnéis is gá a sholáthar in iarratas ar cheadú nó ar dheimhniú de réir alt 372AW(2) agus, de réir mar a bheidh, in iarratas ar dheimhniú de réir alt 372AX(1)(d) nó 372AY(1)(g); agus

(i) nithe a bhaineann le soláthar faisnéise de réir ailt 372AX(1)(c) agus 372AY(1)(f),

mar aon le cibé nithe eile a mheasfaidh an tAire, i gcomhairle leis an Aire Airgeadais, is gá a chur ar áireamh.

(4) (a) Faoi réir mhíreanna (b) agus (c), ní dheonóidh ná ní eiseoidh Bord Bonneagair Turasóireachta na Sionainne Láir ceadú ná deimhniú de réir fho-alt (2) i ndáil le caiteachas caipitiúil arna thabhú sa tréimhse cháilitheach ar fhoirgniú nó ar athfheistiú foirgnimh cóiríochta amháin nó níos mó atá ar áireamh i dtionscadal a mhéid atá an caiteachas sin (nó, i gcás iarratas ar cheadú a bheith i gceist, a mhéid a mheasfar roimh ré go bhfuil an caiteachas sin) níos mó ná méid (dá ngairtear ‘an méid teorann’ san fho-alt seo) atá comhionann leis an méid is lú díobh seo a leanas—

(i) 50 faoin gcéad, nó cibé céatadán is ísle a shonrófar (de réir fho-alt (3)(e)) sna treoirlínte iomchuí don chineál tionscadail atá i gceist, de mhéid iomlán an chaiteachais chaipitiúil arna thabhú sa tréimhse cháilitheach ar na foirgnimh nó ar na déanmhais uile a áirítear sa tionscadal a fhoirgniú nó a athfheistiú, agus

(ii) méid an chaiteachais chaipitiúil arna thabhú sa tréimhse cháilitheach ar fhoirgniú nó ar athfheistiú foirgneamh agus déanmhas a áirítear sa tionscadal, ar foirgnimh agus déanmhais iad seachas foirgnimh chóiríochta.

(b) In aon chás—

(i) ina n-áirítear níos mó ná foirgneamh cóiríochta amháin i dtionscadal, agus

(ii) inar mó ná an méid teorann comhiomlán na méideanna caiteachais chaipitiúil arna thabhú sa tréimhse cháilitheach ar gach foirgneamh cóiríochta a fhoirgniú nó a athfheistiú,

ansin, déanfar an comhiomlán sin, chun críocha iarratais ar cheadú nó ar dheimhniú de réir fho-alt (2), a laghdú go méid atá ar cóimhéid leis an méid teorann agus déanfar an cóimhéid sin a chionroinnt ar bhonn cóir réasúnach idir na foirgnimh chóiríochta go léir a áirítear sa tionscadal.

(c) Faoi réir na gcritéar sna treoirlínte iomchuí a chomhlíonadh, ní fhéadfaidh Bord Bonneagair Thurasóireacht na Sionna láir ceadú a dheonú nó deimhniú a eisiúint de réir fho-alt (2) i ndáil le foirgneamh cóiríochta—

(i) i gcás ina bhfuil foirgneamh cóiríochta amháin san áireamh i dtionscadal, ach amháin i ndáil leis an méid den chaiteachas caipitiúil, arna thabhú ar fhoirgniú nó ar athfheistiú an fhoirgnimh sa tréimhse cháilitheach, nach mó ná an méid teorann, agus

(ii) i gcas ina bhfuil feidhm ag mír (b), ar choinníoll go mbeidh sé sásta leis an mbonn ar a ndearnadh an chionroinnt, ach amháin i ndáil leis an gcuid sin den chóiméid (dá dtagraítear i mír (b)) is inchurtha i leith an fhoirgnimh tar éis an chionroinnt a bheith déanta de réir na míre sin.

Liúntais chaipitiúla luathaithe i ndáil le foirgniú nó athfheistiú campaí saoire cláraithe áirithe.

372AX.— (1) San alt seo ciallaíonn ‘foirgneamh nó déanmhas lena mbaineann an t-alt seo’ foirgneamh nó déanmhas—

(a) a bhfuil a shuíomh go hiomlán laistigh de limistéar cáilitheach de chuid na Sionainne Láir,

(b) atá á úsáid mar champa saoire—

(i) atá cláraithe sa chlár de champaí saoire arna choimeád faoi na hAchtanna um Thrácht Cuartaíochta 1939 go 2003, agus

(ii) a chomhlíonann ceanglais na dtreoirlínte iomchuí i ndáil leis na cineálacha taitneamhachtaí agus saoráidí is gá a sholáthar i gcampa saoire chun críocha na Caibidle seo,

(c) ar ina leith a bheifear tar éis na sonraí seo a leanas a sholáthar do Bhord Bonneagair Thurasóireachta na Sionainne Láir lena gcur ar aghaidh chuig an Aire agus chuig an Aire Airgeadais:

(i) (I) méid an chaiteachais chaipitiúil arna thabhú iarbhír sa tréimhse cháilitheach ar fhoirgniú nó ar athfheistiú an fhoirgnimh nó an déanmhais, agus

(II) i gcás ina bhfuil feidhm ag fo-alt (4) d’alt 372WA i ndáil le foirgneamh cóiríochta, méid an chaiteachais sin atá cáilithe lena dheimhniú de réir an ailt sin,

(ii) líon agus cineál na n-infheisteoirí atá ag infheistiú san fhoirgneamh nó sa déanmhas,

(iii) an méid atá le hinfheistiú ag gach infheisteoir, agus

(iv) cineál na struchtúr atá á gcur ar bun chun an infheistíocht san fhoirgneamh nó sa déanmhas a éascú,

mar aon le cibé faisnéis eile a sonrófar sna treoirlínte iomchuí mar ní a bheadh ina chabhair don Aire Airgeadais le linn measúnú a dhéanamh ar na costais, lena n-áirítear costais státchiste ach gan a bheith teoranta do na costais sin, agus na sochair a éiríonn as oibriú faoisimh cánach i gcomhair foirgneamh agus déanmhas faoin gCaibidil seo, agus

(d) ar ina leith a thugann Bord Bonneagair Turasóireachta Limistéar na Sionnainne Láir deimhniú i scríbhinn tar éis an foirgneamh nó an déanmhas a úsáid den chéad uair nó, i gcás ina dtabhaítear caiteachas caipitiúil ar athfheistiú foirgnimh nó déanmhais, tar éis é a úsáid den chéad uair tar éis an caiteachas sin a thabhú, ar deimhniú é—

(i) ina luaitear gur deimhin leis gur comhlíonadh na coinníollacha i míreanna (a), (b) agus (c),

(ii) ina ndaingnítear dáta na céadúsáide nó, de réir mar a bheidh, dáta na céadúsáide tar éis an athfheistithe, agus

(iii) ina n-áirítear deimhniúchán de réir alt 372AW(2)(a)(ii) nó cóip den deimhniúchán sin (más roimhe sin a eisíodh é).

(2) Faoi réir fho-ailt (3) agus (4) agus alt 372AZ, tá feidhm ag Caibidil 1 de Chuid 9 i ndáil le caiteachas caipitiúil arna thabhú sa tréimhse cháilitheach ar fhoirgniú nó ar athfheistiú foirgnimh nó déanmhais lena mbaineann an t-alt seo amhail is dá ndéanfaí—

(a) in alt 272

(i) i bhfo-alt (3), an méid seo a leanas a chur in ionad mhír (c):

‘(c) i ndáil le foirgneamh nó le déanmhas lena mbaineann alt 372AX, 15 faoin gcéad den chaiteachas caipitiúil dá dtagraítear i bhfo-alt (2) den alt sin,’,

agus

(ii) i bhfo-alt (4), an méid seo a leanas a chur in ionad mhír (c):

‘(c) i ndáil le foirgneamh no déanmhas lena mbaineann alt 372AX, 15 bliana dar tosach an tráth a úsáideadh an foirgneamh nó an déanmhas den chéad uair nó, i gcás caiteachas caipitiúil a bheith tabhaithe ar athfheistiú an fhoirgnimh nó an déanmhais, 15 bliana dar tosach an tráth a úsáideadh an foirgneamh nó an déanmhas den chéad uair tar éis an caiteachas sin a thabhú,’,

agus

(b) in alt 274(1)(b), an méid seo a leanas a chur in ionad fhomhír (iii):

‘(iii) i ndáil le foirgneamh no déanmhas lena mbaineann alt 372AX, 15 bliana tar éis an foirgneamh nó an déanmhas a úsáid den chéad uair nó, i gcás caiteachas caipitiúil a bheith tabhaithe ar athfheistiú an fhoirgnimh nó an déanmhais, 15 bliana tar éis an foirgneamh nó an déanmhas a úsáid den chéad uair tar éis an caiteachas sin a thabhú,’.

(3) Sa chás ina dtabhaítear caiteachas caipitiúil sa tréimhse cháilitheach ar athfheistiú foirgnimh nó déanmhais lena mbaineann an t-alt seo, ní bheidh feidhm ag fo-alt (2) ach amháin más rud é nach lú méid iomlán an chaiteachais chaipitiúil arna thabhú amhlaidh ná méid atá comhionann le 20 faoin gcéad de mhargadhluach an fhoirgnimh nó an déanmhais díreach sular tabhaíodh an caiteachas sin.

(4) Le linn cinneadh a dhéanamh, chun críocha na Caibidle seo, i dtaobh cibé acu, agus a mhéid, a dhéantar nó nach ndéantar caiteachas caipitiúil arna thabhú ar fhoirgniú nó ar athfheistiú foirgnimh nó déanmhais lena mbaineann an t-alt seo a thabhú sa tréimhse cháilitheach, déileálfar le cibé méid den chaiteachas caipitiúil sin is inchurtha go cuí i leith oibre ar fhoirgniú nó, de réir mar a bheidh, ar athfheistiú an fhoirgnimh nó an déanmhais (d’ainneoin aon fhorála eile de na hAchtanna Cánach maidir leis an tráth a dhéileáiltear nó a dhéileálfar le haon chaiteachas caipitiúil mar chaiteachas a tabhaíodh), ar obair í a rinneadh iarbhír le linn na tréimhse cáilithí, mar chaiteachas a tabhaíodh sa tréimhse sin.

Liúntais chaipitiúla i ndáil le saoráidí bonneagair turasóireachta áirithe a fhoirgniú nó a athfheistiú.

372AY.— (1) San alt seo, ciallaíonn ‘áitreabh cáilitheach’ foirgneamh nó déanmhas—

(a) a bhfuil a shuíomh go hiomlán laistigh de limistéar cáilitheach de chuid na Sionainne Láir,

(b) nach foirgneamh nó déanmhas tionscail é, ar leith ón alt seo, de réir bhrí alt 268, nó nach meastar gur foirgneamh nó déanmhas den sórt sin é,

(c) atá in úsáid chun críocha oibriú saoráide cáilithí bonneagair turasóireachta amháin nó níos mó,

(d) (i) faoi réir fhomhír (ii), nach bhfuil foirgneamh nó déanmhas nó cuid d’fhoirgneamh nó de dhéanmhas ar áitreabh ceadúnaithe é (arna mhíniú in alt 2 den Acht Deochanna Meisciúla 1988) ar áireamh inti, ach

(ii) a fhéadfaidh foirgneamh nó déanmhas nó cuid d’fhoirgneamh nó de dhéanmhas ar bialann í (arna mhíniú in alt 6 den Acht Deochanna Meisciúla 1988) a bheith ar áireamh ann, agus ar bialann í—

(I) a bhfuil ar-cheadúnas miondíoltóra fíona, de réir bhrí an Finance (1909-10) Act 1910, i bhfeidhm de thuras na huaire i ndáil léi, nó

(II) a ndearnadh ceadúnas bialainne speisialta, de réir bhrí an Achta Deochanna Meisciúla 1988, a dheonú i ndáil léi faoi alt 9 den Acht sin,

(e) nach bhfuil foirgneamh nó déanmhas nó cuid d’fhoirgneamh nó de dhéanmhas ar áireamh ann agus é in úsáid mar shaoráid ina seoltar cearrbhachas nó geallchur d’aon saghas ar chomaoin luachmhar nó a thugann tacaíocht do sheoladh gníomhaíochtaí den sórt sin,

(f) ar i ndáil leis a bheifear tar éis na sonraí seo a leanas a sholáthar do Bhord Bonneagair Thurasóireachta na Sionainne Láir lena gcur ar aghaidh chuig an Aire agus an Aire Airgeadais:

(i) (I) méid an chaiteachais chaipitiúil arna thabhú iarbhír sa tréimhse cháilitheach ar fhoirgniú nó ar athfheistiú an fhoirgnimh nó an déanmhais; agus

(II) i gcás ina bhfuil feidhm ag fo-alt (4) d’alt 372AW i ndáil le foirgneamh cóiríochta, méid an chaiteachais sin atá cáilithe lena dheimhniú de réir an ailt sin;

(ii) líon agus cineál na n-infheisteoirí atá ag infheistiú san fhoirgneamh nó sa déanmhas;

(iii) an méid atá le hinfheistiú ag gach infheisteoir; agus

(iv) cineál na struchtúr atá á gcur ar bun chun an infheistíocht san fhoirgneamh nó sa déanmhas a éascú;

mar aon le cibé faisnéis eile a sonrófar sna treoirlínte iomchuí mar ní a bheadh ina chabhair don Aire Airgeadais le linn measúnú a dhéanamh ar na costais, lena n-áirítear costais státchiste ach gan a bheith teoranta do na costais sin, agus na sochair a éiríonn as oibriú faoisimh cánach i gcomhair foirgneamh agus déanmhas faoin gCaibidil seo, agus

(g) ar ina leith a thugann Bord Bonneagair Turasóireachta Limistéar na Sionnainne Láir deimhniú i scríbhinn tar éis an foirgneamh nó an déanmhas a úsáid den chéad uair nó, i gcás ina dtabhaítear caiteachas caipitiúil ar athfheistiú foirgnimh nó déanmhais, tar éis é a úsáid den chéad uair tar éis an caiteachas sin a thabhú, ar deimhniú é—

(i) ina luaitear gur deimhin leis gur comhlíonadh na coinníollacha i míreanna (a), (b), (c), (d), (e) agus (f),

(ii) ina ndaingnítear dáta na céadúsáide nó, de réir mar a bheidh, dáta na céadúsáide tar éis an athfheistithe, agus

(iii) ina n-áirítear deimhniúchán de réir alt 372AW(2)(a)(ii) nó cóip den deimhniúchán sin (más roimhe sin a eisíodh é).

(2) (a) Faoi réir mhír (b), fho-ailt (3) go (5) agus alt 372AZ, maidir leis na forálacha de na nAchtanna Cánach a bhaineann le liúntais a thabhairt agus muirir a ghearradh i leith caiteachais chaipitiúil arna thabhú ar fhoirgniú nó ar athfheistiú foirgnimh nó déanmhais tionscail, beidh feidhm acu, d’ainneoin aon ní dá mhalairt sna forálacha sin—

(i) amhail is dá mba é a bheadh in áitreabh cáilitheach, gach tráth ar áitreabh cáilitheach é, ná foirgneamh nó déanmhas a bhfuil liúntas le tabhairt ina leith chun críocha cánach ioncaim nó cánach corparáide, de réir mar a bheidh, faoi Chaibidil 1 de Chuid 9 mar gheall ar é a úsáid chun críche a shonraítear in alt 268(1)(a), agus

(ii) i gcás nach trádáil aon ghníomhaíocht a sheoltar san áitreabh cáilitheach, amhail is (d’aon toisc chun liúntais a thabhairt nó muirir a ghearradh de bhua fhomhír (i)) dá mba thrádáil í.

(b) Ní thabharfar liúntas de bhua an fho-ailt seo i leith aon chaiteachais chaipitiúil arna thabhú ar fhoirgniú nó ar athfheistiú áitribh cháilithigh ach amháin a mhéid a thabhaítear an caiteachas sin sa tréimhse cháilitheach.

(3) Sa chás ina dtabhaítear caiteachas caipitiúil sa tréimhse cháilitheach ar athfheistiú áitribh cháilithigh, ní bheidh feidhm ag fo-alt (2) ach amháin más rud é nach lú méid iomlán an chaiteachais chaipitiúil arna thabhú amhlaidh ná méid atá comhionann le 20 faoin gcéad de mhargadhluach an fhoirgnimh nó an déanmhais díreach sular tabhaíodh an caiteachas sin.

(4) Chun críocha fheidhmiú Chaibidil 1 de Chuid 9 le fo-alt (2), i ndáil le caiteachas caipitiúil arna thabhú sa tréimhse cháilitheach ar fhoirgniú nó ar athfheistiú áitribh cháilithigh—

(a) beidh feidhm ag alt 272 amhail is dá mba rud é—

(i) go gcuirfí an méid seo a leanas in ionad mhír (a) i bhfo-alt (3):

‘(a) i ndáil le foirgneamh nó déanmhas lena mbaineann alt 372AY, 15 faoin gcéad den chaiteachas caipitiúil dá dtagraítear i bhfo-alt (2)(b) den alt sin,’,