Uimhir 26 de 2019

AN tACHT UM SHÁSAMH DO MHNÁ A RAIBH CÓNAÍ ORTHU I bhFORAIS ÁIRITHE (LEASÚ), 2019

[An tiontú oifigiúil]

CLÁR AN ÁBHAIR

Alt

1. Míniú

2. Leasú ar alt 1 den Phríomh-Acht

3. Leasú ar alt 2 den Phríomh-Acht

4. Leasú ar Chuid 3 de Sceideal 1 a ghabhann leis an Acht fán Scéim um Thacaíocht Tithe Banaltrais, 2009

5. Gearrtheideal agus tosach feidhme

Na hAchtanna dá dTagraítear

Uimhir 26 de 2019

AN tACHT UM SHÁSAMH DO MHNÁ A RAIBH CÓNAÍ ORTHU I bhFORAIS ÁIRITHE (LEASÚ), 2019

[An tiontú oifigiúil]

Acht do leasú an Achta um Shásamh do Mhná a Raibh Cónaí Orthu i bhForais Áirithe, 2015; do leasú an Achta fán Scéim um Thacaíocht Tithe Banaltrais, 2009; agus do dhéanamh socrú i dtaobh nithe gaolmhara.

[23 Iúil 2019]

Achtaítear ag an Oireachtas mar a leanas:

Míniú

1. San Acht seo, ciallaíonn “Príomh-Acht” an tAcht um Shásamh do Mhná a Raibh Cónaí Orthu i bhForais Áirithe, 2015.

Leasú ar alt 1 den Phríomh-Acht

2.Leasaítear alt 1 den Phríomh-Acht—

(a) tríd an míniú seo a leanas a chur isteach:

“ciallaíonn ‘Aguisín’ ‘an tAguisín a ghabhann le téarmaí na Scéime Ex Gratia um Cheartas Aisig na bhForas Maigdiléanach i leith mná a bhí ag obair sna neachtlanna sa 12 fhoras ‘Mhaigdiléanacha’ agus a raibh cónaí orthu i gceann de na 14 fhoras thadhlacha’ dar dáta Samhain 2018;”, agus

(b) tríd an méid seo a leanas a chur in ionad an mhínithe ar “Scéim”:

“ciallaíonn ‘Scéim’ an scéim atá de thuras na huaire á riaradh ag an Aire, arna déanamh ag an Rialtas i mí na Nollag, 2013, agus a bhfuil ar áireamh ina téarmaí na téarmaí sin a leagtar amach san Aguisín, lena ndéantar foráil maidir leis na nithe seo a leanas—

(a) íocaíochtaí ex-gratia a dhéanamh le mná a ligeadh isteach i bhforas iomchuí agus a bhí ag obair ann, agus

(b) íocaíochtaí ex-gratia a dhéanamh le mná de réir na dtéarmaí a leagtar amach san Aguisín.”.

Leasú ar alt 2 den Phríomh-Acht

3. Leasaítear alt 2 den Phríomh-Acht, i bhfo-alt (1)(f), trí “sa Sceideal, nó, i gcás go ndearnadh an cinneadh i dtaobh incháilitheachta lena mbaineann faoi na téarmaí a leagtar amach san Aguisín, an áit chónaithe agus an obair ar i ndáil leo a rinneadh an cinneadh sin” a chur in ionad “sa Sceideal”.

Leasú ar Chuid 3 de Sceideal 1 a ghabhann leis an Acht fán Scéim um Thacaíocht Tithe Banaltrais, 2009

4. Leasaítear an tAcht fán Scéim um Thacaíocht Tithe Banaltrais, 2009 i mír 1 de Chuid 3 de Sceideal 1 tríd an bhfomhír seo a leanas a chur in ionad fhomhír (a) den mhíniú ar “íocaíocht iomchuí”:

“(a) íocaíocht nó íocaíochtaí ex-gratia a dhéantar leis an duine faoin Scéim (de réir bhrí alt 1 (arna leasú le halt 2 den Acht um Shásamh do Mhná a Raibh Cónaí Orthu i bhForais Áirithe (Leasú), 2019 ) den Acht um Shásamh do Mhná a Raibh Cónaí Orthu i bhForais Áirithe, 2015), agus folaíonn sé aon sochar a sholáthraítear faoin Scéim sin,”.

Gearrtheideal agus tosach feidhme

5. (1) Féadfar an tAcht um Shásamh do Mhná a Raibh Cónaí Orthu i bhForais Áirithe (Leasú), 2019 a ghairm den Acht seo.

(2) Tiocfaidh an tAcht seo i ngníomh cibé lá nó laethanta a cheapfaidh an tAire Dlí agus Cirt agus Comhionannais le hordú nó le horduithe i gcoitinne nó faoi threoir aon chríoch nó foráil áirithe agus féadfar laethanta éagsúla a cheapadh amhlaidh chun críoch éagsúil nó le haghaidh forálacha éagsúla.